Siguiendo Jesus: Ta un Hasidó di Pas
Hasidónan di pas no ta pasivo, nan ta persuasivo na e manera di e Salbador.
Mi rumannan stimá, awor ku nos ta eksperensiando tempunan sóbrio di komoshon, kontenshon, i, pa hopi sufrimentu profundo, nos kurason ta yená ku gratitut abrumadó pa nos Salbador i e bendishonnan eterno di e evangelio restorá di JesuCristo. Nos ta stima i nos ta konfiÉ, i nos ta resa ku nos lo siguiÉ pa semper.
E Desafio di Media Sosial
E impakto poderoso di e Internèt ta un bendishon i un desafio, úniko den nos tempu.
Den un mundu di media sosial i super karetera di informashon, un persona su bos por wòrdu multipliká eksponensialmente. E bos ei, sea berdadero òf falsu, sea hustu òf ku prehuisio, sea amabel òf kruel, ta move instantaniamente rònt mundu.
Publikashonnan riba media sosial di konsiderashon i bondat hopi biaha ta ketu bou di radar, kaminda palabranan di kontenshon i rabia ta zona frekuentemente manera bos den nos orea, sea ku filosofia polítiko, hende den notisia, òf opinion riba e pandemia. Niun hende òf niun tópiko, inkluyendo e Salbador i Su evangelio restorá, ta imün di e fenomeno sosial aki di bosnan ku ta polarisá.
Bira un Hasidó di Pas
E Sermon del Monte ta un mensahe pa tur pero tabata spesifikamente duná na e disípulonan di e Salbador, ken a skohe pa siguiÉ.
Senor a siña kon pa biba, e tempu ei i awor, den un mundu di kontenshon. “Bendishoná ta e hasidónan di pas,” El a deklará, “pasó nan lo wòrdu yamá e yunan di Dios.”1
Dor di e eskudo di nos fe den JesuCristo, nos ta bira hasidónan di pas, pagando—es desir kalma, fria, òf ekstinguí, tur e flechan ardiente di e atversario.2
Ora nos hasi nos parti Su promesa ta ku nos, lo wòrdu yamá e “yunan di Dios.” Kada persona na mundu ta “desendiente”3 di Dios, pero pa wòrdu yamá “yunan di Dios” ta nifiká mas, muchu nas. Ora nos bin na JesuCristo i hasi kombenio ku n’E, nos ta bira “su simia” i “herederónan di e reino,”4 “yunan di Cristo, Su yunan hòmber i muhé,”5
Kon e hasidó di pas ta kalma i fria, e flechan ku ta kima? Sigur no skonde pa esnan ku ta menospresiá nos. Na lugá di esaki, nos ta keda konfia den nos fe, kompartiendo nos kreensha ku konvikshon pero semper sin rabia ni malisia.6
Resientemente, despues di a mira un opinion fuertemente ekspresá ku tabata krítiko pa ku e Iglesia, Reverendo Amos C. Brown, un lider nashonal di derechinan humano i pastor di e Third Baptist Church na San Francisco, a kontestá:
“Mi ta respetá e eksperensia i perspektiva di e persona ku a skirbi e palabranan ei. Klaro ku, mi no ta mira loke e ta mira.”
“Mi ta konsiderá esaki un di mi gosonan di mas grandi pa konosé e lidernan [di e Iglesia] aki, inkluyendo Presidente Russell M. Nelson. Nan ta, segun mi, e personifikashon di e mihó liderasgo ku nos pais tin di ofresé.”
Despues el a añadí: “Nos por keha di kon kosnan tabata. Nos por nenga pa rekonosé tur e kosnan bon ku ta pasando aworaki. … Pero e aserkamentunn ei lo no sana nos divishon nashonal. … Manera Jesus a siña, nos no ta eradiká maldat ku mas maldat. Nos ta stima generasomanete i biba ku miserikordia, hasta na esnan ku nos ta pensa ta nos enemigunan.”7
Reverendo Brown ta un hasidó di pas. Ku kalma i ku rèspèt ria, el a fria e flechan ku ta kima. Hasidónan di pas no ta pasivo, nan ta persuasivo na e manera di e Salbador.8
Kiko ta duna nos e forsa interno pa fria, kalmá, i paga e flechanan ku ta kima dirigí na e bèrdatnan ku nos stima? E fortalesa ta bini mediante nos fe den JesuCristo i nos fe den Su palabranan.
