Gachalpen nib Riyul’ rok en Tathapeg
Rayog ni ngad thamiyed e falfalaen’ nibe athamgil riy’ napan Somoel nge gospel Rok e mang e dayif nibe toey e yafos rodad nga dakaen.
Buchuw nib miith riy u Bin Kakrom e M’ag babyor nu Haggai e pi thin nibe weliy fan e gidii’ ni rayog ni ngar use nag e pi thin Elder Holland. Kar gilay’gaed ni dar tayed Kristus ninge kengin e yafas nge pigpig roared. Haggai ma weliy fan e thin rok nib fel’ rogon napan ke fonow nag e gidii’ rok ni kar pired nga lan e na’un ma dani toey e temple rok Somoel:
“Girdi’ rog, mangfan ni gimed be par u lan bogi naun ni fafalel’ ma kabay e Tempel rog u but’ nib puth?
“Ere key yoeg fare Somel; Damur guyed e n’en ni be buch romed?
“Kam yunged e woldug ni grain nrib yo’or, machane wom’ngin ni kam t’arede ri bochu’uw. Bay e ggan ni ngam ked, machane de gaman ni ngam fosgad ngay. Bay e wayin ni ngam unumed, machane de gaman ni ngam chinggad ngay. Bay e mad romed, machane de gaman ni nge magwal nagmed. Ma pi’in yad be maruwel e dab ra gaman gad u pulworad.
“Damur guyed fan e ran’ey nike yodroy.”1
Dam mu ba’adag pi thin nibe weliy fan nrib ma’athuk riy ni ngan tay fan e tin ni dariy fan ko tin rok Got?
De’ n’uw napan kug un e mo’olung ko sacrament, nge bee’ nike sul ko mission rok ke yoeg e thin ni rungag e chitimag ni ga’ar ngak pifak rok, “Fare n’en nib t’uf rodad e gathi Wi-Fi ya i’ir e Nephi!”
Napan kug paer u West Africa ko lal’ e duw, kug guy rogon ko bo’or e gidii’ nibe tay fan fare gospel nib fel’ rogoy mab felaen’ug riy’. Rungin nib fel’ riy e fithingan e shop ko fal’eg e karro ni ba’ u Ghana. Fare pumo’on e gagey ngay’ e tunguy riy’ “Thy Will Alignment.”
Rayog ni ngad thamiyed e falfalaen’ nibe athamgil riy’2 napan Somoel nge gospel Rok e mang e dayif nibe toey e yafos rodad nga dakaen. Machane, mrib moem ni nge thiliyegey fare dayif nem ni nge mang e tin nu fayleng, nibe paer riy e tin nu tharimy nib dariy fan woed e mus ni ngan maen nga galasia l’agruw e awa ko rran ni Madnom. Napani aray rogon, e boed e “dabda gaman gad u pulowdad.”
Haggai e me yoeg ngodad nrib t’uf ngodad ni ngad m’ag u wun’dad—ni ngad boeded nibe yoeg u thin nu Australia, “fair dinkum” ko rogon e paer e gospel rodad. Bee’ e fair dinkum napani ngongoliy e ren’en nibe yoeg.
Kug fil boech rogon e fair dinkum mug athamgil i un ko rugby. Kug ril rogon napan kug gay rogon nibe gel, napan kug pii’ ni gubin rayog rog, kug falfalan’ ko fafal.
Bin fel’ e duw kug fafal ko rugby e re duw tomuren e high school rog. Fare team ni gu ba’ riy e rib sasalap mab m’ag u wun’raed. Gamaed e ku gel gaed ko re duw nem. Machane, reb o rran napan kug fafal gad ko e team nib waer, nge tomuren fare gos’gos’ kug duwgily nggu fek e ppin ngu warow ko fare churu’ nib ga’ ko college. Kug lemnag ni bachan e ra mang e gosgos nib moem riy’, e ngariy gay rogon nggu matanang gag ko mad’ad nrayog nggu falfalaen’ ko re churu’. Ko re gos’gos’ nem, e dani m’ag u wun’maed ko hard contacts ngay’ nge kug waer gaed. Ma rib kireb riy’, fini mu’ re match ke yigi ga’ nge amith e blowtheg, ma dani fel ya’an rog ko date rog. Sana nrib t’uf nggu fil rogon ban’en.
