Onimakina te Uea
Ara reitaki ma te Atua e na rikirake bon ti nakon arora n tangiria ni katuka ara onimaki Irouna.
N ara utu, ti tatakakaro n tabetai n te takakaro ae ti aranna bwa “Karaoan Onimakinan Temanna n ae Riao.” Tao kam a bon tia n takakaronna naba. Uoman aomata a tei tabeua te buuti raroaia, temanna e a anga akuuna nakon are temanna. E anga ana kanikina teuare mai akuu, ao teuare mai moa e a rara nako naba ni bwaka nako mwanokan bain raoraona are e a kaman tataninga.
Te onimaki bon ngaia aan te reitaki ni kabane. E kangai teuana te titiraki ae kaineti ma aron reitaki ni kabane “I kona n onimakina te aomata are temanna?” E reke te reitaki ti ngkana a kukurei aomata ni karekea te onimakinaki imarenaia. Bon tiaki te reitaki raoi ngkana iai ana onimaki are temanna ma are temanna akea.
Ngaira ni kabane bon “naati mwaane ma aine iroun Tamara are i Karawa aika A tangiraki.” Ma ngkai reitinakon maiun tamneira a katauraoa araa, n ti ngaia e aki karika te reitaki ae matoatoa anne ma te Atua. E kona n ti kateaki te reitaki ngkana ti rineia bwa ti onimakinna.
Tamara are i Karawa e tangiria ni karaoa te reitaki ae matoatoa ma ngaira ao Natina n tamnei ni kabane. E kaota nanona anne Iesu ngke E tataro, “Ba a na bane n riki n teuana; n ai arora, ngkai Ko mena i nanou, Tamau, ao Ngai I nanom, ba a na mena naba inanora.” Te reitaki ae e ukoria te Atua ma ngaira aika natina n tamnei bon teuana ae ibon ibukiu ao e onoti are E na kona n tibwai ni kabane ake a na bwai ao bon Ngaia. Te aeka n reitaki aei ae nano, ao akea tokina e na tii kona n rikirake ngkana e kateaki iaon te onimaki ae tamaroa, ao ni kororaoi.
Ibukin Tabeaiangana, e a tia Tamara are i Karawa ni mwakuri man te moantai ni kabutanakoa Ana onimaki n aia konabwai mai ieta Natina ni kabane. Te onimaki bon aan te babaire are e Kanakoa ibukin rikirakera ao ara waaki imwain nakomaira nakon te aonaaba. E na reireiniira tuua aika akea tokiia, e na karika te aonaaba, e na anganiira rabwatara aika mamate, e na anganiira te bwaintangira bwa ti na rineia bon ibukira, ao ni kariaira bwa ti na reirei ao n rikirake man karaoan oin ara rinerine. E tangiriira bwa ti na rineia ni irii Ana tua ao n oki ni kakukureira n te maiu ae akea tokina ma Ngaia ao Natina.
Ngkai ti ataia bwa tiaki kona n teimatoa ni kakaraoi rinerine aika raraoi, ao E a tia ni katauraoa te kawai ibukira bwa ti na kona n butaki nako man rinerine aika aki raoiroi. E anganiira ara Tia Kamaiu—Natina, Iesu Kristo—bwa e na kamaiura ao ni kaitiakiira man ara bure n te rairannano. E kaoira bwa ti na kabongana n tainako te bwaintangira ae te rairannano.
E bon kangaanga irouia kaaro bwa a na anga te onimaki ae tau nakon te ataei bwa e na karaoi oin ana babaire, riki ngkana e bon ataia te karo ae e na kona n reke n te korakai te ataei ngkana e karaoa te kairua. Ma Tamara are i Karawa e anganiira te kariaia ni karaoi rinerine ake a na buokiira ni karokoira n ara konabwai mai karawa! N aron are e reireia Unimwaane Dale G. Renlund, “[Ana] kouru n nakoana ni karo tiaki kariaiakaia Natina bwa a na karaoa ae eti; bon kairaiaiakaia Natina bwa a na rinea ae eti ao n tokin te tai n riki n ai Arona.”
Irarikin are e onimakiriira te Atua, e ti kona n rikirake ara reitaki ma Ngaia ti ngkana iai nanora n Onimakinna. Te kangaanga bwa ti a maeka n te aonaaba ae e bwaka ao n namakina kamwaneakin ara onimaki man rikin te aki kokoaua, babakanikawai, ke anaan nanoia aomata tabeman, ke aro riki tabeua. Ngkana ti ataia ae ti kamwaneaki, e kangaanga ae ti na manga onimakina temanna. Rinanon taneiai aika aki tamaroa n onimakinan temanna ma aomata aika aki kororaoi e na korakora kairorona iaon arora n onimakina Tamara are i Karawa ae kororaoi.
