Wa’amngin
Par nbay owchem nge gum’ircha’em ngak fare Tathapag, Yesus Kristus, nge fare falfalaen’ ni gubinfen nima yib Rok’.
Gum nang ko mang e gabe tafney nag! Kemus ni ta’abee’ min motoyil ngak President Nelson. Gube athapeg ni ngu ayuweg nem ngam par ni dam mol magdaed son nag fare profet rodaed, ere kug mel’eg reb e topic: ni’ir e mornga’agen e wa’amngin.
Rame’en, duwngin, nge fari athibthib ko fapi berries, pa’aw, mayis, manga, fa ku boech e wa’amngin ni woed e pomegranate, e kab kafram nib fel’ lamen.
Nap’an e michib rok’ u fayleng, fare Tathapeg e t’areb nag fare wa’amngin ko yafos ni gubinfen. Ya ga’ar, “Gimed ra nangrad ko ngongol rorad.”1 “Ba ke gek’iy ni bfel’ rogon e ra k’uf ma bfel’ wom’ngin.”2 Ke pining daed ni ngad kunuyed fapi “woldug nike el ni fan ko yafos ndariy n’umngin nap’an.”3
Ulan ba lik’ay ni gadaed manang mornga’an ulan fare Babyor ku Mormon, profet Lehi e pir’eg ir u “bangi wuru’ e binaw nib lumor ni rib milmor.” Nbay ba lul’ i raen riy nib makalit, u fthik e milmor, nge ba pa’ i kanawo’ nib k’ik’iy, nge ba pa’ i kananwo’ nib machmach, nge balay ba wasay4 nib k’ik’iy nab yaen u pi’ i kanawo’ nibe yaen i yaen ko bake gak’iy nib sug “wa’amngin e [ra yog nag ngak’] bee’ e falflaen’.” Ko fare lik’ay, Lehi e ga’ar: “Ni guwaen … gufek wa’amgin ngu wa’; … ni rib athibthib, ko urngin mit ban’en ni [kug] ri’ … lamen. … [Nge] gu falfalaen’ ni rib gel. ” Biney e wa’amngin “ni’ir e th’abi fel’ [ko kureb] mit e wa’amgin.”5
Fan e Gak’iy nge Wa’amngin
Mang e be yip’ fan e rake gak’iy ney nge fapi wa’amngin nib falel’? Be yip’ fan “e adag rok’ Got”6 nge fare tonom rok’ e Chitamnguy nbay u Tharmiy nge fare wo’en e thap. “Ya Got e rib t’uf e girdi’ nu fayleng rok, ma aram me pi’ fak ni kari maagirag rok nge yib, ni fan e nge urngin e pi’in ni michan’ rad ngak e aram e dab kurm’ad, ya keyag e yafos ndariy n’umngin nap’an ngorad.”7
Pi wa’amngin ney e be yip’ fan fapi tawa’ath rok fare Tathapeg nge fare Bayul rok’. Gathi kemus ni gadaed ra fos bayay, u dakaen e mich rodet ngak Yesus Kristus, kalngaen’ rodaed, min fol ko pi motochiyel, rayag ni ngan n’ag fan e pi denen rodaed ni nge boran riy ma rayag ni ngad sak’iy gaed nib bi’ech u mit Got nge Fak.
Ngan k’ay wa’amngin farke gak’iy e be yip’ fan ni kad fanayed fapi m’ag nge motochiyel ko fare gospel nikan sulweg yarmen—ntawfe, nthapeg e Kan ni Thothup, ni yaen ngalan e nu’un rok’ Somol ngan endow ko gelngin nib tolang. U fithik fare murnguy rok Yesus Kristus min fol ko fapi motochiyel, gadaed ra thapeg fare yafos nin tay chiylan ngodaed ko pi tabinaew rodaed ulan fare yafos ni gubinfen.8
Aram fan ni yog e angel ni fare wa’amngin e woed “e falfalen’ ko ya’el.”93 Ni rib riyul’!
