Sap nga Meybil Gubin Ngiyal(Alma 34:39; Moroni 6:4; Luke 21:36)
Thingar da athamgiliy ma dabda malmal gad.
Gu ba meybil nag ayuw rok fare Kan ni Thothup ni fan ngom nge gag nap’an napan ni gadaed be falfalen’ ma gadaed be liyoer u ta’abang.
U lane April, u 1976 ke non Elder Boyd K. Packer ngak fapi bitir u Galasia u lane general conference. U lane mulwol rok ni ke kanoeg “Gayuch ko Ya’el,” ke non mornga’agen ngiyal’ rok u Africa nap’an ke guy pi corocodiles ni ke mithag nib mangil nge ni yad ba tuluf gad ko gamanman. Bin magid, ke boeded nag fapi corocodiles nga Mo’oniyan, ni’ir ba tuluf nag ko bitir nibe mangil nag e denen.
Gag 23 e duw rog nap’an ke pi’ Elder Packer mulwol rok, nge Susan nge Gag de’ n’uw napan ko gargeleg ko bin somm’on e bitir romow u taboch. Gomow ba’adag fare mulwol mornga’agen ba cheefeg nag e den’en nge u rogon ni ke use nag fare gamanman ni ba machib nag e kenggin nib ya’el.
Susan nge Gag ni kug darow u Africa bo’or ngiyal’. Nge kug guyew fapi gamanman nib mangil ni ba paer urom. Napani ni sulaen’ug fare mulwol rok Elder Packer u lane yafos romow, kug gayew rogmow nggu fil rogmow e tin ga’fan ko fare gamanman u Africa.
Gu ba’adag nggu non mornga’agen la’agruw e cheetah ni Susan nge Gag kug guyew ni kar tuluf nagrow fapi gamanman nge ta’arevb nag boech e pin’en ni kug guyew ngak fare gospel ku Yesus Kristus.
Pi Cheetah nge Topi
Cheetah e ba tha’bi papey e gamanman u dakean e fayleng nge rayog ni ba mil e 75 mph (120 km/h). Pi gamanman ney e fel’ ya’an mrayog ni ngar taw gad ngay ko 68 mph (109 km/h) ko dariy u lane dalip e second riy’. Pi cheetah ni ba yan nib mith nge chugur gad ngak e gamanman min mil nrib papay ni ba l’oel’oeg nge cham nagrad.
Susan nge Gag kug sap gow la’agruw i hour bochi cheetah ni ba leak mukun e topi, ni’ir e gamanman nib antelope ngay’ u Africa. Fare paan nib n’uw nge malik’ ko fare falang u Africa ni ke mithag nag pi cheetah nap’an kar leakew fapi topi ngay. Pi cheetah ni kar daregew ngorow ko 100 yards (90 meters) machane kar muruwel gow u ta’abang.
Ta’areb e cheetah ke sak’iy u fithik e paan nge dani yaen, ma bin l’agruw ke yan ngo but’ nib sasa’gal nge chugur nag ngak muukun e topi. Ma ere bin som’on e cheetah nibe sak’iy ke liing u fithik e paan nib t’abrogon ngiyal’ ni bin l’agruw ke tal’ me sak’iy nga lang. Re tunom rorow ni ta’areb e cheetah be yan u chugur nga but’ nap’an i tal’ ma sak’iy bin l’agruw u fithik e paan ke ul’ul’uy nib n’uw nap’an. Fan e sasalap ko tunom ney e ni ngan ma’awaer ngag min baen ngak fapi topi nge pinning owechrad i yan ko re ma’ad’ad ni bay yib. Nrogon e gum’aen’ nge yul’yul’, pi l’agruw e cheetah kar muruwel gow nga ta’abang ko bin magid e abich rorow.
U to’oben fare ulung e topi ngay nge pi cheetah ni ba yib ke sak’iy nga dakean e burey ko ngael boechi topi nib gel’ mab ilal. Bachan ke paer nga lang pi topi nga dakaen e burey, rayog ni yad ba matanang nge sap nag ko ma’ad’ad.
Ma ere, nap’an fapi cheetah kar chugur gow nggar lii’ nge yim’, fare muukun e topi kar chel gad mar mil i yaen. Da gu nang u rogon fare topi nib matanang kar nonad ngak fare muukun, machane kar fonow nagrad, nge gubin e topi ke yan u gin’ nib fel’.
Nge mang ke rin’ pi cheetah ngay? Dar tal’ gow, ya kar ululuy ta’areb e cheetah be yan u chugur nga but’ ma nap’an i tal’ ma sak’iy bin l’agruw u fithik e paan. Kar athamgil gow e tunom rorow. Dar tal’ gow. Dar tofan gow. Ka yigi mudugil u wun’row nggar sasaliyeb nge baen nag. Susan nge Gag kug guyew fapi cheetah ba thaey, ni gubin ngiyal’ ba chuchugur nag nga muukun e topi.