Nrib thil’ thil rogon ni yibi buch ko gos’gos’ nga m’on napan kug m’ag u waen’. Bingyal’ ko re gos’gos’ nem kug lii’ bee’; mug thamiy e amith u p’owcheg. Ke fil rogog e papa rog ni dani fel’ nggu dag e amith ko pi to’ogor rog, ma ere kug athamgiliy ko re match. Re blayal’ nem kug gay rogon nggu kay e ggan, ma de yoeg. Bin magid e kakadbul, kug waen nga hospital, nge fare X-ray ke dag ni kug m’ing e yododan rog. Yan nel’ e wik nikan m’ag langag ko waya.
Kug fil rogon boech ko re fanathin ko fare blowtheg nib ga’ nge yododan nib m’ing. Kug puguran ni de yoeg nggu kay e ggan ko nel’ e wik, ya kemus ni kug unum e raen nge milik riy’, machane dab gu kirebaen’ ni ke m’ing e yododan rog ni bachan kug gay rogog nrib gel riy’. Machane kug kiribaen’ ko mad’ad’ e blowtheg rog ni bachan ke sulaen’ug ni kug tal’ boech.
Gay rogoy e gathi be yip fan ni kemus ra aw e tawath ngodad fa dani yib e sik’eng ngodad. Machane be yip fan nra falfalaen’ gad. Falfalan’ nib riyul’ e gathi e n’en nib ngoch’ngoch’ fa papay. Falfalan’ nib riyul’ ma athamgil, ma be yib ngodad ni bachan be athapeg e gay rogdad Somoel.3
Fanathin e Oliver Granger be dag rogoey. Boed ni yoeg President Boyd K. Packer: “Napan Gidii’en Got ke yaen ko Kirtland, … Oliver e magaey ni nge chuwaey’ e ti rorad ni rayog. Dariy yoeg ni nge chuwaey’ nib yo’or. Nge riyul’, de yoeg ni nge chuwaey’ bo’or!”4 Kan duwgily rok fare Bin Som’on e Presidency ni nge mugu’uliy e ban’en mom’aw, mrib gel riy’. Machane Somoel ke oge magaer ngak ni bachan ke gay rogon ni oge thin riy:
“Kug puguran tapig’pig’ rog Oliver Granger; musap, riyul’ ni gube yoeg ngak ni fithingan e ra tay fan nib pogofan ko mfen ngo mfen, ni dabi mus bi’id, ke yoeg Somoel.
“Ere, aygi pag ni nge muruwliy nib gel ni nge ayuweg fare Bin Som’on e Presidency ko Galasia rog, … nge napan i mul ere sak’iy nga lang bayby, ya miligach rok e thothup rog ko pulwon’ riy’, be yoeg Someol.”5
Amrogon ko gadad gubin—e gathi tin nibe gel gad riy, machane pi miligach’ nge muruwel rodad, nibe ga’fan rok Somoel.
Reb e sasun e gachalpen nib riyul’ rok Yesus Kristus e fagaer nib t’uf rodad u Côte d’Ivoire lan West Africa. Re ppin nib fel’ mab yul’yul’ riy’ ke gafgow ko mad’ad’ u waen’, nge dowef, ko le’engin u fithik bukun e duw nib yo’or, nge ke th’aeb e mabgol rorow. De waer ko mich nge yul’yul’ rok, machane bachan ke lii’ ngak, ke gafgow nib almarin nib yo’or ngiyal’. Ke weliy fan e thin rok mang ke buch:
“Mus ni kug oge pogofay ngak, kug mol nib mith’mith’ e mad’ad’ rog; kug od nib mad’ad’ ni amrogon. E boed e mad’ad’ nib nify lan gum’ir’cha’eg. Bo’or ngiyal’ kug meybil ngak Somoel ni nge fek rog, machane ke yigi almarin e amith rog ni mich u wun’ug ni ra paer rog ko gubin e rran rog. Ke almarin ko napan ke yim’ e nina rog fini kug rugoed; ke almarin ko napan ke yim’ e chitimag nge pagael rog. Ke ga’ nag nge upnguy e gum’ir’cha’eg, mug lemnag ni nggu mum’ ni de’ n’uw napan.
“Bingyal’ kug ning u wun’ug e mang e ra rin Somoel fa’anre ke ba’ ko gin rog, ma kug gog, ‘Ireray ke yigi gel, Somoel.’
