Feked e Kruth Rodaed
Kruth rodaed ni gadaed be feek man laek fare Tathapeg e be yoeg ni ngan ulul u fithik e mich ko kanawo’ rok Somoel ni dabin ma’thuk ko tin fayleng ban’en.
Pi walageg, kad thapeged e thin ni bo’or nikeb ko pi toygang’ rodaed napan fare gal rran nike thimur. Gube micheg nag ngom ni fa’anra gadaed ra athamgil ni ngad fol gaed riy u lane yafas rodaed, me Somoel, u fithike garathia Rok, e ra ayuweg daed ngad feked e kruth rodaed me ba’ud nag e tomal rodaed.1
Napan niba’ ko binaew nu Caesarea Philippi, me yoeg fare Tathapeg ngak e gachalpen ni ra gafgow u tan pa’ e pi elder, padrey, nge pi scribe u Jerusalem. Ke fil ngoraed mornga’agen nike yim’ nge foskoyam’ nike ta’.2 Ngiyal’ nem, ma ri dawori nang fan e gachalpen mornga’agen e murwel rok nib thothup u fayleng. Peter rok, e napan ni rung’ag e n’en nike yoeg fare Tathapeg, me feek nga orel me puwan’ Ngak, ni ga’ar, “Somol, mang e yigi siy i pag Got nge ydor: ya thangri dabi yib e pi n’ir ngom.”3
Me non fare Tathapeg ngoraed, ni nge ayuweg raed ni ngad nanged fan gumircha’en niba’ ko murwel Rok nib mu’un e gafgow ninge tay ni nge paer ngay ni ga’ar:
“Fa’anra ba’adag be’ ni nge un ngog, ma thangri pag talin ir, nge fek e kuruth rok nge lekeg.
“Ya en nra finey ni nge ayuweg e pogofan rok e ra thay rok; ma en nra thay e pogofan rok ni bochag e ra pir’eg.
“Be mang e ra fel’ rogon be’ riy ni fa’anra yag ngak e re fayleng ney ni polo’, machane me thay e bin riyul’ e yafos u pa’? fa mang e rayog ni nge pi’ be’ ngki sul e yafos rok ngak?”4
Biney e thin, ma ke yoeg fare Tathapeg ni gubin e pi’in ni ba dag ni nge laek e ba tu’uf ni ngad pagtilined yaed mar paged e tin ni yaed ba adag, n’en ni yima kay, ni yi ba adag, man pag gubin ban’en, nib mu’un e yafas ngay fa’anra baga’ fan, ni karin pagey ko n’en ni ba adag e Chitamangiy—ni boed nike rrin’.5 Ere, iraray, e puluwon e wo’en e ya’el nike thang. Yesus e ke yoeg e kruth nib fanathin ni nge ayuweg e pi gachalpen ni ngar nanged faned boech mornga’agen e miligach nge athagmgil ni ngan pi’ ko tirok Somoel ban’en. Manang e pi gachalpen ya’an e krtuh nge rogon e gidii’ u Rome ni bachane yad mad towasor nag e gidii’ ni ngan kruth nag raed ningad feked e biroraed e kruth u fithik e gidii’ fa ri raned ko gin ni ngan li’ raed ngar m’ad riy.6
Tomuren nike fos fare Tathapeg ko yam’ me tamilang e tafney rok e pi gachalpen kar nanged fan gubin e n’en nikan yoloey ni Mornga’agen7 nge n’en ni ngar rrin’ ko ngiyal’ nem nga m’on.8
Ta’aborogon, gubin dad, pi walageg, thingarda bing e tafneydad nge gum’ircha’dad ni ngad nanged fannapan ni ngad feked e birodaed e kruth ngad laked. Kad filed ko pi babyor nib thothup ni pi’in ni ba adag ni ngar feked e kruth roraed e ba tu’uf Yesus Kristus roraed ni kar palog gaed ko tin kireb ban’en nge gubin e tin ni ba adag e fayleng man fol ko pi motochiyel Rok.9
Gadaed ra adag ni ngad paged e tin ni dani mat’aw ko tirok Got ban’en man pag gubin e n’en nikan noeg ngodaed man athamgil ni ngan fol ko pi machib rok ma ra ayuweg daed ni ngad athamgil gaed ko kanawo’ ko gospel rok Yesus Kristus—mu’un e ngiyal’ ni gadaed be gafgow, ngiyal’ nike mo’owaer e ya’el rodaed, fa thin ko social media nge gubin ban’en u fayleng nib togpluw ko machib Rok.
