Ni Boutoakiia te Roro ae Rikirake
Bon te reitaki ni maiuia kairake ae e na karika rootakin aia rinerine ni korakora .
N au kakatauraoi n taetae nakoimi, e katikaki nanou ni karakinaia Ereman ma naati mwaane aika rorobuaka are natiia ana botanaomata Amon. I a tia n namakina mwaakaia burabeti n Ana Boki Moomon n reireiniia kaaro, bitiobi, ao membwa n te uoote rinanon kamatebwaian te rongorongo aio.
Ereman bon te mwaane ae e onimakinaki irouia kairake n Amonaite. E buokiia n karikirakeia ao n kaikawaia inanon te raoiroi. A kina man tangiria ao “a [tangiria] bwa e na riki bwa aia tia kairiiri.”
E tangiriia kairake n ataeinimwaane aikai Ereman bwa kanga natina mwaane ao e noora aia konabwai. E reireiniira Unimwaane Dale G. Renlund bwa, “ni kanakoraoan buokaia tabeman ti riai n nooriia … rinanon ana taratara Tamara are i Karawa. Ao man anne ti na ataa koauan kakawakin te aomata imatan te Atua. Ti konaa ngkanne n ti namakina ana tangira Tamara are i Karawa ibukiia ni kabane … Natina.” Bitiobi ni boong aikai a kakabwaiaki ma te konabwai n noonori iaon kinakia mai ieta kairake ake a mena i aan aia tararua.
Ereman “e nambwaniia” kairake n ataeinimwaane ake a mena iaan ana tararua. E moanibwaia karikirakean te reitaki ae tamaroa ma ngaiia.
I nanon tain te kangaanga bwa ai te maiu ke te mate, Ereman ma ana taan buaka aikai aikoa kona n noora te taanga n buaka are e kakioia. E reireiniia kairake Ereman:
“Nooria, ti aki ataia ma a bon toki i aan te kantaninga are a na roko nakoira. …
“Ngaia are teraa ami iango, natiu mwaane …?”
A kaeka ataeinimwaane aika a kakaonimaki ni kangai, “Tamara, nooria e mena Atuara iroura, ao e na bon aki kariaia bwa ti na bwaka; ngkanne ti na mwananga.” A tokanikai n te bong anne, man ana boutoka Ereman nakoia kairake n ataeinimwaane aikai n aia iango n kan waaki.
Kairake n Amonaite aikai iai aia iango ae korakora are a kakorakoraia i nanona ibukin “boutokaaia aia aomata.” “Te taanga ae uarereke aio,” are kairake iroun Ereman, e kabutanakoa “te kaantaninga ma te kimwareirei aika korakora” nako nanoia aia taanga n buaka Nibwaite ake a maan n bubuaka. Bitiobi n boong aikai a kona ni kairiia kairake aika a konabwai ni kakabwaiaa aia uoote ao ni buoka ikoikotan Iteraera. E reireiniira Beretitenti Russell M. Nelson bwa bon aio te mwakuri “are [kam] a karokoaki iai nako aon te aba.”
N ai aroia kairake n Amonaite aikai aika a “a kokoaua n taai nako n bwaai nako ake a onimakinai iai,” E kakaonimaki Ereman n iriiria ana taan kairiiri. N aki tabe bwa tera te kangaanga ke te totoko, e aki toki Ereman ni “kateimatoa te nano mwaaka” ni karikirakean aroia. Ngke e tuangaki bwa e na “mwananga ma [natina] mwaane aika uarereke,” e karaoa nanona.
Kairake n boong aika a kakabwaiaaki ngkai bitiobi a ira te kainibaire ibukiia taan kairiiri n “reirei ma [beretitenti] n te Bootaki n Ataeinaine n te uoote.” Beretitenti n te titeiki, a kakoauaa bwa bitiobi ao beretitenti n te Bootaki n Ataeinaine a reireiaki ni kakoroi nanon tibwangaia ibukiia kairake.
E kawakinii berita aika tabu Ereman. Ngke e reirei Amon te euangkerio nakoia aia karo rorobuaka n ataeinimwaane aikai, kaaro aikai a kaukii nanoia n butimwaia. A kakaonimaki nakon maiuia ae boou ae maiuakinan te riki bwa Ana reirei ae kororaoi are a karaoa iai te berita ae tabu bwa a na “kawenei aia bwai ni buaka ni kaitara.” Ti te bwai are e karika iangoan uruakan aia berita ae tabu aio, okiran aroia are ngkoa are te bubuaka, bon noraia Nibwaite bwa a reke n te kangaanga.
