Na Lotu ni Vuravura Raraba ka sa Vakalougatataki ena Domo ni Parofita
Me da dau vakarorogo vua na parofita ni gauna oqo me ra na vukei keda me da vakanamata ki na veika era okati ena ituvatuva tudei ni Dauniveibuli.
Sa dua na ka rekitaki ka taleitaki me da tiki ni Lotu oqo ena vuravura raraba ka dusimaki tiko mai vei ira na parofita, daurairai, ka daunivakatakila! E kaburaki yani na koniferedi oqo ki na 68 na vanua ka vakadewataki ki na 55 na vosa. Sa dina sara ni sa tarai vuravura raraba na Lotu oqo ka ra sa tete yani na lewena ki na veivanua e vuravura. Eda luvena kece na Kalou bula ka dauloloma, na Tamada Vakalomalagi. Au via vakaraitaka na noqu loloma vei kemuni, na taciqu kei na ganequ lomani.
Ena tolu ga na vula sa oti eda a duavata kina kei Peresitedi Gordon B. Hinckley ena nona veiliutaki veivakauqeti ena vakatabui ni Valetabu mai Nauvoo ka sa mai tara tale. E kauti keda lesu tale vua na Parofita o Josefa ka vakavoutaka na noda vakanananu me baleti ira na yalododonu ena gauna e liu; na nodra solibula, nodra rarawa, kei na wai ni matadra; ka vakakina na nodra yaloqaqa, vakabauta, kei na vakararavi vua na Turaga. E sega ni dua na tukaqu mai vei ira na painia ena loma ni i ka 19 ni senitiuri. Ia me tekivu mai na imatai ni siga ni noqu lewena na Lotu au sa vakila kina na noqu voleka sara kivei ira na painia ka ra a kosova na bucabuca. Era sa tubuqu vakayalo, me vakatalega vei ira yadua na lewe ni Lotu kece sara, veitalia ga na vanua era dui cavutu mai kina, na nodra ivosavosa, se na nodra itovo. Era sa mai tauyavutaka e dua na vanua sega walega ni vanua vinaka, ia e vanua ka sa mai tauyavutaki kina vakayalo na kena tarai cake na matanitu ena veivanua kece sara e vuravura.
Me vaka ni sa mai ciqomi edaidai ena vuravura raraba na kosipeli i Jisu Karisito ka vakalesui mai, eda sa painia kece sara o keda yadua ena veivanua eda veimaliwai voli kina kei na veika duidui eda dui sotava. E a donumaka na gauna dredre ni oti na–iKarua ni iValu Levu kei Jamani na imatai ni gauna me kilai kina ena neitou matavuvale na Lotu i Jisu Karisito ni Yalododonu Edaidai. E a Peresitedi tiko ena gauna o ya ko George Albert Smith. Au a se gonelailai sara ka sa ikarua ni gauna oqo ena loma ni vitu na yabaki me keitou vakayalia kina na neitou iyau kece vakavuravura. Keitou a okati vaka ise-ni-ivalu ka sega ni vakadeitaki sara tu na neitou veisiga ni mataka. Ia ena loma ni vitu na yabaki vata ga oqori, keitou a rawata kina e levu cake sara na iyau ka na sega ni voli rawa vakailavo. Keitou a kunea e dua na ivakavakacegu vakalou, na vanua eda na taqomaki kina mai na leqa—o ya na kosipeli i Jisu Karisito ka a vakalesui mai kei na Nona Lotu, ka liutaka tiko e dua na parofita bula ka dina.
Ena gauna au se gonetagane kina, au dau qito voli ena veivale e so era a vakacacani mai na vakacabotetaki ni gasaukuro, kau a tubu cake ena maliwa ni veika e a vakacacani ena ivalu kei na noqu sa kila tu na veika rarawa kei na mosi e a vakayacora na noqu vanua ki na vuqa na veivanua tale e so ena gauna rerevaki ni Karua ni iValu Levu e Vuravura.
Ia na itukutuku vinaka ni ko Jisu Karisito e Dauniveisorovaki vinaka ni kawa tamata, me vakabulai keda kece mai na ibulubulu, ka sauma vakaidina vei keda yadua me vaka na veika eda dui vakayacora, sai koya oqo na kaukauwa ni veivakabulai ka salavata mai na inuinui kei na vakacegu ki na noqu bula.