Boed ni, pi’in ni ku dawori pir’eg e cha’an nike la’ngiy nib manemus ma rayog nike kirbaen’ ma dakir thamiy e athap, fa pi’in ni kar dar gaed la’angin raed ma ke thamiy nikan n’ag ma kan pagtilin, gube yoeg ngom ni gara fol ko thin rok e Tathapeg ni ngam feek e birom e kruth mag laek e be yup fan ko mich ni ngeyog rom ko kanawo’ Rok, mag paer ni gab yul’yul’, ni dam un ko tin fayleng ban’en ni ra chuweg e athap rodaed ko tu’ufeg nge rugnuy rok Got.
Ta’ab ban’en e be sar ko pi’in gimed niba gay ma ke kirbaen’. Ma sana iraray fan ni gabe thamiy ni fare gospel rok Yesus Kristus e gathi fan ngom. Fa’anra iraram fan, ma nggog ngom ni gubin ngiyal’ ma ba’ e athap rok Got ni Chitamangiy nge tunom rok ko falfalean’, ngak Yesus Krstus nge Bayul Rok, nge pi motchiyel Rorow. Gonop Rok ni rib ma’ang’ang, pufthin, nge runguy, ma rayog ni nge ta’areb nag e Tirok ngodaed, ya ngeyag ni ngad baed nga pow’chen ma gadaed thap, fa’anra gadaed ba gel ma gadaed be fol ko fapi motochiyel10 ma gubin ngiyal’ ma yibe rrin’ e tin nib mat’aw.11
PI’in nike rrin’ e denen ni rib tomal, ra rrin’ e biney nikan noeg, u fithik gubin ban’en, ni ngam subutan’ nigem u pow’chen Got, ni ngam non ko pi toygang’ ko Galasia, mag kalngan’ ni ngam pag e denen rom. Biney e wo’ e kurayog ni nge fal’eg wa’athan e pi’in nibe athamgil ni nge pag e tin nib mo’owaer riy, nib mu’un e , nib mu’un pangiy nib kireb ngay, drug, rom nge biya, nge pornography ngay. Pi kanawo’ ney ni yira fol riy e ra chugur nigem ngak fare Tathapeg, ni rrayog ni nge chuwegnem ko leam ni kirkirben rogom ngay, kirbaen’, nge magawon ko dowef nge ya’el. Ere, ku rayog ni ngam ning e ayuw rok e tabinaew rom, tafagar, nge togta.
Wenig dammu pagem napan ni kam mul fa mu leam nag ni dabyog ni ngam pag e denen nge pin’en nib momaw’ ni ngam pag. Dabyog ni ngam taleg i gay rogon mag ulul ni gabe mo’owaer ma gabe denen! Gubin e ngiyal’ ma ngam athamgil ni gelngin ni rayog rom, ni gabe dag ko mithmith rom ni ga ba adag ni ngam bi’ech, no boed rogon nike fil fare Tathapeg.12 Boech e ngiyal’ ma ma fal’ rogon ko tomuren nike yan bukun e pul nib sug ko sikeng nge athamgil. N’en niken micheg e kan pir’eg u lan fare ke Babyor ku Mormon ni “dakean e murnguy e gadaed rathap riy, u tomuren ni kad rinʼed gubin nra yog ni ngad rinʼed,”13 e baga’ fan ko tiney e sikeng. Wenig mu tafneyem ni tawa’ath rok Tathapeg ni garathia e “e dariy n’umngin napan ko ‘tomuren’ ni kad rirn’ed gubin ni rayog rodaed. Rayog ni kad thapeged e garathia Rok biyay, ngiyal, nge tomuren e napan ni gadaed be athamgil.”14
Gube micheg ni napan ni gadaed ra athamgil ni ngad gel gaed ko sikeng rodaed, ma ra tawa’ath nag daed Got ko pi tawa’ath ko mich ni ngan gol nge pi’ ma’ang’ang ni ra buch.15 Ra rrin’ e n’en ni dabyog ni ngad rrin’ed ni go’ gadaed.