Tabeua te ririki n nako, uoman raoraou, Leonid ao Valentina, a kaota nanoia ni kan riki bwa kaain te Ekaretia. Ngke e a moana reiakinan te euangkerio Leonid, e kunea ae e babanga n tataro. Ni moan rikirakena, e a tia Leonid ni korakai man te mwamwanaaki ao te kairi buaka mairouia mataniwi ike e a karikirakea aki onimakinaua taab kairiiri. Taneiai aikai a roota arona ni kauka nanona ao n kaota te bwai are e bon namakinna nakon Tamara are i Karawa. Inanon taina ao ma te kamatebwai, e rikirake n tamaroa ana atatai Leonid iaon anuan te Atua ao n namakina Ana tangira te Atua. N tokin te tai, e a riki te tataro bwa kanga te bwai ae e tataneiai iai ni karaoia ni kaota ana kakaitau ao n tibwa te tangira are e namakinna ibukin te Atua. Ana onimaki iroun te Atua e a kairia ma Valentina n rin inanon te berita ae tabu ni kakorakoraa aia reitaki ma te Atua ao i bon marenaia.
Ngkana buan te onimaki mai imwaina e taukiko man onimakinan te Atua, taiaoka ira ana katooto Leonid. Reitinako nanomwaaka n reiakina riki taekan te Atua, Anuana, Kateina, ao Ana kantaninga. Taratarai ao tauii mwiin taneiai n namakinan Ana tangira ao mwaakana inanon maium. Ara burabeti ae maiu, Beretitenti Russell M. Nelson, e a tia n reirei bwa kabatian riki am atatai iroun te Atua, e na karika riki bebeten Onimakinana iroura.
N tabetai ao te kabanea n tamaroa ni kawai n reirei n onimakina te Atua bon ti man Onimakinana. N aron “Karaoan Onimakinan Temanna n ae Riao” e kainanoa n tabetai te tauraoi n einako nako bukim ao kariaia Ngaia bwa e na tikobiko. Maiura ae mamate aei bon te tai ni kataaki Kakaewenako ake a riaon ara konaa a aki toki n ririki. Ngkana ara ataibwai ao matatara aikoa tau, ni bon etina ti na bae ni kakae nako ibukin bwaai ni ibuobuoki. N te aonaaba ae onrake n aekan rabakau aika mwaiti, e aki kona n tare bwaai n ibuobuoki ni kunean katokan ara kangaanga. Ma e ngae n anne, te reirei ma ngkoa ae kinaaki n Taeka n Rabakau e anga te reirei ae tamaroa: “Ko na onimakina Iehova n nanom ni kabanea.” Ti kaota onimakinan te Atua man rairakira moa Nakoina ngkana ti kaitaraaki ma kangaangan te maiu.
Imwiin banen au tai man au reirei iaon te tua Utah, ara utu a kaitraaki ma karaoan te rinerine ae kakawaki bwa ti na mwakuri iia ao ni maeka iai. Imwiin maroroakinana imarenara ao ma te Uea, ti namakina kairara bwa ti na mwaing ma ara utu nako maeao n te United States, n raroanako ma ara karo ao tarira ma mwanera. N te moan tai, a bane n nakoraoi bwaai ni kabane, ao ti namakina ae kamatoaaki ara babaire. Ma imwiina a bitaki bwaai. E a boo te kauarereke n ara kambwana are I mwakuri iai n te tua, ao e nang bua au mwakuri ao intuarenti n te tai are natira te aine ae Dora e bungiaki ma te kangaanga ni marurungina ao e kainanoi bwaai n ibuobuoki i nanon te tai ae maan. N tain kaitarakira ma kangaanga aikai, I a weteaki nakon te beku are e kainanoa te tai ae korakora ao te motinnano.
I tuai man kaitara ma aekan kangaanga ae aron aio ao I a rangi n rootaki iai. I a moanna n aki kakoauaa te babaire are ti a tia ni karaoia ao taian kamatoa ake a roko ma ngaia. Ti a tia n onimakina te Uea, ao a riai n nakoraoi bwaai ni kabane. I a tia n einako nako bukiu, ao ngkai e tara n ae akea temanna ae tauraoi ni raweai.