Se bolebole cava ga eda dui sotava, ena vakamamadataka na noda icolacola sega walega mai na noda vakabauti Karisito, ia mai na noda vakabauta talega na Nona kaukauwa me vakasavasavataka ka vakaceguya na noda bula ka me da ciqoma na Nona vakacegu.
Ena gauna au sa yabaki tini vakacaca kina e sa parofita tiko ko Peresitedi David O. McKay. E vaka ga keirau sa veikilai vinaka tu: au dau vakila na nona loloma, kei na nona caka vinaka, kei na nona dau veidokai; e dau solia vei au na yalo meu vakila niu nuitaki ka dau vakayaloqaqataka na noqu bula niu se gone. E dina niu a tubu cake rauta ni udolu na maile mai Iurope ia au a vakila ni dau nuitaki au, kau sega ni dau vinakata me’u vakacudrui koya.
E dua tale na ivurevure ni kaukauwa mai na ivola e a vola ko Paula na iApositolo ena gauna e a vesu tu kina, e a volai vei Timoci, na nona ivukevuke nuitaki ka itokani. E a vola:
“Ni sa sega ni solia mai vei keda na Kalou na yalo ni rere: a yalo ni kaukauwa ga, kei na yalololoma, kei na yalomatua.
“O koya mo qai kakua ni maduataka na kena itukutuku na noda Turaga” (2 Timoci 1:7–8).
Na vosa oqo mai vua e dua nai Apositolo makawa ni noda iVakabula kau vakasinaiti ena kena bibi ni oti na ivalu ena gauna ko ya, me vaka ga ena gauna oqo. E vica beka vei keda era laiva nodra rere me lewai ira ena gauna dredre oqo ni veisaqasaqa vakamatanitu, vakailavo, kei na veisaqa vakapolitiki, kei na veibolebole e so ni tamata yadua.
E vosa tiko mai vei keda na Kalou ena dua ga na domo. Ena raici ira vakatautauvata na matavuvale vakatamata na Kalou. Eda na tiko beka ena dua na tabanalevu se dua na tabana lailai, ena duidui beka na draki se na veikau bulabula ni nodaru dui vanua, ena duidui beka na itovo kei na ivosavosa ni nodaru vanua, ka na duidui sara ga na roka ni kuli ni yagodaru. Ia na kaukauwa kei na veivakalougatataki ni kosipeli ka sa vakalesu mai e sa soli mai vei keda kece sara, veitalia na itovo ni bula, se vanua cava, na ivakarau ni bula vakapolitiki, na ivosavosa, kei na noda bula vakailavo, se noda vuli vinaka.
Edaidai sa tu tale oqo vei keda na iapositolo, na daurairai kei na daunivakatakila ka ra sa ivakatawa ni vale cecere, era italai vakalou, ka dau veivakabulai vakaidina. Era kila tale tu ga na duidui ni ituvaki ni bula eda sota kaya tu na lewenilotu. Era sa tiko ena vuravura oqo, ia era sa sega ni vakavuravura.
E tiko na noda parofita bula ena dela ni vuravura oqo, ka sai Peresitedi Gordon B. Hinckley. E kila tu o koya na veika eda bolei kina kei na veika ena vakarerei keda. Sa tu vua na veivakauqeti. Ni kena isau. Ena dua na yabaki sa oti e a vakavulici keda ena nona sala uasivi ka savasava. E a kaya:
“E sega ni yaga me da rere. Ena rawa ni da rawata na vakacegu ni yaloda kei na vakacegu ena noda vuvale. Eda na rawa ni ivurevure ni veivakauqeti vinaka ena vuravura oqo, oi keda yadua kece sara… .
“Na noda tiko vinaka e vakatau ena veivutuni. Na noda kaukauwa e yaco mai na noda talairawarawa ki na ivakaro ni Kalou.” (“Na Gauna Eda Bula Tiko Kina,” Liaona, Jan. 2002, 86).
E vosa vei keda na parofita ena vosa rawarawa wale sara ena yaca ni Turaga. Me vaka e vakadeitaka na iVola i Momani, “A sa vakararamataki ira na Turaga na Kalou me ra kila; a sa dauvosa vei ira na tamata ena nodra vosa me ra kila” (2 Nifai 31:3).
