Ke ke Lototoʻa: Taki Atu ʻi he Hala ʻo e Angamaʻá!
Kuó ke fie maʻu nai ʻi ha taimi ke fai ha lelei ʻi māmani ka naʻe ʻikai ke ke ʻilo ʻa e founga ke kamata aí? Kuó ke fie maʻu nai ʻi ha taimi ke ke taukaveʻi ha faʻahinga meʻa ʻoku totonu ka naʻe ʻikai ke ke lototoʻa feʻunga koeʻuhí ʻe manukiʻi koe homou toʻú kapau te ke fakahoko ia? Ko e taʻu ʻeni ke ke hoko ai ko e takimuʻa naʻe ʻomi ai koe ki māmaní. ʻOku fie maʻu ʻe māmani ʻi he taimí ni, ʻo laka ange ʻi ha toe taimi, hoʻo māmá pea mo hoʻo takí. Te ke lava ʻo fakahoko ha lelei!
ʻOku fakaafeʻi kitautolu ʻe he kaveinga ʻo e 2010 ke tau “mālohi mo loto toʻa” (Sosiua 1:9). Ko e iví mo e loto toʻá ko ha ongo ʻulungāanga ia ʻo e kau takimuʻá. ʻI hoʻo hoko ko e mēmipa ʻo e Siasí, ʻokú ke hoko ai ko e taki ʻi he hala ʻo e angamaʻá mo e angatonú.
Kuo ʻosi kole mai hotau palōfitá, ʻa Palesiteni Tōmasi S. Monisoni, ke tau loto toʻa:
“ ʻE fie maʻu ha lototoʻa lahi ke ke moʻuiʻaki ʻa e angamaʻá mo e anga māʻoniʻoní ʻi he uhouhonga ʻo e ngaahi fakakaukau fakaeonopōní.
“ ʻOku siʻi ʻaupito ke fakakaukau ʻa māmani ia ʻe kei moʻui angamaʻa mo moʻui maʻa ai pē ʻa e kau talavoú mo e kau finemuí ki muʻa pea hoko ʻa e malí. ʻOku ʻai nai ʻe he meʻá ni ke tali lelei ai pē ʻa e angaʻulí ia? ʻIkai ʻaupito!”1
Te ke lototoʻa ke taki ʻi he taimi te ke moʻui ʻaki ai ʻa e ngaahi tuʻunga moʻuí, fakahoko e ngaahi fili ʻoku totonú, mo muimui ʻi he palōfitá. ʻE maʻu ho iví ʻi he taimi te ke feinga fakaʻaho ai ke fakatupulaki hoʻo fakamoʻoni ki he Fakamoʻuí ʻi hoʻo lotu mo lau ʻa e Tohi ʻa Molomoná. ʻE maʻu ho ivi ke taki e kakai kehé ʻi he taimi te ke moʻui ʻaki ai ʻa e ngaahi tuʻunga moʻui ʻoku maʻu ʻi he kiʻi tohi ko e Ki Hono Fakamālohia ʻo e Toʻu Tupú. ʻI hoʻo fakahoko ʻa e ngaahi meʻa ko ʻení, te ke ongoʻi fiefia ai fekauʻaki mo koe. Te ke maʻu ha loto lahi, pea te ke tupulaki ʻi he ivi fakalaumālié.
Pea ʻoua naʻa ngalo ke ke malimali! Maʻu ha ʻulungāanga ʻoku lelei. “Ke tau fai ʻi he loto fiefia ʻa e ngaahi meʻa kotoa pē ʻoku tau maʻu ʻa e mālohi ke faí; pea te tau toki lava ʻo tuʻu maʻu ʻi he loto fakapapau, ke mamata ki he fakamoʻui ʻa e ʻOtuá” (T&F 123:17). ʻOku malava maʻu pē ke ʻilo ʻa e meʻa ʻoku totonú mo e meʻa ʻoku halá (vakai, Molonai 7:16), pea kuo ʻosi talaʻofa mai ʻe fakahā atu ʻe he Laumālie Māʻoniʻoní “ʻa e meʻa kotoa pē ʻoku totonu ke mou faí” (2 Nīfai 32:5). ʻI hoʻo akó, fakafanongo ki he fakahinohino ʻa e kihiʻi leʻo siʻi mo vanavanaikí. ʻOku mou maʻu e talaʻofa ne ʻosi fakapapauʻi mai “ ʻi he mālohi ʻo e Laumālie Māʻoniʻoní te mou lava ai ke ʻiloʻi hono moʻoni ʻo e ngaahi meʻa kotoa pē” (Molonai 10:5).
Ko e hā pē ngaahi tūkunga ʻokú ke ʻi aí, naʻe fāʻeleʻi mai koé ke ke taki ʻi ho fāmilí, ʻi ho ʻapi akó, pea ʻi ho koló. Ko ia, ʻi he taʻu ní, ʻai ke ke toʻa, maʻu ha loto toʻa, mo ke fakahoko ha lelei ʻi he māmaní! ʻOku ʻikai ke ke tuēnoa. ʻE fanongo ʻa e Tamai Hēvaní mo tali hoʻo ngaahi lotú mo Ne fakahinohino hoʻo ngaahi ngāué kapau te ke maʻa mo taau maʻu pē mo e feohi ʻa e Laumālie Māʻoniʻoní.
Ko e ngaahi ʻofefine kimoutolu ʻo e Tamai Hēvaní, ʻokú Ne ʻofa ʻiate kimoutolu. Ko homou Kuongá ʻeni. ʻOku mau ʻofa atu mo lotua te mou mālohi mo loto toʻa ʻi hono moʻui ʻaki ʻa e ngaahi tuʻunga ʻulungāangá pea mou takimuʻa atu ʻi he hala ʻo e angamaʻá. ʻE hanga ʻe hoʻomou sīpinga angatonú ʻo fai ha lelei!