Kakai Lalahi Kei Talavoú
Tuku ʻa e Kuohilí ʻi he Kuohilí
ʻI hoku taʻu 16, naʻe ʻikai ke u teitei vālelei mo hoku māhangá. Naʻá ma kē ʻi he meimei meʻa kotoa pē. Naʻá ne fakamaaʻi au ʻi ha ʻaho ʻe taha ʻi he akó ʻaki haʻane fakaangaʻi lahi au mo tukuʻakiʻi au ʻi muʻa ʻi haku ngaahi kaungāmeʻá. Naʻe mātuʻaki uesia au ʻe heʻene ngaahi tōʻongá mo ʻene ngaahi lea fakamamahí, ʻi ha founga naʻe ʻikai ke lava ʻe hoku tuʻunga kei toʻu tupú ʻo makātakiʻi. Neongo naʻe lea ki ai ʻema ongomātuʻá fekauʻaki mo e meʻa ne hokó, ka naʻe ʻikai pē ke teitei kole fakamolemole mai ia. Ne taʻu lahi ʻeku kukuta ʻa e mamahí ni.
Naʻe kei ʻi he ngāue fakafaifekaú ia ʻi he taimi naʻe maʻu ai hoku uiuiʻi fakafaifekaú. Naʻá ku teuteu ke hū ʻi he temipalé pea naʻá ku kamata fakakaukau ki heʻeku moʻuí ke ʻilo ʻa e tafaʻaki naʻe fie maʻu ke u liliu ke u ongoʻi mateuteu ai ke ʻalu ki he temipalé. Naʻá ku fakatokangaʻi, neongo naʻe ʻikai ke u faʻa fakakaukau ki he meʻa naʻe fai mai ʻe hoku tokouá, ka naʻe kei fie maʻu pē ke u fakamolemoleʻi ia.
Naʻe fakamamahiʻi au ʻe hoku tokouá ʻo laka ange ia ʻi ha toe taha, pea naʻá ku ʻilo he ʻikai faingofua ke u fakamolemoleʻi ia. Ko ia naʻá ku lotua ai ha tokoni mei he Tamai Hēvaní.
Naʻá Ne tokoni mai pea naʻá ku pehē leva ke u kamata faitohi maʻu pē ki hoku tokouá ʻi heʻene ngāue fakafaifekaú. ʻOku ou fakameʻapangoʻia ke u tala atu, naʻe hāhāmolofia ke u faitohi au ki ai ki muʻa ai. Faifai peá u ʻave haʻane fakamoimoi. Ko e taimi naʻá ku mavahe ai ki heʻeku ngāue fakafaifekaú, naʻá ne ʻalu ange mo ʻeku ongo mātuʻá ki he senitā akoʻanga fakafaifekaú ʻo ne fāʻofua mai kiate au. Naʻe aʻu ʻo ne faitohi ange ʻi ha taimi ʻe niʻihi. ʻOku ou ʻiloʻi neongo ʻe taimi lōloa, ka ʻi he tokoni ʻa e Tamai Hēvaní, te tau lava pē ʻo fakangaloʻi ʻa e kuohilí.