Un Gran Kambio di Kurason: “Mi No Tin Nada Mas pa Duna Bo”

Konferensia General di aprel 2022

Un Gran Kambio di Kurason

“Mi No Tin Nada Mas pa Duna Bo”

Pa Elder Eduardo Gavarret

Di e Setenta

E kambio di kurason aki no ta un evento; e ta eksigí fe, kurashi i trabou spiritual konstantemente pa e sosodé.

Introdukshon

Riba djabièrnè, 28 di òktober, 1588, despues di a pèrdè timon pa wòrdu di stür solamente ku rema, e barku La Girona, ku tabata pertenesé na e gran Marina Spañó a dal kontra e barankanan di Punta di Lacad na Nort di Irlanda ¹.

E barku a bòltu. Un di e noufragonan ku tabata luchando pa sobreviví tabata tin un renchi oro bisti ku a wòrdu duna na dje un par di luna promé dor di su kasá ku e inskripshon, “Mi no tin nada mas pa duna bo.”²

“Mi no tin nada mas pa duna bo,”—un frase, i un renchi ku e diseño di un man teniendo un kurason, un ekspreshon di amor di un hende muhé pa su kasa.

Konekshon di eskritura

Ora ku mi a lesa e historia aki, el a impreshoná mi profundamente, i mi a pensa riba e petishon ku e Salbador a hasi:“ I lo bo ofresé mi komo sakrifisio un kurason kibra i un spiritu kontrito”³

Mi a pensa tambe riba e reakshon di hendenan riba Rei Benjamin su palabranan: “Si, nos ta kere tur e palabranan ku a wòrdu bisa na nos … , kual a hasi un gran kambio den nos, òf den nos kurason, ku nos no tin tendensia mas pa hasi malu, pero pa hasi bon kontinuamente.”⁴

Konekshon Personal

Laga mi kompartí ku boso un eksperiensia ku mi tabatin tempu mi ta tin 12 aña di edat, e efekto a dura te ku dia djawe.

Mi mama a bisa, “Eduardo, hasi lihé, Nos ta lat pa e reunionnan di iglesia.”

“Mama, mi ta bai keda huntu ku tata awe,” mi a respondé.

“Bo ta sigur?” Bo mester asistí bo reunion di quorum di saserdosio,” el a bisa.

Mi a kontesta, “Pober tata! E lo bai keda su so. Mi ta bai keda ku n’e awe.”

Tata no tabata miembro di E Iglesia di JesuCristo di e Santunan di e Delaster Dianan.

Mi mama i rumannan muhé a bai e reunionnan di djadumingu E ora ei, mi a bai serka tata den su garashi, kaminda e tabata gusta ta riba djadumingu, i manera mi a bisa mi mama, mi a pasa un ratu, ku tabata, un par di minüt huntu ku ne, i despues mi a puntr’é, “Tata, tur kos ta bon?”

El a sigui ku su hòbi di drecha radio i oloshinan i a djis hari ku mi.

Despues mi a bisé, “Mi ta bai hunga ku mi amigunan.”

Tata, sin hisa kara, a bisa mi, “Awe ta djadumingu. Bo no mester bai iglesia awe?”

“Si, pero awe mi a bisa mama ku lo mi no bai,” mi a respondé. Tata a sigui ku su trabounan, i p’ami, esei tabata un pèrmit pa bai.

E mainta ei tabata tin un wega di futbòl importante, i mi amigunan a bisa mi ku mi no por a pèrdè esaki, i ku nos mester gana e wega ei.

Mi reto tabata ku mi mester a pasa dilanti kapia pa bai e fèlt di futbòl.

Mi tabata kore determiná pa bai e fèlt di futbòl i a stòp dilanti e opstákulo grandi, e kapia. Mi a kore bai na e alsera kontrali kaminda tabata tin un par di palu grandi, i mi a disidí na kore entre nan di manera ku niun hende por a mira mi ya ku tabata e ora ku miembronan tabata yegando e reunionnan.

Mi a yega nèt na tempu pa e komienso di e wega. Mi por a hunga i bai kas promé ku mi mama yega kas.

Tur kos a bai bon; nos ekipo a gana, i mi tabata emoshoná. Pero e korementu bon ehekutá pa bai fèlt ei no a pasa sin wòrdu notá pa e konsehal di e quorum di diákononan.

Hermano Félix Espinoza a mira mi kore lihé di palu pa palu, purbando di no wòrdu deskubrí.

Na komienso di siman, hermano Espinoza a bin na mi kas i a puntra pa papia ku mi. E no a bisa nada di loke el a mira djadumingu, tampoko el a punta mi dikon mi a falta mi reunion.

El a djis nami un manual i bisa, Lo mi kier pa bo duna e lès di saserdosio riba djadumingu. Mi a marka e lès pa bo. E no ta asina difisil Mi ke pa bo lesé, i lo mi bin bèk aki dos dia pa yuda bo ku e preparashon di e lès ei.” Bisando esaki el a duna mi e manual i a bai.

Mi no tabata kier a duna e lès, pero mi no a tribi pa bis’é no. Mi a plania pa keda ku mi tata e djadumingu ei atrobe—kermèn, tabata tin un otro wega di futbòl importante.

