Kakoaua n ara Berita aika a tabu rinanon Iesu Kristo
Ngkana ti rin n ana auti te Uea, ti moana te mwananga ae tabu n reiakina arora ae ana reirei Iesu aika a rietaata ao n tabu riki.
Tariu ao mwaaneu aika a tangiraki, I tataro bwa a na kaboouaki tamneira man taian rongorongo mairouia ara taan kairiiri n te wiikente aei ao ni kukurei n te bwai ae I atonga bwa “Kakoaua n ara berita aika a tabu rinanon Iesu Kristo.” Kakoauakin aei bon te atatai ni koaua ibukin karekean kakabwaia ake e beritani te Atua nakoia te koraki ake a kawakin aia berita ao aio ae e rangi ni kainnanoaki ngkai i nanon boong aikai ake ai taai ni kaaitara ma kangaanga.
Katean ana auti te Uea aika a boou ni kabuta te aonaaba, iaan ana kairiiri Beretitenti Russell M. Nelson, e karika te kimwareirei ae moan te korakora ibuakoia kaain te Ekaretia ao n riki bwa te kanikinaa ae kakawaki ibukin karababaan abanuean te Uea.
Ni iangoan are I rinanona ae e rangi n tamaroa ni katabuan te Tembora iFeather River California Temple n Okitobwa ae nako, I iangoia ngkana ti bua n tabetai i nanon te kakukurei ibukin reken tembra aika a boou n ara tabo ao kaawa nako ao n mwaninga taekan berita aika a tabu riki ake a karaoaki n te tembora.
N aron are e koreaki i moan tembora ni kabane taekana ae tabu ae kangai: “E tabu bwa a na bwai Iehova.” Taeka aikai bon te kakao, nakoira bwa ngkana ti rin n ana auti te Uea, ti a toua te kawai ae tabu n riki bwa ana reirei Kristo aika a rietaata aika a raka riki aroia. I nanon karaoan berita aika tabu i nanon mimitongin te Atua ao ni motikia bwa ti na iriira te Tia Kamaiu, ao ti na karekea te mwaaka n rairii nanora, kabooui tamneira, ao ni kakorakora riki ara reitaki ma Ngaia. Korakorara n ara mwakuri aikai a uota te kamaiuaki nakon tamneira ao ni kamatoaa ara reitaki ae tabu ma te Atua ao Iesu Kristo, are e berita bwa ti na kona ni karekea ana bwaintituaraoi n te maiu are akea tokina. Ti na karekea te nano ae tabu ao n rietaata riki mai i mwiin te mwananga aei ibukin maiura ni katoa bong man ara berita aika a tabu aika ti karaoi rinanon Iesu Kristo.
Te aki nanououa anne bon ara reitaki ma te Atua ae kakawaki ao e kona ni buokiira ni kakorakorai nanora nakon ao ara kakaitau ibukin Iesu Kristo ao Ana mwakuri ni kamaiu. E karikirakei ara konabwai n tangira ao ni beku bukiia tabeman, ao e kakorakora tamneira ni maeka n te aonaaba ae bareka are e rikirake te roo ao te bwarannano. E kakorakoraira bwa ti na tokanikai i aon te nanououa ao te bwarannano, te maaku ao te un, maraki n nano ao akean te kantaninga are e kataia ara kairiribai n rinnako inanora riki ngkana e matoatoa, a teimaan kataakira, ke a kangaanga n aron bwaai aika riki. Te kibu man te baibara e anganiira te kaetieti ae tamaroa ibukira ngkai ti kaitara ma kangaanga ni bwain te aonaaba aei: “Kam na tai kaki ami .”
Tariu ao mwaneu aika kam tangiraki, naake a karekei aia koaua n taian berita aika a tabu ake a karaoaki i nanon ana auti te Uea rinanon Iesu Kristo iai irouia teuana te kabanea ni korakora ni mwaaka ae ti kona ni karekea n te maiu aei.
