Mensahe di Introdukshon
Nos ta honra e yunan di Dios den e seshon speshal aki dor di konsentrá riba nan preokupashonnan i esnan di nan organisashonnan.
Mi kerido rumannan, awor ku nos ta kuminsá e seshon di hende muhe di konferensia general úniko aki, mi ta kontentu pa duna e mensahe idi ntrodukshon aki di e Promé Presidensia.
Nos seshonnan di Djasabra tin un historia di diferente propósito i diferente oudiensia. Awe nochi nos ta agregá na e historia aki segun nos ta embarká un propósito i prosedura nobo pa futuro serkano. E Evangelio di JesuCristo no ta kambia. Doktrina di Evangelio no ta kambia. Nos kombenionan personal no ta kambia. Pero segun e añanan, e reunionnan ku nos ta tene pa komuniká nos mensahenan ta kambia i probablemente lo sigui kambia den añanan [benidero].
Pa awor, e reunion di djasabra anochi aki ta un seshon di konferensia general, no un seshon di ningun organisashon. Manera tur seshon di konferensia general, e planifikashon, oradornan, i músika ta wòrdu apuntá dor di e Prome Presidensia.
Nos a puntra Presidente Jean B. Bingham, presidente general di e Sosiedat di Sokoro, pa dirigí e seshon aki. Futuro seshonnan di djasabra anochi lo por wòrdu dirigí dor di un di e otro Ofisialnan General di e Iglesia, manera miembronan di e presidensia di Sosiedat di Sokoro, Mujeres Jovenes, i Primaria, designá dor di e Prome Presidensia.
Awe nochi e seshon di djasabra anochi aki di konferensia general lo konsentrá riba e preokupashonnan di e hende muhénan Santu di e Delaster Dianan. Esaki lo inkluí e doktrina di E Iglesia di JesuCristo di e Santunan di e Delaster Dianan, e reglanan di e Iglesia ku ta relashoná spesífikamente pa hende muhé, i e responsabilidatnan general i trabou di e organisashonnan ku ta inkluí e hende muhé i mucha muhénan di Iglesia. Ounke e seshon aki, ta keda transmití deliberadamente na un oudiensia rònt mundu manera tur seshon di konferensia general, e oudiensia invitá pa ta presente den e Sentro di Konferensia pa e seshon aki ta e hende muhénan i mucha muhénan di 12 aña pa ariba. Nos a inkluí algun lidernan di saserdosio ku ta presidí riba e organisashonnan ku ta partisipá.
Loke nos ta inisiando aki ta kontesta riba e medionan di komunikashon disponibel aktualmente na Señor Su lidernan i miembronan di Iglesia rònt Mundu. E doktrina di e Evangelio di JesuCristo ta pa tur hende, pues esei ta nos motibu prinsipal i manera di ekspandé. Nos ta honra e yunan di Dios den e seshon speshal aki dor di konsentrá riba nan preokupashonnan i esnan di nan organisashonnan.
Nos ta gradesí ku awor teknologia di transmishon ta duna Iglesia su lidernan e kapasidat pa dirigí entrenamentunan detayá dirigiendo nan mes na oudiensianan spesífiko den fèlt. Nos ta kontentu tambe pa e echo ku oportunidatnan di biahe aktual ta oumentando. Esei ta pèrmití nos manda lidernan di Iglesia pa dirigí entrenamentunan di liderazgo kara kara ku ta nesesario den fèlt.
Esaki ta e obra di Señor JesuCristo. Nos ta Su sierbonan, dirigí pa Su Spíritu Santu. Nos ta invoká e bendishonnan di nos Señor riba e lidernan di e organisashonnan aki i riba e hende muhénan i mucha muhénan fiel ku ta sirbi Señor den e organisashonnan i den nan bida individual. Den e nòmber di JesuCristo, amèn.