Bon te Wanawana iroun te Uea Bwa ti Na Karekea Ana Boki Moomon
Bon au tataro bwa wawarekan ana Boki Moomon inanon te ririki aei e na riki bwa te bwai ae kakukurei ao te kakabwaia nakoira n tatabemaniira nako.
Tariu ao mwaneu aika kam tangiraki, ti rang ni kakaitau ibukin ami mwakuri ni wareki booki aika tabu ma Nakomai, Iriirai. Kam rabwa n ami mwakuri ni kabane. Ami reitaki ma te Atua ao Ana taeka ni katoabong iai mwiia aika a kakaawaki. “Kam kawenea aan te mwakuri ae korakora. Ao man bwaai aika uarereke e kaoti te bwai ae korakora.”
Warekan reirei mairoun ara Tia Kamaiu ake a koreaki i nanon booki aika tabu e na buokiira ni kariki mwengara bwa n nera ni kabwebwei ara onimaki ao n reiakinaki iai taekan te euangkerio. E kaoa te Tamnei nakon mwengara. E kaonii nanora te Tamnei ae Raoiroi n te kimwareirei ao e karikiira bwa taan iriira Iesu Kristo.
I nanon ririki aika nako, inanon wawarekan koroboki aika tabu, ao ti a tia n noora aron reiakinaia ara ataei iroun te Atua rinanon te wareware ao te kamatebwai n taai ake e moan tei iai te euangkerio.
Inanon boong akanne, ao ti teimatoa n nonoora te tamnei ae rangi n okioki. Kaokakin ana euangkerio Iesu Kristo iroun te Atua rinanoia Ana burabeti. A teimatoa aomata n ongotaeka irouia burabeti ao a kakabwaiaaki. Ma, i nanon te tai, tabeman a manga toki man ongotaekaia nakoia burabeti ao a kararoaia mai iroun te Uea ao Ana euangkerio. Aei ae ti aranna bwa kitanakin te koaua. E moan karokoaki te euangkerio nakon Atam, ma tabeman natin Atam ma nei Ewa a manga tannako mai iroun te Uea ao ni kitana te koaua. Ti noora tamnein kaokakin ao kitanakin te koaua are rangi n okioki n aia tai Enoka, Nooa, Aberaam, Moote ao tabeman riki.
N te bong aei, ao ti a maeka inanon tain te mwioko n tararua ae kororaoi. Aio te kabanea ni bong are e nang toki n akea kitanakin iai te koaua. Bon aio te bong are e nang kakoroa iai nanon manga Kauaokin te Tia Kamaiu ae Iesu Kristo ma Ana tautaeka.
Ngaia are, Tera ae okoro ni boong aikai? Tera ae e a tia ni katauraoia ibukira te Uea ni boong aikai, ai moarara riki inanon ara tai aei, are e na kona ni kaniira iai nakon ara Tia Kamaiu n aki manga Kitanna?
Teuana kaekaana ae roko n au iango bon koroboki aika tabu—ao riki bon Ana Boki Moomon: Kakoauan Taekan Iesu Kristo.
Ngkai e a tia ni berita te Atua bwa e na akea te bwaka ae na manga oki nakoia aomata ni kabaneia, ao ti riai n iangoia bwa ti na aki ngaira kona ni manga bwaka—ngkana ti uringa ana reirei Beretitenti Russell M. Nelson, “Ngaira n tatabeman bon tabera karikirakean tamneira.” Ngkai ti kamatebwaia Ana Boki Moomon n te ririki aei, ao e teimatoa ni kaniira nakon te Tia Kamaiu—ao e buokiira ni kaan mangaia n taai nako.
Ti aranna bwa “te kamatebwai,” ma e rangi n tamaroa anne bwa e kaota korakorara ni mwakuriia. Ma tiaki riai n taai nako n reiakinaki koaua aika boou. N tabetai warekan ana Boki Moomon bon ti ara namakin are ti kainnanoia n te bong aei ibukin ara reitaki ma te Atua—karikirakean nanora, ao kakorakoraakin tamneira imwaain kanganga ake ti na kaitarai ni maiura, ke kakaeakin kamaoakin nanora imwiin kaitiboora ma nakobuakan te maiu aei.
Ti kamatebwai koroboki aika tabu bwa e aonga te Tamnei ae raoiroi, are te tia reirei, ni kakorakora bitakin nanora nakon Tamara are i Karawa ao Iesu Kristo ao ni buokiira bwa tina kona n riki n Aekakiia
N aron tein ara iango aikai, ao ti kona ni kaangai, “Tera ae e a tia n reiakiniira te Tamnei ae Raoiroi inanon ara tai ni kamatebwaia ana Boki Moomon n te wiiki aei?” ao “E na kangaa ni kaniira nakon ara Tia Kamaiu?”