Ngkai ti a tia ni kamatebwaia Ana Boki Moomon i nanon Nakomai, Iriirai n te ririki aei, ti a tia ni kakoaua aron Nibwaai ni kamatataa mwaakan te berita ae e tabu rinanon ana onimaki ngke e kaitara ma totoko ao kakaewenako n anaakin bwaatua n aron are e tuangaki iroun te Uea. E ngae ngke e rang n nanokawaki Nibwaai ibukin maakuia ao akean aia onimaki Reimwan ao Remuera, e teimatoa n iai ana onimaki ae e na bon anganiia bwaatua te Uea. E taku nakoia tarina, “Ngkai e maiu te Uea, ao ngkai ti maiu, ti na aki oki nakon tamara n te rereua ni karokoa ae ti a tia ni kakoroa bukin te bwai are e a tia n tuatua te Uea nakoira.” Ibukin matoan nanon Nibwaai n ana berita te Uea, e a kona ni kakoroa nanon te bwai are e a tia n tuangaki bwa e na karaoia. I mwiina, i nanon miina ni burabeti, e taua ana kairoro te aeka ni kakoaua aei Nibwaai, e koroia, “Ngai, ae Nibwaai, I noora korakoran mwaakan Ana Tiibu te Teei te Atua, ae e ruo nako aoia aomata aika a itiaki aika kaain ana ekaretia te Tiibu te Teei, ao ma i aoia ana aomata i nanon te berita ae tabu te Uea, … ao a otangaia n te raoiroi ma mwaakan te Atua n te mimitong ae korakora
I a tia ni noora aron ana tangira te Uea n ana berita ma mwaakana are raanga i nanon maiuiia natin te Atua, ni kakorakoraiia i nanon aia tai n aitara ma kangaangan te maiu aei. N te bong teuana ao e oki buu man ana taromauri n te tembora nakon mweengara ao n tuangai aron rootakina n te bwai ae e namakin ikekei. Ngke e tabe n rin n ana auti te Uea, ao e noora temanna te mwaane ae tabe ni buti ni karaurau n ana kaintekateka e wiira ao temanna te aine are e keiaki n nakonako n okona, ike a kaai ni keiaki n roko n neboa te Uea i nanon Ana auti. Ngke e nakonako buu nako nanon te moan ruu, ao e noora temanna te aine ae akea baina teuana—ao iai tabeua nikiran baina n are teuana—are tabe ni karaoi tibwangana ake anganaki n arona ae tamaroa ao ni mimitong.
Ngke e tabe ni karakina te bwai are rinanona buu, ao e reke ara kakoaua bwa bon tii nanora ni katabua ana berita te Atua ake akea tokiia rinanon berita aika tabu ma Ngaia inanon Ana auti ngaia ae e na kona ni kamwanangaiia taan iriira Kristo bwa ana kiitan mweengaia inanon tain te kamwaitoro, e ngae ngke iai aia kangaanga inanon maiuiia.
Raraou aika tangiraki, ngkana iai te bwai ae rangi ni kakawaki ae ti kona ni karekea—ae ti kona ni manga anganiia natira ao tibura ae e na kona ni buokiia ni kaitarai kataaki ma kangaanga aika imwaaia—bon tii kinaakin ara berita aika a tabu rinanon Iesu Kristo. Karekean aia bwai aikanne e na buokiia ni maiuia n aron are e berita te Uea nakoia Ana taan iriiria aika kakaonimaki: “Au taan reirei a na tei n taabo aika tabu, ao n aki kona ni kamwaingaki.”
Ti na kanga ni karekea te aekaki n nanomatoa anne rinanon Iesu Kristo? E reke man te nanorinano, kabotoan te Tia Kamaiu i nanon maiura, maiuakinan moan tua n ana euangkerio Iesu Kristo, karekean otenanti ni kamaiu ao ni karietataaki, ao karinean ara berita aika a tabu ake ti karaoi ma te Atua n Ana auti ae tabu.
N ana marooro ni kainiin n tain te Maungatabu are karaoaki n Okitobwa 2019, ao e anga ana kauring ara burabeti ae tangiraki i aon te mwaneka ae kakawaki ibukin ara kakoaua ni karekean ara berita ae e tabu, are e taekinaki: “Taura n tatabemaniira nako n rin n Ana auti te Uea e kainanoa katauraoan tamneira ae bati. … Taun temanna n tatabemaniia nako e kainnanoa rairakin te iango ma te nano ni katotonga riki te Uea, n riki bwa kaain te aba ae e kokoaua, n riki bwa te banna ae e tamaroa riki, ao n riki bwa te aomata ae e tabu riki.” Ngaia are, ngkana ti na bita katauraoara n rin n te tembora, ti na bita ara taneiai inanon te tembora, are e na onea maiura itinanikun te tembora. “Ngkanne matoan nanom e na korakora imatan te Atua, ao reirein te nakoanibonga e na timtim i aon tamneim n aron te aoi mai karawa.”
Temanna te bitiobi are I kinaa te kabanea n ikawai kaaina i nanon te Moanrinan tiaki aron te kiraati n te “Moanrinan” ma te kiraati ni “katauraoi nakon te tembora”. I nanon Tianuare ao te bitiobi e weteia kaain te kiraati ma aia tia reirei bwa a na nakon ana aobiti, ike a maroroakina aroia ni kabanea te ririki anne ibukin aia katauraoi nakon te tembora. E reke ana tai te bitiobi n rinanoi tenaan titiraki ake iaon beeba ni kariaia nakon te tembora, ake a manga karinaki i nanon aia reirei n te Moanrinan. E kaungaiia ataei aikai bwa ana tauraoi n te aro are ngkana a kawara ana aobiti te bitiobi n te ririki teuana, ao ana kaman tauraoi, ana kaman atai, kakoauai aia berita aika a tabu, n tauraoi ni karekea te beeba ni kariaia nakon te tembora ao n rin n Ana auti te Uea. N te ririki aei ao iai aman ataeinnaine ake a rangi n ingainga, n tauraoi, n koaua raoi bwa a kona n nako n te tembora ao a roko nakon te bitiobi n tangiria bwa e na kaotinakoi kaobiin beeban kariaiakaia n rin n te tembora n tain raoi te Kanako Ririki n te aoa 12:01 a.m.
