Uaa Aika Aki Mauna
Kabaean ara otenanti iroun te Tamnei ae Raoiroi e bon rangi ni kakaawaki ngkana ti tangiria ni karekei kakabwaia ake a beritanaki ibukin te maiu ae akea tokina.
Ngke te ataeimwaane ngai, I taatangira te uanikai ae te peach, ae boou man tawaa. Ni karokoa te bong aio, iangoan kanakin te peach ae tawaa n ranran ma kanakina ae e rangi ni kangkang. Ngkana a kinikaki peaches aika a tawaa, a kona n tiku i nanon uabong nakon abong i mwaain ae a buakaka. E teimatoa au ururing n raonakin tinau ao tariu ma mwaneu i nanon te tabo ni kuuka ngke ti karaoa kateimatoaan peaches ake a kinikaki i mwaain rokon te tai ni mwaitoro man kainaki i nanon bwatoro. Ngkana ti karaoa raoi kawakinan peaches, e na tiku n teimatoa i nanon ririki te uanikai ae kangkang aei, tiaki ti uabong nakon abong. Ngkana e katauraoaki raoi ao ni kabueaki, e na teimaan te uanikai ni karokoa e uruaki bonotana.
E kairiira Kristo n “nako ni kariki uaa, … bwa e aonga n aki mauna uaami.” Ma E aki taekina taekan uanikai aika peaches. E taekina taekan ana kakabwaia te Atua nakoia Natina. Ngkana ti karaoi ao ni kawakini berita aika a tabu ma te Atua, a kona ni karabaabaki kakabwaia ake a irekereke ma ara berita aika a tabu i tinanikun te maiu aei ao ni kabaeaki i aora, ke ni kateimatoaaki, n aki toki, n riki bwa te kakabwaia ae akea tokina.
Katabean te Tamnei ae Raoiroi mai Karawa, e na kabaei otenanti i aoia te koraki ake a kakaonimaki nakon aia berita ake a tabu bwa e aonga n reitinako mwiokoaia i mwiin te maiu aei. Kabaean ara otenanti iroun te Tamnei ae Raoiroi e bon rangi ni kakaawaki ngkana ti tangiria ni karekei kakabwaia ake a beritanaki ibukin te maiu ae akea tokina, n riki bwa uaa aika aki mauna.
E rangi ni kakaawaki aei ngkana ti tangiria ni karietataaki. N aron are e reireia Beretitenti Nelson, ti riai ni “moanna ma ataakina n ara iango. … N te koaua, ibukira n tatabemaniira, n te ‘kabanea n tai’ ti na kona ni karekea te maiu n aki toki ma ara utu n te karietataaki ike ti na roko iai iroun te Atua, Tamara are i Karawa, ao Natina ae Iesu Kristo.” E a tia naba n taku Beretitenti Nelson: “Te mare ae akea tokina bon te mwakoro ae kakaawaki n te katauraoi ibukin te maiu ae akea tokina. E kainnanoa temanna ni mareaki ma te aomata ae tau, n te tabo ae riai, man te kariaiakaki ni koaua, ao n ongeaaba nakon berita aika a tabu ma te kakaonimaki. Ngkanne, e na kona n kakoauaa temanna reken te karietataaki n abanuean te Atua.”
Tera kakabwaia man te karietataaki? A na maeka iroun te Atua n akea tokina bwa bumwaane ao buaine, ni bwaini “kaintokanuea, abanuea, taabo aika a tautaekanaki, ao mwaaka, … ao reitakin aia kariki n aki totoki,” ao karekean bwaai ni kabane ake iroun te Atua te Tama.
E kaotia te uea rinanon Iotebwa Timiti:
“Ni mimitongin te tiretio iai teniua karawa ke rinanna;
“Ao bwa e aonga ni karekea te kabanea n rietata, te aomata e riai n rin n te karinan n nakoanibonga aio [are nanona te berita ae tabu ae boou ae akea tokina n te mare];
“Ao ngkana e aki, e aki kona ni karekea.
“E kona n rin n are teuana, ma bon anne tokin ueana; e aki kona n rikirake.”
Ti reiakinna ikai bwa e kona temanna n rin te abanuea ae te tiretio, ke ni maeka i matan te Atua, n akea buuna. Ma te karietataaki n te kabanea n rietaata ni karinan n te abanuea ae te tiretio, e riai te aomata ni mareaki n te kariaiakaki ae riai ao i mwiina e na kokoaua nakon berita aika a tabu ake a karaoaki n te mare anne. Ngkana ti kakaonimaki nakon berita aikai tabu aikai, e kona ni kabaea ara mare n te berita ae tabu te Tamnei ae tabu. A riki kakabwaia ake a kabaeaki bwa “uaa aika aki mauna.
