Ppin NIke Ngongliy e M’ag Ngak Got nib Mang Ngak
Ppin nike ngongliy e m’ag ngak Got e aram rogon pifaak Got ni kar manged e nina’ ni kar gagyeg niged e gidii’, nikar machib gaed.
Gub falfalen’ ko biney e tawa’ath ni nggu non ngomed, e ppin ni faak Got. Fag ko biney e balayal’, e nggu pi’ e thamgil ngom ko pi pigpig nikan pining med ngay. Arrogon, gubin e ppin ni faak Got nibe motoyil nga lamag e ke thapeg e pong rok Somoel Yesus Kristus.
Pong rom e ke tabab napan nikan tem nga fayleng, ko gin’en nge ngiyal’ ni fan ngom nike mel’eg Got ni manangem ni rib fal’ rogon ma rigab tu’uf Rok ni ppin ni faak. Lane bin somm’on e yafas, me manangem ma ke machib nigem ma ke tem ko gin ni ra yib kanawo’em, u lane fayleng, ni ngan piningem ko gin ni ngam tawfe riy. U rom, ma gara rung’ag e thin ni ra yoeg e tapigpig rok Yesus Kristus nibe ga’ar: “Gag nike pi’ Yesus Kristus mat’wog, e nggu tawfe nigem u dakean fithngan fare Chitamangiy, nge fare Faak, nge fare Kan ni Thothup. Amen.”1
Napan ni gara yib u fithik e raen ngalang, ma kam thapeg reb e pong ni ngam pigpig. Faak Got ni kaffini ngongliy e m’ag, ma kam dugliy ma kan thapeg e murwel u lan Fare Galasia rok Yesus Kristus ni fan ko Gidii’en Got ko Tin Tomur e Rran, ni kan dugliyem riy. Kam dugliy ngak Got ni ngam feek fithngan Yesus Kristus nga dakeanem, ni ngam fol ko pi motochiyel Rok man pigpig Ngak.
Gubin e pi’in nike ngongliy e pi m’ag ney, ma re murwel nike pi’ Somoel ngak e rib fal’ ngak e cha’an’em. Machane, ppin nge pumo’on ni kar ngongliyed e m’ag ngak Got, e ta’ab pong e ba’ roraed nib ga’fan ma ba sug ko falfalen’. Ni ngan pigpig ngak e gidii’ ni pa’.
President Russell M. Nelson, e non ngak e ppin ni weliy mornga’agen e pong rok SOmoel ngom ni ngan uned ko murwel Rok. President Nelson e weliy e pong rom ni ara’ rogon: “Ke ga’ar Somoel, ’Murwel nge rir rog [e] nggu pi’ e yafas nib manemus ngak e gidii’.’ (Moses 1:39.) Ere pifaak ni ppin ni yaed ba yul’yul’ e ra ga’ar, ’Murwel nge rir rog e nggu ayuweg e pi’in nib tu’uf rog nge thapeg e binem nike yoeg Somoel.’
“Bee’ ni ngan ayuweg nge taw ko gin ni ngari taw ngay nib thothup e bang ko murwel rok e ppin nib thothup. Ni yib nina’, sensey, fa bee’ nima ayuw, ma ir bee’ nibe koel e cley nga pa’ nibe fal’eg ya’an e n’en nibe athapeg. Ir nib mang ngak Got, ma murwel rok nib thothup e nge ayuweg e pi ya’el ni nge falfalen’ me gapas. Iraray rogon fan. Nge pi’ ban’en, nge pi’ e athamgil, ma nge falfalen’.“2
Dabyog ni ngam nang ko we’in, fa n’uwmingin napan, e murwel rom ni ra paer nib sap ko pigpig ni yib nina’, toygang’, fa ppin nibta machib. Fithik e tu’ufeg, me Somoel, e darma digey daed ngad leam niged ko we’in, ngeyial’, fa rogon e murwel rodaed. Machane ga manang u lan fapi chep nib thothup nge pi profet ni gubin e pi murwel ney ma ra yib, demtrug ko lane biney e yafas fa bin migid, ngak gubin e ppin ni faak Got. Ma gubin ma nge fal’eg rogoy ni fan ko yafas nib manemus u lane tabinaew—“bin tha’abi falel’ e tawa’ath rok Got.”3
Gara llowan’ ni ngam athamgil ngam fal’eg rogom e chiney niba’ e tomur ko tafney rom. Binem e murwel e kan moem nag ya gubin e pi murwel ney ma ta’ab rogon rogon ni ngan fal’eg rogoy ngay.
