Ko a Kaman Rineaki bwa kona Beku
Bon nanon te Atua bwa e kaotia nakoim ae e a kaman rineiko, ao E na karaoa aei ngkana ko ukoria moa n reiakina ao n ira Nanona.
Te tairiki aei, N na taetae nakoia kairake n te Ekaretia, te roro ae rikirake aika kairake n ataeinimwaane ao n ataeinaine ake bon taan tei ibukin te roro ae na roko.
N Okitobwa 2013, e taekinna ara burabeti ae tangiraki, Beretitenti Russell M. Nelson: “Tamami are i Karawa e kinako i nanon te tai ae rangi ni maan. Ngkoe, ae Natina te mwaane ke te aine, ko rineaki Irouna bwa ko na roko nakon te aonaaba n te tai aei, n riki bwa te tia kairiiri n Ana mwakuri ae korakora i aon te aba.”
Uoua te ririki n nako, e reitia n taekinna Beretitenti Nelson ni kangai:
“N te bong aei I kamatoa n taekinna bwa e a tia n tua te Uea bwa a riai ataeimwane ni kabane aika tau n tauraoi ni mwananga ao ni beku ni mitinare. Ataeinimwaane aika kaain te Ekaretia, bon tabeia n te nakoanibonga te mwakuri ni mitinarei. E a tia ni baireaki ami tai ngkami kairake n ataeinimwane n roko n te aonaaba ike e beritanaki iai te mwakuri ibukin ikoikotakia tibun Iteraera. …
“Ngkami ataeinaine ake kam tau man konamaki, e tamaroa te mwakuri ni mitinare, ma e bon nakoimi, baireana. … Tataro bwa ko na ataia ngkanaa e tangiria te Uea bwa ko na mitinare, ao te Tamnei ae Raoiroi, e na kaeka nako nanom ao am iango.”
Ana rongorongo te burarbeti i aoia kairake n ara bong aikai n te mwakuri n ikoikotan Iteraera ao ana kakao nakoira bwa ti na ukora te Uea n tataro nakoina ibukin bwaai ake ti na karaoi, bon mwakoron, kakoaua n te maiu ao kakabwaia ake ko karekei mai iroun te Atua i mwain ae ko bungiaki nako aon te aba. Ngaira ni kabane ake ti bungiaki nako aon te aba ti maeka ngkoa ma Tamara are i Karawa bwa ngaira Natina n tamnei. E taku te Uea nakon Mote, “Bwa Ngai, te Uea ae te Atua… karikii bwaai ni kabane, ake I a tia n taekini, n aroia n tamnei, i mwaain ae a roko n aroia n rabwata i aon te aonaba.”
Ngke E moan karikiko bwa te nati n tamnei, E bon rangi n tangiriko bwa natina n tamnei mwaane ao aine ae iai iroumi n tatabemani ngkami anuam aika reke mai ieta ao rikim ae akea tokina.
N am tai ni maiu i mwain te maiu aei, “ko karikirakea aron [kinakim] ao [ana] konabwai tamneim.” Ko kakabwaiaki ma te inaomata n rinerine, arom ni karaoi am rinerine i bon iroum, ao ni karaoi babaire aika kakawaki, n aron iriiran ana babaire ni kakukurei Tamara are Ikarawa, bwa ti na “karekea rabwatara ae mamate ao ni karekei ara taneiai ao n rikirake i aon te aba … ao n ataia bwa iai [rikim] ni bwaibwai n te maiu are akea tokina.” Am babaire e roota maium ngkoa, n te maiu i mwain te maiu aei, ao n reitinako n roota maium ngkai. Ngkai natin te Atua ngaira aika ti maeka n te maiu i mwain te maiu aei, ko “rikirake ni wanawana ao n reiakinna n tangira te koaua.”
