“Raica Meu Agilosi Mada ga, Meu Tabalaka na Domoqu”

Peresitedi Gordon B. Hinckley

Au sa vakauqeti kemuni … mo ni vakayagataka na valetabu ni Lotu. Lako kina ka vakayacora na cakacaka cecere ka talei sa tuva tu vei keda na Kalou ni lomalagi.

Kemuni na taciqu kei na ganequ lomani, keimami kidavaki kemuni tale ena dua na koniferedi cecere ni vuravura raraba ni Lotu i Jisu Karisito ni Yalododonu Edaidai.

A vunautaka o Alama: “Raica meu agilosi mada ga meu tabalaka na domoqu me vaka na davui ni Kalou sa yavalati vuravura, meu vunauci ira kina na tamata kecega me ra veivutuni!” (Alama 29:1)

Eda sa yacova mai e dua na vanua sa voleka kina ni da rawata oqori. Na veika e vakayacori ena koniferedi oqo ena kaburaki yani ki vuravura taucoko, ka ra na rogoci ka laurai o ira era vosa mai vei ira na Yalododonu Edaidai ena veivanua kecega. Sa balavu sara na vanua eda lakova mai ena kena vakayacori na raivotu ka volai ena ivola ni iVakatakila: “Ia kau a raica e duatani na agilose sa vuka ena maliwa kei lomalagi kei vuravura, a sa taura na itukutuku vinaka e sega ni oti rawa, me vunautaka vei ira sa tiko e vuravura, vei ira kece talega na veimatanitu, kei na veimataqali kei na duivosavosa, kei ira na tamata”(iVakatakila 14:6).

Kemuni na taciqu kei na ganequ sa dua na soqo uasivi oqo. E dredre ni da vakasamataka. Keimami vosa tiko yani ena vale ni koniferedi vakasakiti oqo. Au sega tale ni kila e dua na vale me vakatauvatani kaya.

Me vaka ni da dua na matavuvale levu, eda matataka na matavuvale vakatamata ena vuravura vakaitamera ka totoka oqo.

E vuqa vei kemuni o ni a vakaitavi ena vakatabui ni Valetabu e Nauvoo. Sa dua na soqo cecere ka uasivi, ka na guiguilecavi dredre. Eda sega ni vakatabuya walega e dua na vale vakasakiti, e dua na Vale ni Turaga, ia eda sa vakatabuya e dua na ivakananumi totoka ni Parofita o Josefa Simici.

Ena 1841, ni oti e rua na yabaki na nona tadu mai ki Nauvoo, a kacivaka kina ena veivakauqeti nei koya sa Cecere Sara ni dodonu me tara e dua na Vale ni Turaga me ivakatakarakara cecere ni cakacaka ni Kalou ena delana cecere ni siti o ya.

E dredre me da vakabauta ni ena ituvaki o ya kei na mataqali gauna o ya a rawa me tara kina e dua na vale ka vaka tu oya na kena vakasakiti ena dua na vanua a kilai ena gauna o ya me iyalayala ni vanua o Amerika.

Au vakabekataka, au vakabekataka sara vakalevu, ni a dua tale tiko na vale ka tautauvata na kena itaratara ena yasana taucoko o Illinois.

Me na vakatabui ki na cakacaka nei Koya sa Cecere Sara, me rawa kina na Nona inaki tawamudu.

E sega tale ni dua na sasaga me sega ni tarai. E sega ni dua na solibula me dredre. Ena loma ni lima na yabaki ka tarava era jisilitaki vatu ka vakadavo yavu ni vale, lalaga kei na iukuuku na turaga. Era lako ki na vualiku e vica na drau, me ra laki tiko kina vakalailai, me ra musu kau vakalevu sara, me ra qai vesuvesuka vata me vaka na ibilibili ka vakacirima sobu mai e uciwai ki Nauvoo. E ta mai na kau oqori na ibono vivinaka. E kumuni na sede me voli kina na ivako. Eda sega ni vakasamataka rawa na levu ni solibula e vakayacori me rawa kina na iloilo. Era tara tiko e dua na valetabu vua na Kalou, ka dodonu me ka vinaka duadua era rawata.

