L-Imfietaħ u l-Awtorità tas-Saċerdozju

Mill-Presbiteru Dallin H. Oaks

Tal-Kworum tat-Tnax-il Appostlu

Immaġni

L-imfietaħ tas-saċerdozju jidderieġu kemm lin-nisa kif ukoll l-irġiel, u l-ordinanzi u l-awtorità tas-saċerdozju jippartjenu kemm lin-nisa kif ukoll l-irġiel.

I.

F’ din il-konferenza rajna għadd ta’ aħwa fidili jiġu mħollija, filwaqt li sostnejna s-sejħa ta’ oħrajn. B’ dan it-tibdil fis-sejħiet—tant familjari fil-Knisja—aħna ma “nwarrbux” meta niġu mħollija, u ma niġux “promossi” meta niġu msejħin. Ħadd ma jiġi “mwarrab jew promoss” fis-servizz tal-Mulej. Hemm biss “‘il quddiem jew lura” u d-differenza tiddependi minn kif aħna naċċettaw jew naġixxu meta niġu mħollija jew imsejħa. Darba jiena kont qed nippresiedi meta wieħed li kien president ta’ wited ġie mħolli mis-servizz li kien ta tant tajjeb għal disa’ snin sħaħ u issa kien jinsab kuntent bit-tħollija tiegħu u bis-sejħa l-ġdida li hu u martu kienu għadhom kif irċevew. Huma ġew imsejħa sabiex ikunu mexxejja fin-nursery tal-qasam tagħhom. Huwa biss f’ din il-Knisja li ż-żewġ sejħiet jitqiesu t-tnejn onorabbli bl-istess mod!

II.

Waqt li kienet qed tindirizza l-konferenza tan-nisa, il-president ġenerali tas-Soċjetà tal-Għajnuna Linda K. Burton qalet, “Nittamaw li nnissluġo kull waħda minna xewqa akbar li nifhmu aħjar is-saċerdozju.” ¹ Dan il-bżonn japplika għalina lkoll, u jiena sa nisħaq dwar dan billi nitkellem dwar l-imfietaħ u l-awtorità tas-saċerdozju. Peress li din il-ħaġa tikkonċerna kemm lill-irġiel kif ukoll lin-nisa, jiena kuntent li din il-konferenza qed tiġi mxandra u ppubblikata għall-membri kollha tal-Knisja. Il-qawwa tas-saċerdozju tberikna lkoll. L-imfietaħ tas-saċerdozju jidderieġu kemm lin-nisa kif ukoll l-irġiel, u l-ordinanzi u l-awtorità tas-saċerdozju jippartjenu kemm lin-nisa kif ukoll l-irġiel.

III.

Il-President Joseph F. Smith iddeskriva s-saċerdozju bħala “il-qawwa ta’ Alla ddelegata lill-bniedem li permezz tagħha l-bniedem jista’ jaġixxi fid-dinja għas-salvazzjoni tal-familja umana.”² Mexxejja oħra għallmuna li s-saċerdozju “huwa l-qawwa suprema fuq din id-dinja. Huwa l-qawwa li permezz tagħha nħolqot id-dinja.”³ L-iskrittura tgħallem li “dan l-istess Saċerdozju, li kien fil-bidu nett, għandu jkun preżenti wkoll fl-aħħar tad-dinja” (Moses 6:7). Għalhekk, is-saċerdozju huwa l-qawwa li permezz tagħha aħna nqumu mill-mewt u nipproċedu għall-ħajja eterna.

L-għarfien li aħna nfittxu li niksbu jibda b’ għarfien tal-imfietaħ tas-saċerdozju. “L-imfietaħ tas-saċerdozju huma l-awtorità li Alla ta lil dawk li jħaddnu s-saċerdozju sabiex huma jidderieġu, jikkontrollaw u jiggvernaw l-użu tas-saċerdozju Tiegħu fid-dinja.”⁴ Kull għemil jew ordinanza mwettqa fil-Knisja jsiru taħt id-direzzjoni u l-awtorizzazzjoni ta’ xi ħadd li jħaddan l-imfietaħ għal dik il-funzjoni partikolari. Kif spjega l-Presbiteru M. Russell Ballard, “Dawk li jħaddnu l-imfietaħ tas-saċerdozju … letteralment jagħmluha possibbli għal dawk kollha li jservu b’ fedeltà taħt id-direzzjoni tagħhom sabiex jeżerċitaw l-awtorità saċerdotali u jkollhom aċċess għall-qawwa tas-saċerdozju.” ⁵