Fare Muruwel nib Mo’maw ni Ngan Yul’Yul’
Ni woed rogon ni kad filed, kemus ni tomren ni kan k’ay wa’amngin fare gospel nikan sulweg yarmen, ni par ni yib yul’yul’ ngak’ fare Somol Yesus Kristus e ban’en nde mom rogon. Kagdaed be ul’ul’ be yib ngodaed e lumel, dar ta’areb e tafney, nge lumel ni be luf gum’ircha’endaed rok’ fare Tathapeg ko fare falfalaen’ nib fel’ nike mu’ i buch rodaed nap’an ni kaed leked Ir.
Bachan e re mo’oniyaen’ ney, lik’ay ku Lehi e ni ta’amagran. U barba’ fare lul’ e bay ba nu’un riy nib ga’ nib sug urngin mit e gidii’ riy ni yaed be yip’ pa’raed, ma yaed be moning nag, ngak’ fa pi’in ni karbaed i yib ngak’ Yesus Kristus.
Fapi gidii’ nbay ulan fare nu’un e yaed be kakrang ma yaed be minmin ngak’ fapi gidii’ ni yaed be tay chiylen fapi motochiyel, ni yaed be athapeg ni ngar lufed e mich roraed ngak Jesus Kristus nge fare gospel Rok’. Nga bachan fapi thin nib ta somoning ngak fapi gidii’ nike mich u wun’raed, boech fapi gidii’ nike mu’ i ri’ lamen fare wa’amngin e yib e tatamra’ ngoraed ko fare gospel ni kar nanged mornga’agen. Fapi denen ko fayleng nge salpil’ugun e luf raed; mi yaed pe’ed keru’ raed ko fare wa’amngin; nge, ko thin rok’ Somoel, “ere mar [mul] gaed nga wuru’ e wo’ [miyaed] malog.”10
Ko pi rran rodaed e dbay, fare mo’oniyaen’ e ke pi’ boech gidii’en e murwel nibe murwel nib alamrin, ni yaed be ga’nag fare nu’un nib ga’. Nib ga’ nike tharay fare lul’, nibe athapeg ni nge liyeg e pi tabinaew rodaed, nap’an ni fapi gidii’ ni yaed be yip’ pa’raed ma yaed be moning nbay fapi telephone roraed nib ga’.11
President Nelson e weliy, “Fare mo’oniyaen’ e ribe gay rogon ni nge kireb nag e mich me taleg e murwel rok Somol.”12 Tayed u wun’daed fare thin rok’ Lehi: “Dag motoyil gaed ngoraed.”13
Daba rus gaed, machane thingar da fal’egned rogdaed ngaed pered. Boech i ngiyal’, ma tin nib achig ban’en e rayag ni nge luf daed. Wenig dam pag fapi duwer rom, tin nike yog e gidii’, tafagar ndakriy e mich roraed, fa tin nib kirbean’ ni nge lufem ko fare athibthib, nib polo’, nge fare tawa’ath nibe yib ko fare wa’amngin farke gak’iy. Par nbay owchem nge gum’ircha’em ngak fare Tathapag, Yesus Kristus, nge fare falfalaen’ ni gubinfen nima yib Rok’.
Fare Mich Ku Jason Hall
Ko June ppin rog Kathy, nge gag e gun’ew ko gameyag rok Jason Hall. Ko ngayal’ nem ni yim’, 48 e duw rok’ ma be pigpig ni’ir fare elders quorum president.
