Tomuren ea Sikeng ko Mich Rodaed
Napan ni ngad leaked lam’ Rok nge motochiyl’ Rok, Ir ra gel nag dad u magawon rodad.
Nap’an ni ka gu bitir, chongin ko fare Galasia ea ke og ngog ni nge fly nag ea tabinaw rog ni yib u Puerto Rico iyaen nga Salt Lake City ni fan ngad m’ag gad uta’abang u lan fare temple machane me yib e mo’maw ni be tabab i m’ug. Marivid, ni reb ko walageg nib ppin, e ubchiya’. Dabi ba’adag, galibthir rok kar meybil marunga’ e tin thingarda rrin’ nge kar thamiey t’uf ni ngar milekag. Kar pagan’uy fa’an ni ngar leakew e thogthog rok Somoel, ra ayuweg nge ta’awath e tabinaw rogmew—nge ke rrin’ ngomed.
Demtrug e magawon ra yib u yafos rodad, rangad pangan’dad ngak Yesus Kristus ni ra fal’ig e woen ni ngad dared u fithik e mich. Ke micheg Got ni gubin e pi’in nike fol ko pi m’ag ni kar ngongliyed Ngak, e yad ra thapeg gubin e tawa’ath Rok, ko ngiyal’ ni ra pi’. Elder Jeffrey R. Holland ke yoeg, “Boech e blessing ra yib nib papay, boech dani yib mada’ ko tharmiy; machane ni fan e gidii’ nibe thapeged fare Gospel ku Yesus Kristus, yaedra yib.1
Moroni ea ke weliy ni “mich e bogi banʼen ni yibe athapeg ma danur guy; ere, dabi yoʼor lungmed ni bachan e damur guyed, ya dabi yib e mich riy ngomed nge yaeni madaʼ nga tomuren ni kan sikeng nag e mich romed.”2
Thingarda fith e Duwer ney “Mang t’uf ni ngad rrin’ed nib fel’ rogon napan ra yib e magawon ngodad?”
U lan ea thin ngak’ ea gidii’ nib som’on ni’ir ea President ko fare Galasia, President Russell M. Nelson ke fil: “Gadaed ea Presidency nib bi’ech ma gadaed ba’adag, ni ngad tabab gaed ni bay fare tomur u wun’daed. Ni bachan e biney, gamad be non ngom e dabay ko fare tempel. Ni ran’ey nibay ko tafney romad e ngad athamgil gaed ngad thapeged e gelingin ulan fare na’un rok Somoel, min m’ag e tabinaew, min tayfan fapi motochiyel ni kad ted u temple ni’ir era pi’ e tawa’ath ngodad rok’ Got—ko yafos ni manemus. Pi gum’ing ko tempel nge motochiyel ni kam fal’eg urom e iraram e kiy nira gel nag e yafos rom, mabgol nge tabinaew rom, nge rogon rayog ni ngam sabthriy fare lumel ku moniyan’. Tin ni garam tayfan u tempel nge pigpig ni gabe tay ni fan e gidii’ ni kakrom ere tawa’ath nigem me mon’ag nag e yi’iy ni yibe thogthog nag ngom nge gapas ni ran pi’ ngom ni kum ul’ul’ ngam par ko fare kanawo’en e motochiyel.”3
Napan ni ngad leaked lam’ Rok nge motochiyl’ Rok, Ir ra gel nag dad u magawon rodad.
Rib mo’maw e milekag rok tabinaw rog nga fare temple, machane nap’an kar yib nga fare Salt Lake Temple, nina rog, ke sug ko mich, ke yog, “Gadad be fel’ ROGON; Somoel ra damiiteg nagdad.” Kad m’ag gad, me gol walgeg ni ppin. Biney ke buch tomuren e sikeng ko mich rorow galibthir rog nge kar leakew e thogthog rok Somoel.
Biney e wok ko galibthir rog be pii’ athamgil e tabinaw rog daba’. Fare wok ni gallabthir romow ea kar filed ngomaed fan ko machiben ea gospel mar ayuweged ni ngu nanged fan fapi fan nge towa’ath ni ra yibnag fare gospel. Nangfan e fan ko fare machib rok Yesus Kristus rangad ayuwegdad ni ngad feked e magawon rodad ufithik e mich.