Taian Amonaite a tangiria n buokiia aomata aikai ake a tia n anganiia mweengaia ae mano. Ereman, n raonaki ma tabeman riki, a kairoroia bwa a na kawakin aia berita ae tabu are a na aki manga buaka. E onimakina riki korakoran te Atua are e na anganiia nakon korakoran aia kabaang ma aia katebe taian Amonaite.
Ngke a kaitara Ereman ma ana taan buaka aika a kairake ma kangaanga aika a kamamate, e nano matoa Ereman. “Nooria, e aki kakawaki—ti onimakinna bwa te Atua e na kainaomataira.” N teuana te katooto, ngke a kan mate man te boranibaki, aia kaeka bon “bunra nako [tamneia] n te tataro nakon te Atua, bwa e na [kakorakoraia] ma ni [kainaomataia] …[ao] te Uea … e bon [kawariia] ma te karaunano bwa e na bon [kainaomataia]” “ibukin korakoran aia onimaki n te bwai are a tia n reireinaki bwa a na kakoaua.”
Ti reiakinna mairoun Ereman bwa kairake n ataeinimwaane aikai a boutokaaki irouia aia karo. Kaaro aika a kakaonimaki aikai a ataia bwa moan tibwangaia bon reiakinaia natiia. A reiakiniia natiia bwa a na kawakin tuua ao n nakonako n eti” i matan te Atua. A bon tia n reireinaki irouia tinaia “bwa ngkana aki nanououa, ao e na kamaiuia te Atua.” Tamaia a katei banna ni katooto aika a korakora n aron karaoan berita aika tabu. Taan buaka ngkoa aika ataa kakamakun te buaka. A kanakoia natiia aika a tuai ririnanon te buaka i aan ana tararua Ereman ao n boutokaia man “kakanakoan bwaai ake a kainanoi.”
Tiaki ti Ereman n mwakuri ma te taanga n buaka ni kairake aio. E rawata aomata irarikina are e kona n katan nakoia ibukin aia boutoka ao aia kairiiri. E reitaki nakon Kaaben Moronaai ibukin buokaia, ao e reke buokaia.
Akea ae beku n abanuean te Uea ae tei ti ngaia. E a tia ni kakabwaiaira ma ara uoote ao ara titeiki te Uea. Man Ana bootaki are e tia ni kaokaki, iai bwaai n ibuobuoki, wanawana, ao kairi mai ieta ibukin kaitaraan kangaanga nako.
Te bitiobi e katauraoa te tararua ibukin te uoote rinanon te kauntira. E karaoi marooro ni katoa aua te namwakaina i aon mwakuri n ibuobuoki ao ni kaungaia aia kooram unimwaane ma te Bootaki n Aine bwa a na kakoroi nanon tibwangaia n mwakuri n ibuobuoki nakoia utu. Beretitentii aikai a taua aon mwakuriian bwaai aika a kainnanoaki ao ni kakaean kaekaia mai ieta. Beretitenti n te titeiki anga aia boutoka man reiakinaia aia kooram unimwane ao te Bootaki n Aine n tibwangaia aikai.
Te kairi are e kainnanoaki ibukiia taan kairiiri ao kaaro e reke n te Gospel Library ao te Gospel Living apps. N bwaai n ibuobuoki mai ieta aikai, ti kona n karekei koroboki aika tabu, aia anga reirei burabeti n boong aikai, ao te Aeniboki ni Kabuta. Te mwakoro ibukiia Kairake n te Gospel Library ao e mwaiti bwaai n ibuobuoki ibukiia kooram ao beretitentii n te kiraati ao iai Ibukin Kakorakoraia Kairake: Te Kairi ibukin Karaoan Rinerine. Ngkana membwa n te uoote a kamatebwai bwaai n ibuobuoki mai ieta aikai ao n ukora ana kairiiri te Tamnei, aomata ni kabane a na karekea te kairiiri mairoun te Uea ibukin kakorakoraaia kairake.
E na kakabwaiaaki man kakorakoraaki te uoote ae bwanin ngkana membwa a boutokaa te roro ae rikirake. N aki taraa aki kororaoira ma kabwakara, Tamara are i Karawa e kaoira n tatabemaniira, rinanon raoraonakira n Tamneina, e kaoia ake tabeman. E ataia bwa ti rikirake ao n kaitiakaki ngkana ti iriira ana wirikiriki te Tamnei ae Raoiroi. E aki tabe ngkana e aki kororaoi ara kekeiaki. Ngkana ti tomaira ma te Uea, ti kona n onimakinii ara kekeiaki bwa a na kaineti raoi ma are E tangiria ibukiia kairake.
