Elder Daryl H.Garn
mai na Vitusagavulu

Ena gauna e a daukaulotu voli kina mai na Ra kei Kenada o Daryl H. Garn a veisiko yani ki na nona iwasewase na nona perestedi ni kaulotu. E sega soti ni raica vakalevu na peresitedi ni kaulotu o Elder Garn baleta ni sa rui levu na tabana ni kaulotu oqo, o koya gona e sa dua dina na gauna vinaka vua oqo.

“Ni tinia o Elder Arave na nona ivakadinadina, e kaya ni kila vakavinaka cake na veika oqori mai na veika kecega ,” e nanuma lesu o Elder Garn, “ka vakadinadinataka ki na noqu vakanananu na Yalotabu ni dina—ni rawa ni tautauvata na nomu kila se mo kila vakavinaka cake mai na veika kecega na veika ni Yalotabu.”

Me tekiva mai na gauna o ya, sa vakila vakavica vata o Elder Garn, ka a tokoni ki na iKarua ni Kuoramu ni Vitusagavulu ena Okotova, na dina ni nona ivakadinadina na nona peresitedi ni kaulotu. E nanuma lesu ena vica na yabaki e muri ena nona a dabe tiko ena dua na koniferedi ni iteki mai Ohio ka qai vakasolokakanataka vua na Yalotabu ni na kacivi ki na matabisopi ni nona tabanalevu. E se qai macawa rua toka ga kina ena koronivuli ni bati, ia ni se bera ni cava na siga ko ya, sa vakadeitaka na veikacivi oqori o Peresitedi Spencer W. Kimball (1895–1985), ka se lewe voli kina ni Kuoramu ni Apositolo Le Tinikarua.

“E kaya kina o Elder Kimball, ‘Baraca Garn, sa kacivi iko na Turaga ki na itutu oqo, ia kevaka ko na vakaliuca na veika e dodonu me liu, ena vakalougatataki iko ko koya,’”e nanuma o Elder Garn. E vakila mai na nona veiqaravi vagumatua ena nona ilesilesiokati kina na bisopi, peresitedi ni iteki, peresitedi ni Cauravou, lewe ni matabose e cake, ka Vitusagavulu ni Wasewase—e tokoni ena veiyasa ni nona bula kece sara.

E kaya na watina o Irene, ni sa dau vakaliuca tu ga na Turaga, ka vakadonuya na kaci kecega e kacivi kina—se na kaci ni veivuke e loma ni vale se na liutaki ni dua na tabanalevu—ena kaya ga vakamalua, “Oqori sara ga na ka au vinakata meu cakava!”

E a sucu o Elder Garn ena i ka 28 ni Tiseba 1938 e Tremonton, e Utah, kivei rau o Uel kei Lolita Hodges Garn. A vakamautaki Irene Hall ena i ka 19 ni Tiseba 1951 ena valetabu e Logan Utah. E ono na luvedrau ka 19 na makubudrau. Erau a susuga cake na nodrau matavuvale e Mesa, Arizona.