Ma riyul’, gubin ba’nen Got ma pinning nge fith ngodad ir ea yang ko t’ufeg nifan dad, nge ba’adag Rok ni nge pii’ e ta’awath rok ngak egidii’ ni bay e mich. Dabda lemnag e bitir rodad ra fil ni ngar ba’adagdad e gospel; I ir a ngongol rodad ni ngar fil’ed ngoraed. Napan ni ngad ayuwegraed ni ngar mel’ig nib mataw, ea susun rodad rogon ra pii’ athamgil ngoraed ni ngar mel’eg nib mataw. Napan ni ngar fasgad nib fel’ rogon ra ayuweg pi fak ni ngar nanged e tin nib riyul’ ku fare gosple ni fan raed.
Yaed gubin ma yaed be machib nag e tin riyul’ ko gospel u fithik e pagan’ nge tamilang. Pi pu’moon nge ppin nib yangren, mu sap ko tin nibriyul’ nib thothup nge guyrogon ni nge piriyeg e nangfan ko fare gospel. President Nelson e kaffini fanow ni ga’ar: “Mang gonop e damur thapeg? … Mu fol ko n’en nike rrin’ Profet Joseph. Gay bang nib gapas. … Sobutan nigem u pow’chen Got Weliy e tin ni ba’ u gumircha’em ngak e Chitamangiy nu Tharimy. Sap ngak ko kanawo’.”4 Nap’an ni ngam guy e pow’ii rok Chitimangiy ni Tharimy, mmo’toyil ko fonow rok pi profet ba fos, nge sap ko pi susun nib mataw rorow galibthir nib fel’, rangam mang nib gel e dayif ko mich ulan e tabinaw.
Fan ko labthir ni baey ea bitir ni ke chuw ko fare wo’en ea m’ag, mu pired nga buut’ ngam ayuweged ni ngar nanged fan tin riyul’ ko fare gospel. Ayuwegraed ningar nanged fan e tin riyul’ ko gospel. Mu tabab gaed ea chiney; gathi kayigi sasaga’al.
Wok rodaed ko yafos nib mat’aw ea rayog ni nge pii’ ea thil nib gaa’ mab mangil. President Russell M. Nelson ea ke yoeg: “Gadaed Gidii’en Got ko Tin Tomur ea Rran, ma ke fel’ ngodaed ni gadaed be lemnag ni ’galasia’ ea ban’en ni be buch u lane ea tafen ea liyor rodaed, min ayuweg ko tin ni be buch u tabinaw. Ba t’uf ea thil ko re rogoy ney. Chiney ea ngiyal’ ko reb ea galasia ni kengin riy ea tabinaw, min ayuweg ko tin ni be buch u lan tafen ea branch, ward, nge stake rodaed.”5
Ma fil fare pi babiyor nib thothup, “Chathowoliy ea bitir u lan wo’en ni thingari yaen u dakean: ma ra ilal, ma dabi chuw riy.”6
“Ere chiney, e bachan e machib ko fare thin e be mʼug riy ni wawliy fapi gidiiʼ ni ngar rinʼed e tin nib matʼaw—arragon, ma bagaʼ angin ni aw nga laniyaenʼ fapi gidiiʼ nga rogon ni rinʼ e sayden, ara yug banʼen, ni ke buch roraed—ere Alma e lemnag nib gamog ni ngar gayed rogon falʼngin fare thin ku Got.”7
Fare ea yat ni mornga’agen ba ppin ni ke damomuw ni fak ni pageal ea be ka’ ea okas ni yo’or. Demetrug ko i’in ni ke non ngak’, me ’ul’ul i mugu’uliy ea ’ar’ar rok’ ko okas. Ni rib baliyangan’, nike fek e bitir nge e pu’moon nib nga pu’moon nib cheg ko ganop.
Ke yib me yoeg ngak,“Sir, fakag ea ma ka’ ea okas ni kayigii’ yo’or. Rayog ni ngam non ngak’ ni nge tal?”
Ke motoyil’ i chel, me yoeg ko pagael rok’,“Marow nga tabinaw ngam sulow ngara’ ni ke yaen l’agruw ea wik nap’an.”
Ke fek e fak rok nge kar ranow nga tabainaw rorow, ke balyangan’ me lem nag ko man fan ni de puruuy’ ko fare pagael ni dabki kay e okas.
Ke sul gow la’agruw e wiik. Fare mo’on e sap ko fare pagael me ga’ar, “Fachi pagael, thinga mu tal i kay e okas ni bo’or. Dani fel’ ko dowef rom.”
Me guchim fare pagael me yoeg ni ra fol.
Me ga’ar chitinngin fare pagael, “Mangfan ni danum moeg e binir ngak ko fare gal wik nike thimur?”