Ngad tabab gaed ko murwel ni ngan mang e ppin nibta machib. Demtrug ko ba’ e binem e murwel rom ni gab bulyol ni ragag e duw rom u lane tabinaew nike yim’ e chitmangin, fa gab presideny ko Relief Society u lane ba binaew nike aw e nifiy ngay, fa gaba’ u lane aspital ni baningam gol ko ba surgery—rayog ni ngam rrin’ e murwel rom nikeb rok Somoel ni ngam faak nibta pigpig.
Tinef e murwel e ba murwel nib thil. Machane yaed gubin ma ba tu’uf, gumircha’ey nib gel, nge mich ni dariy e murus riy ni darma yoeg Somoel ban’en ni ngan rrin’ ni dawori fal’eg kanawo’en, nge laniyan’ ni ba adag ni nge yaen nge rrin’ ni fan Ngak.4
Ya ke fal’eg rogon, fachi bulyol nib ragag e duw rok e ke m’ag e bachbach ngak e nina’ rok nike yim’ la’ngin me meybil ni nge nang rogon ni nge ayuweg e tabinaew rok. Me paer ni aram e n’en nibe rrin’.
Fare Relief Society President e ke fal’eg ir ni nge pigpig um’on ni nge aw e nifiy ko gin ni ba’ riy. Ke yag ni nge nang me tu’uf e gidii’ rok. Mich rok ngak Yesus Kristus e ke gel u lan bukun e duw nike buch e meybil rok ngak Somoel ni ngan ayuweg nge pigpig Ngak. Ya ke fal’eg rogon ir nike n’uw napan, ma ke yag ni nge awyueg e ppin ni ngan ayuweg e gidii’ nge tabinaew nike magawon.
Fare ppin nibe gol u aspital ko ba surgery e ke fal’eg rogon ni nge pigpig ngak e pi’in nib m’ar niba’ u to’ben. Ke paer nima pigpig ngak e gidii’ ni demtrug ni fan ngak Somoel ni boed ni manang fa ba fagar rok. Napan nike thamiy u gumircha’en ni nge pigpig u aspital, me pigpig ngak e gidii’ ni dariy e murus rok nge fithik e tu’ufeg ni boech e gidii’ e ri athapeged ni dabi gol nib papey ni dabi chuw roraed.
Ta’abrogon ko rogon nikam fal’eg rogom ni ngam pigpig, ma ngarim fal’eg rogom ko birom e pong ni gnam mang bee’ nib gel rok Somoel napan nike taw ko ngiyal’. Ba tu’uf e mich ngak Yesus Kristus, ninge paer u fithik e adag rom ko fapi chep nib thothup, ni nge gagyeg nag e gidii’ man fil e thin Rok ngak e gidii’ ni dariy e murus riy. Ma arame gara fal’eg rogom ninge paer fare Kan ni Thothup rom nge ayuweg nem. Gara adag ni ngam ga’ar, “Gura rrin,“ napan ni ra ga’ar e counselor u lane Young Women presidency, nike rus, “Sister Alvarez e ke kol nike m’ar e daba’. Mini’ e ra sensey nag e clas rok?“
Ba tu’uf ni ngan fal’eg rogoy ko rran napan ni ra pinngem Somoel ko ba murwel ni ngam mang e nina’. Machane kab tu’uf gumircha’ey nib sug ko tu’uf nib gel ko somm’on. Ba tu’uf e mich ngak Yesus Kristus nib gel u lan gumircha’em. Ma ra tu’uf ni ngan meybil nag e ayuw, kanawo’, nge gapas rok fare Kan ni Thothup ko n’en ni kam thamiy ni rayog.