Ere, pi’in nike kirbaen’, nib domomow, nike kireb e tafney rok, fa ke paer u fithik e kirbaen’ ko n’en ni gabe thamiy ni susun e dabi buch, ni ngam fek e kruth rom ngam laek e Tathapeg e be sar fan ko athamgil ni ngan pag e tiney man sap ngak Somoel ya ngeyog ni nge chuweg daed ko tiney me ayuweg daed ngad pir’eged e gapas. Machane, fa’anra gadaed ra chich’iy pa’ daed ko pin’ey ni dani mangil, ma gadaed ra pir’eg ni gadaed be paer ni dariy e Kan Nthothup rok Somoel u lane yafas rodaed. Dabyog ni nge kalngan’ gaed ni fan boech e gidii’, machane rayog ni ngad ni’ged fan e kireb roraed—nike tel daed e pi’in nike kireb nag e tafney rodaed.16
Fare babyor nib thothup e be fil ngodaed ni ba’ e kanawo’ ni ngan chuw e tiney—ni ngad paged e Tathapeg rodaed nge ayuweg daed nge thilyeg gumircha’en daed nge bi’ech nag.17 Ra nge buch e biney, ma ba tu’uf ni ngad baed ngak Somoel u fithik e mo’owaer rodaed,18 man ning e ayuw rok ma wenig nag ni nge n’ag fan e kireb rodaed,19 ni baga’ ni napan e ngiyal’ ni gadaed ma feek e sacrament ko Madnom ni gubin e wiik. Aygun mel’eged ni gayed nge n’ag fan e ayuw Rok man rrin’ e n’en nib ga’fan mab momaw’ ni ngan n’ag fan e kireb rok e pi’in nike kireb nag e tafney rodaed ngeyog ni ngad gapas gaed. Gube micheg ngom ni gara rrin’, me sug e gapas ko balayal’ rom nibe yig rok Somoel.
Napan ni ba’ u lane Liberty Jail ko 1839, me yol fare Profet Joseph Smith ngak e chonggin e Galasia ni mornga’agen gubin e ni ra buch nga m’on ni ba sar fan ko pi magawon ney. Ke yoloey ni ga’ar, “Gubin e tafeen e pilung, mat’woy nge gelngiy, e ran dag ma raan pi’ ko pi’in nike athamgil nib gel ni fan ko fare gospel rok Yesus Kristus.”20 Ere, pi walageg nib t’uf rog, pi’in ni kar feked fithngan fare Tathapeg nga dakean raed, ni kan pagan’ ko micheg Rok ni yibe athamgil nge mada’ ko tomur, e ra thap21 ma ra paer rok Got ni darma m’ay e falfalen’ riy.22
Gadaed gubin ma gadaed ma yan u fithik e magawon u lane yafas rodaed ni ma ka’aring e kirbaen’ ngodaed, nibe mulan’ daed, athap nike m’ay, ma boech e ngiyal’ ma gadaed be mo’owaer. Boech e pi leam ney e ma n’anggin daed ngad fithed Somoel ni gadaed be ga’ar: “Mongfan ni gube yan u fithik e tiney?” fa “Mongfan ni dar buch e n’en ni gube leam nag? Ere, gube rrin’ gubin ban’en gelngin ni rayog rog ni nggu fek e kruth rok ni nggu laek fare Tathapeg!”