Permezz tal-kontroll tal-eżerċizzju tal-awtorità saċerdotali, il-funzjoni tal-imfietaħ tas-saċerdozju jkabbru kif ukoll jillimitaw. Ikabbru billi jagħmluha possibbli li l-awtorità u l-barkiet tas-saċerdozju jkunu disponibbli għall-ulied kollha ta’ Alla. Jillimitaw billi jidderieġu min jista’ jingħata l-awtorità tas-saċerdozju, min jista’ jħaddan l-uffiċċji tiegħu u kif jingħataw id-drittijiet u l-qawwiet tiegħu. Per eżempju, persuna li jħaddan is-saċerdozju ma jistax iħaddem l-uffiċċju jew l-awtorità tiegħu jekk huwa ma jiġix awtorizzat li jagħmel dan minn xi ħadd li jħaddan l-imfietaħ. Mingħajr dik l-awtorizzazzjoni, l-ordinazzjoni tkun invalida. Dan jispjega għaliex dak li jħaddan is-saċerdozju—hu x’inhu l-uffiċċju tiegħu—ma jistax jordna xi membru tal-familja tiegħu jew jamministra s-sagrament f’ daru mingħajr l-awtorizzazzjoni minn xi ħadd li jħaddan l-imfietaħ neċessarji.

Bl-eċċezzjoni tal-ħidma mqaddsa li l-aħwa nisa jwettqu fit-tempju taħt id-direzzjoni tal-imfietaħ li jħaddan il-president tat-tempju, li se niddeskrivi dalwaqt, huwa biss dak li jħaddan uffiċċju saċerdotali li jista’ jiffunzjona f’ ordinanza tas-saċerdozju. U l-ordinanzi awtorizzati kollha tas-saċerdozju jiġu rreġistrati fuq ir-reġistri tal-Knisja.

Ultimament, huwa l-Mulej Ġesù Kristu li jħaddan l-imfietaħ kollha tas-saċerdozju, liema saċerdozju huwa Tiegħu. Huwa dak li jiddetermina liema mfietaħ jistgħu jiġu ddelegati man-nies mortali u kif jistgħu jintużaw dawn l-imfietaħ. Xi kultant aħna naħsbu li l-imfietaħ kollha tas-saċerdozju ġew mogħtija lil Joseph Smith ġewwa t-Tempju ta’ Kirtland, iżda l-iskrittura tiddikjara li dak li ngħata hemm ġew kienu “l-imfietaħ ta’ din id-dispensazzjoni” (D&C 110:16). Fil-konferenza ġenerali bosta snin ilu, il-President Spencer W. Kimball fakkarna li hemm imfietaħ oħra saċerdotali li għadhom ma ġewx mogħtija lil bniedem fuq din id-dinja, fosthom l-imfietaħ tal-ħolqien u tal-qawmien mill-imwiet.⁶

In-natura divina li tillimita l-eżerċizju tal-imfietaħ tas-saċerdozju tispjega d-differenza importanti bejn deċiżjonijiet dwar affarijiet li għandhom x’ jaqsmu mal-amministrazzjoni tal-Knisja u deċiżjonijiet li jaffettwaw is-saċerdozju. L-Ewwel Presidenza u l-Kunsill tal-Ewwel Presidenza u l-Kworum tat-Tnax, li jippresiedu fuq il-Knisja, ġew mogħtija l-qawwa li jieħdu bosta deċiżjonijiet li jaffettwaw il-policies u l-proċeduri tal-Knisja—ħwejjeġ bħal fejn jinbena l-bini tal-Knisja u l-etajiet biex wieħed iservi missjoni. Iżda avolja dawn l-awtoritajiet li jippresiedu jħaddnu u jeżerċitaw l-imfietaħ kollha ddelegati lill-bniedem f’ din id-dispensazzjoni, huma mhumiex liberi li jbiddlu l-mudell li ġie ordnat b’ mod divin li jiddikkjara li huma biss l-irġiel li jistgħu jħaddnu uffiċċji fis-saċerdozju.

IV.

Issa sa nitkellem dwar l-awtorità saċerdotali. Sa nibda bit-tliet prinċipji li għadna kemm iddiskutejna: (1) is-saċerdozju huwa l-qawwa ta’ Alla ddelegata lill-bniedem biex jaġixxi għas-salvazzjoni tal-familja umana, (2) l-awtorità saċerdotali hija ggvernata minn nies li jħaddnu s-saċerdozju li jħaddnu l-imfietaħ saċerdotali, u (3) peress li l-iskrittura tiddikjara li “l-awtoritajiet u l-uffiċċji fil-knisja huma żjieda għal dan is-saċerdozju Melkisedeku” (D&C 107:5), dak kollu li jseħħ taħt id-direzzjoni ta’ dawk l-imfietaħ saċerdotali isir bl-awtorità tas-saċerdozju.

