A Kakaawaki Taeka
A reitaki taeka ma te namakin. A kaoti ara iango, namakin, karaki, ao ara taneiai aika a tamaroa ke a buakaka.
Tariu, mwaaneu, ao raoraou ni kabuta te aonaaba, I kakaitau ngkai I kona n maroro nakoimi te botanaomata ae moan te mwaiti aio, ake angiina bon kaain te Ekaretia ma raao ao taan ongora aika a boou n te maungatabu aio. Ti butimwaingkami!
Rongorongo ake a tibwaaki man te tabo n taetae aio a marooroakinaki n taian taeka. A tibwaaki n te Taetae n Imatang ao n rairaki nakon e kaaniia 100 tabun taetae aika a kakaokoro. Ma ti teuana te oi n tainako. Taeka. Ao a rangi ni kakaawaki taeka. N na kaoka riki anne. A kakaawaki taeka!
Boni ngaia aan te aro n reitaki; a kaota ara koaua, kateira, ao ara nonoori. N taai tabetai ti taetae; ao n taai n tabetai ti ongora. A reitaki taeka ma te namakin. A kaoti ara iango, namakin, karaki, ao ara taneiai aika a tamaroa ke a buakaka.
Te kananokawaki bwa a kona n tabekaki taeka n aki ataa te riai, aki mwamiraaki raoi, ke a kammaraki. Ngke a tabekaki, a bon aki kona ni manga kaokaki. A kona ni kaikoaka, kataerea, uota rikaki te aomata, ke n karioi mwakuri aika a karuanikai. A kona n riki bwa karawawatakira.
N iterana are teuana, a kona n tabekaki taeka ni kimarimari, ni kaunganano, ke ni boutoka. A kona ni kauekea iangoan te bitaki, kabouan te nano, ke kaetan te kawai. A kona n riki taeka bwa kaukan ara iango nakon te koaua.
Aio bukina ngkai, e teretere raoi, bwa e kakaawaki ana taeka te Uea.
N Ana Boki Moomon, te burabeti ae Aramwa ao ana botanaomata i Amerika ngkoa, a kauntaba ma te buaka ae reitinako ma naake a katinanikua ana taeka te Atua, naake a kamatoai nanoia, ao naake a kabaerekai kateia. A kaman tia ni karaoa ae eti naake a kakaonimaki, “Ao ngkai, ibukina bwa te taeka ae kabwarabwaraki iai ana konabwai ni kairia aomata bwa a na karaoa ae e eti—eng, bon iai korakoran riki korakorana iaon aia iango aomata nakon te kabaang, ke te bwai riki teuana, are e a tia n riki nakoia—ngaia are Aramwa e iangoia bwa e riai bwa a na kata tamaroan ana taeka te Atua.”
Ana taeka te Atua, e konai taeka ake tabeua. Aio teina mani Karikan aonaaba ngke E taetae te Uea: “E na oota: ao e a oota naba.”
E tabekaki te kaunganano n te Nu Tetemanti iroun te Tia Kamaiu: “Ane e na mauna karawa ma aonaba, ma a na bon aki mauna au taeka.”
Ao aio naba: “Ngkana e tangirai te aomata, ao e taua au taeka: ao E na tangiria Tamau, ao Ti na nakoina, ao Ti na maeka i rouna.
Ao mairoun Maria, tinan Iesu, e roko te kakoaua ae nanorinano aio: “Tara ana toro te Atua, ae te toro ae te aine; e na karaoaki nako iu n ai aron am taeka.”
Kakoauaan ao tauan ana taeka te Atua, e kaaniira nako Ina. E a tia ni berita Beretitenti Russell M. Nelson, “I berita bwa ngkana ko kamatebwaia Ana taeka, e na rikirake am konabwai n riki n ai Arona.”
Ti tangiria n riki n ai aron are e mwaneweaki n te kuna, “e raka ara kakabwaia ao tabura—n ai aron te Tia Kamaiu”?
I katamneia Iotebwai Timiti te ataei ngke e katorobubua man ongo ana taeka Tamana are i karawa: “[Iotebwa,] Aio Natiu ae Tangiraki. Ongo Irouna!”
Ti “ongo irouna” n taeka man koroboki aika a tabu, ngaia are ti na kawenenakoi taeka aikai ke ti na mwakurii i nanon maiura? Ti na bitaki?
Ti “ongo Irouna” n te kaotioti ae e onoti ao n ana wirikiriki te Tamnei ae Raoiroi, ni kaekaan tataro, ao n taai ake bon ti Iesu Kristo, rinanon mwaakan Ana Mwakuri ni Kamaiu, ae kona ni kabebeteira, ni kabwarai ara bure ao n anganira te rau, ao ni mwaneira “ni baina n akoi.”
Te kauoua, a kakaawaki aia taeka burabeti.
