Solibula e Kauta Mai na Veivakalougatataki Vakalomalagi
Kevaka, eda dau veikauwaitaki, kevaka eda dau loloma, kevaka eda dau talairawarawa vua na Kalou ka muria na Nona parofita, na noda solibula ena kauta mai na veivakalougatataki vakalomalagi.
Na vosa, “solibula e kauta mai na veivakalougatataki vakalomalagi” mai na sere, “Me sa dokai na Turaga,”1 e dau vakauqeta na yaloqu. Na solibula e vakamacalataki me “na noda solia yani e dua na ka e yaga vakalevu me baleta e dua na ka ka bibi sara na kena yaga se talei.”2 Na solibula e levu na kena ituvaki. O ira na Yalododonu Edaidai era veiyalayalati kei na Turaga me ra solibula. Ena noda cakava oqo, eda solia na noda lewa me Nona, ka vakatabuya na noda bula ki na taraicake ni Nona matanitu kei na qaravi ni luvena.
Ko ira era yalodina ena nodra solibula ni solia vakadodonu na nodra ikatini, e sa yalataka tu na Turaga ni na dolava na katuba ni lomalagi. E sega walega ni vakalougatataka na tamata yadua kei na vuvale na solibula ko ya, baleta ni vei ilavo ka soli vakaisolisoli soliwale ki na Lotu e solia na kaukauwa ni ivurevure3 ka vukea na matanitu ni Turaga me vakayacora na cakacaka mana e veisiga. E a kaya na Tui ko Penijamini: “Vakasamataka na kalougata kei na nodra marau ko ira era maroroya na ivakaro ni Kalou. Raica, era sa kalougata ena ka kecega, vakayago ka vakayalo.4 Na soli vakadodonu ni ikatini e dua na ivakaraitaki e tautuba ni yalayala e loma ni solibula.
Na vakamuri ni lawa ni lolo e dua tale na iwalewale ni solibula. E kerei keda na Turaga me da biuta vakatikitiki e dua na Sigatabu ena veivula me da lolo kina ena rua na gauna ni kana. Eda sureti me da solia ki na Lotu, na ilavo ka maroroi mai na isau ni rua na gauna ni kana ko ya me vukei ira era gadreva na veivuke. Na lolo kei na soli ni isolisoli ni lolo e veivakasavasavataki ki na yalo. E kaya o Peresitedi Spencer W. Kimball, “Ni vakatovotovotaki na lawa ni lolo, ena raica e dua ni basika na kaukauwa me vakadruka na nanumi koya vakaikoya kei na kocokoco.”5
Na cakacaka ena valetabu kei na ivola ni kawa e solibula ni loloma. O ira na Yalododonu yalodina era solia e milioni na auwa ena cakacaka ena ivola ni kawa. Era wilika vakamaqosa ka vakamatailalai na maikorofilimu kei na veiivolaniveisiga. Ena peni kei na komupiuta era vola ka maroroya na tikinisiga kei na veika e a yaco. Era vakayacora na veicakacaka tabu ena valetabu me baleti ira na tubudra lomani. Me vakataka na veisorovaki levu ni iVakabula oqo e dua na ivakaraitaki ni solibula—vakayacora vua e dua na ka ka sega ni rawa vua me vakayacora vakataki koya.
Ena vica na yabaki sa oti, ena dua na itavi vaka-Lotu mai St. Petersburg, Rusia, o au kei na watiqu o Mary Jane, keirau a kalougata ena neirau vakila na veivakalougatataki ni cakacaka ena ivola ni kawa. Keirau sikova na akaivi ni sucu, vakamau, kei na mate me keirau raica na cakacaka ni Lotu ena nona maikorofilimutaka e so na itukutuku me baleta na Ra kei Rusia. Ena noqu sarava tiko na akaivisi ena nona tabaka tiko na veidraunipepa mai na veiivola makawa tavukadiridiri mai na koro ko Pskov, era vuki na yaca me ra tamata dina. E vaka me ra lade tani mai na draunipepa ka kaya: “Ko sa kunei au. Au sa sega tale ni yali. Au kila ni dua na siga, ena dua na vanua, e dua mai na noqu matavuvale ena kauta na yacaqu ki na valetabu, meu na papitaiso ka taura na noqu edaumeni, ka vauci vei au na watiqu kei ira na luvequ. Vinaka!”