Tera ae kainnanoaki nakon te kakaonimaki ni kawakina te mare n te berita ae tabu ae boou ae akea tokina?
E a tia n reirei Beretitenti Russell M. Nelson bwa iai uoua tein kabaebae ngkana ti rinnako n te berita ae tabu n te mare ae akea tokina; iteran te boraraoi i marenan te bumwaane ao te buaine, ao te boraraoi ae rietaata ma te Atua. Ni karekea kakabwaian te karietataaki ni kabaeaki i aora ao n tikunako i mwiin te maiu aei, ti riai ni kokoaua nakon boraraoi aika uoua aikai n te berita ae tabu.
Ni kawakinan kanoan te boraraoi ma buum, e reirei nakoira te Atua bwa ko na “tangira [oin] buum te aine [ke buum te mwaane] ma [nanom] ni kabanea, ao … n nim ma neienne [ke teuanne] ao akea riki.” Ibukiia ake a tia ni mareaki, te nim nakon neienne ke teuanne ao akea riki nanona kam kaai n reitaki i nanon te tangira, kam tangira ao tabe ibukimi, kam bairei taai ma buumi i tinanikun bwaai tabeua, ao kam nakon te Atua bwa e na buoki ngkami n tokanikai i aon mamaarami nako. E nanonaki naba bwa akea te namakin ke te reitaki n taanga n arona nako i tinanikun ami mare, ni ikotaki ma te kabwakabwaka ke te marooro, ao akea tamnei n tangako, ake a na karika te kaibwabwaru.
Ni kawakinan te boraraoi n te berita ae tabu, e riai irouia uoman bwa a na iangoa te mareaki. E a tibwa reirei Beretitenti Dallin H. Oaks: “Ti bane naba n ataia bwa Ngaia ae te [Atua] e bon aki kona n taumatoa temanna nakon kabaeakin aia reitaki ngkana e bon aki boraoi n aia iango teuanne ke neienne. Te kakabwaia n te kabaebae e na bon karaoaki nakoia ake a kawakin aia berita ae tabu ma e aki anaaki n te taumatoa ni kabaeiia aomata aika a tuai n tau ke n aki kariaia
Tera te boraraoi ae rietaata ae e nanonaki iroun Beretitenti Nelson? Te boraraoi ae rietaata bon are e karaoaki ma te Atua.
Ni kawakina te boraraoi ae rietaata aei ma te Atua, ti kokoaua nakon ara berita aika a tabu n te tembora are ti a tia ni karaoia ni kaineti ma tuan te ongeaaba, anga karea, te euangkerio, te itiaki, ao te katabuaki. Ti berita naba ma te Atua bwa ti na karekeia raora ibukin te maiu ae akea tokina ao n riki bwa buu ao kaaro aika a raoiroi. Ni kawakinan te boraraoi ae rietaata, ti tau ibukin kakabwaia n riki bwa kaain ana utu te Atua rinanon te berita ae tabu ma Aberaam, ni ikotaki ma kakabwaiaaia kanoa, te euangkerio, ao te nakoanibonga. Kakabwaia aikai bon ngaia naba uaa ake a aki mauna.
E ngae ngke ti kantaningaia bwa ni kabane ake a rin n te berita ae boou ao n akea tokina a teimatoa ni kokoaua ao n karekei kakabwaia ake a kabaeaki i aoia ibukin te maiu ae akea tokina, n tabetai te kantaninga anne e riaon ara kona. I nanon au tai ni mwakuri, I a tia ni kaitibo ma membwa ake a karaoi aia berita aika a tabu ma aki karaoa anne buuia. Iai naba ake akea buuia, a aki reke aia tai ni mare n te maiu aei. Ao iai naba ake a aki kakaonimaki nakon aia berita aika a tabu n te mare. Tera ae riki nakoia aomata ake a reke aikai nakoia?
-
Ngkana ko teimatoa ni kakaonimaki nakon berita aika a tabu ake ko karaoi ngke ko entaute, ko na karekei am kakabwaia ake a beritanaki nakoim n te entaumente e ngae ngkana e urua ana berita buum te aine ke te mwaane ke n urua ana mare. Ngkana ko a tia ni kabaeaki ao n raure i mwiina, ao ngkana e aki kabuaaki kabaeakim, te kakabwaia nakon te aomata n te kabaebae anne e teimatoa n tiku ni maiu ibukim ngkana ko teimatoa ni kakaonimaki.