Gara fith rogon ni nge nang e pumo’on ni demtrug yangren ni nge nang ko mang e ba tu’uf ko ppin nike nina’. Ba duwer nib ga’fan. Pumo’on e dabyog ni nge nang gubin ban’en, machane rayog ni nggu filed ban’en nike yib rok Got. Ma ku rayog ni nggu nanged ban’en ni gamaed be sap, napan ni gamaed ba gay fare Kan Nthothup ninge ayuweg maed ni nggu nanged fan e n’en ni gamed be guy.
Ku ug yaliy Kathleen Johnson Eyring nike yan 57 e duw napan ni kug mabgol gow. Ir e chitinngin aningeg e pagael nge l’agruw e ppin ni fak mow. Ra nge un ngak bee’, ma ke dugliy ni nge mang e nina’ ngak bukun e tabinaew nge bukun mira’ay e gidii’ nike ta’ raed u lan gumircha’en.
Gimed manang e thin rok President Nelson ni mornga’agen e murwel rok e ppin nib thothup—nib mu’un e murwel rok nib nina’: “Ni yib nina’, sensey, fa bee’ nima ayuw, ma ir bee’ nibe koel e cley nga pa’ nibe fal’eg ya’an e n’en nibe athapeg. Ir nib mang ngak Got, ma murwel rok nib thothup e nge ayuweg e pi ya’el ni nge falfalen’ me gapas. Iraray rogon fan.”5
Glengin ni rayog ni nggu nang fan e, ppin rog, i Kathleen, ma ke rrin’ e binem, nike pi’ e Chitamangdaed ngak e ppin ni faak. Be yib ngog nib thin ni “koel e cley nga pa’ nibe fal’eg ya’an e n’en nibe athapeg … ir nib mang ngak Got.“ Darma towasor. Be fal’eg rogon. Ma baga’ e athap rok nima gay rogon, ni nge ayuweg e pi’in nib tu’uf rok. Gelngin e fare gospel rok Yesus Kristus—rogon ni kuguy u fithik e meybil rok nike bukun e duw.
Ppin nike ngongliy e m’ag ngak Got e aram rogon pifaak Got ni kar manged e nina’ ni kar gagyeg niged e gidii’, nikar machib gaed, nge pigpig ko rogon nge gin nike ta’ raed ngay. Gube micheg ni gara pir’eg e falfalen’ ko wo’ rom iyan ko tabinaew rom u tharmiy napan ni gara sul Ngak ni gab ppin ni faak ni kam fol ko m’ag rom ngak Got.
Gube micheg ni Got ni Chitimangiy e ba fas ma gab tu’uf Rok. Irma fulweg e pi meybil romed. Fare Faak nib Tu’uf Rok e be gagyeg, ko gubin rogon, Fare Galasia rok Yesus Kristus ni fan ko Gidii’en Got ko Tin Tomur e Rran. President Russell M. Nelson e profet Rok e chiney. Me Joseph Smith e ke guy me ke non ngak Got ni Chitamangiy nge Yesus Kristus u fithik e gak’iy u Palmyra, New York. Gu manang nib riyul’ e binem. Gube micheg ni Yesus Kristus ir tathapegmed; Ir bat’uf ngomed. Nge udakaen e Bayul Rok, rangam biech nag nge laen e lang ko e muruwel romed nib thothup ni ke pinning med. Gube micheg ni arrogon u dakean fithngan thothup Yesus Kristus, amen.