Elder James M. Dunn
mai na Vitusagavulu

Me vakataki ira e vuqa tale, au sa tara cake na noqu ivakadinadina e veisiga yadua, dua na buloko ena dua na gauna,” e vakadikeva toka o Elder James M. Dunn, ka se qai kacivi walega oqo ki na iKarua ni Kuoramu ni Vitusagavulu. “Na veivakauqeti au vakila ena noqu se gonetagane lailai sa matua ena vuku ni gauna kei na veiqaravi kei na noqu dau cakava na veika a vakavulici vei au ni dodonu.”

E a sucu ena i ka 16 ni Epereli 1940 e Pocatello, Idaho, kivei rau o Billy E. kei Melba Meyers Dunn, eratou a tubu cake o Elder Dunn kei iratou na lima na tacina e Salt Lake City, e Utah, “Ka tu vei iratou na veigauna vinaka kece sara me rawa ni raica e dua na gone Yalododonu Edaidai.”

Ni oti na nona kaulotu ki Uruguay, e a vakamautaki Sandra (Penny) Barker ena valetabu e Salt Lake ena i ka 7 ni Okosita 1963. E a dau taleitaki Penny ka rokovi koya me tekivu sara mai na nodrau a vakaitavi vata me vakailesilesi ni kalasi ena koronivuli torocake. Ena veiyabaki taumada ni nodrau bula vakawati, e a veiqaravi o Elder Dunn vaka turaganivalu ena mataivalu tu vakawawa e Utah, e a sasagataka e dua na diqiri ni vuli ni Amerika vaka- Latina ena Brigham Young University, ka rawata e dua na koroi ni loya mai na Univesiti e Utah.

Ena nona cakacaka osooso vakaloya ni veilewai, e a vulica kina o Elder Dunn ni ra sa ka ni solibula ena vuku ni nona itavi vakalotu na lailai sobu ni tamata era vinakata mai na nona veiqaravi ka vakakina na lailai sobu ni nona auwa ni cakacaka, na veiitavi vakalotu oqori e okati kina na lewe ni matabose e cake, bisopi, peresitedi ni iteki, peresitedi ni daukaulotu, kei na Vitusagavulu ni Wasewase.

Ni tamadratou e ono na goneyalewa, e kaya kina o Elder Dunn, “E duatani toka na noqu bula; e uasivi sara na kedra isema na goneyalewa kei na tamadra.” E a vaqaqacotaki na isema oqori ena nodratou a veiqaravi vata kei koya na nona matavuvale mai Colombia, e a peresitedi ni daukaulotu mai kea. Eratou a lesu mai ki vale ko koya na watina kei iratou na luvedrau yalewa ni ratou sa madila vinaka tu ena vosa vaka-Sipeni ka vaqaqacotaki vakayalo.

Ena nona ciqoma na nona ilesilesi vou, e kaya kina o Elder Dunn: “Ena vakataroga beka e dua se cava e yaco kina na veika oqo, ena vakaevei beka na bula ena veiyabaki mai muri. Ia mai na veilesilesi sa oti yani au sa kila kina ni na dua na veivakalougatataki levu na veiqaravi. Ena veiyabaki sa oti yani, sa itakele tu kina ni veika vivinaka kece sara e yaco tiko ki na noqu matavuvale kei na noqu bula na Lotu.