Teirake! E Wewete Nakoina
Te euangkerio bon tiaki te kawai n totokoi kangaanga ma te aro n taobara ni karikirakea ara onimaki ao arora n reiakinna bwa ti na kanga ni kaitarai.
Tabeua te tai n nako I titirakina kainabau, “Ko kona n tuangai bwa bukin tera, n au ururing, ao ti bon tuai man reke kangaanga i nanon maiura?”
E taraai ao e taku, “Ko koaua. N na tuangko bwa bukin tera ti bon tuai man kaitarai kangaanga aika a bubura; ibukina bwa e rang ni uarereke am ururing!!”
Ana kaeka e bon buokai ni kauringai ae maiuakinan ana euangkerio Iesu Kristo e bon aki kanakoi rawawata ma kakaewenako, ake a riai n riki ibukin rikirakera.
Te euangkerio bon tiaki kawai n totokoi kangaanga ma kakaewenako n te maiu ma bon taobaraan te kangaanga ibukin karikirakean ara onimaki ao arora n reiakinna bwa ti na kanga ni kaitarai.
I karekea namakinan te koaua aei tabeua te namwakaina n nako ngke I nakonako n te bong teuana ao n te tai ae karina e a mabubu au taratara, n roo, ao n taanoi. I maaku. Imwiina e tuangai te taokita, “Ngkana ko aki waekoa ni bwainaorakiia, ko kona ni matakii ni wiiki aika a na roko.” I a bon taoanki riki n te maaku ae korakora.
Ao i mwiina a taku,“Ko kainnanoa te iti nakon te mata—iiti nako nanon te mata, ae kaureaki raoi—ni katoa aua te wiiki ni karokoa tokin maium.”
Anne bon te bwai ae e aki karauai.
E roko i mwiina te iango n ai aron tein te titiraki. I titiraki i bon irou,: E Raoiroi! E aki raoiroi au taratara, ma ai tera aron au taratara n te maiu tamnei? Iai bwaai aika kainanoaki bwa na bwainnaorakiia ikekei? Ao tera ae nanonaki n ae e na itiaki au taratara n tamnei?”
I iangoa rongorognon te mwaane ae mataki ae Batimea, are e kabwarabwaraaki n ana euangkerio Mareko. Ao e taku taekan te kibu aei, “Ao ngke e ongo bwa ngaia Iesu tei Natareta, e moana tangina, ao n taku, Iesu, are natin Tawita, nanoangaai,”
Ni bon koauana, n aia taratara aika mwaiti, Iesu bon natin Iotebwa, ma e aera ngkai e weteia Batimea bwa “Natin Tawita”? Ibukina bwa e ataia bwa Iesu bon te Mesia, are e taetae ni burabetiaki bwa e na bungiaki man te kanoa are Tawita.
E rang kakaongora te rongorongo, bwa te mwaane ae mataki aei, e kina Iesu. E nooria n te aro n taamnei are e aki nooria n rabwata, ngke tabeman a kona n noora Iesu n te aro n rabwata ma a mataki n tamnei.
Ti reiakinna man te karaki aei taekan kaitiakan ara taratara n tamnei.
Ti warekia bwa, “A mwaiti aomata ake a takuia ao n tuangnga bwa e na aki karongoa, ma e kanenea riki bwanaana n takarua ni kangai, Natin Tawita, nanoangaai.”
A bane aomata ake irarikina n tuanga bwa e na aki karongoa, ma e kanenea riki bwanaana ibukina bwa e kina Iesu. E aki kan kubari bwanaa ake ongo ao n kanenea riki bwanaana n takarua.
E karaoa are taku ao n aki tataninga te bae e na tuangaki. Ribuakon nako ana kangaanga, ao e kabongana ana onimaki bwa e aonga n roko riki n te mwaneka are i aona.
Ma ngaia, are te moan reirei are ti reiakinna bwa Ti na kateimatoa itiakin ara taratara n tamnei ngkana ti katurua ara taratara iroun Iesu Kristo ao n teimatoa ni kokoaua nakon ake ti ataia bwa a bon koaua.
