Me Ra Duabauga Vata kei Kedaru
E dina sara ni da na sega ni duavata kei na Kalou kei Karisito me yacova ni sa noda gagadre cecere duadua na Lomadrau kei na veika erau vinakata.
Ni sa voleka ni oti na Nona veiqaravi vakatamata, ka sa kila “sa yaco mai na Nona gauna” (Joni 13:1), e a vakasoqoni ira na iapositolo ena dua na lomanivale e cake mai Jerusalemi. Ni oti na vakayakavi ka oti na Nona savata na yavadratou ka vakavulici iratou, sa qai cabora e dua na Masu cecere duadua ni loloma o Jisu ena vukudra na iApositolo oqo kei ira kece ka ra na vakabauti Koya. E masu Vua na Tamada ena vosa oqo:
“Ia ka’u sa sega ni masu ena vukudra walega oqo, ia ena vukudra talega era na vakabauti au ena vuku ni nodra vosa;
“Me ra duabau kecega; me vaka edaru sa duabau, Tamaqu, me ra duabau kei kedaru: me vakadinata ko vuravura ni kemuni sa talai au mai.
“Ia na vakarokoroko ko ni a solia mai vei au, ka’u sa solia vei ira; me ra duabau, me vaka edaru sa duabau:
Me’u tu vei ira, ka mo ni tu vei au, me ra vakayacori sara me ra duabau ga” (Joni 17:20–23).
Sa dua na ka na kena lagilagi ni da vakasamataka ni da sa sureti me da tiki ni duavata uasivi vakaoti ka bula tiko vua na Tamada kei na Luvena. E yaco vakacava na ka oqo?
Ni vakasamataki na taro oqo, e matata vinaka ni dodonu me da tekivu ena noda yaco me da duavata mada ga vakaikeda. Eda a buli mai na rua na ka na yago kei na yalo, ka so na gauna eda dau sega ni veiyaloni se da dau veivala. Na yaloda sa vakararamataki ena noda lewa e loma, na rarama i Karisito (raica Moronai 7:16; V&V 93:2), ka dau sauma vakayago ga na vakasolokakana ni Yalo Tabu ka gadreva me vakamuria na dina. Ia na viakana kei na veitemaki o koya ka dau kabita na yago, kevaka e vakatarai, ena vakarusa ka liutaka na yalo. E a kaya ko Paula:
“Ia ka’u sa kunea kina e dua na vunau, sa tiko kina vei au na ca ni’u sa via kitaka na vinaka.
“Ni’u sa vinakata na vunau ni Kalou ena lomaqu dina:
“Ia ka’u sa kunea e duatani tale na vunau ena veitikiqu, erau sa veivala kei na vunau sa tu ena lomaqu, a sa vakabobulataki au ki na vunau ni ca o koya sa tiko ena veitikiqu (Roma 7:21–23).
E vakaraitaka ko Nifai na veika tautauvata:
“E dina ga sa vakaraitaka vei au na Turaga na Nona cakacaka levu ka veivakurabuitaki ena Nona loloma, ia sa tagi ga na yaloqu ka vaka: A tamata vakaloloma koi au! Au sa rarawa ena vuku ni noqu itovo vakayago ka sa rarawa na yaloqu ena noqu caka ca.
“Au sa vakavolivoliti, ena vere kei na ivalavala ca ka’u sa tao rawarawa kina” (2 Nifai 4:17–18).
Ia, ena nona nanuma na iVakabula, e a kaya kina ko Nifai ena nona nuitaka ena kena itinitini: Ia, au sa kilai Koya ka’u sa vakararavi vua” (2 Nifai 4:19). Na cava na kena ibalebale?
Ko Jisu talega e dua ka vakayago ka vakayalo, ia e sega ni soro ki na veitemaki. (raica na Mosaia 15:5). E rawa ni da vuki vua ena noda qara na vakacegu kei na duavata, kei keda yadudua baleta ni kilai keda. E kila na sasaga, ka kila talega na sala me rawata kina na sasaga. Me vaka e tukuna ko Paula, “Ni sa sega ni noda bete levu ko Koya, sa sega ni lomani keda rawa ni da sa malumalumu; ia sa dau veretaki vakatautauvata ena ka kecega ko Koya, ia ka sega na Nona cala” (Iperiu 4:15).
O koya e bibi, e rawa me da rai vei Jisu me vukea na vakalesui ni duavata ni yaloda ena gauna eda soli keda kina ki na ivalavala ca ka vakacacana na noda vakacegu. Ni oti ga na Nona masu cecere ni kerekere me rawa ni da “duabau ga,” e a rarawa ko Jisu ka solia na Nona bula me sorovaka na noda ca. Na kaukauwa ni Nona Veisorovaki e rawa ni bokoca na mana ni ca. Ni da veivutuni, na Nona veisorovaki ena loloma e veivakadonui ka vakasavasavataki keda (raica 3 Nifai 27:16–20). E vaka ga eda a sega ni vakamalumalumutaki, e vaka ga eda a sega ni soli keda ki na veitemaki.
Ena noda sasaga ena veisiga kei na veimacawa me da muria na sala i Karisito, na yaloda e tukuna na nona kaukauwa me vakamalumalumutaka na tamata dina, na ivalu e loma sa maravu, na veitemaki sa oti na nona dau veivakaleqai. Sa vuqa vakavuqa na lomavata ena kedrau maliwa na vakayalo kei na vakayago me yacova ni sa veisau na yagoda vakayago, ena vosa nei Paula, mai na “iyaya ni bula tawa savasava ki na ca” ki na “iyaya ni bula savasava vua na Kalou” (raica Roma 6:13.)
