Bwaai ni Kabane Ibukin Kabwaiara
N te tai aei ao ae akea tokina, te kantaninga n te Karikibwai ao aron raoi te Atua bon ibukin karokoan bwaai ni kabane ibukin arora.
Te bong aei bon 6 n Eberi—kauringan kaokan Ana Ekaretia Iesu Kristo ni boong aika kaitira— ao mwakoron bongin te Itita, ngkai ti kakoauaa ma te kimwareirei ni maiun Iesu Kristo ae kororaoi, ana anga karea ni kamaiu, ao Mangautina ae mimitong.
Te karaki mai Tiaina e moanaki n natin temanna te mwaane ae kunea te aoti ae tamaroa.
“Ai tekeraoira,” a taku kaain rarikina.
“Ti na noria,” e taku te mwaane.
I mwiina e bwaka te nati te mwaane man te aoti ao e tiku ni kakaiaki ikoakina.
“Ai tekebuakara,” a taku kaain rarikina.
“Ti na noria,” e taku te mwaane.
A roko taan karinrin n te tanga ni buaka ma aki anaa te nati are e ikoaki.
“Ai tekeraoira,” a taku kaain rarikina.
“Ti na noria,” e taku te mwaane.
Te aonaaba ae bibitaki aio e aki toki n namakinaki iai angibuaka, te aki rau, ao n taai tabetai te tekeraoi, ao—n angiin te tai—te tekebuaka. Ma, n te aonaaba ae karawaawata aio, “ti atai bwaai bwa a bane n ibuoboki ni karika te raoiroi ibukia akana a tangira te Atua.” Eng, ngkai ti mwananga n te etieti ao n uringa ara berita aika a tabu, “bwaai ni kabane a na kaai ni mwakuri ibukin ae raoiroi ibukimi.”
Bwaai ni kabane bon ibukin kabwaiara.
Te berita ae tamaroa! Te karaunano ae reke bon mairoun te Atua! N te kawai ae kamiimi aei, te kantaninga n te karikibwai ao aron te Atua ni koaua bwa E ataa te moa ao te toki; ni karekea bwa a na mwakuri bwaai ni kabane ibukin ae raoiroi ibukira; ao ni buokiira n riki ni kaitiakaki ao n tabu rinanon ana akoi ao ana Mwakuri ni Kamaiu Iesu Kristo.
Ana Mwakuri ni Kamaiu Iesu Kristo e kona ni kainaomataira ao ni kamaiura man ara bure. Ma e mataata raoi Iesu Kristo ni marakira ni kabane, rawawatara, aorakira, nanokawakira, kamaenakoara. N te tai aei ao ae akea tokina, Tokanikaina i aon te mate ao moone E kona ni kaetii bwaai ni kabane. E buoka ni kamarurunga are e uruaki ao ni karinanoaki, karekea te raoi irouia ake a un ao n aki boraoi, karau nanoia ake a maroaa ao ni katinanikuaki, kaungai nanoia ake aki koaua raoi ao n aki kororaoi, ao n uota te kakai are e ti kona n reke mairoun te Atua.
Ti anenea Areruia ao n takaruaa Otanna! Ma mwaakan karawa ao te tamaroa ae akea tiana, ni kabane bwaai a kona n bane ni mwakuri ibukin nakoraoin arora n ana babaire ni kakukurei te Atua. Ti kona ni kaitaraa te maiu ma te nanomatoa ao te aki maaku.
Ni katukaki n ti ngaira, ti na bon aki atai bwaai aika a raoiroi ibukira. Ngkana “I bon rineai,” I bon rinea naba oin au aki konabwai, mamarau, ao aki tauu. N tokin te tai, karaoan ae rangi n tamaroa, ti riai n tamaroa. Bwa bon akea riki ae tamaroa ma ti te Atua. ti ukora te kororaoi iroun Iesu Kristo. Ti riki ngaira n rangi n tamaroa iroura, ni koaua raoi ngkana ti katoka te nano n aomata ao n riki bwa te nati i matan te Atua.