Te katauraoi bon tiaki tii ibukiia ake ai tibwa aia moan tai n nakon te tembora. Ti bane n riai ni kakatauraoira bwa ti na nako n ana auti te Uea. Teuana te titeiki ae I ataia e a tia ni kabonganaa te kibu ni koora ae “Kabotoan te Mweenga, e boutokaaki man te Ekaretia, ao te kabaeaki n te tembora.” Kabaeaki bon te taeka ae rangi ni kakaongoraa n ae e nanonaki iai katuruan te kantaninga n te kairiiri, ma e nanonaki naba taekan te kabaeaki nakon ke kamatoaaki man, kakorakoraaki, ao ni botumwaaka nako iai, ni koaua raoi. Ngaia are kabaeara nakon te tembora e kabaeira nakon te Tia Kamaiu, e anganiira kawaira raoi ao kamatoaakira ngkai ti ataia raoi bwa ti kakoaua n ara berita rinanon Iesu Kristo. Ngaia are, ngaira ni kabane ti riai ni kanakoraoa aron kabaeakira man karekean ara tai are i mwiina ma te Uea n ana Ana auti ae tabu, e ngae ngkana e kaan ke e raroa te tembora.
E kauringiira ara burabeti ae tangiraki Russell M. Nelson, kakaawakin moan tua aikai ngke e taku: “Te tembora e boboto i aon kakorakoraakin ara onimaki ao kamarurungaan tamneira ibukina bwa te Tia Kamaiu ao Ana reirei bon ngaiia boton raoi te tembora. Bwaai ni kabane ake a reiakinaki n te tembora, rinanon kaetieti ao rinanon te Tamnei, e karikirakea ara atatai ibukin Iesu Kristo. Ana otenanti aika a rang kakawaki a kabaeira Nakoina rinanon berita aika tabu n te nakoanibonga. Ngkanne, ngkai ti kawakin ara berita aika a tabu, E kabaeira ma ngaira Ana kamaiu, ao mwaakana ni kakorakora. Ao eng, ti rangi ni kainnanoa mwaakana i nanon boong aika i mwaaira.”
E tangiriira te Tia Kamaiu bwa ti na tauraoi n ataia raoi, ma te mataata, bwa ti na kanga ni karaoi ngkai ti karaoi berita aika tabu ma Tamara are i Karawa i nanon Arana. E tangiriira bwa ti na tatauraoi n rinanon tibwanga, ma taian berita, ao katabeara; n tauraoi ni karekei atatai aika nano n tamneira ake ti na riai ni katauraoira iai n te maiu aei. I ataia bwa ngkana e noora ae raka ke karaoan te raoiroi n nanora aika a kukurei ni kabotoa maiura i aona ao n otenanti ao berita aika a tabu ake ti karaoia n Ana auti, E na kakabwaiaira, n Ana kawai ae kororaoi, ma kakai ao ana tangira n akoi aika ti kainnanoi.
Ana auti te Uea bon te tabo are ti kona iai ni bitaki iai nakon kawai aika rietaata ao n tabu riki. Ngaia, are ngkana ti otinako man te tembora, ma te bitaki are reke man ara kaantaninga ao man kanoan berita aika tabu, ake a otanganaki man te mwaaka are mai karawa, ao ti uota te tembora ma ngaira nakon mweengara ao maiura. I koaua raoi nakoimi bwa karekean tamnein ana auti te Uea inanora e kona raoi ni bitiira.
Ti reiakinna naba man te tembora bwa ngkana ti tangira Tamnein te Uea bwa e na inaomata i nanon maiura, ao ti riai ni kaakeai namakin ibukin karaoan mwakuri n ribuaka nakoia aomata ni kabane. Karekean nnen namakin ke iango n ribuaka inanora ao n ara iango e na kona ni kaotinakoi taeka ma mwakuri n riibuaka, i aon bwaai n reitaki iaon te intanete ke i nanon mweengara, ao ni kanakoa Tamnein te Uea mai nanora. Ngaia ae, tai kaki ami aki-maku n ami kakoaua, ma kariaia, am kakoaua bwa e na kamatoaaki.
Te waaki are teimatoa ao n reitinako ngkai i aon katean tembora e na teimatoa n anganiira te ungannano, kairara, ao ni kakabwaiaira. Ma ae kakawaki riki, ngkai ti na bita katauraoara n rin n te tembora, ti na bita ara taneiai n te tembora, are e na onea maiura itinanikun te tembora. Ngke e kaoniira te bitaki aei n te nanomatoa n ara berita ae tabu are karaoaki ma te Atua rinanon Iesu Kristo. E maiu te Atua, ao Iesu bon ara Tia Kamaiu, ao aio bon ana Ekaretia are e a tia ni kaokaki nakon te aonaaba aei. I nanorinano n taekin koaua aikai n arana ae tabu ara Uea Iesu Kristo, amen.