Kan Pir’eg Gelngin ko fare Babyor ku Mormon
Gubine gidii’ ma ngari buch rok ma rayog ni ngan pir’eg e tin riyul’ ni ba’ u lane Babyor ku Mormon.
Nap’an ni gura guy e tabinaew, ma reb e duwer ni guma fith ngoraed e rogon ni kar nanged mornga’agen e Galasia nge rogon ni kar tawfe gaed. Demtrug rogon ko facha’ e bee’ nib ta yan nga galasia fa bee’ ni ke yan bukun e duw ni dakir ma yaen nga galasia. Gubin ngiyal’ ma ta’aborogon e fulweg roraed: yad ma falfalen’, mar tabab gaed i weliy rogon ni kan pir’eg raed. Ma woed, ni mornga’agen salpen raed e aram mornga’agen nrogon ni kan pir’egdaed.
Yesus Kristus e ir fare Somol ko tin nib malog ban’en. Bt’uf Rok e tin nib malog ban’en. Irraray fan ni fil mornga’gen fare dalip i fan e thin nrayag ni ngan pere’eg ko guruy ni 15 ulan e Luke: fan e thin ni mornga’agen fapi saf nra molbochgaed, fare salpiy ni yaen nga bayang, nge, fare pagal ni sul ko chitamangin. Gubin e pi thin ney ma ta’aborogon: demtrug rogon fan ni kar malog gaed. Demtrug fa’anra kar nanged ni kar malog gaed. Ba’ e thin nikan noeg u fithik e falfalen’, “Mu uned ngog ko felfelan’, ya kug pir’eg fara saf rog ni [ke] yan ngabang.”1 Ya ko tomur riy, dariy ban’en nib malog Rok.2
Nggu weliy ngom reb e n’en nike buch rog nib ga’fan ngog—mornga’geg ko rogon ni kan pir’eg neg.
Um’on nige gaman 15 e duw rog, me pin ngeg e uncle rog, ni Manuel Bustos, ni nggu par boch rok nge tabinaew rok u Mariken. Biney e rib mangil ngog ya gura fil e thin ni Mariken. Uncle rog e ke un ko Galasia boch e duw kafram, mab gel e thothup rok ni woed e missionary. Sana irraray fan ni nina’ rog, ndan gu na’ab, e non ngak me yog nra fanay e biney e tawa’ath ni kemus nbay ta’areb rogon: ni dabi gay rogon ni nge towasor nigeg ni nggu un ko Galasia rok. Gamaed ba ulungi Catholic, nike bukum e duw, ma dariy fan ni ngan thilyeg. Uncle rog e fanay e biney e thin nikemus ko duwer ni mornga’agen e Galasia ma dabi fulweg taban.
Machane, uncle rog nge figirngin, ni Marjorie, e dabyag ni ngar digeyew e tin ni yow manang.3
Kan teg ngalan ba singil ko library nabay bugi babyor riy nib gang’gang’. Gube guy ni ulan e re library ney ma go’ nopon 200 e babyor ni copi ko fare Babyor ku Mormon nib thilthil e thin riy, ni 20 riy e thin nu Spanish.
Rboran riy, ni gube leam, mug fek reb fare Babyor ku Mormon nthin nu Spanish.
Reb fapi babyor ni ba ra’en-mak’ef mab mungunguy dugren, nbay ya’an angel Moroni u m’on riy. Nap’an nug bing, bin th’abi somm’on ko fare babyor e kan yoloy nibe micheg ni ga’ar: “Ma napʼan ni ke thap e pinnʼey ngomed, ma gubaʼadag ni ngam fithed Got riy, ni fachaʼ ni Chitamangiy ni Manechubog, u fithingan Kristus, ko ba riyulʼ e pinnʼey fa dangay; ma faʼan gimed ra fith u fithikʼ e lʼagaenʼ u gumʼirchaʼey, u fithikʼ e yulʼyulʼ, nib mich anʼuy ngakʼ Kristus, ma ra dag e riyulʼ riy ngomed, u dakean gelingin fare Kan ni Thothup.”
Maki ul’ul ngay: “Ma dakean gelingin fare Kan ni Thothup e rayog ni ngam nanged riy e tin nib riyul’ ni mornga’agen gubin ban’en.”2
Rin momaw’ rogon ni ngu weliy gelngin e pi thin ney nib thothup ni par ko tafney rog nge lan gumʼirchaʼeg. Ngog e tin ni riyul’, dagur sap nag e tin nib “riyul’ ban’en.” Kemus ni fel’ yangreg, mab fel’ e tafney rog ko yafos rog, ma gub felfelan’ ko biney e yalen nib be’ech.
Ere, bachan fare micheg nike par ko tafney rog, ere gu tabab i be’eg farke babyor. Napan ni gu bi’eg boech, mug nang fan ni fa’anra rugu ba adag ni ngeyag ban’en ngog ko biney, ma nggu tabab ko meybil. Ma gadaed gubin ni gadaed manang ko mang e ke buch ni gathi kemus ni kam bi’eg machane kukum meybil no mornga’agen fare ke Babyor ku Mormon. Ere, irraram e n’en ni buch rog. Ban’en ni rib thil mab mangil—arragon, ta’ab rogon ko n’en ni buch ngak biyu’ e gidii’ u dakaen e fayleng. Kug nang u dakaen fare gelngin fare Kan ni Thothup ni fare Babyor ku Mormon ab riyul’.
Mug wan ko uncle rog ngu weliy ngak ko mang e ke buch ma guba a’dag ni ngu tawfe. Dan ki yag ni nge mithag e felfelan’ rok. Aff ngalan e karo rok, me yaen nga sukoyjo, me fek e tiket ko sukuki rog ni nggu sul nga tabinaew, nbay bangi babyor riy ni be yog ko nina’ rog, “dariy ban’en ni kug rrin’ ko ran’ey!”