Aikai titiraki aika raraoi ibukin ara kamatebwain koroboki aika tabu i nanon mwengara. Bon titiraki naba aika a rangi n nakoraoi ibukin moan waakinan ara reirei n Tabati n tain te taromauri. Ti kanakoraoa ara anga reirei n tain te taromauri man kanakoraoan ara kamatebwai ni mweengaia inanon te wiiki koraki. Ngaia are, n ara kiraati n te Tabati, “ane e tataekinna ao ane e karekea, a oota imarenaia, ao a kaai ni karikirakeia ao a uaia ni kimwareirei.”
Aikai kiibu tabeua are e a tia te Tamnei ae Raoiroi ni kaoti nakon au iango man au kamatebwai n ana Boki Moomon inanon te wiiki aei:
-
E tuanga Iakobwa Nibwaai “bwa e na kaawakin bwaatua aikai ao n anganiia kanoau … man te roro teuana nakon te roro teuana. Ao ngkana a tataekin bwaai aika a tabu, ke ni kaotioti … , ke n taetae ni burabeti,” ao e riai Iakobwa “ni korei … iaon bwaatua aikai … [ibukiia] aia botannaomata.”
-
Imwiina ao e kamatoa Iakobwa n ana koaua, “Ti ukoukori kanoan [booki aika tabu], … ao n nooran kakoaua aikai ao ti karekea te kantaninga, ao aki kai kamwaeaki ara onimaki.”
Ngkai, a kauringai kiibu aikai bwaai ake e taekin Nibwaai imwaaina ibukin bwatua buraati:
“Ti a tia ni karekei taian rekooti … ao n ukeuke mai iai ao ti kunea bwa a … korakora bonganaia naba nakoira, ao ti na kona naba ni kateimatoai ana tua nako te Uea ibukiia natira.
“Mangaia ae, bon te wanawana iroun te Uea bwa ti na uotia ni mwanangara, i nanon mwanangara i nanon te rereua nakon te aba ni berita.”
Ngkai, ngkana e riai n otan Riaai ma ana utu bwa e na riai n iai irouia koroboki aika tabu, ao e riai naba bwa e na riai ni iai n otara n te bong aei. Kakawakin ma korakoran mwaakan koroboki aika tabu nakon tamneira e teimatoa n aki kerikaki otana inanon maiura ni boong aikai.
Akea riki rongorongoia botannaomata ae a kona ni karekea ana Boki Moomon n ikotaki ma koroboki aika tabu riki tabeua ake ti teimatoa ni kimwareirei iai ni boong aikai. Eng, a teimatoa ni kakabwaiaki Riaai ma ana utu ibukin uouotan bwatua buraati, e ngae ngke aki toa baia iai! Katotoon ana Boki Moomon ae te kabanea ni kakaawaki bon ane ko kawakinna bon iroum. Bwa anne are ti teimatoa ni wawarekia.
Ni miin Riaai i aon te kai ni kamaiu, ao e reireiniira iai Riaai kakaawakin ara atatai rinanon ana tangira te Atua ibukira. Imwiina ngke e tia ni kana uaan te kai, ao e noora buuna Riaai, ae Tiera, ma natina aika Nibwaai ma Taam bwa a tabe n tionako teutana.
“A tei n taraa n ae aki ataa te tabo ae a na nako iai.
“… I anoanoia,” E taku Riaai, “ao I tuangiia naba n te bwana ae baibati bwa a riai n nakoiu, ao ni kana te uanikai, ae moan te kangkang riki nakon uaanikai nako.
“Ao … bwa a nakoiu ao a kana te uanikai.”
I tangira aron te banna are kateia Riaai n tibwangana ni karo. Tiera, Nibwai, ao Taam a maiuakina te maiu, ae raoiroi ao kakaraoan te eti. Ma iai riki ae tamaroa ibukiia mai iroun te Uea, te bwai ae karewe riki ibukiia. Ma aki ataia bwa ana karekea iaara, ma ti Riaai ae ataia. Ngaia are e a weteia, “n te bwanaa ae baibati,” bwa a riai nakon te kai ni kamaiu ao ni kana uaana. E rangi mataata ana kaetieti. Akea te bwaintangira ae kakaawaki riki.
I a tia naba n kaitibo ma tein te aekaki n tibwanga ni karo aei. Ngke te ataeinimwaane ngai, tao 11 ke 12 au ririki ni maiu, ao e tuangai tinau, “Mark, ko a tia n ataia bon iroum, man mwaakan te Tamnei ae raoiroi, ae e koaua te euangkerio?”
I kubanako n ana titiraki aei. I a tia n teimatoa ni kataia n riki bwa te “ataeinimwaane ae ongotaeka,” ao Irou bon ti anne ae rangi n tau. Ma tinau, n ai aron Riaai, e ataia bwa iai riki te bwai ae kainnanoaki. I riai n mwakuriia ao n ataia bon irou.
