Pero Nos No a Hasi Kaso di Nan
Kombenionan i ordenansanan ta hiba nos na i yuda nos pa rekordá semper nos konekshon ku Señor JesuCristo ora nos ta progresá riba e kaminda di konvenio.
Mi kasá, Susan, nos tres yunan i nan kasánan, tur nos ñetunan, i Elder Quentin L. Cook, mi kompañero di stul den e Quorum di Diesdos pa kasi 15 aña, tur sigur por testiguá di e echo ku ami no por kanta bon. Pero apesar di e falta di talento vokal, mi ta stima pa kanta e himnonan di e Restorashon. E kombinashon di palabranan inspirá i melodianan mahestuoso ta yuda mi siña prinsipionan di evangelio esensial i ta lanta mi alma.
Un di e himnonan ku a bendishoná mi bida den maneranan remarkabel ta “Trabajemos Hoy En la Obra del Señor.” Resientemente mi a bin ta skrudiña i siña tokante un frase spésifiko den e refran di e himno ei. “Nos lo no skucha loke e malbado por bisa, pero Señor so nos lo obedesé.”1
Nos lo no skucha.
Ora mi ta kanta “Trabajemos hoy en la Obra,” hopi bia mi ta pensa riba e hendenan den e vishon di Lehi bayendo dilanti riba e kaminda ku ta hiba na e palu di bida ku no solamente tabata “gara na”2 pero tabata “kontinuamente teniendo duru na e bara di heru, te ora nan a yega dilanti i kai abou i partisipá di e fruta di e palu.”3 Lehi ta deskribí multitutnan den e edifisio grandi i espasioso ku tabata mustra “e dede di kalumnia na [e] i esnan … partisipando di e fruta.”4 Su kontest na e gritamentu i insulto ta magnífiko i memorabel;”pero nos no a hasi kaso di nan.”5
Ta mi orashon ku e Spíritu Santu lo bendishoná i iluminá kada un di nos ora nos ta konsiderá huntu kon nos por wòrdu fortifiká pa “no hasi kaso” di e influensha malbado i bosnan ku ta tenta di e mundu kontemporanio den kual nos ta biba.
No Hasi Kaso
E palabranan hasi kaso ta sugerí tuma nota di òf pone atenshon na un hende òf algu. Pues, e palabranan di e himno “Trabajemos Hoy en la Obra” ta amonestá nos pa tuma un desishon afirmativo pa no pone atenshon na “kiko e malbado por bisa.” I Lehi i e hendenan huntu kuné ku a partisipá di e fruta di e palu ta proveé un bon ehèmpel di kon no pone atenshon na e tentamentu i eskoria ku frekuentemente ta bin for di e edifisio grandi i espasioso.
E doktrina di Cristo skirbí “ku e Spíritu di e Dios bibu … den tablaa di karni di [nos kurason”6 ta alsa nos kapasidat di “no hasi kaso” na e hopi distrakshonnan, tentamentunan, i desviashonnan den nos mundu dekaí. Por ehèmpel, fé enfoká den i riba e Señor JesuCristo ta fortifiká nos ku fortalesa spiritual. Fé den e Salbador ta un prinsipio di akshon i di poder. Ora nos ta aktua di akuerdo ku e bèrdatnan di Su evangelio, nos ta wòrdu bendishoná ku kapasidat spiritual pa sigui pa dilanti dor di desafionan di mortalidat miéntras enfokando riba e goso ku e Salbador ta ofresé na nos. Berdaderamente, “si nos hasi loke ta korekto nos no tin motibu pa teme, pasó Señor, nos yudadó, lo tei semper serka.”7
Un Konekshon Personal pa medio di Kombenionan
Drentando den kombenionan sagrado i risibí dignamente e ordenansanan di saserdosio ta uni nos i mara nos na Señor JesuCristo i Tata Selestial.8 Esaki simplemente ta nifiká ku nos ta konfia den e Salbador komo nos Defensor9 i Mediadó10 i ta dependé riba Su mérito, miserikòrdia, i grasia11 durante e hornada di bida. Ora nos ta fuerte den bin na Cristo i ta uní ku nE, nos lo risibí e bendishonnan di limpiesa, sanashon, i fortalesa di Su Ekspiashon infinito i eterno.12
Bibando i stimando e kompromisonan di kombenio ta krea un konekshon ku Señor ku ta profundamente personal i spiritualmente poderoso. Ora nos ta honra e kondishonnan di kombenionan i ordenansanan sagrado, gradualmente i kada bes mas nos ta wòrdu halá mas serka di DjE13 i ta eksperensiá e impakto di Su dibinidat i realidat bibu den nos bidanan. Jesus ta bira muchu mas ku e personahe sentral den historianan di skritura; Su ehèmpel i enseñansa ta influensiá kada un di nos deseo, pensamentu, i akshon.
Ami frankamente no tin e abilidat pa deskribi adekuadamente e naturalesa i poder eksakto di nos konekshon di kombenio ku e Yu di Dios resusitá i bibu. Pero mi ta testigu di ku e konekshon ku nE i Tata Selestial ta real i ta fuentenan di siguransa, pas, i goso mas grandi, i e fortalesa spiritual ku ta abilitá pa “no teme, maske e enemigu ta burla di bo.”14 Komo disipulonan ku ta hasi i warda e kombenionan di JesuCristo, nos por wòrdu bendishoná pa tuma “kurashi, pasó Señor ta na nos banda”15 i no pone atenshon na e influensianan maligno i burla mundano.
Ora mi ta bishitá ku miembronan di Iglesia rònt mundu, hopi biaha mi ta hasi nan e pregunta aki: kiko ta yuda bo pa “no hasi kaso” na influenshanan mundano, tentamentu, i burla? Nan kontestanan ta hopi instruktivo.