Hermano Espinoza tabata un persona ku hóbennan ta atmirá.⁵ E la haña e evangelio restorá i a kambia su bida, den otro palabra, su kurason.

Ora ku djasabra atardi a yega, mi a pensa, “Wèl, porta mañan mi por lanta malu, i mi no mester bai iglesia.” No tabata e wega di futbòl ku tabata preokupá mi mas; tabata e lès ku mi mester a siña, un lès spesialmente tokante dia di Reposo.

Djadumingu a yega, i mi a lanta mas salú ku nunka. Mi no tabata tin niun esküs—niun eskape.

Tabata e promé biaha ku lo mi a duna un lès, pero Hermano Espinoza tabata den mi banda, i esei tabata e dia di un gran kambio di kurason pa ami.

For di e momentu ei, mi a kuminsá santifiká e dia di Reposo, i ku tempu, segun e palabranan di Presidente Nelson, e dia di Reposo a bira un delisia.⁶

“Señor, mi ta duna bo tur kos; Mi no tin nada mas pa duna bo.”

Logrando

Kon nos ta logra e gran kambio di kurason ei? E ta wòrdu inisiá i eventualmente e ta sosodé

ora [ku] nos studia e skrituranan nos ta optené e konosementu ku ta fortalesé nos fe den JesuCristo kual lo krea un deseo pa kambia.⁷
ora ku nos kultivá e deseo ei pa medio di orashon i ayuno.⁸
ora ku nos aktua, segun e palabra studia òf risibié, i nos hasi konvenio pa entrega nos kurason na E, meskos ku Rei Benjamin su hendenan.⁹

Rekonosementu i Kombenio

Kon nos por sa ku nos kurason ta kambiando?¹⁰

Ora ku nos kier komplasé Dios den tur kos.¹¹
Ora ku nos ta trata otro nan ku amor, rèspèt, i konsiderashon.¹²
Ora ku nos mira ku e karakterístikanan di Cristo ta birando parti di nos karakter.¹³
Ora ku nos ta sinti e guia di e Spiritu Santu mas konstante.¹⁴
Ora ku nos ta warda e mandamentu nan ku tabata difísil pa nos obedesé i despues sigui bib’é.¹⁵

Ora ku nos skucha kuidadosamente na e konseho di nos lidernan i disidí pa sigui nan ku alegria, nos no a eksperensia un kambio di kurason?

“Señor, mi ta duna bo tur kos; mi no tin nada mas pa duna bo.”

Mantenshon i Benefisionan

Kon nos ta mantené e gran kambio?

Ora ku nos partisipá di e santa sena tur siman i renobá e kombenio di tuma riba nos e nòmber di Cristo, semper kòrda riba DjE, i warda Su mandamentunan.¹⁶
Ora ku nos dirigí nos bida na tèmpel.¹⁷ Asistí na tèmpel regular lo yuda nos mantené un kurason nobo i renobá segun nos ta partisipá den e ordenansanan.
Ora nos stima i sirbi nos próhimo dor di aktividatnan di ministrá i obra misional.¹⁸

E ora ei pa nos gran goso, e kambio interno ei lo fortalesé i plama te ora e abundá den bon obra. ¹⁹

E gran kambio di kurason aki ta trese un sintimentu di libertat pa nos, konfiansa, i pas.²⁰

E kambio di kurason aki no ta un evento; e ta eksigí fe, kurashi i trabou spiritual konstantemente pa e sosodé. E ta kuminsá ora ku nos deseá pa sede nos boluntat na Señor, i e ta bira realidat ora ku nos hasi kombenio ku n’É i warda esakinan.

E akshon individual aki tin un efekto positivo riba tantu nos komo esnan rondó di nos.

Den e palabranan di Presidente Russell M. Nelson, “Imaginá kon lihé e konfliktonan devastadó den hinter mundu—i esnan den nos bida individual,—lo a resolvé si nos tur disidí pa sigui JesuCristo i pone atenshon na Su enseñansanan.”²¹ E akshon aki di sigui e Salbador Su enseñansanan ta hiba nos na un kambio grandi di kurason.

Kerido rumannan, hóbennan, i muchanan, ora ku nos ta partisipá na e konferensha e wikènt aki, laga e palabranan di nos profetanan, kual lo bini for di Señor, drenta nos kurason pa eksperensha un gran kambio.

Pa esnan ku ainda no a uni na Señor Su Iglesia restorá, mi ta invitá boso pa skucha e misioneronan ku un deseo sinsero pa sa kiko Dios ta spera di boso i eksperensia e transformashon interno ei.²²

Awe ta e dia pa disidí di sigui Señor JesuCristo. “Señor, Mi ta duna bo, mi kurason; mi no tin nada mas pa duna Bo.”

Meskos ku a rekuperá e renchi for di e noufragio, ora ku nos entregá nos kurason na Dios, nos ta wòrdu reskatá for di e lamannan razu di e bida aki, i den e proseso nos ta wòrdu rafiná i purifiká pa medio di e ekspiashon di Cristo i ta kombertí den “yunan di Cristo” nasé spiritualmente “for di E.”²³ Di esaki mi ta duna testimonio den e nòmber di JesuCristo, amèn.