Binem e neap’, Susan nge Gag kug puruy nigew mornga’agen pin’en kug guyew mug filew rogon. Nge kug non gow ngorad pi bitir romow nge pifak rad mornga’agen fapi kenggin. Chiney ngu weliy fan dalip e kenggin riy
Kenggin #1—Mu Gonpiyem ko Pi Sabanban ku Mo’oniyan
U wun’ug, pi cheetah e fel’ ya’an, sasalap, nge gel. Fare bucho’ ko pi cheetah e mire’ ni bay e tultulbuy nib talimar ni ba mithag nagrad nap’an yad ba tuluf nag pi gamanman u fithik e pan u Africa.
Ni ta’ab rogon, ban’en nibe yib e ma’ad’ad ko ya’el rodad bingyal’ ni yibi m’ug nib fel’ ya’an, sasalap, fa falfalan’. Ere, u fayleng rodad ni daba’, gadad gubin ba t’uf ni ngad sap niged ko tin tagan ni ba m’ug nib mangil riy’. Isaiah ke folow nag, “Gafgow ngakʼ e piʼin ra pining e felʼ ko tin nib kireb, nge kireb ko tin nib felʼ, nge piʼin ni ma tay e lumor nib tamilang, nge tamilang nib lumor, nge piʼin ni ma tay e moʼoy nib athibthib, nge athibthib nib moʼoy!1
Tiney e rran be m’ug nib fel’ ni ngan lii’ ngem’ e bitir ndowriy gargeleg fa’anre dubag e ppin riy’. Tin ma’athuk e kan noeg e puf matawon riy. Ere, ke yigi fel’ ni u tiney tomur e rran ba’ e gospel ni sulweg chilan rogon ni ba tamilangaen’ min ayuweg dad ni ngad guyed fare sabanban ko Mo’oniyan.
“Ngak pi’in ni ba lowan’ nge ni bay e riyul’ rorad, nge kar thapeg gad fare Kan ni Thothup ni nge powiy’ nagdad, nge dar fol gad e sabanbanere gu ba yog ngom, de th’ab ngorad nga nin’ nga mit e nifiy, machane ba paer e rran.”2
Kenggin #2—Mu ’od’od ma Paanag
Ko e topi, fa’an ni ir ba sasagal fa malmal rayog ni bay yib e cheetah. Amrogon, ya’el nib sasagal fa malmal ra pag ni yib pi sabanban ko Mo’oniyan’. Dariy fan nag e tin thothup ra fekey e mad’ad’ nga lan e yafos rodad.
iStock.com/Angelika
Nephi ke weliy fan ni uragon u tiney tomur e rran Mo’oniyan ra wawliy laniyaen’rad iyaen ko fel rogon nu fayleng, “ni arame yaed ra ga’ar: Gubin ban’en mab fel’ rogon u Zion, arragon, Zion e ke mon’og, ma gubin ban’en mab fel’ rogon—ere aray rogon ni fare mo’oniyan’ e ra baen nag e ya’el roraed, me wawliyraed nib kolchiya’ iyan nga infierno.”33
Thingar da athamgiliy ma dabda malmal gad. Athamgily e ni ngan sap nag ni ngan guy min tal’ e ma’ad’ad ngom. Nge sap nag e be yip fan ni ngan paer nib oed ni ngan matangiy nge ayuwegem. Nrogon e ya’el, thingar da od’od’ nge motoyil ko thin rok Kan ni Thothup nge thin ni bay yib rok pi matanang Rok Somoel.4
“Arragon, ma kug be ning chilen ngomed … ni ngam tayedaen’med ko meybil ni gubin e ngiyal’, ni nga dabiyog ni wawliymed fapi lumel ku mo’oniyan iyean nga orel, … ya musap gaed, ya ra tawa’ath nagmed ko tin kireb ban’en.”5
Nap’an gadad ba lem nag morga’agen fare Taathapeg u lane yafos rodad nge gospel Rok rayog ni ngad gel’ niged yalen e fayleng nib malmal nge magaf. Fa’anre ba’ owechdad ni ngad guyed nge talin ni ngad rung’aged riy’,6 fare Kan ni Thothup ra ayuwegdad ni ngad sap niged min motoyil gad ko ngiyal’ ni dani lemnag dad nib t’uf riy’.
“Sap nag, ere, ga ba satambay”7
Kenggin #3—Mu Nang Fan Laniyan’ e To’gor
Cheetah e to’ogor nibe lii’ ngem’ e gamanman riy’. U fithik e rran, gubin e rran, cheetah e to’ogor.
Mo’oniyan “e to’gor ko tin nib mangil’ nge gubin gidii’ ni ba adag tin ku Got.”8 U fithik e rran, gubin e rran, pangiy rok e ngan tagan nag pifak Got nib pum’on nge ppin ni ngan ta’ab rogdad nag ir.9
Fan e wo’en nib falfalan’ rok en Chitamangiy e ngan powi’iyaen pi bitir Rok, fekey e falfalan’ ngorad nib magaey, nge sulweg rad ngak Ir nib fos ko yam mab machalbog. Fare mo’oniyan ni ba muruwliy ni ngan wagey nge kireb nag pifak Got min tal’eg e mon’og ngodad. Mo’oniyan ba muruwliy nib yul’yul’ rogon ni ngan cham ngak pin’en ko wo’en e Chitamangiy ni dubuy dakaen nib gel.