E sa noda itavi sega walega me da vakarorogo ia me da vakayacora sara ga na Nona vosa, me da rawata kina na veivakalougatataki ni veicakacaka vakalotu kei na veiyalayalati ni kosipeli ka sa vakalesui mai. E a kaya o koya: “Raica koi au na Turaga, au na vakayacora na noqu yalayala kevaka dou sa muria na noqu ivakaro; ia kevaka dou sa sega ni muria na noqu ivakaro, dou na sega ni rawata na ka sa yalataki” (V&V 82:10).
Ena so beka na gauna ena luvuci kina na yaloda, eda na vakamavoataki, se eda na yalolailai sara ena noda tovolea tiko vakaukauwa me da lewe ni Lotu vinaka sara. Mo yalodei, e tiko e dua na Dauniveivakabulai. Me da dau vakarorogo vua na parofita ni gauna oqo me ra na vukei keda me da vakanamata ki na veika era okati ena ituvatuva tudei ni Dauveibuli me baleta na nodra ilesilesi tawamudu na Luvena. E kilai keda na Turaga, e lomani keda, e vinakata me da rawa ka, ka vakaukauwataki keda tikoga ena nona tukuna:
“Mo ni qarauna … me vakayacori vakadodonu na veika ena yalomatua; ni sa sega ni yaga vua na tamata [tagane se yalewa] me cici vakatotolo [ni sa] malumalumu na yago … , [ia] sa kilikili me [ra] gumatua sara” (Mosaia 4:27).
Eda sa gumatua tiko li ena noda bulataka na ivakaro ni Kalou, ka sega ni da cici, me ulabaleta na noda kaukauwa? Se eda tayabe tu beka ga yani vakamalua? Eda vakayagataka tiko li vakayalomatua na noda gauna, noda taledi, ka vakavuku na noda iyau? Eda sa vakanamata tiko li ki na veika e bibi cake? Eda sa vakamuria tiko li na veivakasalataki vakaraivotu ni parofita?
E dua na kena ivakaraitaki sa ikoya na vakaukauwataki ni noda matavuvale. Na ivakavuvuli ni lotu ni matavuvale e a soli vei keda ena yabaki 1915. E a vakananumi ira tale kina na itubutubu o Peresitedi McKay ena 1964 ni “sega tale ni dua na rawa ka ena rawa ni saumi kina na leqa ni matavuvale” (lavetaki mai vei J. E. McCulloch, Na Vuvale: Na iVakabula ni Veivakararamataki [1924], 42; ena Ripote ni Koniferedi, Epe. 1964, 5). Ena 1995 e kacivaka raraba kina e vuravura na noda parofita ni gauna oqo me da vakaukauwataka na matavuvale ni sa yavu dei ni itikotiko. Ia ena tolu walega na yabaki sa oti eratou a tukuna kina ena yalololoma na Mataveiliutaki Taumada kei iratou na Kuoramu ni Apositolo Le Tinikarua: “Keitou sa vakasalataki kemuni na itubutubu kei na isolisoli mo ni vakabibitaka na masumasu ni vuvale, na lotu vakamatavuvale, na vulici ni kosipeli kei na ivakavuvuli, kei na itavi qaravi vata vakamatavuvale. Se mani vaka sara evei na levu ni veika tale e so eda gadrevi mai kina, me ra kakua ni vakalaivi me ra taura na gauna ni vei itavi vakalou oqo ka na rawa walega ni qarava na itubutubu kei na matavuvale” (“iVola mai na Mataveiliutaki Taumada,” Liaona, Tis. 1999, 1).
Me da tovolea ena yalomalumalumu me da vakavoutaka na noda soli igu kei na solibula me da muria na parofita, na daurairai, kei na daunivakatakila mai na yaloda kece sara. Me da dau vakarorogo ka me da na vakasalataki ka vakavukui mai vei ira era taura tu na idola ni matanitu. Ni da mai tiko ena koniferedi oqo, me na veisau na yaloda, ka me na toro cake na noda gagadre ni caka vinaka (Alama 19:33), ka me da na painia ni kena tarai cake na yavu vakayalo ka me na tauyavutaki kina na Lotu ena noda dui yasa ni vuravura. Ena yaca i Jisu Karisito, emeni.