“Ma reb e kakadbul kug sap nggu pirieg fare amith nibe yib ko ren’ey lan gum’ir’cha’eg, mug sap nrib to’aer lan e ya’el rog. Dakurin pir’eg. Laniyaen’ug ke sul bayay ko mang fan ni rayog rog [nggu] thamiy e amith, machane de yoeg e amith ngog. Kug soen nag kakadbul mada’ ko neap nggu thamiy fare amith nga lan gum’ir’cha’eg; dab ki yoeg. Ma ere kug ragbug nga but’ mug oge magaer ngak Got ni ke pag fare miligach ni bayul rok Somoel nibe ayuweg neg.”6
Re ppin ney e chiney kan seal nag ngak e pum’on nib fel’, mab yul’yul’ nibe adag dakaen nib to’aer.
Ere mang e pangiydad fa’anre gadad e gachalpen nib riyul’ rok Kristus? Nge mang e pulwon fare gospel rodad napan gadad ma ”guyed e n’en ni be buch [rodad],” woed e Haggai ma yoeg?
Gu ba’adag rungi pangin rok chitimag King Lamoni nib fel’. Ga ra puguran ni domomuw rok nib som’on napan ke guy fak rok nibe un ngay Ammon, e Nephite—chongin e gidii’ ni dubrad fapi Lamanited riy’. Ke fek e sayden rok ni nge cham ngak Ammon machane ke gel Ammon ngak me tay e sayden ko k’angey. “Ere fare pilung, ni ke rusnag e yafos rokʼ, e gaʼar: Faʼan gara pageg ni dab mu liiʼeg ma gura piiʼ ngom ni demutrug ko manga gara ning, ni mus iyaen nge madaʼ nga barbaʼ fare lung ni gube gagyeg nag.”7
Musap bin yang e thin rok—ke yoeg nra piiʼ barbaʼ fare lung rok ni fan ko yafos rok.
Machane tabuch, tomuren ke nang fan fare gospel, ke yoeg nra piiʼ yug thil ban’en. “Me gaʼar fare pilung: Manga nggu rinʼ me yog ngog e re yafos ney ni manechubog ni kam weliy mornga’agen? Arragon, manga nggu rinʼ me yog ni ngug mang fak Got, me puw e biney e yaʼel nib kireb nge chuw u lan ngorongreg, mug thapeg fare Kan ni Thothup rokʼ, ni nge yog nug sug ko falfalaenʼ, ni nge siy ni chuwegeg ko bin tomur e rran? Musap gaed, i gaʼar: Gura pag gubin e pinʼen ni bay rog, arragon, gura pag e lung rog, ni nge yog ni yog ngog e biney e falfalaenʼ.”8
Chiney, ke falʼeg rogoy ni nge pag gubin e pinʼen ni baʼ, bachan fare gospel e tolang pulwon riy! Ke fair dinkum marungagen fare gospel
Ere, re duwer ni ba gaʼfan rodad gugin e, gadad gubin e fair dinkum marungaagen fare gospel? Bachan pangiy nib mathilin e gathi fair dinkum! Nge Got e dabi falfalanʼ ko e gidiiʼ nib mathilin riyʼ.9
Dariy e flaʼab, fa gosʼgosʼ, fa ginʼey, fa social media, fa video game, fa fafael, fa fagaer nib celebrity, fa banʼen ni baʼ ko fayleng nrib felʼ ko yafos ni manemus. Ere fonow rok Somoel ngak gadad gubin e “guyed e n’en ni be buch romed.“
Thamiy rog e weliy fan nib fel’ rogon ko pi thin Nephi: “Guma falfalaenʼ ko tamilang; guma falfalaenʼ ko tin riyulʼ; guma falfalaenʼ ku Yesus, ya ke bayuliy e yaʼel rog ke chuw u infierno.”10
Gadad e pi gachalpen ngak Ir ni ke piiʼ gubin Rok ni fan dad? Iʼir niʼir e Tabayul nge Taayuw rok en Chitimangiy? Niʼir ni Ke mʼag u waenʼ ko fare miligach rok nib bayul ma amrogon chiney u fithik e adag, wurengaenʼ, nge athap ningad thapeged e falfalanʼ ni dabi mus biʼid? Gu wenig nag ngak enra rung’ag fa be’eg pi thin ney: Wenig ngom, wenig ngom dam pag nga waey e m’udugil rom ngak fare gospel ko chirofen nga m’on. Mu fair dinkum nag chiney mu thamiy e falfalaen’ nib riyul’! U dakean fithngan Yesus Kristus, amen.