Wewete, Tai bwaka
Ngkana ti wetea te Atua ao ti na bon aki bwaka.
N te bong aei I tangiria ni moanna man te koaua ae nako mai inanou bwa E ongo ara tataro te Atua ao ni kaekai n ae bon onoti ibukira.
N te aonaaba ngkai ti rinanon taai aika aki ataaki, te maraki, te bwaranano ao te uruaki n nano, ti kabotoa riki arora iaon oin korakorara ao baike ti tangiri, n aron ataibwaira ao kamanoara ake a reke man te aonaaba. Aio e na karika ae ti katuka are oin raoi buokara ao boutokakira mai ibuki are e kona ni kaitarai kangaanga n te maiu ae mamate aei.
I uringnga te tai ngke I karinaki n te onaoraki ibukin aorakiu, are e a bon kangaanga reken iai matu. Ngke I kamatea te taura ao e a rotongitongo nanon te ru, I noora otan te koroboki iaon te tiiring i etau ae kangai, “Wewete. tai bwaka.” I miimii, bwa n te bong are imwiina I norii aekan rongorongo akanne inanon nako taian ruu.
Bukin tera e rangi ni kakawaki te rongorongo aei? Ngke I titirakina te neeti iaon aei, e taku, “E koreaki bwa e na totokoa te ikuaki ae karina are e na kakorakoraa te maraki are iai iroum.”
N te maiu aei, n aron teina, e uoti taneiai aika a kamaraki, a riki tabeua bon man rabwatara, tabeua a riki ibukin mamarara ke man rotakira, tabeua a riki man aia rinerine tabeman, ao tabeua a riki bon man kabonganaan ara rinerine.
A na iai riki te berita ae korakora nakon are e bon anga Ngaia ae te Tia Kamaiu ngke E kangai, “Bubuti, ao kam na anganaki; ukeuke, ao kam na karekea; karebwerebwe,” ke wewete, “ao e na kaukaki nakoimi?
Te tataro bon ti kawaira n reitaki ma Tamara are i Karawa are ti kona iai ni “wewete ao n aki bwaka.” Ma, bon iai taai ae ti na bae ni iangoia bwa te wewete e aki ongoraeaki ibukina bwa ti aki karekea te kaeka ae tawe ke te kaeka are ti kantaningaia.
Aio e kona ni kairiira nakon te raraoma, te aki kukurei, ao te un. Ma uringa te onimaki are e kaotia Nibwaai iaon te Uea ngke e kangai, “E aera ngkai e na aki kona ni kairai bwa N na kabaa te kaibuke?” Ngkai, I tuangko, e na kanga n aki kairiko te Uea, bwa ko na aki bwaka?
Te onimaki nakon ana kaeka te Atua e kaota butimwaean ae Ana kawai bon tiaki ara kawai ao bwa “ni kabane bwaai a na koro bukiia n te tai ae riai.”
Ataakin koauana raoi bwa ngaira bon naati iroun Tamara are i Karawa ae tatangira ao n akoi e riai n anganiira te unganano ni “wewete” n te nano n tataro ma te anua ae te teimatoa n [ta]tataro, ao n aki [kai]mamaara; … ao e na reke mweraoin tamnei[ra] man te mwakuri are [ti] karaoia.” Iangoia bwa aekakira ana namakin Tamara are i Karawa ngkana ara tataro n tatabeua nako ake ti karaoi ti bubuti n aran Natina, Iesu Kristo. Tera te korakora ao anuara n amarau, ae I kakoauaa, bwa a na kaotaki ngkana ti karaoi baikai!
Koroboki aika tabu a onrake ma banna ni katooto irouia te koraki ake a wewete nakon te Atua bwa aonga n aki bwaka. Ereman ao ana taanga ni buaka, ngke a kaitarai aia kangaanga, a “wetea” te Atua, ni kabwaroa tamneia n te tataro. A karekea karauan nanoia, te rau, te onimaki, ao te kaantaninga, ni karekea kaungakiia ao nanomatoaia ni karokoa e koro nanon aia kouru.
Iangoia bwa e na kanga aron Mote n tia ni wetea ao n tang nakon te Atua ngke e a kunea ae e a mena imarenan Taari are Uraura ao kaain Aikubita ake a kan roko ni buakaniia, ao Aberaam ngke e ongeaba nakon bukinana n anga natina ae Itaaka bwa te karea.
Temanna mai iroumi kam a tia ke kam na rinanon te taneiai ae te wewete e na riki bwa te kaeka nakon te aki bwaka.
Tenibwi te ririki n nako, ngke kainnabau ao ngai ti katauraoi nakon mareakira n te tua ao mareakira n te tembora, ti tareboniaki ni kaongoaki bwa e a kamaunaaki ara mare n te tua ibukin te taowae ae riki. Ti karekea kaongoakira aei tenibong imwaain are e na karaoaki te mare. Imwiin katakin kabaean ara tai ae mwaiti ma aobiti ake tabeua ao akea ae reke ara tai, ti a moanna n namakina te bwaranano ao te aki koaua bwa ti na bon mareaki n aron are e baireaki.
Au kainrou ao Ngai ti “wewete,” ni kabwaroa nanora n te tataro. N tokina, e a tuangiira temanna taekan teuana te aobiti n te kawa ae uarereke itinanikun te kawa ae bubura ike raoraona iai bon te meeia. N aki tabwara, ti nako ni kawaria ao ni butiia ngkana e kariaia bwa e na mareira. E roko kimwareireira, bwa e kariaia. E kamataataa ana tia koroboki nakoira bwa ti riai ni karekei beeba ni kakoaua n te kawa anne ao n nikirii ni kabane imwaain te bwakantaai n te bong are imwiina.