Man ara kakoaua ao onimaki iroun te Atua, kataaki ao karawawata a kona ni katabuaki ibukin kabwaiara. Iotebwa, are e kaboaki nako i Aikubita, e kamaiuiia ana utu ao ana aomata rimwii. Kamatawarikan Iotebwa Timiti n te Karabuti i Liberty e reireinna“bwaai aikai a na anganiko te kataneiai, ao bon ibukin kabwaiam.” Te maeka ma te onimaki, te kataaki ao te anga nano ake ti bon aki rinei e kona ni kakabwaiaiira ma tabeman ni kawai aika ti aki kantaningai.
Ti kakorakoraa te onimaki ao te kakoaua iroun te Uea bwa a na mwakuri bwaai ni kabane ibukin kabwaiara ngkai ti karekea te taratara ae akea tokina; n atai katakira bwa tao bon ti i nanon te “tai ae e uarereke”; n atai karawawata bwa a kona ni katabuaki ibukin kabwaiara; ni butimwaea te kabuanibwai, te mate ae karina, te mamara n taian aoraki bwa mwakoron te maiu aei; ao n onimaki bwa Tamara are i Karawa ae tatangira e aki anga te kataaki ni karekei kaira ke n motiki taekara iai. E na aki anga te atiibu nakon temanna are e bubuti te kariki ke tiaki te naeta nakon are e bubuti te ika.
Ngkana e roko te kataaki, n angiin te tai te bwai ae ti rangi n tangiria bon temanna ae e na ongoraa iroura ao n raoniira. N te tai anne, kaeka aika a okioki a kona n aki ibuobuoki, ma bon ti ibukin te karaunano. N tabetai ti kantaningaa temanna bwa e na nanokawaki, maraki, ao n tang ma ngaira; ti na kaota te maraki, tao te un; n tabetai te marakinano; ao kakoauaa ma ngaira ae iai bwaai aika ti aki atai.
Ngkana ti onimakina te Atua ao Ana tangira ibukira, rawawatan nanora a kona ni mwakuri ibukin kabwaiara n tokin te tai.
I uringa te bong teuana ngke I karekea te rongorongo n te kabuanibwai ae korakora n te kaa ake a irekereke iai aika I tangiriia. N taai akanne, n te rawawata ao te onimaki, ti kona n taekinna ma Iobi, “E anga te Uea, ao E a manga uoti nako; e na karaoiroaki aran te Uea.”
N te Ekaretia ni kabutaa te aonaaba, titeiki ao mwakoro aika 3,500 ao uoote ao mwaanga aika 30,000 a katauraoi taabo ni katantan ao ni kamanomano man te angibuaka. Ma i nanon ara titeiki ao uoote, a mwaiti utu ao aomata n tatabemaniia aika kakaonimaki a kaitaraaki ma kakaewenako aika kangaanga, e ngae ngke a ataia (ke a tuai ataia) ae a na uaia ni mwakuri bwaai ni kabane ibukin kabwaiara.
I Huddersfield, i Engiran, e kuneaki te Tari Samuel Bridgstock bwa e kaentia n te kaaua n rinan tabeua te tai i mwaain weteakina bwa te titeiki beretitenti ae boou. Ibukin aorakina ae kakamaku aio, e titirakina kainabana, Anna, bwa bukin tera ae e na nako ni kaea te intawiu.
“Ibukina” e taku Titita Bridgstock, “bwa ae ko nang weteaki bwa te beretitenti n te titeiki.”