Pi fagar rog, ngarin tafneyed daed ni kruth rodaed ni gadaed be feek e m’un e sobutan’ ngay nge pagan’ ngak Got nge gonop Rok. Ngarin nanged ni manang daed nge tin nib tu’uf rodaed. Kab ga’fan ni ngan nang nib thil awa rok Somoel ngodaed. Boech ngiyal’ ma gadaed ma gay e tawa’ath ma gadaed ta’ e ngiyal’ ni nge rrin’ Somoel. Dabyog ni ngad daged e yul’yul’ rodaed Ngak ni gadaed be yoeg Ngak e ngiyal’ ninge buch e n’en ni gadaed ba adag. Napan ni gadaed ra rrin’ e biney, ma gadaed be ta’aborogon ko fapi Nephite ni yad ba kireb ni kakrom, ni ri kakringed e pi walagraed ni yad be yoeg nike pag e ngiyal’ ninge buch e n’en nike yoeg Samuel nib Lamanite ninge buch, ni bo’or e gidii’ e ke balyang e tafney roraed.23 Ba tu’uf ni ngarin pagan’ gaed ngak Somoel ni ngan athamgil man nang ni Ir e Got, ma manang gubin ban’en, ma manang daed.24
Kaffini yag ni nggu pigpig ngak ba ppin nike yim’ e pumo’on rok nikan noeg Franca Calamassi ngak, nib m’ar nima m’am’a yilen. Sister Calamassi e ir e cha’an somm’on nike un ko Galasia rok Yesus Kristus u lane tabinaew rok. Demtrug ni dan tawfe nag e pumo’on rok, ma ma motoyil ko pi tamachib ma baga’ nima un nga Galasia. Demtrug rogon e pi gafgow ney, ma ke paer Sister Calamassi nib yul’yul’ nge chugliy aningeg e bitir rok u lane gospel rok Yesus Kristus. Napan ni yim’ e pumo’on rok, me feek Sister Calamassi pifaak nga raned nga temple, mar uned ko pi gam’ing nib thothup man chiyliy raed ni tabinaew. Tin nikan micheg nag ko pi gam’ing ney e ke pi’ e, athap ngak, nge falfalen’ nike ayuweg u lane yafas rok.
Napan ni m’ug e m’ar rok u downgin, me yib e bishop rok nge yibliy. Napan ni yoeg ngak e bishop rok nike fal’ rogon ni nge pag ir ko tirok Somoel, me yoeg ninge gel e mich rok ni nge athamgil ko m’ar rok nge taw ko tomur.
Napan ni kuguy, ni gube koel pa’ Sister Calamassi ni gube sap nga lan owchen, muguy ni boed e angel—nibe m’ug nib pagan’ ko tunom eork Got nge athap rok nib gel ko tu’ufeg nge tunom rok e Chitamangiy ni fan ngak.25 Ku thamiy ni ri ba adag ni nge athamgil u fithik e mich rok nge taw ko tomur ni nge feek e kruth rok, demtrug ko mang e be yaen u fithik. Yafas rok e re ppin ney e boed e mich rok Kristus, mornga’agen e mich rok nge athamgil rok Ngak.
Pi walageg, gu ba adag ni nggu micheg ngom ni gadaed ra fek e kruth rodaed ma gadaed laek e Tathapeg e ba tu’uf ni ngan rrin’ e n’en nike rrin’ man boed Ir,26 ni yibe athamgil u fithik e momaw’ u lane yafas, man pag e tin ni gadaed ba adag, ni nge pagan’ daed ngak Somoel. Fare poet e yoloy ni ga’ar:
“Mu pagan’um ngak Somol: nge michan’um, ngak dabi mulan’um: mu, pagan’um, ngak Somol.”27
“Ir e yoror nge ta’ayuw rodad.”28
Gube micheg nag ngom ni rani laek e gin nike yan e Masta rodaed riy man soen Ngak ni ir e ma pi’ e gapas ko yafas rodaed e ra pi’ e gapas ko ya’el rodaed me ba’ud nge moem nag e tin tomal rodaed.29 Gu be micheg e pinn’ey u dakan fithngan Yesus Kristus nib thothup, amen.