Ena maliwa ni veika e yaco tiko oqo e rau a mate kina na Parofita kei na tacina o Hyrum mai Carthage ena i ka 27 ni June 1844.

E sega ni dua vei keda na bula tiko oqo e rawa ni vakasamataka na kena vakacaca vei ira na Yalododonu na ka oqo. Sa yali na nodra iliuliu—o koya, na tamata raiyawa kei na raivotu. E sega walega ni nodra iliuliu o koya. E nodra Parofita. Sa vuabale na nodra rarawa. Ka vakarerevaki na nodra yaluma.

Sa mai tomana na ilakolako o Brigham Young, na Peresitedi ni Kuoramu ni Apositolo Le Tinikarua, ena nona sa mai yaco me iliuliu. Sa biuta o Josefa na dodonu e tu vua ena usouso ni domodratou na Apositolo. Sa gagadre nei Brigham me vakacavara na valetabu ka sa mani tomani tikoga kina na cakacaka. Era sasagataka e veisiga kei na veibogi na nodra inaki e dina ga ni yaco tiko na veivakacacani vei ira mai na ilawalawa kila ka dauvakacaca. Ena 1845 era sa kila ni ra sa na sega tale ni rawa ni tiko ena siti era a tara mai na vanua veidabibi ena bati ni uciwai. Era kila ni sa dodonu me ra toso. Sa yaco me gauna ni vakusakusa; taumada, me vakacavari na valetabu, kei na kena ikarua, me caka na qiqi ka kumuni na kakana me ra toso yani ki na Ra.

Sa tekivu qaravi na veicakacaka vakalotu ni se bera ni vakacavari sara vakavinaka na valetabu. E tomani tiko ga ena vakusakusa me yacova sara yani na vulaibatabata ni 1846, sa tekivu me ra sogota na tamata na nodra katuba ni vale ka toso sobu yani vakamalua ena Parley Street ki bati ni wai, ka ra qai takosova yani na uciwai ka cabe ki na tai ni wai vaka ki Iowa.

Sa toso tikoga na itosotoso ki na ra. Sa cevata na uciwai ka batabata vakasivia. Ia a rawa kina vei ira me ra toso e dela ni waicevata.

Vaka ki na tokalau era railesuva tale na siti ni nodra tadra kei na valetabu ni Kalou. Oti era rai yani vaka ki na ra ki na dua na ilakolako era sega ni kila na vanua ena cava kina.

E a vakatabui na valetabu ni oti ga na kena tara, era “vakaemeni” ga o ira era vakatabuya ka toso sara. E a qai vakamai na valetabu mai vua e dua na dau vakamakama ka a voleka sara ni mate ena nona cakava tiko na caka ca oqori. E a qai vakarusa vakadua na veika a vo tu e dua na cagilaba. Sa mai yali kina na Vale ni Turaga, na vua cecere ni nodra buno.

Sa voleka me vaka na siti ni yalo o Nauvoo. E a seyavu tiko ga yani me yacova ni sa voleka ni yali yani vakadua. E a siviyarataki ka teivaki na vanua e a tu kina na valetabu. Sa sivi yani na veiyabaki, ka qai muria mai vakamalua e dua na veivakayadrati. O ira na noda, na makubudra o ira era a bula kina eliu, sa vakayadrati mai lomadra na kedra vakanananu na tubudra ka ra gadreva me ra vakananumi ira na tubudra ka ra a sotava na isau vakaloloma. Sa qai bula tale mai vakamalua na siti ka vakalesui tale mai na veitiki Nauvoo e so.

Ena veivakauqeti ni Yalotabu ka vakayavalati mai na gagadre nei tamaqu ka a veiqaravi vakaperesitedi ni kaulotu ena yasayasa ko ya, na gagadre ni lomana me tara tale na valetabu o ya ka qai sega ni rawata, keimami sa kacivaka kina ena koniferedi ni Okotova 1999, ni da na tara tale na vale vakairogorogo o ya.