Ba’aray e thin rok’ Jason ni thilyeg e yafos rok’:
“[Nap’an ni gub 15] [kug] mad’ad u maday. … Ke [m’ing] kang’ag ma dakriy gelngin rongreng nge mada’ nga butt’. Dakriy yalen egg nge boech yalen pa’ag. Dakriyag ni ngu wan u butt’, sak’iy, … fa gu durwi’iyeg. Buchu’uw e pogofan nge sbathin ni rayag rog.”14
“‘Got ni Chitamag [nbay u Tharmiy],’ gube wenig, ‘ni fa’an nrayag ni nge fal’ rogon pa’ag, gumnang nrayag rog. Wenig, Chitamag. …
“… ‘Mu fanay eg, Chitamag; kemus ni gube [meybil nifan] pa’ag.’”15
Jason e dan thapag ngak’ fran pa’. Rayag ni ngam rung’ag laman fapi thin nibe yib ko fare nu’un nib ga’? “Jason Hall, Got e dar motoyil ko fapi meybil rom! Ya fa’an Got a ba Got ko tu’ufeg, ma uw rogon nrayag ni nge pagem ni aragon? Mangfan ni nge mich u wun’uy Kristus?” Jason Hall e runga’ag lamanraed, machane dani motoyil ngoraed. Ya ir e kay wa’amngin farke gak’iy. Mich rok’ ngak Yesus Kristus e gel. I mu’ nag e skul u university me lang’iy Kolette Coleman ulan e temple, me weliy ni’ir fare adag ko yafos rok’.16 Tomren 16 e duw ko mabgol, me buch reb e ma’ang’ang, kar fakyew reb a pagal, Coleman, nikan gargelnag.
Uw rogon ni ke ga’ fare mich rorow? Kolette e weliy: “Ke pagaen’ mow ko tonom rok’ Got. Ma ke pi’ e athap ngomow. Gamaed manang ni Jason e [boech nga m’on] ma ran polo’ nag. … Gamow manang nike pi’ Got ngomow fare Tathapeg, ni fare maligach rok’ e ke ayuweg mow ko pi rran ni dabkiyag romow.”17
Nmon ko magawon rok’ Jason, Coleman ni 10-e-duw rok’ e yog ni papa’ rok’ e ke fil ngak’ “Chitamangiy nbay u Tharmiy e [bay] e tonom rok’ nifan ngodaed, yafos u fayleng e rib mangil, ma rayag ni ngad pared ulan fapi tabinaew. … Machane … gadaed ra yan u fithik e tin nib momaw’ ban’en ma ra tun ay daed.”
Ul’ul’ Coleman: “Chitamangiy nbay u Tharmiy e ke pi’ Fak, Yesus, nga fayleng. Murwel rok’ e nge par nib polo’. Fosag e gidii’. Me tu’ufeg raed. Ma bayi gafgow ni bachan fapi amith rodaed, kirbaen’, nge denen. Ma bayi yim’ ni fan ngodaed.” Me ul’ul Coleman nge yog, “Ni bachan e ke rrin’ e biney, Yesus e manang ko mang e gube thamiy e chiney.
“Dalip e rran nga tomren nike yim’ Yesus, Me … fos bayay nib polo’, ko fare dugur rok’ nib polo’. Rib tu’uf e biney rog ni bachan e gumnang … dugur ko [papa’] rog e ran polo’ nag ma gamaed ra sul nga ta’abang ni gamaed btabinaew.”
Coleman e yog, “Gubin e nap’ nap’an ni kug bitir, ma yog e papa’ rog ngog, ‘Gab tu’uf ku papa’, ma gab tu’uf rok e Chitamangiy nbay u Tharmiy, ma gur reb e pagal nib mangil.’”18
Falflaen’ e Ma Yib u Dakean Kristus
President Russell M. Nelson e weliy rogon fan fapi gathon e tabinaew ku Hall e bay e falfalaen’ nge athap roraed. Me ga’ar ngog:
“Falflaen’ ni gadaed be thamiy kemus ni buch’uw ni be l’eg rogon ko rogon ea yafos rodaed mab l’eg rogon ko kenggin ea yafos rodaed.