Me sminnmin fare pumo’on. “Re gal wik nir e kugu be kay e okas.”
Pu’moon ney nike fos nib thabi fel’ rogon bachane ke nang bay e gel ufithik e thin fa’an e bee’ ma fol’ ko fonow rok.
Wok rodaed ko bitir rodaed ea ba gel u nap’an ni yaed be guydaed, ni gadaed baey u daken fare wo’en ea m’ag. Fare profet i Jacob ko fare Babyor ku Mormon ea reb ea susun ko mat’aw nem. Fak ni Enos ke yoloy e ga’fan nifan e machib rok chiitamangin:
“Gag, Enos, e gumnang ni chitamag e beeʼ nib moʼon nib mangil—ya ire fil ngog e thin rokʼ, nge ku morngaʼagen e machathowol nge fonow rokʼ fare Somoel—ma gube oge magaer ngakʼ e Got rog riy …
“…ma fapi thin niʼir e bagaʼ ni guma rungʼag ni ma weliy e chitamag u morngaʼagen e yafos ni gubinfen, nge falfalaenʼ rokʼ fapi saints, e ri rich nib toʼaer nga lan gumʼirchaʼeg.”8
Fapi chitiningin fapi salthaw ni fel’ yangren ea ra fol gad fare gospel, nge bitir roraed ea ra tolul gaed ni yaed be yul’yul’. Kaptan roraed ea ke yoeg:
“Ke fil e pi chitiningraed ngoraed, ni faʼanra dabi maerwaer u wunʼraed, ma ra ayuwegraed Got.
“Mar weliyed ngog e thin rokʼ e pi chitiningraed, ni yaed be gaʼar: Dar maerwaer u wunʼmaed ni pi chitiningmaed e yaed manang.”9
Enos nge fapi salthaw ni fel’ yangren kar gelnagraed udakaen e mich rorad pi galibthir, ni ke ayuwegraed ufithik e sikieng ko mich roraed.
Kad ta’awath ngadad bachaen ke fulweg e gospel rok Yesus Kristus u rran rodad, nima fekdad nga lang napan ni be kireb. Ke pi athamgil nogdad nira yib e ta’awath nifan e ngongol rodad fa’an ni ngad thapeg e sikeng ko mich rodaed.
Gamow ppin rog ea gu ’un gow ko Elder David A. Bednar ko fare dedication ko fare Temple u Haiti Port-au-Prince. Kakmow i Jorge ke ’un ngomaed me yog ngog e experience rok’ “Kari mangil’, Papa! Napan Elder Bednar ke tabab e meybil ko yibily, kug thamey e singel ke sug ko guwal’ nge tamilang. Fare meybil ea ke pii’ bo’or ko llowaen’ rog ko fan ea temple. Fare temple e ir fare na’un rok fare Somoel.”
Ulan fare Babiyor ku Mormon, Ke fil Nephi napan ni gand ba’adag ni ngad nangedfan e ba’adag Rok Got, I Ir ra gelnagdad. Ke yoloy, “Me yibi buch ni gag, Nephi, ni rigub bitir … ma kug baʼadag ning gu nang urngin e pi riyulʼ rokʼ Got nib miith, ere, mug yoer ngakʼ Somoel; me piiʼ ngog, me munguy nag gumʼirchaʼeg ma aram me mich u wunʼug urngin e thin ni ke weliy e chitamag; ere dag togopluw ngakʼ ni boed rogon walageg.”10
Walageg, wineg mu ayuweg ngak e bitir nge gidii’ chugur nigem ni ngar leak e tonom rok Got ere e Ya’el rayog ni nge fil ngoraed nge munguy nag gum’ircha’raed ni ba’adag ni ngar fol Ngak ufithik e yafos roraed.
Boed ni kug lemnag marunga’agen e susun rorow galibthir, kug nang e mich road ulan Yesus Kristus ra dag ngodad e kanaw’o nga na’un rodad nu Tharimey. Guma nang ni ra yib e ma’ang’ang tomuren ea sikeng ko mich rodaed.
Gube pii’ e mich rog marunga’agen Yesus Kristus nge bayul Rok. Gu ma nang ni’ir ea Tathapeg nge Tabiyul rodaed. Yow Chitamangdaed nu Tharminy kar bow ko kadbul nem u lane ea fare spring ko 1820 iyib ku Joseph Smith, ni fare profet ko fare Sulyarmen. President Russell M. Nelson i ir e prophet nifan e rran rodad. U dakean fithngan Yesus Kristus, amen.