Man iriiran ana kairi te Tamnei ae Raoiroi n buokia kairake, ti riki bwa taan kakoauaa ana tangira Tamara are i Karawa i nanon maiura. Mwakurian ana wirikiriki te Uea e karikirakei reitaki n tangira ao n onimaki. Bon aia reitaki kairake i nanon maiuiia ae e na korakora rootakin aia rinerine.
Ana reiakina bannan te kaotioti ngkana a ikarekebai ma ngaira n waakin kakaean ao mwakurian taian wirikiriki ni beku ibukiia tabeman. Ngkana a katan nakon te Uea kairake ibukin kairakiia mai ieta, reitakiia ma Ngaia ao Onimakinana e na kakorakoraaki.
Ti kaota nanora n onimaki irouia kairake man anganakiia ara boutaka ao kairan kawaia ao man aki tautaekaniia. Ngkana ti keerikaki man kariaia bwa kairake a na bon reiakinna rinanon te reitaki n marooro i marenaia, rinean kawaia ae kairaki mai ieta, ao kammwakuran aia kainibaire, a na karekean te kimwareirei ni koaua ao te rikirake.
Beretitenti Henry B. Eyring e reiakiniira bwa “tera ae e kakawaki riki bon te bwai ae a reiakinna tabeman mai [iroum] bwa antai raoi ngaiia ao tera are a na kona n riki iai. Au kantaninga bwa a bon aki konaa n reiakina ae mwaiti man ti te anga reirei. A na karekea man namakinana bwa antai ngkoe, antai ngaiia are ko iangoia, ao tera am iango are a na kona n riki iai.”
A kamiira kairake n ninikoriaia, aia onimaki, ao rabakauiia. Ngkana a rineia bwa a na riki bwa ana reirei Iesu Kristo n ae bwanin, Ana euangkerio e na mwakoro inanoia. Irirana e na riki bwa mwakoron kinaakia, ao tiaki ti n te bwai ae a karaoia.
E buokiia kairake n Amonaite Ereman n nooria bwa aekara maiun ana reirei Iesu Kristo ae ninikoria. Ti kona n bane n riki bwa banna ni katooto aika a korakora i aon maiuia ana reirei Kristo n boong aikai nakoia kairake. Kaaro aika a kakaonimaki a tataro ibukin taian banna ni katooto aikai inanon maiuia natiia. Akea te waaki ae kona n onea mwiin bannaia ikawai aika a tatangira man kawakin berita aika tabu.
Ngkana beretitenti n te kooram n ibonga, te bitiobi a kona n katei banna ni katooto ibukiia kairake i aon katein te buu ae kakaonimaki ao te tama ae tatangira rinanon aia kamanomano, katauraoi, ao tararua n aanga aika a raoiroi. Bitiobi, ma aia iango aika a baraaki [iaoia] kairake, a kona n rootia rooro ma rooro.
Kairake n boong aikai a warekaki ibuakoia tamnei aika a kakannato iroun Tamara are i Karawa. Ngaiia taan kamanoa te koaua ma te inaomata n rinerine ni maiu i mwain te maiu n rabwata aika a nanomatoa. A bungiiaki n boong aikai bwa a na ikoikota Iteraera rinanon ana kakoaua aika a korakora iroun te Uea Iesu Kristo. E kinaira n tatabemaniira ao e ataa korakoran ara konabwai. E taotaonakinnano i nanon rikirakeia. E na kabooi maiuia ao n kawakiniia. E na kamaiuia ao ni kairiia. E na kaungaiia. Ngaira, aika aia karo ao taan kairiiri, ti a tia ni katauraoaki nakon boutokaakia. Iai ana Ekaretia te Tia Kamaiu are e na buokiira ni karikirakea te roro are imwiina.
I kaota au kakoaua bwa Ana Ekaretia Kristo, e kaokaki rinanon te Burabeti Iotebwa Timiti ao ni kairaki n boong aikai iroun Beretitenti Russel M. Nelson, e barongaaki bwa e na buokiia kairake ni kakoroi nanon aia kantaninga ae korakora n boong aika kaitira. N aran Iesu Kristo, amen.