Sorok’ ko n’en nike yog. Ya kan pir’eg neg u gelngin ko fare Babyor ku Mormon
Ba’ e pi’in ni pi tamachib e ke pir’eg raed u dakean e fayleng, ni bo’or kanawo’en. Fa pi’in nikan pir’eg raed u dakean e fagar roraed nike ta’ Got nga lane kanawo’ roraed. Ma ku woed nrayag nike pir’eg raed be’ ko biney e mfen fa be’ ni gidii’ rodaed ni kakrom.5 Demutrug ko mang, ya af’anra ngan mon’og nga m’on min sul bayay ko galasia, chiney fa ta’boch, yaed gubin nthingar ri buch roraed min patag raed ko fare gelngin e tin nib riyul’ nbay ulan fare Babyor ku Mormon. Nap’an e ngayal’ ney, thingar dugliyed u wan’raed ngak Got ni yaedra gay rogon ngar fol gaed ko fapi motochiyel Rok’.
Nap’an nug sul nga Buenos Aires, me guy e nina’ rog ni rug ba’dag ni nggu tawfe. Ngaiyal’ nem e guma togpluw, dani puwan’ ngog, machane me fol rog. Danug nag, ni ir e ke fal’eg e duwer ko tawfe rog. Arragon, mich u wun’ug ni fare interview rok ab alamrin ko interview ni ma tay e pi tamachib. Ke ga’ar ngog: “Fa’anra gab’adag ni ngam tawfe, ma gura ayuwegnem. Machane somm’on e nggu fith boch ban’en ngom, ma gu ba adag ni ngam tafney nag mag fulweg nib yul’yul’. Gabe micheg ni ngam man ko missa ni gubin e Madnom?”
Mug ga’ar ngak, “Arragon, rayag, gura rrin’ e ran’ir.”
“Gamnang ko uw n’umngin nap’an e missa?”
“Ea, gumnang,” e gog.
Me fulweg, “Ere, fa’an garam tawfe, gubin ngiyal’ ma ngguy ni gara yan.” Me aram me fith ngog ni f’an gura pag e chingaw’ nge thoy tamagow.
Mug fulweg ngak, “Ea, rayag, kug ra rrin’ e ran’ir.”
Ma ki uneg ngay, “f’an garam tawfe, ma aram ni gura mudugliy ni arraray fan.” Ma ki ul’ul ko thin romow ni gubin ko fapi motochiyel.
Uncle rog e kol nag e nina’ rog me yog ngak ndabi marwaer, ya gura pag e pinn’ey. Aningeg e duw nga tomren, napan ni gu thapeg fare mission kol rog nga Uruguay Montevideo Mission, me kol e nina’ rog nag e uncle rog me fith ko wi’in e gura pag e pinn’ey. N’en nib riyul’ e nap’an nug tawfe, ma ke par e nina’ rog nib felfelan’.
Kug nang ni fare Babyor ku Mormon e bayang nib ga’fan ko fare gum’ing ni micheg “rayog ni nge chugur beeʼ riy ngakʼ Got u dakean yalen e paer riy, ni dabiyog ni rinʼ yuken e babyor.”6
Nephi e weliy e n’en nth’abi ga’fan ko fare Babyor ku Mormon ni array rogon:
“Ya kug muruwel gaed nib gel ni nggu yol gaed, ni nggu pingegedaenʼ pifakmaed, nge pi walagmaed, ni nge michaenʼraed ngakʼ Kristus, me felʼ thilraed Got. …
“Ma gamaed [be] weliy morngaʼagen Kristus, gamaed be falfalaenʼ rokʼ Kristus, [ma] gamaed be machib ni morngaʼagen Kristus, gamaed be prophesy ni morngaʼagen Kristus, … ni nge yog ni nang pifakmaed e re ginnʼen ni ngar sap niged e manʼaegfan ko pi denen roraed ngay.”4
Ga’ngin farke Babyor ku Mormon e kan thogthog nag ni t’abrogon fan nib thothup.
Iraray fan, ni gubin e pi’in ni ra bi’eg me fol riy, e gathi kemus ni ra nang mornga’agen Kristus machane ra fil ban’en rok Kristus—baga’ ni yaed ra “gay rogon ni ngan mangil u dakean e fayleng”8 ma darin siyeg ni bachane dar mich u wun’uy9 ni bachane n’en nike yoeg e gidii’ ni mornga’agen ban’en ni dawori bi’eged biyay.
President Russell M. Nelson e tafney nag: “Nap’an ni gura tafney nag farke Babyor ku Mormon, thin ni be yib ko tafney rog e gelngin. Tin nib riyul’ ko farke Babyor ku Mormon e bay gelngin ni nge fosag, me ayuweg, fulweg, duruwi’iy, pi’ gelngin, machib nag, fa fefelan’ nag e yafos rodaed.”10
Gube pining med ni gubin, demutrug ko n’umingin nap’an ni kam mang be’ ko fare Galasia, ni ngan pag gelngin ko tin nib riyul’ ko fare ke Babyor ku Mormon ni nge pir’eg daed bayay, ma gubin e rran ni ngaed gayed rogon ni ngaed thapegned e pi yi’iy ni fan ngodaed. Ya ra buch ni f’an gadaed ra pag nge buch.
Gube micheg ni fare Babyor ku Mormon e bay ni ga’ngin fare gospel rok Yesus Kristus riy nge fare Kan ni Thothup era micheg nag ngak e cha’en, nbay gum’ircha’en nib mat’aw, ma be sapnag e loan’ ko rogon ni nge thap e yafos rok.11 U dakean fithngan Yesus Kristus, amen.