“Bendishoná boso ta ora ku hende insultá boso i, … i ta bisa tur klase di maldat riba boso pa Mi kousa.
“… pasobra boso rekompensa den shelu ta grandi; pasobra asina nan a pèrsiguí e profetanan ku tabata promé ku boso.9
E Importansia di Albedrio
Dos prinsipio importante ta guia nos deseo pa bira hasidónan di pas.
Promé, nos Tata Selestial a duna kada persona su albedrio moral, ku e abilidat pa skohe su propio kaminda.10 E albedrio aki ta un di donnan di mas grandi di Dios.
Di dos, ku e albedrio aki, nos Tata Selestial ta pèrmití pa [por tin] “oposishon den tur kos.”11 Nos “ta purba e marga, pa [nos] por sa pa apresiá e bon.”12 Oposishon no mester sorpresá nos. Nos ta siña distingui bon for di malu.
Nos ta regosihá den e bendishon di albedrio, komprondiendo ku lo bai tin hopi ku no ta kere loke nos ta kere. Defakto, poko den e delaster dianan lo skohe pa laga nan fe den JesuCristo ta sentral den tur kos ku nan pensa i hasi.13
Dor di e plataforma di medio sosial, un bos di inkredulidat por parse di ta un multitut di bosnan negativo,14 pero asta si e ta un multitut di bos, nos ta skohe e kaminda di hasidónan di pas.
E lidernan di Señor
Algun ta mira e Promé Presidensia i e Quorum di e Diesdos Apòstelnan di tin motibunan di mundu, manera lidernan polítiko, komersio, i kultural.
Sinembargo, nos ta yega na manera diferente na nos responsabilidat. Nos no ta wòrdu eligí ni selektá for di aplikashonnan. Sin ningun preparashon spesífiko, nos ta yamá i ordená pa kompartí testimonio di e nòmber di JesuCristo rònt mundu te na nos delaster rosea. Nos ta esforsá pa bendishoná esnan malu, esnan [ku ta] nan so, esnan kurason kibrá, i esnan pober i pa fortalesé e reino di Dios. Nos ta buska pa sa Señor Su boluntat i proklamá esaki, spesialmente na esnan ku ta buska bida eterno.15
Maske nos humilde deseo ta pa Señor Su enseñansanan wòrdu honrá pa tur hende, e palabranan di Señor dor di Su profetanan ta hopi biaha kontrali na e pensamentu i tendensia di e mundu. Semper e tabata asina.13
E Salbador a bisa Su Apòstelnan:
“Si e mundu [odiá] bo, bo sa ku el a odiá ami promé ku el a odiá bo. …
“… Tur e kosnan aki nan lo hasi … pasó nan no konosé Esun ku a manda Mi.”17
Kuidando tur [hende]
Genuinamente nos ta stima i kuida tur nos prohimo, hasta si nan no ta kere manera nos. Jesus a siña nos den e parábola di e Bon Samaritano ku esnan ku ta di kreensha diferente mester ekstendé man pa yuda tur den nesesidat, siendo hasidó di pas, buskando e kousanan bon i noble.
Den febrüari, un titular den Arizona Republic a deklará, “e proyekto di lei Bipartista sostené pa e Santunan di e Delaster Dianan lo protehá homoseksualnan i i transgéneronan.”18
Nos, komo Santunan di Delaster Dianan, ta “komplasé di ta parti di un koalishon di fe, komersio, hendenan LGBTQ i lidernan di komunidat kende a traha huntu den un spiritu di konfinsa i rèspèt mutuo.”19
Presidente Russell M. Nelson un biaha di forma pensativo a puntra, “Fronteranan no por eksistí sin bira liñanan di bataya?”20
Nos ta esforsá di ta “siguidonan apasibel di Cristo.”21
E Ora pa No Kontestá
Algun di e atakenan riba e Salbador tabata asina maligno ku E no a bisa nada. “I e sumo saserdote i e eskribanan … a akusé fuertemente … a hasi chèrchè di DjE,” pero Jesus “no a kontestánan nada.”22 Tin biaha ora bo ta un hasidó di pas ta nifiká ku nos ta resistí e implulso pa kontestá i na lugá di esei, ku dignidat, keda ketu.23
E ta kibra bo kurason ora palabranan fuerte òf baho wòrdu ekspresá tokante e Salbador, Su siguidónan, i Su Iglesia dor di esnan ku un tempu tabata pará huntu ku nos, a partisipá di e Santa Sena ku nos, i a testifiká ku nos i e mishon dibíno di JesuCristo.24
Esaki tambe a pasa durante di e Salbador Su ministerio.