Te bong are imwiina, ti mwaing nakon te kawa ae e uarereke ao ni kawara te o-ni-bureitiman ni bubuti reken beeba ake a kainnanoaki. Ti kubanako, bwa e taku te aobitia bwa e aki kona n anganiira, ibukina bwa a mwaiti taanga ni kairake aika a karabaiia mai irouia aia utu ni mareaki ni karaba n te kawa arei, ma eng bon tiaki ngaira. Manga aekakina naba, te maaku ao te nanokawaki e taoniira.
I uringa arou bwa I kanga ni karaurau ni wetea Tamau are i Karawa bwa N na aki bwaka. I karekea te namakin n au iango ae itiaki, ae okioki ae kangai, “Te rekomente nakon te tembora, te rekomente nakon te tembora.” I waekoa naba ngkekei ni buuta au rekomente n te tembora ao n angan te aobitia, are e miimii iai au kainrou.
Bon te kubanako ngaira ngke ti a ongo ae kangai te aobitia, “Bukin tera kam aki kaman tuangai ae ngkami kaain Ana Ekaretia Iesu Kristo ibukiia Aika Itiaki ni Boong aika Kaitira? I rang ataa raoi ami ekaretia.” E waekoa ni karaoi beeba ni kakoaua. Ti rangi ni kubanako riki ngke e a otinako naba te aobitia man te aobiti n akea te bwai ae e taekinna.
E a nako nimabwi te miniti, ao e tuai man oki. 5 te miniti ao e a boo 12 n te ingabong, ao bon tii ara tai te bwakantaai anne n nikirii taian beeba. Ngkekei naba ao e a kaoti ma te kamea ae uarereke ao n tuangiira bwa bon ana bwaintangira nakoira ngkai ti mareaki ao e a anganiira ma taian beeba.
Ti biri nakon ana aobiti te meeia, ma ara beeba ni kakoaua ao raora ara kamea. Imwiina ti noora kaan te aobiti n buti ni kainetiira. I tei i mwaaina. E tei te kaa, ao ti noora te tia koroboki bwa e mena ikekei. E noorira, ao n taku “I karautaeka, I tuangii ngkami bwa n te bwakantaai. I riai n nako ni katabeau teuana.”
I kananorinanoai ni kainabaabu, ni wetea Tamau are i Karawa, ni manga bubuti riki bwa N na aki bwaka. N te tai ae waekoa, e riki te kakai. E taku te tia koroboki nakoira, “Ai kakatekera ami kamea anne. Te tabo raa ae I kona ni karekea temanna ae ai aron anne ibukin natiu te mwaane?”
“Aio bon ibukim,” ti waekoa ni kaekaa.
E taraira te tia koroboki ma te kubanako ao n taku, “E raoiroi, ti a nako n te aobiti ao ni barongaa aron karaoana.”
Uoua te bong imwiina, ti mareaki Carol ao Ngai n te tua, n aron are e baireaki, ao imwiina ti kabaeaki n te Lima Peru Tembora.
E koaua, ti riai n uringnga bwa te wewete e bon nakon te onimaki ao te mwakuri—te onimaki n ataia ae iai Tamara are i Karawa are E kaekai ara tataro ni kaineti nakon Wanawana ae akea tokina, ao imwiina, te mwakuri ae e rinanon te bwai are ti bubuti ibukina. Tataro—wewete—bon kanikina n ara kaantaninga. Ma karaoan te mwakuri imwiin te tataro bon te kanikina ae ara onimaki e bon koaua—te onimaki ae e kataaki n taai ni maraki, maaku, ke n te bwaranano.
I buti ngkami bwa kam na iangoi aikai:
-
N taainako iangoa te Uea bwa te moan bwai ibukin te ibuobuoki.
-
Wewete, tai bwaka. Rairaki nakon te Atua n te tataro ae nako mai inanom.
-
Imwiin te tataro, karaoa am kabanea ni konaa ni karekei kakabwaia ake ko tataro ibukiia.
-
Karinanoko ni butimwaea te kaeka are ni bon oin Ana tai ao n Ana kawai.
-
Tai toki! Reitinako waaki rake iaon kawain te berita ae tabu ngkai ko tataninga ibukin te kaeka.
Tao a na iai temanna n te tai aei are, inanon te bwai ae e rinanona, a namakinna ae a tauraoi ni bwaka ao a tangiria ni wewete n aron are e karaoia Iotebwa Timiti ngke e tang, “O te Atua, ko mena iaa? … E na maanra baim n tiku?”
Bwa tao inanon taai ae aron aikai, tataro n “te maiu n tamnei ae waaki nako,” n aron are e reireia Beretitenti Nelson, ibukina bwa aki toki n ongoraeakinaki am tataro!
Uringa te kuna n taromauri aei:
Ko kautinako n te ingabong,
Ao ko tataro?
N aran Iesu, ara Uea,
Ko na bubuti buokam
Bwa bon otangam?
Ngkana ti tataro ti kona n namakina mwaneakira iroun Tamara are i Karawa, are e kanakoa Ana Riki Temanna bwa e na kabebetei rawawatara, ibukina bwa ngkana ti wetea te Atua, I kakoauaa bwa ti na bon aki bwaka. N aran Iesu Kristo, amen.