Miembronan balente hopi biaha ta ilustrá e importansia di invitá e poder di e Spíritu Santu den nan bida pa medio di un estudio signifikativo di e skrituranan, i preparashon apto pa partisipá den e ordenansa di Santa Sena. Tambe ta wòrdu menshoná ku frekuensa e apoyo spiritual di miembronan di famia fiel i amigunan di konfiansa, e lès vital siñá pa medio di ministrá i sirbi den Señor Su Iglesia restourá, i e kapasidat pa diserní e bashí apsoluto di loke sea ku ta bini den òf for di e edifisio grandi i espasioso.
Mi a nota den e kontesta di e miembronan aki un patronchi partikular ku ta signifikantemente spesial. Promé ku tur kos, e disípulonan aki tin un testimonio firme di e plan di felisidat di Tata Selestial i e ròl di JesuCristo komo nos Redentor i Salbador. I [na] di dos [lugá], e konosementu i konvikshon spiritual ta individual, personal, i spesífiko; nan no ta general i apstrakto. Mi ta skucha e almanan deboto aki papia di konvenionan ku a duna nan fortalesa pa surpasá oposishon i nan konekshon ku e Señor bibu apoyando nan den tempunan bon i malu. Pa e individuonan aki, JesuCristo berdaderamente ta un Salbador personal.
Kombenionan i ordenansanan di Evangelio ta operá den nos bida meskos ku un kompas. Un kompas ta un dispositivo usá pa indiká e direkshonnan kardinal di nòrt, suit, ost, i west pa propositonan di nabegá i orientashon geografiko. Den manera similar, nos konvenionan i ordenansanan ta hiba nos na i yuda nos pa rekordá semper nos konekshon ku Señor JesuCristo ora nos ta progresá riba e kaminda di konvenio.
E direkshonnan kardinal pa kada un di nos den mortalidat ta pa bin na i wòrdu perfekshona den Cristo.16 Kombenionan i ordenansanan sagrado ta yuda nos mantené nos enfoke riba e Salbador i lucha, ku Su grasia,17 pa bira manera E. Pero siguramente, “un [poder] invisibel lo yuda mi den e kousa glorioso di e bèrdat.” 18
Wanta Duru na e Bara di Heru
Nos konekshon di kombenio ku Dios i JesuCristo ta un kanal pa medio di kua nos por risibí e kapasidat i fortalesa pa “no hasi kaso.” I e union aki ta wòrdu fortifiká ora nos ta tene duru kontinuamente na e bara di heru. Pero manera e rumannan di Nefi a puntra, “Kiko ta e nifikashon di e bara di heru ku nos tata a mira … ?
“I [Nefi] a bisa na nan ku esaki tabata e palabra di Dios; i esnan ku skucha e palabra di Dios, i lo tene duru na dje, lo no pèrdè nunka; tampoko e tentashonnan i e flechanan ardiente di e atversario no por apoderá di nan pa bira siegu, pa hiba nan na destrukshon.”19
Por fabor nota ku e abilidat pa resistí tentashonnan i e flechanan ardiente di e atversario ta wòrdu primintí na e individuonan ku “gara duru” en bes di djis “tene na” e palabra di Dios.
Interesante ta, e Apòstel Juan a deskribí JesuCristo komo e Palabra.20
“Den komienso tabata e Palabra, i e Palabra tabata ku Dios, i e Palabra tabata Dios. …
“Tur kos a wòrdu kreá dor di DjE; i sin DjE nada ku a wòrdu trahá lo no tabata tei. …
“I e Palabra a bira karni, i el a biba ku nos, (i nos a mira su gloria, e gloria komo e unigenito di e Tata,) yen di grasia i bèrdat.”21
Pesei, un di e nòmbernan di JesuCristo ta “E Palabra.”22
I tambe, e di ocho artíkulo di féta bisa, “Nos ta kere ku e Beibel ta e palabra di Dioste asina leu ku e ta korektamente tradusí ; tambe nos ta kere ku e Buki di Mormon ta e e palabra di Dios23
P’esei, e enseñansanan di e Salbador, manera registrá den e santu skrituranan, tambe ta “e palabra.”
Laga mi sugerí ku garando duru na e palabra di Dios ta enserá (1) kordando, honrando, i fortalesiendo e konekshon personal ku nos tin ku e Salbador i Su Tata pa medio di kombenionan i ordenansanan di e evangelio restorá, i (2) usando e skrituranan i e enseñansanan di e profetanan i apòstelnan bibiente bou di orashon, seriamente i ku konsistensia, komo fuentenan sigur di bèrdatnan revelá. Ora nos ta riba e kaminda di “gara duru” na Señor i ta transformá pa medio di biba Su doktrina,24 mi ta primintí ku individualmente i kolektivamente nos lo wòrdu bendishoná pa “para den luganan santu, i lo no wòrdu mové.”25 Si nos permanse den Cristo, e ora ei E lo permanesé den i kana ku nos.26 Siguramente, “den e dianan di tribulashon su Santunan e lo animá, i prosperá den e kousa di bèrdat.”27
Testimonio
Sigui pa dilanti. Gara duru No hasi kaso.
Mi ta testifiká ku fidelidat na e kombenionan i ordenansanan di e Salbador su evangelio restora ta abilitá nos pa sigui pa dilanti den e obra di Señor, pa gara duru na DjE komo e Palabra di Dios, i pa no hasi kaso na e atrakshonnan di e atversario. Den e lucha pa e bèrdat, ku kada un di nos saka nos spada, hasta “e spada poderoso di bèrdat,”28 den e nòmber sagrado di Señor JesuCristo,