Nanon te Atua Bwa E na Kairiko Nakon Mweengana
Ana babaire ni kabane te Tama ibukiia natina aika tangiraki e kateia bwa e na uotiia aomata ni kabane n oki nakon mweengana.
I kan kaota au kakaitau ibukin ami tataro ngkai I a waaki ni kataneiaai nakon weteau, rinanon Beretitenti Nelson, ni beku bwa ana Abotoro te Uea Iesu Kristo. Kam kona ni katamneia n ami iango aron namakinan te nanorinano aei, ao e a tia n riki bwa te tai n onikaki ao n tirobaea arou. Ao aio, ni koauana, bon te mwioko ae rine ni beku ibukin te Tia Kamaiu, n aanga nako, ao ni mwakuri ma ngkami n tibwaan te rongorongo ae raoiroi n Ana euangkerio ae karekea te kantaninga.
I rarikin anne, e tataekinaki bwa rineakim bwa te abotoro ae boou ae korakora riki kubanakona bon tinan kainabam. I aki ataia ngkana bon anne ae taekinaki, ma n aron rineakiu, e bon kona ni koaua. Ao I kanamakinna bwa ngkai akea irarikira tinan kainnabau e na bon bae ni miimi ma ni kubanako.
Tabeua namwakaina n nako, ngke I mwananga ma kainnabau nakon te aba teuana ibukin karaoan mwiokoau n te Ekaretia, I uti n te ingabong teuana ao n taraa tinaniku man wintoon ara utero ma te matutu. Inanon te kawai ae e ibetutu kaaina, I nooria bwa e a kainaki te kawai ma te bureitiman n tei ni kaokiia kaa ngkana a roko n te tabo are e kainaki. N te tai anne, bon tii tabeua kaa ake a roko ao ni kaokaki. Ma inanon te tai ae maan ao a mwaiti kaa n roko, e a rerena te kaa n tei.
Man te wintoo mai i etan, I matakuakina te bureitiman ae taraa ni kukurei ni kamwakura mwaakana n tuuka te kawai ao ni kaokiia aomata. Ni koauana, ti tebo ma te aomata ae angang, ni kibakiba ni kukurei, ngkai a roko kaa n te tabo are e kainaki. Ngkana iai te turaiwa ae un ngkai e tukaki te kawai, e aki taraa ni kan ibuobuoki ke n nanoanga. E bon tii ioioa atuuna ao ni kotea te kawai are teiterana.
Raoraou, aika taan iriira Kisto i aon kawaira n te maiu ae mamate, ana babaire ae tamaroa Tamara, ae “moan te kamiimii” , e katauraoaki ibukin okiran mweengam, tiaki ae e na katikuko. Akea ae e a tia ni katea tuukan te kawai ao ni kaaki temanna n te tabo anne bwa e na kaokiko ao ni kanakoko. Ni bon koauana, bon kaitaraana raoi. E reitinako te Atua ni kan rereitaki ma ngkoe. E “tangiriia Natina ni kabane bwa a na rineia ni manga oki Nakoina,” ao E karaoi bwaai ni kabane ni buokiira ni kaokiira nakon mweengana.
Tamara are i Karawa e tararuaa aron Karikan te aonaaba aei n oin te kantaninga ibukin katauraoan te tai ibukim ao ibukiu bwa ti na karekei ara taneiai n te maiu ae mamate, te tai ni kabonganai inaomatara are e anganiira te Atua n Rineia, n reirei ao n rikirake, ni karaoi kairua, n rairinanora, n tangira te Atua ao raoraora, ao n te tai teuana ti na manga oki nakon Mweengana.
E kanakomaia Natina ae Tangiraki nakon te aonaaba ae bwaka bwa E na maiu n rinanon are a rinanona aomata,, ni katea te banna ni kakairi ibukiia Natina ni kabane bwa a na iria, ao ni mate ao ni kabooa maiura. Ana bwaintangira Kristo n ana mwakuri ni kamaiu e kamwaawai totoko man te mate n rabwata ao n tamnei are e na kararoaira man mweengara i karawa.
Ana babaire ni kabane te Tama ibukiia natina aika tangiraki e kateia bwa e na uotiia aomata ni kabane n oki nakon mweengana.
Tera aran te babaire aei ae a aranna ana tia uarongorongo te Atua, Ana burabeti, n te booki ae tabu ae Kaokaki? A aranna bwa te babaire ni kaboakira, te babaire n nanoanga, ao te babaire ni kakukurei ae korakora, ao te babaire ni kamaiu are bon ibukira ni kabane, “rinanon raraan au Rikitemanna.”
Nanon te Tama n ana baaire ni kakukurei ae korakora bon kukureira, ikai n te tabo aei, ngkai n te tai aei, ao n akea tokina. Bon tiaki tuukan kukureim ao ni karika raraomam ao maakum.
Nanon te Tama n ana babaire ni kaboomwi bon ibukin kabooan maiura, kamaiuara man karawawataakin ao maten Iesu Kristo, ni kainaomataaki man te tautoronaki n te bure ao te mate. E aki katikuko n arom.
Nanon te Tama n ana baaire n nanoanga bon anganakira te nanoanga ngkai ko oki Nakoina ao ni karinei am berita man am kakaonimaki Nakoina. Bon tiaki kakeaan te nanoanga ao karikan te maraki ao te nanokawaki.
Nanon te Tama n ana babaire ni kamaiu bon ibukin kamaiuakira n te abanuea are te tiretio ngkai ti karekea ara “koaua iroun Iesu” ao n anga nanora ae bwanin Nakoina. E aki katinanikuko.