E ivakaraitaki ni solibula sega ni nanumi koya me baleta na kosipeli i Jisu Karisito na bula nei Josefa Simici. E dina ni a kune rarawa vakalevu na Parofita o Josefa, e a dei toka ga ka vorata kina na veivakacacani levu. E a talanoataka ko Parley P. Pratt e dua na ka vakaloloma e a sotava ena nona tiko vata kei na Parofita mai na valeniveivesu mai Missouri ena draki batabata ni 1838–39. Na ono na vula oqori e vakavulica na Parofita cecere ka tabaki taumada oqo.
E valeniveivesu eratou vakarogoca tiko na parofita kei iratou na nona itokani na qaciqacia kei na vosavosa ca era cakava tiko na yadra vei ira na “Momani.” Sa sega tale ni vosota rawa na parofita na nodra vosavosaca. E tucake vakasauri, ka kaya ena “domo vaka na kurukuru” ka kaya: “‘TIKOLO koi kemudou na tevoro mai eli. Ena yaca i Jisu Karisito au sa cudruvi kemudou, ka vakaroti kemudou mo dou galu… .’
“E a tucake tu vakadodonu ka vakaturaga. Vesuki tu, ka sega na nona iyaragi; malumu, sega ni masa ka dokai me vaka na agilosi… . [Era kino ena sautaninini na yadra] ki na tutu ni vale,” ka biuta na nodra iyaragi, “ kerea na nona veivosoti, ka galu tu me yacova ni sa veisau na yadra.”
E a vola tale kina o Baraca Pratt, “Au sa raica na italatala ni lewa, vakaisulu ena icurucuru ni turaganilewa … ; Au sa vakadinadinataka e dua na Bose Vakamatanitu ena soqoni bibi … ; Au sa tovolea meu raica e so na tui, na tikotiko vakatui, na idabedabe kei na isala vakaturaga … ; ia na vakaturaga kei na vakatui au se qai raica vakadua, ni wavutu ena ivesu, ena bogilevu ena dua na rumu butobuto ena dua na koro tawakilai e Missouri.”6
Ni oti e vica na macawa, ena dua tale na auwa ni butobuto, e a kerea tale ko Josefa na Turaga ena nona veivuke. E a sauma na Turaga, “I na luvequ; me vakacegu na yalomu; raica sa lekaleka walega na gauna ni nomu rarawa kei na vutugu.”7 Qai kaya tale na Turaga, ena vosa veivakurabuitaki oqo vua na Parofita: “Raica era na taroga na yacamu mai na iyalayala kei vuravura.”8
Ena nona raica lesu, ni oti e lima na yabaki, na kena se bera ga ni tara vakaoti na Valetabu e Nauvoo, e sa kila o Josefa ni sa voleka ni cava na ilakolako ka sa vakarau lako “me vaka na lami me vakamatei,” ia e “malumu me vaka na mataka ni dua na draki vinaka.”9 E a soli koya me vesu tale vakadua ena yalayala mai na veiliutaki vakamatanitu ni na taqomaki. Ia na nona veivakadinati e a sega ni dokai. Ena June 27, 1844, o koya kei na tuakana ko Hyrum erau a labati vakaca sara ena valeniveivesu mai Carthage.
Erau sa taroga mai na iyalayala kei vuravura na yaca i Josefa Simici, ia edaidai ena cila tikoga na siga ena veivanua kecega e tiko kina na Lotu i Jisu Karisito. Na veivosa oqo baleti Abraham Lincoln e vakamacalataka talega na dokai ni Parofita o Josefa Simici:
Oqo e dua na tamata e vakatautauvatani kei na vuravura,
E dua ka tautauvata kei na ulunivanua kei na wasawasa … .