I kaeka man n tuangnga ae e tuai man reke au tai n rinanon te bwai are tuangai. Ma e aki rangi n taraa ni kubanako n au kaeka.
Imwiina ao e taekina te bwai ae I aki kona ni mwaninga taekana. I uringa ana taeka ni karokoa te bong aei: “E tangiria Tamara are i Karawa bwa ko na ataia i bon iroum. Ma ko riai ni kaairia ma am mwakuri. Ko riai ni wareka ana Boki Moomon ao n tataro bwa ko na ataia rinanon mwaakan te Tamnei ae Raoiroi. E na kaekai am tataro Tamam are I Karawa.”
Ma, I bon tuai man wareka Ana Boki Moomon mai i mwaina. Irou I tuai n roro ni karaoa anne. Ma tinau e ataa riki ae riai ibukiu.
Ai aron ae e kaungaai ana titiraki aei bwa N na ataia bon irou.
Ngaia, are ni katoa tairiki, i nanon au ruu are ibuobuokia ma tariu ake uoman, ao I a kauraa au taura ae mena ietau ao ni wareka teuana mwakoron ana Boki Moomon. Ao ngke, I a tia n tiringa au taura, ao I ruo man au kainiwene ao ni katorobubua ao n tataro. I tataro ma nanou ni koaua ao ma nanou ni kan ataia ni kabotauaki ma nanou mai imwaina. I butia Tamau are i Karawa bwa e na taiaoka n anganai bwa N na ataa koauan ana Boki Moomon.
Man te tai anne ao I a moana au wareware n ana Boki Moomon, I namakinna ae Tamau are i Karawa e noora nanou ae korakora. Ao I namakinna ae iai Nanona irou. I nanon au tai ni wareware ao n tataro, ao e roko te mwengaraoi, ma namakinan te rau i aou. Te mwakoro teuana imwiin te mwakoro teuana, ao e tabe n rikirake otan te onimaki i nanou. Inanon te tai, ao I tabe n ataia ae namakin aikai bon kamatoaan te koaua mai iroun te Tamnei ae Raoiroi. Ao I a ataia i bon irou ae koaua ana Boki Moomon ao Iesu Kristo bon te Tia Kamaiu ibukin te aonaaba. I rangi ni kakaitau ibukin ana kakao tinau ae kaunganano.
Au taneiai ni wareka ana Boki Moomon ngke te ataeinimwaane ngai e kauka kawaiu nakon kamatebwaian koroboki aika tabu are e kateimatoa kakabwaiaakiu ni karokoa te bong aei. I teimatoa ni wawareka ana Boki Moomon ao n tataro ni katorobubua. Ao e teimatoa te Tamnei ae Raoiroi ni kaokioka koauana nakoiu.
Eti n aron are e taekinna Nibwaai. Bon kanoan te rabakau mai Iroun te Uea bwa inanon maiura ao ti riai n uouotii koroboki aika tabu. Ana Boki Moomon bon “kingin atibun te maninganinga” are angan te roro aei teina ae okoro ma rooro ake mai i mwaaina. Ngkana ti kamatebwaia ana Boki Moomon ao n ongeaba nakon te burabeti ae maiu ngkai, e na bon akea bwakara i nanon maiura.
Te kakao nakon te kai ni kamaiu man irirakin ana taeka te Atua bon tiaki ti te kakao mai iroun Riaai nakoia kaain ana utu, ao bon tiaki naba ana kakao tinau nakoiu bwa N na wareka ao n tataroakina ana Boki Moomon. Bon te kakao mai iroun ara burabeti ae, Beretitenti Russell M. Nelson, nakoira n tatabemaniira nako.
“I berita,” e taku bwa ngkana ko tataromwaaka ni kamatebwaia ana Boki Moomon ni katoabong, ko na karaoi babaire aika a tamaroa riki—ni katoabong. I berita bwa ngkai kam iangoa te bwai ae kam kamatebwaia, a na uki wintoon karawa, ao kam na karekei kaekaan ami titiraki ao kairan maiumi.”
Bon au tataro bwa wawarekan ana Boki Moomon inanon te ririki aei e na riki bwa te bwai ae kakukurei ao te kakabwaia nakoira n tatabemaniira nako ao ni kaniira iai ma ara Tia Kamaiu.
E maiu Tamara are i Karawa. Iesu Kristo bon ara Tia Kamaiu ao te Tia Kabooira. Iai i nanon Ana Boki Moomon Ana Taeka are E karokoa iai Ana Tangira nakoira. Beretitenti Russell M. Nelson bon ana burabeti te Uea ae maiu n te aonaaba n te bong aei. I ataia bwa bwaai aikai a koaua ibukina bwa e a tia ni kaotia te Tamnei ae Raoiroi, are ana kakoaua are I karekea ngke I moan wareka ana Boki Moomon ngke te ataeinimwaane ngai. N aran Iesu Kristo, amen.