I mwain ae ko bungiaki, e mwiokoi ngkami te Atua bwa kam na kakoroi nanon ana mwakuri n am tai ni maiu i aon te aba. Ngkana ko teimatoa n kororaoi, kakabwaia ake a taekinaki n te maiu i mwain te maiu aei e na karekei nakoim tibwanga aika a mwaiti, n raonaki ma te tibwanga ni beku n ana Ekaretia ao n iri buakon mwakuri aika kakaawaki i aon te aba n te bong aei: ikoikotan Iteraera. Kakabwaia ao berita man te maiu i mwain te maiu aei bon kanikinaean ae ko bon katabuaki i mwaain bungiakim. “Te reirei i aon katabuakim i mwaain bungiakim e bon kaineti nakoia ni kabane membwa n te Ekaretia.” Katabuakim i mwaain buangiakim e aki nanonaki ae ko nang karekei wewete ao mwioko aika mwaiti. Ko na karekei kakabwaia ma tibwanga i mwiin kamwakuran inaomatam n rinerine, n aron ae katabuakim i mwaain bungiakim n te maiu i mwain te maiu aei e reke ibukina bwa ko maiuakina te raoiroi. Ngkai ko kaotiko bwa ko kororaoi ao n rikirake iaon kawain te berita ae tabu, ko na karekea te tibwanga ni beku n am kiraati n te Botaki n Ataeinaine ke n am kooram n te nakoanibonga. Ko na kakabwaiaki ni beku i nanon te tembora, ao n riki bwa tari mwaane ao aine aika taan ibuobuoki, ao ni beku ni mitinare ngkai ana reirei Iesu Kristo ngkoe.
Bukin tera bwa e kakaawaki ae ko na oota ni katabuakim i mwaain bungiakim? I nanon te tai are a mwaiti iai titiraki, te tai are a mwaiti ake a kan ukora rikiia ni koaua, ni koauana bwa e kinaira te Atua ao ni kakabwaiaira n tatabemaniira nako i mwain ae ti bungiaki nako aon te aba ma “anuara [nako] ae kakaawaki n te… maiu i mwain te maiu n rabwata, te maiu ae mamate, ao kinakira mai ieta ao te kantaninga n te maiu are akea tokina” e uota te rau ae tamaroa ao koauana n am iango ao nanom. Atakina bwa antai ngkoe e bon moanaki man mataatam n Ana kakabwaia te Atua ake a kaman katabuaki i aom i mwaain bungiakim nako aon te aba. Bon nanon te Atua bwa e kaotia nakoim ae e a kaman rineiko, ao E na karaoa aei ngkana ko ukoria moa n reiakina ao n ira Nanona.
I tangiria ni kan warekii are e koreia Beretitenti Nelson i aon te Instagram. Teuana mai ibuakon ae i tatangiria bon are n Turai 20, 2022. E koreia:
“I kakoaua bwa ngke arona bwa e taetae nakoimi te Uea, te moan bwai ae E tangiria bwa kam na ataia moa bon kinaakimi ni koaua. Raou aika kam tangiraki, ngkami raoi natin te Atua n tamnei. …
“… Tai kamangaoko iai: Am konabwai a roko mai karawa. Ma kakaonimakim n ukoria, e na anganiko te nonorii te Atua arom n raoi n riki .”
Tao N na tibwaa ma ngkami te bwai ae reireia tamau nakoiu bwa N na kinaai ni koaua ao ni kunea ana babaire te Atua i nanon maiu?
Ni moaningabongin te kaonobong teuana ngke 13 au ririki, ao I uti n koro uteute bwa tabeu anne ni katoa wiiki. Ngke I tia, ao I ongo rebwen te mataroa ae kainaki mai bukin ara auti ao n noora tamau bwa e weweteai bwa N na raonna. I mwananga nako bukin te auti, ao e tuangai bwa N na tekateka ma ngaia i aon te kaintamwarake. Bon te moaningabong ae tamaroa. I uringnga bwa ti bon rang tena ngke ti tekateka bwa a uaia ni boo angara. E tuangai bwa e tangirai. E titirakinai bwa tera au kouru ni maiu. Ao I taku, “Eng, anne e rang bebete irou.” I atai bwaai aika uoua: I tangiria n abwaabwaki, ao I tangiria ni kan nako ni kaembing ni katoa tai. Bon te aomata ngai ae I aki aroaro. E ngare, ao n toki inanon tabeua te tai, ao taku: “Steve, I tangiria ni kan tibwaa te bwai ae rang kakawaki irou. I tataro bwa Tamau are Ikarawa e na kamatoa nakoim bwaai aika n na taekin bwa aonga n tiku n am iango ao i nanom n te aro bwa ko na aki mwaninga taekana.”