N tabetai, ibukin namakinan te kamwaneaki ao kammaraki ni koaua, e kona te buu ae kakaonimaki ni kabuaa kabaeakiia ma buuia ake aki kakaonimaki bwa aonga n kararoaia ma ngaiia, i aon te aba ao n te maiu are i mwiina. Ngkana ko raraoma bwa ko bae ma buum ngkoa are e aki rarairannano, uringa, ko na bon aki! E na bon aki tangira temanna te Atua bwa e na tikunako ni bae n te reitaki ae akea tokina ni kaitaraa nanon teuanne ke neienne. E na kakoaua Tamara are i Karawa bwa ti na karekei kakabwaia ni kabane are a tangiria nanora ao ara rinerine.
Ma, ngkana e tangiraki kamaunaan te kabaebae, e karineaki te inaomata n rinerine. A kona ni karaoaki kawai aika a katauaki. Ma e riai n aki karaoaki aio n tiaki angana! E taua te kiing te Moan Beretitentii ni kabaebae i aon te aba ao i karawa. N te tai are e kariaiakaki kamaunaan te kabaeaki iroun te Moan Beretitentii, kakabwaia ni kabane ake a kaineti ma te kabaeaki anne aikoa mwakuri; a kamaunaaki boraraoi ake a karaoaki ma kainabaia ke ma te Atua. E kakaawaki te mataata bwa karekean te kakabwaia n te karietataaki, ti riai ni kaotia bwa ti bon kukurei n rin i nanona ma te kakaonimaki ni kawakina te berita ae tabu ae boou ae akea tokina aei, n te maiu aei ke are i mwiina.
-
Ibukia membwa n te Ekaretia ake a tuai iein, taiaoka uringnga, “n oin ana kawai ao ana tai te Uea, akea te kakabwaia ae na tauaki mairouia Aika Itiaki aika kakaonimaki. E na motiki taeka te Uea ao e na kaniwanganiia n tatabemaniia nako ni kaeineti ma [nanoia] ae korakora n raonaki ma aia mwakuri.”
-
Ngkana ko tuai teimatoa ni kakaonimaki nakon berita aika a tabu n te tembora, iai te kaantaninga? Eng! Ana euangkerio Iesu Kristo bon te euangkerio n karekean te kaantaninga. E roko te kaantaninga anne rinanon Iesu Kristo ma te rairannano ni koaua ao iriiran ana reirei Kristo ma te ongeaba. I a tia n nooria aomata ni karaoi kaairua aika a kakaiaki, n urui aia berita aika a tabu. Aika a teimatoa n riiriki, I nooria ake a rairannano ni koaua, ni kabwaraaki aia bure, ao n oki nakon kawain te berita. Ngkana ko a tia n urua am berita n te tembora aika a tabu, I kaumakiko bwa ko na oki nakon Iesu Kristo, marooro ma am bitiobi, raira nanom, ao kauka nanom nakon te mwaaka ni kamaiu ae korakora ae tauraoi ae riki man ana Mwakuri ni Kamaiu Iesu Kristo.
Tariu ao mwaneu, e a tia n anganiira berita aika a tabu Tamara are i Karawa bwa ti aonga ni kona ni karekea ni kabane ake E a tia ni kawakinna ibukira. Kakabwaia aika a tabu mairoun te Atua aikai a rangi ni kangkang riki nakon uaan kaai i aon te aba. A kona ni kawakinaki ni kateimatoaaki ibukira n akea tokina, n riki bwa uaa aika aki mauna, ngkana ti kakaonimaki nakon ara berita aika a tabu n te tembora.
I kakoaua bwa e a tia ni kaoka te kariaia ni kabaebae te Atua i aon te aba bwa e kabaeaki naba i karawa. E kuneaki te kariaiakaki anne n Ana Ekaretia Iesu Kristo ibukiia Aika Itiaki ni Boong aika Kaitira. E tauaki iroun te Moan Beretitentii ao te Kooram n te Tengaun ma Uoman ao ni kammwakuraki i aan ana kairiiri Beretitenti Russell M. Nelson. Te koraki ake a rin n te berita ae boou ao n akea tokina n te mare ao ni kawakina te berita ae tabu anne a kona n riki ni kororaoi ao n karekea i nanon taina kororaoin mimitongin te Tama, n aki tarai aroaro ake a riaon aia konaa.
Kakabwaia aika a beritanaki aikai n irekereke nakon ara berita aika a tabu a kona ni kabaeira iroun te Tamnei ae tabu n te berita ao n riki bwa uaa aika aki mauna n aki totoki. Aikai au koaua n aran Iesu Kristo, amen.