Mai moana e anganaki teuana ke uoua te ririki ni maiu, Beretitenti Bridgstock (ae mena ibuakora n te bong aei) e a tokara ana kaaua n ririki ni beku. E rinanon boong aika a tamaroa ao ni kangaanga. E katiteuanaaki ana titeiki ma te onimaki, te ibuobuoki, ao te akoi ae rikirake. E aki bebete, ma a maeka ma te onimaki kainabana ao ana utu, te kakaitau, ao ataakin te nanokawaki a kakoauaa bwa e na riki bwa te kimwareirei ae akea tokina rinanon Ana Mwakuri ni Kamaiu Iesu Kristo ae kaokaki.
Ngkana ti rau, tauraoi, ao ni karinerine, ti na namakina te tamaroa, te kantaninga, ao te rau ni kaainakin te berita ae tabu are e anga te Uea. I nanon taai aika tabu, E na kona ni kaota teutana rababan te maiu are akea tokina are bon mwakoron maiura ni katoabong, ike bwaai aika a uarereke man bebete a uaia ni mwakuri ibukin te raoiroi ibukiia naake a angaanga ao taan karekea.
Rebeka, ae natin au moan beretitenti n te mition ae te aine, e tibwaia bwa e kanga te Uea ni kaekaa ana tataro ibukin te rau ma reken te tai ae aki kantaningaaki ni kaekaan ana tataro temanna te aomata.
Ni bwakanakon te tai n te tairiki teuana, ngke e tabe n nanoanga Rebeka, i mwiin maten tinana, e karekea te namakin mairoun te tamnei bwa e na nako ni kaboa bwaan ana kaa. Ngke e roko n te tabo ni kabo bwaa, e kaitibo ma te aine ae e a kara ae e inimaki ni ikeike ma te tangke ni bwai ni ikeike ae bubura. I mwiina, Rebeka e anga nakon te aine arei ana mitiin ni ikeike tinana ae e uaraoi. E taku te titita aei ma nanona ni kakaitau, “Ko a tia ni kaoka nakoiu arou ni inaomata.” A bane ni mwakuri bwaai ibukin ae raoiroi ngkana ti ibuobuoki n aron are E karaoia Iesu Kristo.
E kabwarabwara te tama ae e katoaaki ma natina te mwaane ni karaoa te mwakuri n ibuobuoki, “Te mwakuri n ibuobuoki e riki ngkana ti bitaki man raao ngaira aika ti uoti kuukii nakoia raoraora aika onimakinakinaki, n riki bwa taan moan kaeka n te maiu n tamnei.” Te riki bwa kaain te berita ae tabu i nanon Iesu Kristo e anga te rau, te reitaki, te katabuaki.
I nanon taai ni kangaanga, te tatauraoi n te maiu n tamnei e kona ni kauringiira bwa Tamara are i Karawa e atai bwaai aika ti mena i nanona ngkana ti a rangi n rootaki ao ni maroaa. Te katooto, te utu ae e uotaki natiia n te amburanti nakon te onaoraki a kunea te rau i mwiina ngke a uringa ana wirikiriki te Tamnei ae Raoiroi n te bwai ae e na riki.
N taai tabetai rababan te maiu ae akea tokina ae e anganiira te Uea bwa ti na namakiniia ara utu are n iteran te rabuna. E kunea te kimwareirei te titita ni marooro nakon Iesu Kristo n ana euangkerio ae kaokaki. Ma e ngae n anne uoua kabuanibwai aika a rangi n roota maiuna—noran te kabuanibwai n te booti ao kabuanibwain tinana, are e bon bakabureia.
E ngae n anne te titita aio e tokanikai man maakakin te ran ao ni bwabetitoaki ma ni kateboaki. Ao n te bong ae karika te kakukurei, e kakoauaa n nora temanna n tei ibukin tinana are e a tia ni mate, ni bwabetitoaki n te tembora. “Te bwabetito n te tembora e kamaiua tinau, ao e anganai te rau,” e taku te titita aio. “Ai bon tibwa te moan tai ae I namakina te rau i mwiin maten tinau.”
E kaokioka kunara n taromauri ae tabu Ana karaunano bwa a na mwakuri bwaai ni kabane ibukin kabwaiara.