Mo’oniyan’ ni dariy’ e dowef rok, nge dabiyog ni nge mon’og. Raen u lul’ e ra tal’ ko dam, ma ta’ab rogon ke tal’ e mon’og ko Mo’oniyan’ bachan dariy e dowef rok. Bachan ke togopluw ngay, Lucifer dab ki yoeg e tawa’ath ko yafos ni ba un ngay e dowef nge yil. Rebo rogon nibe weliy fan pi scripture e gechig ko amith nibe tay e ya’el e ni dabiyoeg Mo’oniyan’ ni nge ul’ul’uy min boed e Chitimangdad nu Tharimy.
Bachane e dowef e ba ga’fan ko wo’en e falfalan’ Rok Chitamangiy nge ko mon’og e ya’el rodad, Mo’oniyan ni ba’adag ni nge tal’ e mon’og roadad nu dakean e tin tagan ko dowef rodad. President Russell M. Nelson ke fil rogon ni ngan matangiy pi ya’el rodad fini “‘dam mu furuy em nga m’on ni ngam man nga bayang nsusun dam man ngay fam rrin’ e n’en sususn ndam rrin.’ … Gadad nib pu’mon nge ppin be awan’ [nu fayleng] nib t’uf ni ngad fos gad. ‘Piney e ba t’uf ko yafos rodad. Ere, mang ni ba rrin’ fare mo’oniyan? … Ir ba cham ngodad u dakean e tin ni ba’adag dad. Ir ba’adag dad ni ngad kayed e tin kierb, garbad gad e tin kireb, nge adag dakaen nrogon ni dabi fel’ riy’!”10
Reb e tin nib minmin mab manechubog e ni fare Mo’oniyan, facha’ nib kireban’ ni bachan dariy’ e dowengin, e ma lumelaen’ dad ni ngad kireban’ gad boded ir nu dakean ngongoliy e dowef rodad nib tagan rogon. Fare tallin ni dariy’ rok nge dabiyog ngak e fa n’en nibe use nag ni ngan wawliy ngodad i yaen ko magoth’goth’ ko dowef nge ya’el.
Nang fan e laniyaen’ ko to’gor e ba ga’ fan ni nge fal’eg rogoy ni ngam matangiyem.11 Bachane Kapten Moroni ma nang fan fare laniyaen’ ko fapi Lamanites, ke fal’eg rogon ni nge mada’ nagrad nap’an kar baed nge ke gel nagrad riy’.12 Nge binem e kenggin nge micheg ra yib ngodad.
“Fa’an ra fal’eg rogon, da mu rus.
“Nge rayog ni ngam chuw fare gelngin’ e to’ogor.”13
Thin, M’ag, nge Mich
Ni ta’ab rogon ni ba fil’ e kenggin ko pi cheetah nge topi ngay, thingar gadad gubin ba sap ko pi kenggin u lane ban’en ni ke rin’ u yafos rodad. Nap’an gadad ma bing tafinay nge gumircha’dad ni ngan athapeg ayuw u dakean e gelgin’ ko Kan ni Thothup, ra yib e kenggin nib mangil nge ayuw nib gelngin’ rok pin’en nga lan e yafos rodad. Ba yat’ nib tha’bi mangil u lane chepin nib thothup nge u langgin e yafos rodad.
Kug non mornga’agen kemus e dalip e kenggin ni rayog ni ngam fil rogon ngay ko milekag rok Susan nge Gag u Africa. Gu ba’adag ni ngan lemnag mornga’agen mulwol ko pi cheetah nge topi nge fil boech e kenggin ko gur nge tabinaw rom. Wenig mu tiyan’um gubin ngiyal’ ni tabinaw e be lu’lukngun nib riyul’ ko fil e gospel.
Nap’an ni ba rin’ e biney, ra yib e tafney nib ya’el ngom, thamtham nib thothup ra yib u lane gumircha’em, nge ngam nang mang ni gaba rin’ ere rayog ni “mfeked [fare] armor [ku Got] nib polo’ ni rayog ni ngam ayuweged gimed rok e to’ogor romed ni be cham ngomed, ma kigimed bay u tagil’med, ndawor ni tharbegmed.”14
Gu ba micheg ni ba yib e ta’awath ko matang nib ya’el u lane yafos rom nap’an ni ba sap ngak meybil gubin ngiyal’.
Gu be micheg ni ba yan u dakean e wo’en nib m’ag ba pi’ e ayuw ko ya’el nge pi’ e falfalan’ u lane yafos rodad. Nge gu be micheg ni Taathapeg ni ke faskoyam’ ra ayuw nge gel’ nagdad u fithik ngiyal’ nib mangil nge kireb. Gu be micheg e ren’ey u dakan fithngan fare Somoel nib Thothup Yesus Kristus, amen.