Ena gauna e bale kina ena cagi kaukauwa, e a lako sobu
Me vaka e dua na vu ni sitari levu, drokadroka na veitabana,
Lako sobu vata kei na qolou vakaitamera ena veidelana,
Ka biuta e dua na vanua galili ena lomalagi.10
E sega ni dua na solibula me levu cake mai na veisorovaki ni iVakabula ko Jisu Karisito. Na Nona Veisorovaki, e dina ni dredre vei keda me da kila sara vakavinaka ka sega ni dua na ka me tautauvata, sa ikoya na itavi cecere duadua ni vu ni Nona lako mai ki vuravura. Eda vakavinavinaka, baleta na Nona solia na loloma cecere duadua, sa sega kina na bati gaga nei mate, ka sega na qaqa nei bulubulu.
Na noda bolebole meda solibula vakarawarawa ena veika kece e soli vei keda, era oka kina na noda dui sasaga. E a kaya vakaidina ko Elder Neal A. Maxwell, “Na nona solia vakaikoya na nona lewa e dua sa ikoya duadua ga na ka eda taukena vakaikeda me da biuta ena icabocabo ni soro ni Kalou. Na veika tale e vuqa eda solia … sa ikoya ga na veika e a sa solia se da dinautaka Vua.”11
Na solibula e kena usutu levu e ka mai na uto—na uto, “Raica sa gadreva na uto na Turaga kei na vakasama talairawarawa.”12 Kevaka eda dau veikauwaitaki, kevaka eda dau loloma, kevaka eda talairawarawa vua na Kalou ka muria na Nona parofita, na noda solibula ena kauta mai na veivakalougataki vakalomalagi. “Ka mo ni solia vei au ena solibula na uto sa raramusumusu kei na yalo sa kakavorovoro.”13
Ena dua na tikina duatani sara au a raica vakalailai na solibula ni loloma ni iVakabula kivei au. Keirau a sikova kei na watiqu e vica na vanua e a taubaletaka ka veivakavulici kina na iVakabula mai Jerusalemi ena yakavi ni bera na Siganisucu. Na vutugu ka a sotava na i Vakabula e kauta mai na yalo e lokumi kivei keirau ni keirau mai tucake ena ruku ni tikotiko vakatui nei Kaiafa. Ko ya na vanua e a beitaki ka dusi kina. Keirau raica na qara ni sinucodo ena lalaga vatu. Keirau lagata na sere “A Poor Wayfaring Man of Grief”14 ni tuturu tu na wai ni matai keirau. E a tu duadua sara tu ga ena kedra maliwa na dauveibeitaki. Ena yalo e bibi keirau masuta na veivakayaloqaqataki me keirau Nona dauniveiqaravi bula kilikili.
Ni oti ga vakalailai, keirau sikova na Qara Vatu ka sa lala tu. Na vosa ni ivola ni Kalou, “Sa sega ni tiko eke ko Koya: sa tucake tale”15 e voqa mai ki na yaloi keirau. Ko Eliza R. Snow e a vola:
Rui vutugu ni rube tu,
Sega ni vosa galu ga.
Na itavi bibi me rawa, …
Loma iTamana yaco tu.
Mai mate me isoro ga, …
Tou bula kina ka qaqa.16
Na nona Veisorovaki na iVakabula e loloma levu duadua e kila tu na tamata.
Eda lagata na veivosa oqo mai vei Peresitedi Gordon B. Hinckley:
E bula, na noqu vatu dei ni vakabauta,
Na inuinui serau ni tamata e vuravura,
Na bikeni ki na dua na sala vinaka,
Na rarama ena daku ni ilati ni mate.17
Au yalobibi ni dua na turu ni Nona dra e a turu vei au. Sa noqu masu ni keirau na sota kei na iVakabula ena dua na siga. Au na tekiduru ka reguca na mavoa ena ligana kei na yavana, ka na tavoya tani na wai ni mataqu. Au na masuta me na tukuna o Koya, “E vinaka, a tamata vinaka ka dina.”18 Sa tiko na inuinui ena vuku ni Nona loloma. O Koya sa “ivuvu ni noda veivakalougatataki.”19 Na veika oqo au vakadinadinataka ena yaca tabu ni vakaraitaki levu duadua ni solibula, na noda iVakabula ko Jisu Karisito, emeni.