Tao nanon aei bwa ai akea tuua ni kaira aron maiura? Bwa te kawai ae ti rineia ni kabongana inaomatara e aki kakawaki? Bwa ti kona n anai ke ni katikui ana tua te Atua? Tiaki, bon tiaki. Ni koauana teuana mai buakon ana kakao ao ana bubuti Iesu n Ana tai ni mwakuri i aon te aba bwa ti na bitaki ao n rairinanora ao n oki Nakoina. N aanaki i aon Ana angareirei ni kabane ni maiuakinan kainibaire aika a rietaata rinanon te maiu ae raoiroi bon te kakao ibukin rikirakem, n onikan te onimaki iroun Kristo, nakon bitakin te nano ae korakora.
E tangiriira te Atua bwa ti na bita arora n iango ni bangaomata ao ni kainikatonga, ni katuka te aro n aomata, n “nako, ao tai manga bure.”
Ngkana ti kakoaua nanon te Tama n ana babaire are bon ibukin kamaiuiira, kaboakira, ao n nanoangakira, ao n anganiira te kukurei, tera nanon te Nati are Mairouna ao e kakoroaki bukin te baaire ae korakora aei?
E taetae nakoira te Nati: “Ba I ruo mai karawa, tiaki i bukin te karaoa oin nanou, ma bon i bukin te karaoa nanon Teuare kanakomaiai.”
Ana kantaninga Iesu bon ana kantaninga te Tama n atataiaomata! E tangiria bwa e na kona ni karaoaki aei nakoia Natina ni kabane bwa a na karekea tokin ana kouru n te babaire aei—te maiu ae akea tokina ma Ngaiia. Akea temanna ae e na katinanikuaki man te konabwai mai ieta aei.
Ngkana ko iangoia n raraoma bwa e na aki reke iroum, ke te tangira n nanoanga n Ana Mwakuri ni Kamaiu Kristo e rootiia tabeman, ma tiaki ngkoe, ngkanne e kairua mataatam. Akea Tokina nanona akea tiana. Akea Tokina e bautiko ma naake ko tangiriia.
E kabwarabwara te koaua ae tamaroa aei Nibwaai: “Bon akea te bwai ae kakaraoia ma ti bwaai aika a na kawaaka te aonaba; bwa e tangira te aonaba, n te aro are e anga oin maiuna bwa e aonga ni kairia aomata ni kabane nakoina. Mangaia ae, bon akea temanna are e tuangnga bwa e na aki karekea ana kamaiu.”
Te Tia Kamaiu, te Tia Kawakin Tiibu, e nako n ukoukoriia Ana tiibu aika a bua ni karokoa E kuneiia. E “aki tangira maten temanna.”
“E aroraki baiu ae nanoanga nakoimi, ao ane e roko nakoiu, N na butimwaia.”
“Iai ibuakomi ae aoraki? Uotiia mai. Iai ibuakomi ae mwauku, ke e mataki, ke e ikoaki, ke e aki konabwai, ke e rebera, ke e rai, ke aika a bonotaninga, ke a karawawataki n aekaia nako? Kairiaa mai ao N na katoka aorakiia, bwa e a onrake nanou n te nanoanga ibukimi.”
E aki kanakoa te aine ae e nraaraa, E aki nanomwaraa iroun te reebera; E aki totokoa te aine ae kuneaki ni bure; E aki totokoa te tia raraoma ni koaua— n aki tabe bwa tera aia bure. Ao E bon aki kona n tuukiko ke naake ko tangiriia ngkana ko uota Nakoina nanom ae uruakin ao tamneim ae raraoma. Anne bon tiaki nanona ke Ana banna, ke Ana babaire, oin ana kantaninga, are e tangiria ni kan karekea, ke ana kantaninga.
Tiaki, E aki karaoi bwaai aika a na tuuki kawaira, E kanakoi mairoura. E aki kaakiko itinaniku; E butimwaiko bwa ko na rin. Ana mwakuri ae bwanin bon kaotan nanona aei.
Ngkanne e koaua ae bon iai Ana anga karea ni kamaiu , are e kangaanga bwa ti na mataata iai, are e riaon ara konabwai n te maiu ae mamate bwa ti na ataia. Ma, aei ae e kakawaki “ma,” ti ataia, ti mataata iai, ti kona n iangoia, ae e tabu, nanona ni koaua ngke e anga maiuna bwa ti aonga ni kamaiuaki.
E raeuaki rokini maneaban te Atua ngke e mate Iesu i aon te kaibangaki, kanikinaean ae te oki nakon mweengan te Tama e a tangaina n tauraoi—nakoia naake a na oki Nakoina, a Onimakinna, a kaaki rawawataia I aona, ao ni uota Amona ae aoraoi rinanon te reitaki inanon berita aika tabu.
N taekana teuana, ana babaire te Tama bon tiaki ibukin totokoan kawaira. Bon tiaki anne; e na bon aki riki anne. Tao a na iai bwaai aika ti riai ni karaoi, tuua aika a na kawakinaki, arora aika ti na ibitii? Eng. Man Ana nanoanga, bwaai aikai ni kabane, ti konai ni karaoi.
Aei te rongorongo ae kakukurei! I aki kona ni kaota aron au kakaitau ibukin koaua aikai. Ana banna te Tama, Ana babaire, Ana kantaninga, Nanona Ae tangiria bon ibukin kamaiuara, n angani ngkami te rau, ni kairi ngkami, ao nake kam tangiriia, nakon mweengana. Man aei I kakoaua n aran Iesu Kristo, amen.