Tariu ao Mwaneu, ti riai n aki ongo ni bwanaa ake a katobibiira n te aonaaba, bwa ti aonga ni kateimatoa itiakin ara taratara n tamnei. N te aonaba ae mangaongao ao ni kamangaongao, ti riai n teimatoa ni kakaonimaki nakon baike ti atai, kakaonimaki nakon ara berita aika a tabu, kakaonimaki ni kawakinan tuua, ao ni kamatoai riki ara koaua, n aron are e karaoia te mwaane aei. Ti riai n takarua ao ni kanenei bwanaara ni kaoti ara koaua nakon te aonaba iroun te Uea. Te mwaane aei e kina Iesu, ao e teimatoa ni kakaonimaki nakon ana koaua, ao n aki muutiakini bwaana ake a katobibia.
A mwaiti bwanaa n taai aikai ake a kataia ni kauarerekea bwanaara ngaira aika ana reirei Iesu Kristo. Ti rabunaki ni bwanaan te aonaba n te aro ae ti aki kona ni karongoa, ao anne bukina bwa ti riai ni kaota ara koaua n te bwanaa ae korakoran iroun te Tia Kamaiu. Ibuakon nako bwanaan te aonaba, ao e warekai te Uea bwa ngai temanna are nna tataekina au koaua, ao ni kaota bwanaara, ao ti na riki bwa Bwanaana. Ngkana ti aki karaoi baikai, ao antai ngkanne ae nang riki bwa taan kakoaua Iesu Kristo? Antai ae na tataekina Arana ao ni katanoata Ana mition mai karawa?
Iai katabeakira n te maiu n tamnei are na roko man ara atatai mai iroun Iesu Kristo.
Tera ae karaoia Batimea i mwiin anne?
Ngke e tua te Uea nakoina bwa e na teirake, e karaoa nanon anne ma te onimaki.
E taekinaki ni koroboki aika tabu bwa, “E, karenako oneana mai i aona, ao e teirake, ni kawara Iesu.”
Te mwaane ae kakaonimaki ao n nanorinano aei e ataia bwa e na bon teirake nakon te maiu ae tamaroa n ana taeka Iesu. E ataia bwa e a nakoraoi riki maiuna nakon ana kangaanga, ao te moan bwai ae karaoia ngke ongo ana wewete Iesu e bon karenako oneana are raemangamanga.
E a manga karaoa te mwakuri nakon are e na tataningaa te bwai ae na tuangaki.
Tao e roko n ana iango ni kangai, “I aki manga kainanoa aei, ngkai e a roko Iesu n rin i nanon maiu. Aio bon te bong ae boou. I a tebenako man karawawatan te maiu aei. Ngkana raou Iesu ao N na kona ni waakina te maiu ae boou ao ni karekea te kimwareirei Irouna, ma Ngaia, ao Irouna. Ao N na bon aki tabe ma taekau ake a wai man te aonaba. E a weteai Iesu, ao E na buokai ni waaki i nanon maiu ae boou.”
Bon te bitaki ae rang tamaroa!
Ngke e karenakoi oneana aika raemangamanga, ao titebo ngke e karuoi ni kabane kangaanga n te maiu.
Aio te bon te kauoua n reirei: ti kawakina itiakin ara taratara n tamnei ngkana ti kitana arora n aomata, n raira nanora, ao ni moana te maiu ae boou i nanon Kristo.
Te kawai ibukin karaoan aei bon man karaoan ao kawakinan ara berita bwa ti aonga n teirake nakon te maiu ae tamaroa riki rinanon Iesu Kristo.
Ngkana ti karekei angara n namakina ae ti bon raraomaeakina arora, te raraoma ibukin arora ao ara kangaanga, ao n nanokawaki ibukin bwaai ni kabane ni maiura aika a bubuaka aika riki i nanon maiura, ao bon aomata aika buakaka ake ti taku bwa a karika aki kukureira, ti bon bwainii oneara aika raemangamanga i aon angara. E koaua bwa n taai tabetai, aomata a bon nanonna raoi ke aki , ni kamarakiira. Ma ti riai ni baireia ni kammwakura ara onimaki iroun Kristo man kanakoan te iango ae memeere are e mena iroura bwa karekean angara ke ni kaairua ao ni karenakoi, n ataia bwa E kona ao e na bon kamaiura.