Algun du e disípulonan di Jesus ku tabata ku n’E durante Su milager mas mahestuoso a determiná pa “no [kana] mas ku n’E.”25 Lamentabelmente, no ta tur lo keda firme den nan amor pa e Salbador i nan determinashon pa warda e mandamentunan.26
Jesus a siña nos pa alehá for di e sírkulo di rabia i kontenshon Den un ehèmpel, despues ku e Fariseonan a konfrontá Jesus i a konspirá pa wak kon nan por destruí’E, e skrituranan ta bisa ku Jesus a alehá Su mes for di nan,27 i milagernan a sosodé miéntras “gran multitut tabata sigui’E, i El a sana nan tur.”28
Bendishonando e Bidanan di Otro
Nos tambe por alehá for di kontenshon i bendishoná e bidanan di otronan,29 miéntras nos no ta isolá nos mes den nos propio huki.
Na Mbuji-Mayi, Republika DemoKratiko di Congo inisialmente algun tabata krítiko di e Iglesia, no komprondiendo nos kreensha nI di konosé nos miembronan.
Algun tempu pasá, Kathy i ami a asistí un serbishi spesial di Iglesia na Mbuji-Mayi. E muchanan tabata bistí imakulatamente, ku wowonan briante i sonrisanan grandi. Mi a spera pa papia ku nan di nan edukashon pero a bin haña sa ku hopi di nan no ta bayendo skol. Nos lidernan, ku fondonan humanitario hopi nominal, a haña un manera pa yuda nan.30 Awor, mas ku 400 studiante—mucha muhé i hende hòmber, miembro i tambe esnan no di nos fé—ta bon biní i ta wòrdu siñá dor di 16 maestro ku ta miembro di e Iglesia di JesuCristo.
Kalanga Muya di dieskuater aña a bisa, “[Dor ku nos tabatin poko sèn,] mi a pasa kuater aña sin por a bai skol. … Mi ta asina gradesí pa loke e Iglesia a hasi. … Awor mi por lesa, skirbi i papia Franses.”31 Papiando di e inisiativa aki, e alkalde di Mbuji-Mayi a bisa, “mi ta inspirá dor di E Iglesia di JesuCristo di e Santunan di e Delaster Dianan pasó miéntras [otro] Iglesianan ta wòrdu dividí kada un den nan skina… [boso ta traha] ku [otronan] pa yuda e komunidat den nesesidat.”32
Stima Otro!
Kada biaha ku mi lesa Juan kapítulo 13, mi ta kòrda di e Salbador Su ehèmpel perfekto komo hasidó di pas. Jesus ku amor a laba e pianan di e Apòstelnan. Despues, nos ta lesa “e tabata preokupá den spíritu”33 ora E tabata pensa tokante un ku E ta stima ku tabata prepará pa traishon’É. Mi a trata pa imaginá e pensamentunan i sentimentunan di e Salbador ora Judas a bai. Loke ta interesante ta ku, na e momento sobrio ei, Jesus no a papia mas di Su sentimentunan “preokupante” òf di traishon. Al kontrario, El a papia ku Su Apòstelnan tokante amor, Su palabranan ta kai manera kaskada durante e siglonan.
“Un mandamentu nobo Mi ta duna boso, Pa boso stima otro, manera Ami a stima boso. …
“Pa medio di esaki tur hende lo sa ku boso ta mi disípulonan, si boso tin amor pa otro”34
Ku nos por Stim’É i stima otro. Ku nos por ta hasidónan di pas, ku nos por wòrdu yamá e “yunan di Dios.” mi ta resa den e nòmber di JesuCristo, amèn.