Ana Boki Moomon bon te kakoaua ae ti kona n taua i nanon baira bwa Iesu bon te Kristo ao te Atua e kakoroa nanona Ana taetae ni burabeti. E koreaki irouia burabeti ni mwaakan te tamnei ake a nora ara bong, bwa e moanaki Ana Boki Moomon man kangaanga aika a bon riki—te utu ae e inimaki ni waaki aika kakaokoro. Ma, ngkai ti kamatebwaia ao ni iangoa 1 Nibwaai 1 ni karokoa Moronaai 10, ti kaaniaki nakon Iesu Kristo ma te kakoaua ae matoatoa bwa tera ae riki ikekei ao i mwiina e kona ni kakabwaiaira ikai ao ngkai.
Bwa iroun te Uea, rinanoia burabeti aika a maiu, ni kamwaiti ana auti te Uea ni kanii riki nakoira n taabo aika kakaokoro, kakabwaia n te tembora ni mwakuri ibukin kabwaiara. Ti roko nakon te Atua ao Iesu Kristo man berita aika a tabu ao otenanti ao ni karekei ara nonori aika akea tokiia iaon te maiu ae mamate aei. Temanna i mwiin temanna, te ara teuana ma teuana, ti anga kaain ara utu aika a tangiraki—ara bakatibu—otenanti ni kamaiu ao kakabwaia n berita aika a tabu n ana kawai te Uea ni kamaiu iaon Maungan Tion.
Ngkai a kaan riki tembora nakoira n taabo aika a mwaiti, te anga karea n te tembora ae ti kona n anga bon ukoran te tabo ae tabu ni katoa tai inanon ana auti te Uea. I nanon ririki aika mwaiti, ti a tia ni kaikoiko, ni baireia, ao n anga are ti kona n roko nakon te tembora. Ngkai, ngkana e bon reke taina, taiaoka kamwaita riki am tai n nakon te Uea n Ana auti ae Tabu. Karika te nebonebo n te tembora n tainako ao te beku ni kakabwaiako, kamanoko, ao ni kaungako ma am utu—te utu ae ko mena i nanona ngkai ke ae ko na karekea ao n riki nako iai n te bong teuana.
Irarikina, ngkana e bon kona n reke taina, taiaoka iangoa te kakabwaia ni bon karekea oin kunikaim n te tembora. E taku tibu te unaine man au utu ae mangori bwa mai ibuakon bwaai n te aonaaba aei te bwai ae e moamoa tangirana bon oin kunikaina n te tembora. E taku tibuna te mwaane, “E wirikiriki tibu te unaine, ‘N a karaoa au beku ni bon oin kunikaiu n te tembora, ao ngkana I mate, N a taunaki ma ngaia.’” Ao ngke e a mate, e bon taunaki ma ngaia.
N arona ae e reireia Beretitenti Russell M. Nelson, “Ni kabane bwaai aika ti kakoauai ao ni kabane ana kakabwaia te Atua are E a tia ni karaoia ma Ana aomata i nanon te berita ae tabu a bane n roko i nanon te tembora.”
N te tai aei ao ae akea tokina, te kantaninga n te Karikibwai ao aron raoi te Atua bon ibukin karokoan bwaai ni kabane ibukin arora.
Aio bon Ana kantaninga te Uea ae akea tokina. Bon Ana taratara ae akea tokina. Bon Ana berita ae akea tokina.
Ngkana e a mangaongo te maiu ao e aki mataata raoi te kantaninga, ngkana ko tangiria ni maiuakina ae tamaroa ma ko aki ata arona, nakomai nakon te Atua ae Tamara ao Iesu Kristo. Kakoauaa bwa A maiu, a tangiriko, ao a tangiri bwaai ni kabane bwa a na mwakuri ibukin kabwaiami. I kakoauaa bwa A bon tangira aio, n aki totoki ao n akea tokina, n aran Iesu Kristo ae tabu man mimitong, amen.