Ngaahi Fakakaukau Maʻá e Efiafi Fakafāmili ʻi ʻApí

ʻOku ʻi he makasini ko ʻení ha ngaahi fakamatala mo ha ngaahi ʻekitivitī ʻe lava ke fakaʻaongaʻi ki he efiafi fakafāmili ʻi ʻapí. Ko ha ngaahi sīpinga pē ʻeni ʻe niʻihi.

“Fakatupu ʻo e ʻOtu Moʻungá,” p. 32: ʻOku hanga ʻe he fakamatala ko ʻení ʻo fakafehoanaki ʻa hono ikunaʻi ʻo e ngaahi faingataʻá, ki he kaka moʻungá. ʻE lava ke ke faʻu ha ʻekitivitī, hangē ko e kaka ʻi ha foʻi tafungofunga pe sitepu, ʻa ia ʻe tokoniʻi e fāmilí ke nau manatuʻi mo fakahoko e tefitoʻi moʻoni ko ʻení.

“Tokoniʻi ʻe he Laumālié,” p. 44: Hili haʻamou lau fakataha ʻa e fakamatala ko ʻení, ʻe lava ʻa e kau mēmipa ʻo e fāmilí ke fevahevaheʻaki ʻa e ngaahi meʻa ne nau aʻusia ʻi ha taimi kuo tāpuekina ai kinautolu ʻi heʻenau muimui ki he ngaahi ueʻi ʻa e Laumālié.

“Lotua ha Tali,” p. 56: Te ke lava ʻo fakaafeʻi ho fāmilí ke nau vahevahe ʻa e ngaahi meʻa kuo nau aʻusia ʻi hono maʻu e tali ki heʻenau lotú, pea fakaʻaongaʻi ʻa e fakamatalá ni ko ha talateu.

“Ko e Foʻi Lole Fuopotopotó,” p. 62: Ko e founga ʻe taha ke tokoni ai ki he longaʻi fānaú ke nau tokanga lolotonga ʻa e taimi efiafi fakafāmili ʻi ʻapí, ko hono fetōʻaki ho leʻó mo e anga e fakafōtunga ho matá he taimi ʻokú ke fai ai ha ngaahi foʻi talanoá (vakai, ʻOku ʻIkai ha Ui ʻe Mahuʻinga Ange ʻi he Faiakó, 222). ʻE lava ke hoko ʻeni ko ha founga ʻaonga ʻi he laukongá mo hono toe fakamatalaʻi ki he longaʻi fānaú ʻa e “Foʻi Lole Fuopotopotó.”

“Te Mou ʻIlo Au,” p. 80: ʻE lava ke hoko ʻa e langatoí ko ha ʻekitivitī fakafiefia ke mou fakahoko fakafāmili, pea toki fakafehoanaki ʻa e foʻi vaʻingá ki he talaʻofa ʻoku ʻi he Selemaia 29:13: “Pea te mou kumi mo ʻiloʻi au, ʻo ka moú ka kumi kiate au ʻaki homou lotó kotoa.”