Għaliex dan japplika għan-nisa? F’ indirizz lis-Soċjetà tal-Għajnuna, il-President Joseph Fielding Smith, li dak iż-żmien kien il-President tal-Kworum tat-Tnax-il Appostlu, qal dan: “Filwaqt li n-nisa ma ġewx mogħtijin is-Saċerdozju, dan ma jfissirx li l-Mulej ma tahomx l-awtorità. … Persuna jista’ jkollha l-awtorità mogħtija lilha sabiex tagħmel ċerti ħwejjeġ fil-Knisja li jorbtu u huma assolutament neċessarji għas-salvazzjoni tagħna, bħall-ħidma li n-nisa jwettqu fid-Dar tal-Mulej. Huma għandhom l-awtorità mogħtija lilhom li jwettqu ċerti ħwejjeġ kbar u meraviljużi, sagri għall-Mulej, u li jorbtu lill-bnedmin daqs il-barkiet li jingħataw mill-irġiel li jħaddnu s-Saċerdozju.”⁷

F’ dak l-indirizz mill-aktar sinifikanti, il-President Smith reġa’ tenna li n-nisa ġew mogħtija l-awtorità. Lin-nisa qalilhom, “Intom tistgħu titkellmu b’ awtorità, għaliex il-Mulej tagħkom l-awtorità.” Huwa qal ukoll li s-Soċjetà tal-Għajnuna “ġiet mogħtija l-qawwa u l-awtorità li twettaq bosta ħwejjeġ. Il-ħidma li huma jwettqu titwettaq b’ awtorità divina.” U, bla dubju, il-ħidma tal-Knisja mwettqa kemm minn nisa kif ukoll l-irġiel, kemm jekk fit-tempju jew fl-oqsma jew fil-friegħi, titwettaq taħt id-direzzjoni ta’ dawk li jħaddnu l-imfietaħ tas-saċerdozju. Għalhekk, meta kien qed ikellem lis-Soċjetà tal-Għajnuna, il-President Smith spjega, “Il-Mulej tahom din l-organizzazzjoni kbira fejn huma għandhom l-awtorità li jservu taħt id-direzzjoni tal-isqfijiet fl-oqsma tagħhom … , iħarsu l-interessi tan-nies tagħna, kemm b’ mod spiritwali kif ukoll temporali.”⁸

Għalhekk, kif intqal b’ mod ġust li s-Soċjetà tal-Għajnuna mhijiex sempliċiment klassi għan-nisa iżda xi ħaġa li huma jagħmlu parti minnha—li twaqqfet b’ mod divin biex tikkumplimenta s-saċerdozju.⁹

Aħna m’ aħniex imdorrijin nitkellmu u ngħidu li n-nisa għandhom l-awtorità tas-saċerdozju fis-sejħiet tagħhom fil-Knisja, iżda allura x’ tip ta’ awtorità oħra tista’ tkun? Meta mara—żagħżugħa jew anzjana—tiġi distinta sabiex tippriedka l-evanġelju bħala missjunarja full-time, hija tiġi mogħtija l-awtorità saċerdotali li twettaq funzjoni saċerdotali. L-istess nistgħu ngħidu meta mara tiġi distinta sabiex tiffunzjona bħala uffiċjal jew għalliema f’ waħda mill-organizzazzjonijiet tal-Knisja taħt id-direzzjoni ta’ xi ħadd li jħaddan l-imfietaħ tas-saċerdozju. Kull min jiffunzjona f’ xi uffiċċju jew sejħa li jkun irċieva minn xi ħadd li jħaddan l-imfietaħ saċerdotali jkun qed jeżerċita l-awtorità tas-saċerdozju waqt li jwettaq id-doveri mogħtija lilu jew lilha.

Dawk kollha li jeżerċitaw l-awtorità saċerdotali għandhom jinsew dwar id-drittijiet tagħhom u jikkonċentraw fuq ir-responsabbiltajiet tagħhom. Dan hu prinċipju tant meħtieġ fis-soċjetà b’ mod ġenerali. Il-kittieb famuż Russu Aleksandr Solzhenitsyn ġie kkwotat li qal, “Wasal iż-żmien … li niddefendu l-obbligi umani aktar mid-drittijiet umani.”¹⁰ Il-Qaddisin tal-Aħħar Jiem żgur li jagħrfu li biex nikkwalifikaw għall-eżaltazzjoni ma jiddependix daqshekk mid-drittijiet li niksbu iżda mir-responsabbilitajiet li nwettqu.

V.

Il-Mulej qal li huma l-irġiel biss li għandhom jiġu ordnati għall-uffiċċji tas-saċerdozju. Iżda, kif enfassizzaw diversi mexxejja tal-Knisja, l-irġiel mhumiex “is-saċerdozju.”¹¹ L-irġiel iħaddnu s-saċerdozju, b’ dover sagru li jużawh biex ibierku l-ulied kollha ta’ Alla.