Era vakanuinui na tamata. Era lako mai na turaga kei na marama ka ra gadreva me ra veivuke. Era cau mai ena umailavo lelevu kei na maqosa vakacakacaka. Ena gauna talega oqo e sega tale ni dua na ilavo me bula. Eda na tara tale na Vale ni Turaga me kena ivakananumi na Parofita o Josefa ka me noda isolisoli vua na noda Kalou. Ena i ka 27 ni June se qai oti walega oqo, ena yakavi ena gauna vata beka erau a lauvana kina ena valeniveivesu mai Carthage o Josefa kei Hyrum ena 158 na yabaki yani i liu, e a vakayacori kina na kena vakatabui na vale vakasakiti oqo. Sa vanua ni veika totoka. E duri tu ena vanua vata sara ga e a duri tu kina na valetabu e liu. Na kena levu e tautuba e tautauvata vinaka sara ga. Sa dua na ivakananumi veiganiti vinaka ki vua na Parofita cecere ni itabagauna oqo, o Josefa na Daurairai.

Sa dua na ka na levu ni noqu vakavinavinaka, e titobu na noqu vakavinavinaka ena vuku ni veika sa yaco. Nikua e qara vaka ki na ra, ena delana levu ka raica sobu tu na siti o Nauvoo, ena tai kadua ni Mississippi, ka ulabaleta na bucabuca e Iowa e duri tu kina na valetabu nei Josefa, e dua na vale vakasakiti ni Kalou. Eke ena Salt Valley, ka qara vaka ki na tokalau ki na valetabu totoka o ya mai Nauvoo, e tucake tu kina na valetabu nei Brigham, na valetabu e Salt Lake. Erau veiqaravi me vaka na bai ni ivola ka ra koto ena kedrau maliwa na veiivola ka tukuni kina na veika rarawa, na yaluma, na solibula, ka vaka sara talega kina na nodra mate e udolu vakaudolu ka ra a lako ena ilakolao balavu mai na bati ni uciwai na Mississippi ki na buca ni Salt Lake.

Sa yaco na valetabu e Nauvoo me i ka 113 ni valetabu vakayagataki. Sa vakatabui tale e dua ena Hague e Netherlands me sa 114 taucoko kina. Era sa robota tu na veimatanitu ni vuravura na veivale uasivi oqo ka duidui na kedra lelevu kei na kedra itaratara. Era tara me ra curu kina na tamata ka qarava na cakacaka i Koya sa Cecere Sara na Nona inaki sa ikoya me tucake tale mai na mate na tamata kecega ka rawata na bula tawamudu (raica Mosese 1:39). Era tara na veivaletabu oqo me ra vakayagataki. Eda rokova na Tamada ni da vakayagataka tiko.

Me idola ni koniferedi, au sa vakauqeti kemuni, na taciqu kei na ganequ, mo ni vakayagataka na valetabu ni Lotu.

Lako kina ka vakayacora na cakacaka cecere ka talei sa tuva tu vei keda na Kalou ni lomalagi. Me da vulica mai kea na Nona sala kei na Nona inakinaki. Me da vakayacora mai kina na veiyalayalati ka na kauti keda yani ki na sala ni ivalavala dodonu, sega ni kocokoco, kei na dina. Me da semati vata vakamatavuvale mai kea ena ruku ni dua na veiyalayalati tawamudu ka qaravi ena kaukauwa ni matabete ni Kalou.

Me da vakateteya yani mai kea na veivakalougatataki vata oqo vei ira na veitabatamata e liu, vei ira sara mada ga na tubuda ka ra waraka tu na veiqaravi e rawa ni da sa qai solia ena gauna oqo.

Me vakalougatataki kemuni tikoga na Kalou, kemuni na taciqu kei na ganequ. Me tara na yalomuni na Yalo i Ilaija ka vakauqeti kemuni mo ni vakayacora na cakacaka o ya ena vukudra na tani ka ra na sega ni rawa ni toso ki liu vakavo kevaka o ni sa vakayacora. Me da reki ena galala lagilagi e noda, sa noqu masu ena vakarokoroko ena yaca i Jisu Karisito, emeni.