Bon akea ara aanga ni kona n taekina ae kangai, “Bon ngai te kawai ao bon ngai ae I karaoi kangaanga aikai bwa a na kaoti. I aki kona n bitaki, ao n rawa ni kan butimwaea.”
Ngkana ti iango n arona anne, ao ti bon baireia bwa ti tutuangaki te bwai ae ti na karaoia.
Ti teimatoa n tuai ni karenakoa oneara aika raemangamanga.
Kammwakuran te onimaki nanona bwa ti na katan irounara Tia Kamaiu, ao ni kakoaua bwa man ana Mwakuri ni Kamaiu, ti kona n teirake i aon bwaai nako ngkana e E tuangira.
Te kateniua n reirei bon kabanea n taeka aika aua: “[e] roko iroun Iesu.”
E na kanga n nakon Iesu ngkai bon te mataki ngaia? Te kawai bon ti mwanangara nakon Iesu man ongora n Ana taeka.
Ao aio te kateniua n reirei: Ti na kateimatoa itiakin ara taratara n tamnei ngkana ti kakauongo nakon Bwanaan te Uea ao n kariaia bwa E na kairiira ni maiura.
Kanga ai aron te mwaane aei ngke kanenea bwanaana nakon bwanaa ake a katobibia, e kakauongo raoi nakon bwanaan te Uea ibuokon bwanaa aika mwaiti.
Te onimaki aei kanga ai aron ana onimaki Betero ngke e mwananga i aon taari ao ni katurua ana taratara n tamnei i aon te Uea ao n aki tabe ma te ang are korakora ni katobibia.
E motikaki rongorongon te mataki aei ma te taeka ae kangai “e a noraba, ao n iriira Iesu.”
Teuana te reirei ae kakawaki man te karaki aei bwa te mwaane aei e bon kamwakura ana onimaki iroun Iesu Kristo ao e karekea te kamaiuaki ibukina bwa e bubuti ma nanona ae koaua, te nano ae koaua bwa e na iriiriia.
Ao aio raoi bukina ngkai ti teimatoa ni kareikei kakabwaia i nanon maiura, ibukina bwa ti iriira Iesu Kristo. Bon taekan Kinaakina, karaoan ao kawakinan ara berita ma te Atua bon mai Irouna, e kona n bitaki maiura mai Irouna, ao n teimatoa ni karokoa te toki mai Irouna.
I bon irou, ao kaitiakan ara taratara n tamnei bon katuruan ara taratara iroun Iesu Kristo.
Ma e itiaki au taratara n tamnei ngke I karekea itinakin matau? Eng, antai ngai bwa N na taekinna? Ma I rang kakaitau ibukin bwaai ake I nooria.
I noora ni koaua bain te Uea n te mwakuri ae tabu aei i nanon maiu.
I noora aia onimaki aika mwaiti n taabo ake I nako iai ake akakorakora au onimaki.
I nooria anera ni katobibiai.
I noora aia onimaki aika mwaiti ake a bon aki noora te Uea n rabwatana ma a nooria n aia taratara n tamnei, ibukina bwa a bon kina i nanoia.
I kakoaua bwa te euangkerio aio bon kaekaan titiraki ni kabane, ibukina bwa Iesu Kristo bon te kaeka ibukira ni kabane. I kakaitau ni bwaai ake I noori ngkai I iriira au Tia Kamaiu.
I berita bwa ngkana ti ongo bwanaan te Uea ao ni kariaia Ngaia bwa e na kairiira ni kawain te tia Kamaiu ae tabu, ti na kakabwaiaaki ma itiakin ara taratara, mataata n tamnei, ao raun te nano ao te iango ni kabanea maiura.
Ke ti kanenea ara koaua Irouna nakon bwanaa ake irarikia n te aonaaba are e kainanoia riki bwa e na ongo ae bati n taekan Iesu Kristo ao tiaki ae karako. Ti riai ni karenakoi onea aika raemangamanga ake a teimatoa ni mena i aora ao ni mena n te aonaaba ae tamaroa riki i nanon ao rinanon Kristo. Ti riai ni kanakoi ni kabane iango ake a na totokoira n iriira Iesu Kristo ao ni kunei aaro aika a raraoi n iriiria ngke ti ongo bwanaana. Aio au tataro n aran Iesu Kristo, amen.