“Nap’an ni gadaed ra sap ko tonon rok’ Got ko fare thapeg … nge Yesus Kristus nge fare gospel Rok’, rayag ni ngaed thamiyed e falfalaen’ ni demuturug ko mang e be buchbuch—fa tin ndar buch—ulan e yafos rodaed. Falfalaen’ e ma yib ni bachan Ir. I’ir e tabolngin ko urngin e falflaen’. …
“fa’an gadaed ra sap ko fayleng … , ma dariy bi’id ni gadaed ra nang e falfalaen’. … [Falfalaen’] e ba tawa’ath nima yib ni yibe gay rogon ni ngan par ni yib yul’yul’, ni woed rogon ni fil Yesus Kristus.”19
Ba Mich Mich u Nap’an ni Ngan Sul
Fa’an nra dariy rom fare wa’amngin farke gak’iy, ma gube micheg ngom ni pa’ fare Tathapeg e gubin ngayal’ mab kik’iy i yib ngom. Be pong, “Kalgaed ngaen’raed ngar baed ngog.”20 Bay wa’amngin ni gubin ngayal’ mab bo’or. Dabyag ni ngan chuw’iy ni chuway’, ma dariy be’ ni ra a’dag ni ran siyeg.21
Fa’anra Ga ba’dag ni nge sul ko farke gak’iy ni nge ri’ lamen biyay, tabab ko meynil ngak’ e Chitamangiy nbay u Tharmiy. Mich u wun’um ngak’ Yesus Kristus nge fare gelngin e bayul Rok’. Gube micheg ngom ni nap’an ni garam sap ngak’ fare Tathapeg “ulan e pi tafney rom,”22 fare wa’amngin farke gak’iy e rran pi’ ngom, ni rib fel’ lamen, ma rib mangil ko ya’al rom, “ma ire th’abi fel’ ko gubin e pi tawa’ath rok’ Got.”23
Dalip e wik kafram ko dbay, kug guy fare falfalaen’ rok’ fare Tathapeg rok’ e ppin rog Kathy nap’an ni gun’ew i yibliy fare Temple u Lisbon Portugal. Fare thin nib riyul’ ko fare gospel e yib nga Portugal ko 1975 nap’an nin pi’ matwon gubin e tiliw. Gubin fapi gidii’en Got ni ri’ lamen fare wa’amngin nap’an ndariy tagil’ fare galasia, fa chapels, ma dariy e temple nib chuchgur gonp’an 1,000 miles (1,600 km) e bay ra uned ngodaed ngaed falfalaen’gaed u ta’abang ni bay fare wa’amngin e gak’iy e chiney nran pere’eg ulan e nu’un rok’ Somol u Lisbon, Portugal. Gube tayfan fapi gidii’en Got ko tin Tomur e Rran ni gum’ircha’enraed ab sap ngak’ fare Tathapeg.
Fare Tathapeg e ga’ar, “En nra par u fithik’ag, mu gu par u fithik’an, e bo’or wom’ngin nra yib: ya dariy ban’en nrayag romed ni fa’anra da mpethgad ngog.”24
Non ko re kadbul ney ngak’ fapi gidii’en e Galasia u dakan e fayleng, President Nelson e ga’ar, “Pi walageg nib tu’uf rog, gamed fapi wa’amngin e motochiyel nibe laek wo’en Yesus Kristus.” Ma ki yoeg: “Gu be pining e magar ngomed! Guba’dag med!”25
Gab tu’uf romaed, President Nelson.
Mich u wun’ug ni kug guy nga owcheg fare gelngin e yi’iy nibe yib nga dakan fare President rodaed. I’ir fare profet rok’ Got. Ni woed Lehi, President Russell M. nibe pining daed nge ngak’ gubin gathon e tabinaew rok’ Got ni nge yib nge k’ay wa’amngin farke gak’iy. Yog ngodaed e sobut’aen’ nge gelngiy ni ngan laek fapi mulwol rok’.
Gube micheg u fithik e sobu’taen’ ni Yesus Kristus e Fak Got. Fare tu’ufeg Rok’, Gelngin, nge murunguy Rok’ e ma pi’ gelngin gubin ban’en. Gube micheg u dakean fithngan Yesus Kristus, amen.