E bon rang n anaa nanou tamau n te tai anne. E rairaki nakoiu ao n tarai matau ao n taku, “Natiu, kamanena raoi am tai n te maiu aei.” Ti bon aki kakarongoa n te tai ae maan ngke e katuka raoi i nanou te bwai are e taekinna.
E reitia i mwina ao n taku, “Ko ataia, bwa iai te tai are ko na tiku bon ti ngkoe n akea ae na ataa te bwai ae ko karaoia? N taai akanne ko na iangoia, ‘Bwa bwaai ake I karaoi ana rootaki iai temwaangina, ke bon ti ngai n rotaki’?”
E taku i mwiina, “N angiin am tai ni maium, tera ae ko na karaoia n am tai ae mwaawa n maium e bon korakora mwiina n arom ni kaitara ma kangaanga ao karawawata ake ko na kaitibo ma ngaia; bwaai ake ko karaoi n am tai ae mwawa e na bon korakora naba mwinanakoim n arom ni kaitara ma te tokanikai ao kimwareirei ake ko na namakinna i nanon maium.”
E karekea te bwai are e tangiria nanona tamau. Tangin bwanaana ae tangraoi, ao te tangira are I namakinna man ana taeka, a bon tiku n au iango ao i nanou n te tai anne.
I reiakinna i nanon ririki aika bati bwa bon te kakai ae korakora are riki i aon te kaintamwarake n au tai n ataei, n te tai ae mwaawa i nanon maiu, I kona n tataro nakon te Atua ao ni karekea te kaotioti. E reireinai tamau arou bwa N na kanga n reiakina ana kakabwaia te Atua are E a tia ni kaman katauraoia. N taai aika onoti akanne, I reiakinna bwa Ana Boki Moomon bon ana taeka te Atua. I reiakinna bwa e rineai te Atua bwa N na mitinare. I reiakinna bwa e kinaai te Atua ao e ongo ao ni kaekai au tataro. I reiakinna bwa Iesu bon te Kristo, ara Tia Kamaiu ao te Tia Kabooira.
A mwaiti kaairua ake I karaoi i mwiin au tai ma tamau are I aki kona n mwaninga arei, te teimatoa ni kamanoi taai aika onoti ni maiu e a tia n tiku bwa te atinroo n angibuakan te maiu ao n anganai te konaa bwa N na ukora te mano ma te kamaiuaki, kakorakorakin kakabwaia man ana tangira te Tia Kamaiu ao ana mwakuri ni kamaiu.
Tariu ao mwaneu aika kairake, ngkai ko tabe ni kamanena raoi am tai n maium ma kukureim; ongora nakon anene ake a na uotikorake; wareware ni koroboki aika tabu; kakaonimaki n taai nako, n tataro ma nanom; ao n kabanea am kona bwa ko na karekea ao n iangoa raoi am kakabwaia n tamanuea, are ko na karekea te kaotioti. N ana taeka Beretitenti Nelson, ao e na “kaureaki matam nakon koaua n te maiu aei te tai are ko nang baireia iai bwa aekakira te maiu are ko tangiria bwa ko na maeka iai n aki toki.”
E na kaekai ni kabane am tataro Tamara are Ikarawa, moarara riki am tataro ake ko karaoi n am tai ae onoti inanon maium. E na kaoti nakoim bwaintangira ao am tarena, ao ko na namakina Ana tangira nakoim, ngkana ko titiraki ma nanom raoi ni kan ataia. Ngkai ko kamanena am tai ni maium, am mwakuri ni karaoan otenanti ao berita n te euangkerio a na bon bane ni uaana iroum. Ko na tabe ni kaan riki ma te Atua ngkana ko karaoi am berita ma Ngaia, ao ko na bon tabekakirake nakon te kaantaninga ae korakora, te onimaki, ao te aki nanokokoraki n taian berita ake E karaoi ibukim. Ko tangiria ni kan ataa ana babaire te Atua ibukim? I kaota au koaua bwa E tangiriko bwa ko na ataia, ao E tua nakoia Ana burabeti n te aonaaba bwa a na kaoira n tatabemaniira nako bwa ti na tataro ao ni karekea te kakoaua n oin ara taratara. I kaota au koaua i aon mwaakan ana mwakuri n anganano ara Tia Kamaiu are e a karekea nakoira bwa ti na maeka ma te kimwareirei i nanon ana kakabwaia te Atua, n aran Iesu Kristo, amen.