Ena noda duabau vakaikeda e vakarautaki keda ki na veivakalougatataki cecere ni noda mai duabau kei na Kalou kei Karisito.
E rawata ko Jisu na duabau uasivi duadua kei na Tamada ena Nona soli Koya, yago kei na yalo, ki na lewa nei Tamada. Nona dauveiqaravi e sa dau matata vinaka baleta ni sega na vakasama se na gagadre ka sega ni lomavata kei na Tamada. Me baleta na Tamana, e kaya kina ko Jisu, “Au sa kitaka tikoga na ka sa vinakata ko Koya” (Joni 8:29).
Baleta ni Nona lewa ko Tamada, e a soli koya kina ko Jisu me mate, ni sa duavata ga na loma i Tamana kei na Luvena (Mosaia 15:7).
E dina ga ni sega ni ka lailai se rawarawa na ka oqo. Na rarawa ko ya e a kaya, “Koi au, na Kalou, sa kaukauwa sara, au sa sautaninini ena mosi, ni veivakararawataki ko ya; au a bunotaka na dra, ka sa yaluma sara kina na yaloqu kei na yagoqu—au a sa kerea me kau tani vei na bilo ni cudru—
“Ia me vakarokorokotaki ga ko Tamaqu; raica au a gunuva na bilo ko ya, ka vakacavara na noqu itavi ena vukudra na luve ni tamata” (V&V 19:18–19).
Na itukutuku oqo e vakaraitaka ni ai matai ni ka duadua e vinakata na iVakabula me vakalagilagi ka vakarokorokotaki ga na Tamada. E “tu” vua na Luvena na Tamada me vaka ni lagilagi ni Tamada kei na lewa ni Tamada e nona-rai kei na inaki duadua ni Luvena.
Ena iotioti ni Kanavata kei iratou nona iapositolo, e a kaya kina na iVakabula:
“Koi au na vaini dina, ka sa ivakatawa ni were ko Tamaqu.
“A tabaqu kecega sa sega ni vua sa kauta laivi yani ko Koya; ia na tabaqu kecega sa vua, sa samaka ko Koya, me vua vakalevu sara” (Joni 15:1–2).
Na sala cava ni veivakasavasavataki e tauri, na solibula cava e okati kina, ena sega beka ni da kila taumada. Ia kevaka me da a taroga vata kei na cauravou vutuniyau, “Na cava tale sa vo vei au?” (Maciu 19:20), kena isau mai vua na iVakabula ena tautauvata: “Lako mai ka muri au” (Maciu 19:21); mai noqu tisaipeli me vaka ni’u sa tisaipeli nei Tamaqu; ia me da vaka “na gonelalai, me da talairawarawa, yalomalua, yalomalumalumu, dauvosota, dauloloma ka talairawarawa ki na ka kece sa lewa vua na Turaga me vaka na gone sa talairawarawa vua na tamana” (Mosaia 3:19).
E kila vinaka ko Peresitedi Young na noda bolebole ena nona kaya:
“Ni sa oti na veika kece e tukuni ka caka, ni sa oti na nona liutaki ira tiko mai na nona tamata vakadede, o sa sega tikoga ni raica ni lailai tiko na veivakabauti vua na noda Kalou? O rawa ni raica vei iko? Ko na via taroga, ‘Baraca Brigham, o raica vei iko?’ Au raica, Au rawa ni raica ni lailai na noqu vakabauta, ena so na vanua, vei Koya ka’u vakadinata.—Baleta na cava? Baleta ni sega vei au na kaukauwa, baleta ni’u tamata ga, na ituvaki oqo e kauta mai vei au na lutu tani… .
“… E dua na ka e dau tubu cake e lomaqu ena so na gauna, na ka ko ya … e kauta mai e dua na laini ni veiwasei ena ka au taleitaka kei na ka e taleitaka na Tamaqu mai lomalagi; dua na ka e kitaka na ka au taleitaka kei na ka e taleitaka na Tamaqu mai lomalagi me sega ni duabau.
“… E dodonu me da vakila ka kila, ena kena rawarawa, me lesu tale ki na itovo ni tamata ka sa lutu tani, me da rawa ni taura na vakabauta kei na kila ka me da kilai keda, ni veika taleitaki ni Kalou ko ya ka da qarava me noda ka taleitaki talega, ka sega ni dua tale, sega ena gauna oqo kei na ivakataotioti (Deseret News, 10 Sep. 1856, 212).
E dina sara ni da na sega ni duavata kei na Kalou kei Karisito me yacova ni sa noda gagadre cecere duadua na lomadrau kei na veika erau vinakata. Na talairawarawa vakaoqo ena sega ni rawa ena dua ga na siga ia mai na Yalo Tabu, ena vakavulici keda ka tuberi keda na Turaga kevaka eda vinakata me yacova, ena dua na gauna, me sa rawa ni qai tukuni ni sa tiko vei keda ko Koya me vaka ga ni sa tiko vei Koya na Tamana. Ena so na gauna au dau rere ni vakasamataka na veika e gadrevi kina, ia au kila ni ena duavata taucoko ga oqo ena kune kina na marau vakaidina. E sega ni tukuni rawa na noqu vakavinavinaka niu sureti meu duavata kei rau na sa cecere sara ko ya kau dau rokova ka qarava me Tamaqu Vakalomalagi kei na noqu Dauveivueti.
Sa noqu masu me rogoca na Kalou na nona masu na iVakabula ka liutaki keda me da duavata kei Rau, ena yaca i Jisu Karisito, emeni.