Rawa ni Tauri ena Initaneti na iTukutuku ni Cakacaka Vakalotu

E dua tale na iwase vou ni Family SearchTM ena iTukutuku ni Cakacaka Vakalotu e sa na rawa ni na tauri ena imatai ni gauna ena initaneti o ya ena www.family-search.org. Na kato ni itukutuku vakomupiuta oqo e tu kina na itukutuku kece ni cakacaka vakalotu vei ira na mate ka sa qaravi oti mai na valetabu. E rawa ni ra raica e keri na lewenilotu kevaka e sa qaravi oti na cakacaka vakalotu vua e dua na tamata ni bera ni vakauti yani na yacana ki na valetabu. Na dikevi ni veiitukutuku oqori ena vukea me vakalailaitaki na kena dau vakayacori vakavica na cakacaka vakalotu vua e dua na tamata.

E se qai vakacurumi walega e milioni na yaca, ka na dau vakayacori tale tiko ena veimacawa me vakadeitaka me na vakarautaki tu vei ira na lewenilotu na itukutuku me baleti ira na nodra qase.

Mo volayaca me na rawa vei iko mo vakayagataka na veika oqori, ena gadrevi vei ira na lewe ni Lotu na nodra naba ni itukutukuvolai vakalewenilotu kei na tikinisiga era a vakacurumi kina. E rawa ni ra vakarautaka na vunivola ni tabanalevu kei na vunivola ni tabana na vei itukutuku oqori vei ira na lewenilotu.

E sa na rawa vei ira na lewenilotu ka sa tu vei ira mai vale na Initaneti se mai na nodra vale ni volavola ni itukutuku makawa ni matavuvale me ra vakayagataka na veika oqori. O ira na vei valenivolavola ni itukutuku makawa ni matavuvale ka sega ni se tiko vei ira na Initaneti me ra veitaratara yani ki na Family and Church History Department ena sala me ra na semati yani kina ki na Initaneti ni ra sa na vakadonuya oti mai na veiliutaki ni matabete ena vanua ko ya.