Elaine Schwartz Dalton
iKarua ni Daunivakasala, Mataveiliutaki Raraba ni Goneyalewa

E sega soti ni dede na nona lakova na ikarua ni nona yabaki e Brigham Young University o Elaine S. Dalton, sa takali vakasauri yani na tamana. Sa dua na gauna ni veivakatovolei levu ena nona bula oqori, sa dau masu vakalevu me kila na vuna sa mai kau tani kina na tamana mai na dua na matavuvale ka gadrevi koya sara vakalevu.

E a sega ni saumi mai na nona masu me yacova na vulaikatakata ka tarava, ni vakatasuasua wavoki voli e Iurope vata kei ira na timi ni danisi vakailala e BYU. Ena Sigatabu ni Tama, ni yaco tiko na nodra soqoni ni sakaramede, e a vagolei ira e dua ka a vosa ki na Vosa Vakaibalebale 3:5–6: “Mo vakararavi vei Jiova ena vu ni yalomu; ka mo kakua ni vakararavi ki na nomu yalomatua. Mo vakarorogotaka vua na nomu sala kecega, ia ena vakadodonutaka na nomu ilakolako ko koya.”

“Au kila ni sa isau ni noqu masu na ivolanikalou ko ya,” e kaya ena gauna oqo ko Sisita Dalton. “Au se bera tiko ga ni kila na vuna e sa takali yani kina na tamaqu, ia au kila ga niu gadreva meu vakararavi vua na Turaga. Me tekivu mai na gauna ko ya au sa dau tuberi voli mai na ivolanikalou ko ya. Ena veika kece sa yaco kau sega ni kila, au kila ni kevaka au vakararavi vua na Turaga, ena dusimaka na noqu sala ko Koya.”

Ena nona ilesilesi vou vaka ikarua ni daunivakasala ena mataveiliutaki raraba ni Gone Yalewa, e nuitaka tu o Sisita Dalton me na vakayaloqaqataki ira na gone yalewa me ra tauyavutaka na mataqali vakararavi vata o ya vua na Tamada Vakalomalagi ka vakasaqara na veidusimaki ni Yalo Tabu.

E a sucu o Sisita Dalton mai Ogden, e Utah, ena i ka 1 ni Noveba 1946 kivei rau o Melvin Leo kei Emma Martin Schwartz. E a vakamautaki Stephen E. Dalton ena i ka 13 ni Sepiteba 1968 ena Valetabu e Salt Lake. E ono na luvedrau ka ratou vakaitikotiko e Salt Lake City.

A rawata o Sisita Dalton na nona koroi na Bachelors ena vosa vakavalagi mai na Brigham Young University. Sa veiqaravi oti ena matabose raraba ni Gone Yalewa, peresitedi ni Gone Yalewa ena iteki, daunivakasala ena kalasi ni iSakisaki, ka qasenivuli ena iSoqosoqo ni Veivukei.

“Era sa vakasakiti na gone yalewa ni kua—era kidakida vakayalo ka kaukauwa,” e kaya o koya. “E matalia na veika era bolei kina me ra buladodonu ena vuravura oqo. Ni ra lewe ni Lotu, e rawa ni ra kilai tani ka liutaki ira era vakasaqara na ivakaraitaki dodonu.”