Burabeti, a kaota koauan ae E tabu Iesu Kristo. A reirei Ana Euangkerio ao ni kaota Ana tangira nakoia. I kaota au koaua bwa te burabeti ae e maiu, Beretitenti Russell M. Nelson, e karekei man tataekin ana taeka te Uea.
E rabakau ni maroro Beretitenti Nelson. E a tia n taku, “Teimatoa ni kawain te berita ae tabu,” “Botiia Iteraera,” “Kariaia te Atua bwa Boton Ara Iango Inanon Maiura,” “Bwaina te ikarekebai,” “Kakaitau,” “Kakorakoraa am onimaki iroun Iesu Kristo,” “Kamarurunga am koaua,” ao “Riiki bwa te tia karaoa te raoi.”
N tai ae aki maan n nako ,ao e tuangira bwa ti na “iangoa te abanuea ae te Tiretio.” “Ngkana ko kaaitara ma te kangaanga ni karaoan am rinerine,” e taku, “iangoa te abanuea ae te tiretio! Ngkana ko rootaki n te kariiriaki, iangoa te abanuea ae te tiretio! Ngkana ko korakai n te maiu ke irouia raoo ake ko rang tatangiriia, iangoa te abanuea ae te tiretio. Ngkana iai ae mate ni moantaai, iangoa te abanuea ae te tiretio. …Ngkana ko taonaki ni kangangan te maiu aei, iangoa te abanuea ae te tiretio! … Ngkai ko iangoa te abanuea ae te tiretio, e na reke te bitaki i nanom, … ko na kaitibo ma te kataaki ao te kakaitara n te ota ae boou, … [ao] e na rikirake am onimaki.”
Ngkana ti iangoa te abanuea ae te tiretio, ti taekin bwaai ngkai, ma … aika a na roko.” N te aonaaba ae taonaki n te kamangongao ao te itabaraara, ti riai ni bwaina te taratara anne.
Unimwaane George Albert Smith, i mwaain are e riki bwa te Beretitenti n te Ekaretia, e taekina kamaotaakin te burabeti ao ni mutiakin ana taeka. E taku: “Te motinnano are ti karaoia ngke ti katei baira … bon teuana te bwai ae rangi ni kakaawaki. … Nanona … bwa ti na tei irarikina; ti na tataro ibukina; … ao ti na uaiakina tauan ana kaetieti n aron are E tua te Uea nakoina.” Nanona naba, ti na botumwaaka ni mwakurii ana taeka te burabeti.
Ngai temanna mai ibuakoia 15 burabeti, taan mamata, ao taan kaotioti ake a kamatoaki ngkoananoa iroun te Ekaretia ae bwanin. I kan tibwaa teuana rongorongou ike I kamatoaa iai te burabeti man taua ana taeka. I kabotaua arou ma te burabeti are Iakobwa, are e taku, “I a tia naba n ongo bwanaan te Uea n taetae nakoiu n oin ana taeka.”
Okitobwa ae e nako kainnabau, Melanie, ao Ngai, ti mena i Bangkok, Thailand, ibukin au katauraoi ni katabua ana ka-185 n tembora te Ekaretia. Irou, tibwangau aio ai aron te mii ao I nanorinano iai. Bon aio te moan tembora n aonon Atia maiakimainiku . Moan te betiraoi—e boraonotao, ruaiwa taubukina, “te kateitei ae boraoi” bwa e na riki bwa maneaban Iehova ae te Atua. Tao iraua au namwakaina n iangoa raoi te katabu aei. E roko i nanou ma au iango bwa te aba ma te tembora, a mwaneaki raoi i nanon baia burabeti ma abotoro. Bon Thomas S. Moson are e katanoata te tembora ao Beretitenti Nelson ae karaoa te katabu.
I a tia ni katauraoa te tataro ni katabu namwakaina n nako. A tia n rairaki taekana nakon 12 taetae. Ti a tauraoi. Anne naba bon irou.
N tairikin te bong ni katabu ao I kautaki mai i aon kieu ma namakinan te aki rau, ao tabetaben au iango ibukin te tataro ni katabu. I kataia ni katibanakoa te wirikiriki, ao n taku bwa e a bon tia aron te tataro. Ma e aki toki rokon te Tamnei ae Raoiroi irou. I namakinna bwa iai taeka aika a aki rin, ao n aron kairakiu mai karawa, a roko rinanon te kaotioti, ngaia are n rabanen te tataro, I karinii taeka aikai: “Ti a iangoa te abanuea ae te tiretio, ni kariaia te Atua bwa Boton ara Iango i nanon Maiura, ao n riki bwa te tia karaoa te raoi n taainako.” E kauringai te Uea bwa N na iangoa raoi ana taeka te burabeti ae e maiu: “Iangoa te abanuea ae te tiretio,” “Kariaia te Atua bwa Boton ara Iango Inanon Maiura,” “riiki bwa te tia karaoa te raoi.” A kakaawaki ana taeka te burabeti iroun te Uea ao nakoira.