L-akbar qawwa li Alla ta lil uliedu l-irġiel ma tistax tiġi eżerċitata mingħajr is-sħubija ta’ waħda minn uliedu, għaliex kien biss lil uliedu n-nisa li Alla tahom il-qawwa “li jkunu jistgħu joħolqu iġsma … biex jiġi fis-seħħ il-Pjan Kbir ta’ Alla.” ¹² Dan huwa kliem il-President J. Reuben Clark.

Huwa kompla: “Dan huwa l-irwol tan-nisa tagħna u ta’ ommijietna fil-Pjan Etern. Huma ma jħaddnux is-saċerdozju; huma ma ġewx mitluba li jwettqu d-doveri u l-funzjonijiet tas-Saċerdozju; lanqas ma ġew mgħobbija bir-responsabbiltajiet tiegħu; huma bennejja u organizzaturi taħt il-qawwa tiegħu, u huma jgawdu wkoll mill-barkiet tiegħu, jippossedu s-sapport tal-qawwiet tas-Saċerdozju u jippossedu funzjoni li ġew imsejħin għaliha b’ mod divin, li fl-eternità hija importanti daqs is-Saċerdozju nnifsu.” ¹³

Permezz ta’ dak il-kliem ispirat, il-President Clark kien qed jitkellem dwar il-familja. Kif hemm iddikjarat fil-proklamazzjoni tal-familja, il-missier jippresiedi fil-familja u hu u l-omm għandhom responsabbiltajiet separati, iżda huma t-tnejn “obbligati li jgħinu lil xulxin bħala sħab indaqs.” ¹⁴ Ftit tas-snin qabel il-proklamazzjoni tal-familja, il-President Spencer W. Kimball ta din l-ispjegazzjoni spirata: “Meta nitkellmu dwar iż-żwieġ bħala sħubija, ejjew nitkellmu dwar iż-żwieġ bħala sħubija sħiħa. Ma rridux li n-nisa Qaddisin tal-Aħħar Jiem ikunu sieħba bla vuċi jew limitati f’ din il-ħidma eterna! Jekk jogħġobkom kunu sieħba li tikkontribwixxu u sħaħ mar-raġel tagħkom.”¹⁵

F’ għajnejn Alla, kemm jekk fil-Knisja jew fil-familja, in-nisa u l-irġiel huma indaqs, b’ responsabbiltajiet differenti.

Sa nagħlaq billi nsemmi xi veritajiet dwar il-barkiet tas-saċerdozju. B’ differenza mill-imfietaħ u l-ordinazzjonijiet tas-saċerdozju, il-barkiet tas-saċerdozju huma disponibbli kemm għan-nisa kif ukoll għall-irġiel bl-istess kundizzjonijiet. Id-don tal-Ispirtu s-Santu u l-barkiet tat-tempju huma eżempju ċar ta’ din il-verità.

Fid-diskors mill-isbaħ tiegħu fil-Ġimgħa Edukattiva ġewwa BYU is-sajf li għadda, il-Presbiteru M. Russell Ballard ta dawn l-istruzzjonijiet:

“Id-duttrina tagħna tal-Knisja tpoġġi lin-nisa b’ mod ugwali iżda differenti mill-irġiel. Alla ma jħarisx lejn wieħed mis-sess bħala aħjar jew aktar importanti mill-ieħor. …

“Meta l-irġiel u n-nisa jmorru t-tempju, it-tnejn li huma jiġu addotati bl-istess qawwa, li hija l-qawwa tas-saċerdozju. … L-aċċess għall-qawwa u l-barkiet tas-saċerdozju jinsab hemm għall-ulied kollha ta’ Alla.”¹⁶

Jiena nagħti x-xhieda tiegħi dwar il-qawwa u l-barkiet tas-saċerdozju ta’ Alla, li huma disponibbli kemm għal uliedu irġiel kif ukoll nisa. Jiena nixhed dwar l-awtorità tas-saċerdozju, li tiffunzjona fl-uffiċċji kollha u fl-attivitajiet kollha tal-Knisja ta’ Ġesù Kristu tal-Qaddisin tal-Aħħar Jiem. Jiena nixhed dwar il-funzjoni mmexxija b’ mod divin tal-imfietaħ tas-saċerdozju, li huma mħaddna u eżerċitati fil-milja sħiħa tagħhom mill-profeta/president, Thomas S. Monson. Finalment u l-aktar importanti, jiena nixhed dwar il-Mulej u s-Salvatur tagħna, Ġesù Kristu, li dan is-saċerdozju huwa Tiegħu u li aħna qaddejja Tiegħu, f’ isem Ġesù Kristu, amen.