Pōpoaki ʻa e Faiako ʻAʻahí
Hoko ʻo Moʻui Fakafalala pē Kiate Kita
Akoʻi e ngaahi potufolofola mo e ngaahi lea ko ʻení, pe ko ha tefitoʻi moʻoni kehe te ne faitāpuekina ʻa e kau fafine ʻokú ke ʻaʻahi ki aí, kapau ʻe fie maʻu. Fakamoʻoni ʻo kau ki he tokāteliné. Fakaafeʻi ʻa kinautolu ʻokú ke akoʻí ke nau fakamatala atu ha meʻa ne nau ongoʻi mo akó.
Ko e Hā ʻa e Moʻui Fakafalala pē Kiate Kita?
“ ʻ ʻOku ʻuhinga ʻa e moʻui fakafalala pē kiate kitá, ki hono fakaʻaongaʻi hotau ngaahi tāpuaki kotoa kuo foaki mai ʻe he Tamai Hēvaní, ke tokangaʻi ʻaki kitautolu mo hotau ngaahi fāmilí pea tau feinga ke maʻu ha ngaahi founga ke fakaleleiʻi ʻaki pē ʻetau ngaahi palopalemá.’ ʻOku tau taki taha moʻona pē ʻa e fatongia ke feinga ke fakaʻehiʻehi mei he palopalemá ki muʻa pea hoko maí pea ke tau ako ke ikunaʻi e ngaahi faingataʻá he taimi ʻoku hoko aí. …
“Ko e hā ʻa e founga ʻe lava ke tau moʻui ai pē ʻiate kitautolú? ʻOku tau hoko ʻo fakafalala pē kiate kitautolu ʻi heʻetau maʻu ha ʻilo, ako fakaʻatamai mo poto he laukongá; [ʻaki hono] fakapotopotoʻi ʻo e paʻangá mo e maʻuʻanga tokoní, mālohi fakalaumālie, teuteu ki ha meʻa fakatuʻupakē ʻe ala hokó pea mo e moʻui lelei fakasōsiale mo fakaelotó.”1
Julie B. Beck, palesiteni lahi ʻo e Fineʻofá.
Ko ha Fatongia he Ongoongoleleí
“ ʻI heʻetau moʻui fakapotopoto mo fakatupulaki ʻa ʻetau ngaahi meʻafoakí mo hotau ngaahi tālēnití, ʻoku toe lahi ange ai ʻetau moʻui fakafalala pē kiate kitautolú. Ko e moʻui fakafalala pē kiate kitá ʻa ʻetau fatongia ʻaki ʻetau lelei fakalaumālie mo fakatuʻasinó pea pehē kiate kinautolu kuo fakafalala mai ʻe he Tamai Hēvaní ke tau tokangaʻí. ʻE toki lava moʻoni pē ke tau faʻifaʻitaki ki he Fakamoʻuí ʻi hono tokoniʻi mo faitāpuekina ʻo e niʻihi kehé, ʻi he taimi te tau moʻui fakafalala ai pē kiate kitautolú.
ʻOku mahuʻinga ke mahino ko e moʻui fakafalala pē kiate kitautolú ko ha founga ia te tau aʻusia ai ʻetau taumuʻá. Ko ʻetau tefitoʻi taumuʻá pē ke hoko ʻo tatau mo e Fakamoʻuí, pea ʻoku aʻusia e taumuʻa ko iá ʻi heʻetau tokoni taʻesiokita ki he niʻihi kehé. ʻOku fakautuutu ke lahi pe taʻofi ʻetau malava ke tokoní ʻi he tuʻunga ʻoku ʻi ai ʻetau moʻui fakafalala pē kiate kitautolú.”2
ʻEletā Robert D. Hales ʻo e Kōlomu ʻo e Kau ʻAposetolo ʻe Toko Hongofulu Mā Uá.
“Ko e moʻui fakafalala pē kiate kitá ko e ola ia ʻo ʻetau ngāué pea ʻokú ne fālute ʻetau ngāue fakauelofea kehe kotoa pē. Ko ha ʻelemēniti mahuʻinga ia ʻo ʻetau lelei fakalaumālié pea pehē foki ki heʻetau lelei fakatuʻasinó. Naʻe lea ʻa Palesiteni Melioni G. Lomenī [1897–1988] ʻo fekauʻaki mo e tefitoʻi moʻoni ko ʻení ʻo pehē: ʻTau ngāueʻi ʻa e meʻa ko ia ʻoku tau fie maʻú. Tau moʻui fakafalala pē kiate kitautolu mo tauʻatāina. He ʻikai ke lava ʻo maʻu ʻa e fakamoʻuí ia ʻi ha toe tefitoʻi moʻoni kehe. Ko e fakamoʻuí ko ha meʻa fakafoʻituitui, pea kuo pau ke tau ngāueʻi ʻa hotau fakamoʻuí ʻi he ngaahi meʻa fakatuʻasinó pea pehē foki ki he ngaahi meʻa fakalaumālié.]’ …
“Naʻe toe akoʻi mai ʻe Palesiteni Sipenisā W. Kimipolo [1895–1985] ʻo fekauʻaki mo e moʻui fakafalala pē kiate kitá ʻo pehē: ʻ[Ko e fatongia ki he tuʻunga fakasōsiale, fakaeloto, fakalaumālie, fakaetuʻasino, mo fakaʻekonōmika ʻo e tangata takitaha, ʻoku ʻuluaki hilifaki pē ia kiate ia, uá ki hono fāmilí, pea toki tolu ki he Siasí, ʻo kapau ko ha mēmipa faivelenga ia ai].ʻ”3
Palesiteni Thomas S. Monson