Te kateniua, ae e rangi ni kakaawaki, bon ara taeka. E koaua, ngkai e kaona aonaaba te emoji n taai aikai, ao a kakaawaki taeka.
Ara taeka, a kona ni boboutoka ke ni kaun, ni kakukurei ke ni kataorikaki ke n tewenakoaki. Ngkana e kabuebue kanoan te tai, a kona ni kabueeka ke ni kammaraka te nano taeka—ao n titiku n te nano. Ara taeka i aon te intanete, kanako rongorongo, bwaai n reitaki n te intanete ke tweets, a kona ni bure kabwaranakoaia. Ngaia are taratara raoi am taeka ao aron tabekana. I nanon ara utu, riki nakoia buummwane, buuaine, ao ataei, a kona ni bobotiira ke ni karekea ara marena n ara taeka.
N na anga teniua taeka aika a uarereke ake ti na kona ni kabonganai ni katoka te maraki man taian kangaanga ao marena, ni boutokaira, ao ni kakaungaira ibon i marenara:
“Ko rabwa.”
“Kabwara au bure.”
Ao “I tangiriko.”
Ko na tai tataninga te botaki ke te kangaanga ao ko a tibwa kabonganai taeka aikai. Kabonganai n tainako ma te nano ae koaua, bwa a kaota taben nanom ibukiia aomata. E bati te kabwarabae n taetae; tai karaoa anne.
Ti kona ni kangai “ko rabwa” i aon te kaintamwarake ae bubuti, aia tabo n tei taian kaa, te mwaakete, te kateirain, ke nakoia kaain rarikira ao raoraora. Ti kona ni kangai “kabwara au bure” ngkana ti kairua, ngkana ti aki roko n te bowi, ngkana ti mwaninga te rekenibong, ngkana ti nora te aomata ae e rawawata. Ti kona ni kangai “I tangiriko” ao taeka akanne a katerea te rongorongo “I iangoiko,” “I tabeakiniko,” “I tauraoi ni buokiko,” ke “Ko moanbaan te kakaawaki ngkoe irou.”
N na karakina teuana rongorongou. Buumwaane, kakauongo raoi. Aine, e na ibuobuoki naba aio nakoimi. I mwain weteakiu nakon tibwangau n te Ekaretia, I mwamwananga man au kambwana. I a tia n kaei taabo aika a raroa i nanon taai aika a bon tau maniia. N tokin au bong, e aki kakaawaki bwa I menaa iaara, I aki toki n tareboniia mweengau. Ngkana e kaekaki te tareboon irouni kainnabau ae Melanie, ao I reitaki ma ngaia, inanon ara maroro, I aki toki n tataekina “I tangiriko” Ni katoa bong, a riki taeka akanne bwa antiroon tamneiu ao au mwakuri; a kamanoai man babaire aika a buakaka. “Melanie, I tangiriko” boni kaotan te onimaki ae matoatoa i marenara.
E aki toki ni kangai Beretitenti Thomas S. Monson, “E rangin ni kainnanoa am ibuobuoki te aonaaba. Iai waae n nakonako, baai n tautau, iango ni kaungaunga, naano ni kairi mai ieta, ao tamnei aika a na kamaiuaki.” Taekinan “Ko rabwa,” “Kabwara au bure,” “I tangiriko” e na kakoroa nanon anne.
Tariu ao mwaaneu, a kakaawaki taeka.
I berita bwa ngkana ti “kanuaira n ana taeka Kristo” are e kairiiri nakon te kamaiuaki, ana taeka ara burabeti ake a kairiira ma ni kaungaira, ao ara taeka ake a kaotiira bwa antai ngaira ao tera rikiara, e na ruonira mwaakan karawa. “A na tuangko ana taeka Kristo bwaai ni kabane aika ko riai ni karaoi.” Ngaira natin Tamara are i Karawa ao boni Ngaia Atuara, ao E kantaningaira bwa ti na taetae n “neweia anera” ni mwaakan te Tamnei ae Raoiroi.
I tangira au Uea ae Iesu Kristo. Boni ngaia, n aron ana taeka Itaia n te O Tetemanti, “Te Kamimi, Te tia Reirei, Te Atua ae Mwaaka, te Tama ae Akea tokina, Te Uea n Raoi.” Ao e katereterea te Abotoro ae Ioane, Kristo boni Ngaia “te Rokou.”
Aio au koaua ngai te Abotoro are e weteaki nakon ana mwakuri mai karawa ao ni weteaki bwa te tia kakoaua i Rouna. N aran te Uea Iesu Kristo, amen.