N te bong teuana te taeka ae “Tai titiraki bwa bukin tera; ma titiraki bwa tera ae ko na riai n ataia” e roko n te tai naba anne n au iango ao nanou. Ngkai I a bon taonaki riki n te aki rau. I bon inanon te tai are I a minotaki iai n au babaire are mai i mwaina, e wewete te Atua bwa n na Onimakinna riki nakon are mai i mwaaina. Ngkana I tarai taai ake a nako, aio bon te tai ae kakawaki i nanon maiu—bon te tai are I a ataia bwa te kawai ae e rangi n tamaroa n onimakinan te Atua bon man katukan te onimaki i Rouna. I nanon wiiki ake i mwiina, I miimi n noria bwa ana kakai te Uea e kaotaki n Ana babaire ni kakabwaiaia ara utu.
Taan reirei ma taan kairiiri aika tamaroa a ataia bwa rikiraken wanawanara ma korakoran rabwatara e kona n reke ngkana ara iango ma ara mwatireti a kamwakuraki. N ai arona naba, e kaoiira te Atua bwa ti na rikirake man onimakinan Ana anga reirei n maiun tamneira rinanon kataneiaan kamwakuran nanora. Ngaia are, ti kona n ataia bwa tao tera ara onimaki are ti a tia ni kaotia n taai aika nako iaon te Atua, e na kona ni manga iai riki kataneiaan kamwakuran ara onimaki ae na kaoti i mwina. E katurua ana taratara te Atua iaon rikirakera ma ara konabwai. Bon Ngaia te Mataniwii n tia Reirei, te tia kairiiri ae e aki toki ni buokiira bwa ti na atai riki ara konabwai ake mairoun te Atua. E na raonaki anne n tainako ma te kakao n taai aika a na roko bwa ti na Kakoaua riki.
E reireiniira ana Boki Moomon taekan te kawai are e kabongana te Atua ni kammwakuriira bwa E angoa ni karikirakea te reitaki ae korakora ma ngaira. I nanon Nakomai, Irirai, ao ti a reirei aron kataakin onimakinan te Atua iroun Nibwaai ngke e tuangaki ma tarina bwa a na okira Ierutarem n anai bwaatua ake buraati. I mwiin aki nakoraoin moan aia kakatai are a karaoia, a bwara nanoia tarina ao a tauraoi n okirikaaki n akea bwaatua. Ma e rineia Nibwaai bwa e na kabanea ana onimaki iroun te Uea ao e tokanikai ni karekean bwaatua. Te taneiai anne e bon kakorakoraa ana onikaki Nibwaai i roun te Atua ngke e uruaki ana kai ni katebe ao ana utu aitara ma te bora ni baki i nanon te karereua. Ao e a manga rineia naba Nibwaai bwa e na onimakina te Atua, ao a kamaiuaki ana utu. Tokanikai ni baika e rinanona aikai e angan Nibwaai kakorakoraan ana onimaki iroun te Atua ibukin manga tibwangana are manga tei naba i mwaaina are—kabaakin te kaibuke.
Rinanon tokanikai aikai, e kakoakoraa ana reitaki Nibwaai ma te Atua n reitinako ao ni kateimatoaan ana onimaki Irouna. E kabonganaa naba te aekaki ni kawai aei nakoira te Atua. E anganiira wewete nakoira ibukin kakorakoraakin ao kabotoan ara onimaki i rouna. Ni katoa tai ngkana ti kariaia ao ni mwakurii wewete aikai, ao a na rikirake ara onimaki iroun te Atua. Ngkana ti tannako ke n totokoa te kakao, e na toki rikirakera ni karokoa ti a manga waaki iaon te wewete ae boou.
Ma te rongorongo ae kakukurei bwa e ngae ngke ti a tia n aki karokoraoa ara onimaki iroun te Atua i nanon taai aika nako, ma ti kona ni manga rineia bwa ti na onimakinna n te bong aei ao i nanon bongin ara waaki nako. I berita bwa ni katoa tai are ti karaoia, e na mena ikekei te Atua n raweira, ao ara reitaki n onimakinana e na rikiraki n rangi ni matoatoa ni karokoa te bong are ti na katiteuanaaki ma Ngai ao Natina. Ngkanne ti kona n taekinna n aron Nibwaai, “O te Uea, I a tia n onimakiniko, ao N na onimakiniko n aki toki.” N aran Iesu Kristo, amen.