Mga Tubag gikan sa mga Lider sa Simbahan
Sa Unsang Paagi nga Magiyahan Ko sa Espiritu?
Samtang magtinguha kita sa Espiritu Santo, Siya masaligan, ug minahal nga kauban.
Gikan sa usa ka pakigpulong nga gihatag atol sa seminar alang sa bag-o nga mga lider sa misyon niadtong Hunyo 24, 2023.
Dihang kita nakompirmahan nga mga miyembro sa Simbahan human sa bunyag, kita nakadawat og sertipiko sa bunyag ug kompirmasyon. Apan unsa may kapuslanan sa maong sertipiko nga giplastar sa bungbong o gi-display sa scrapbook kon dili nato gamiton ang gasa nga gihatag kanato?
Kita kinahanglan nga takos nga magtinguha ug mosalig sa Espiritu Santo.
Unsaon sa Pagtinguha sa Espiritu
Ang pagtinguha sa Espiritu Santo naglakip og labaw pa kay sa makompirmahan lamang isip usa ka miyembro sa Simbahan. Inosente ra kaayo ang paghunahuna nga tungod lang kay nakadawat kita sa gasa sa Espiritu Santo ug lakip ang usa ka sertipiko, ang kinahanglan lang natong buhaton mao ang pag-ingon og, “OK. Andam na ko. Ipadayag na!”
Espirituhanon nga Buhat
Ang mga buhat sa personal, pribadong debosyon importante sa atong pagtinguha sa Espiritu Santo. Ang espirituhanon nga buhat sa pagtinguha sa Espiritu naglakip sa:
-
Kinasingkasing nga pag-ampo ngadto sa Amahan uban sa hugot nga pagtuo diha kang Jesukristo. Sa atong mga pag-ampo, samtang atong ipahayag ang atong pagpasalamat ngadto sa Dios, mahimo kitang mas maayo sa pag-ila sa Iyang kaluoy diha sa atong mga kinabuhi.
-
Kanunay ug gitutokan nga pagtuon sa kasulatan. Ang pagbusog sa mga pulong ni Kristo, sama sa makita diha sa mga kasulatan, makapaaghat og personal nga pagpadayag.
-
Pagtuman sa mga sugo sa Dios, tungod kay “ang gasa sa Espiritu Santo mao ang katungod nga makabaton sa kanunay nga pakig-uban sa Espiritu Santo kon kita takos.”
-
Katakos. Kana nagpasabot nga kita mosulay sa atong labing maayo nga paningkamot sa pagtuman sa mga sugo sa Dios ug dili mangatarongan sa makasasala nga gawi. Kon kita masayop, kita maghinulsol. Kon kita dili mobuhat niana, atong gilimitahan ang abilidad sa Espiritu Santo sa pagsulti og bisan unsa kanato, gawas lamang sa, “Kinahanglan ka nga maghinulsol!” Lagmit dili gayod kita makadawat og bisan unsa nga laing pagpadayag hangtod nga atong mabuhat.
-
Pagtahod sa mga pakigsaad nga atong gihimo sa Dios. Usa ka bahin sa pagtahod sa atong mga pakigsaad mao ang makugihong pag-andam alang sa pag-ambit ug takos nga pag-ambit sa sakramento kada semana.
Pagkat-on sa Pag-ila sa Espiritu
Bisan pa sa lig-on nga pundasyon sa espirituhanon nga buhat, kinahanglan gihapon kitang makat-on sa pag-ila sa tingog sa Espiritu Santo.
Ang Espiritu Santo makigsulti sa lain-laing mga paagi ngadto sa lain-laing mga tawo sa lain-laing mga panahon. Ang tingog sa Espiritu Santo dili kusog o saba apan malumo ug malinawon, sama sa usa ka hunghong. Mahimo kining sa talagsaon nga paagi yano ug lunsay. Mahimo kining modulot o mainiton. Makaapekto kini sa hunahuna ug kasingkasing. Nagdala kini og kalinaw, hingpit nga kalipay, ug paglaom—dili kahadlok, tumang tensiyon, o kabalaka. Makapahigmata kini ug nindot, dili makalibog.
Alang kanako, ang pagpadayag moabot sa mubo, laktod, mahinungdanon nga mga direktiba, sama sa “Adto!,” “Buhata!,” o “Isulti!” O kini mahimong moabot ingon nga mga ideya, kasagaran inubanan sa maaghop nga pag-aghat sa pagbuhat niana nga mga ideya. Ang maong kahibalo ug pagsabot mahimong ipahayag nga walay pulong. Panagsa ra nga ang pagpadayag moabot nga adunay klaro nga mga pagpasabot ngano nga kita kinahanglang adunay buhaton.
Ang pagtinguha sa Espiritu naglakip sa pagwagtang sa mga makabalda. Aron sa pagdawat og personal nga pagpadayag, kinahanglan nga atong biyaan ang kalibotanong kasaba. Dili kita makadawat og pagpadayag kon kita nasuko, nasamok, o nasagmuyo, o bisan sa pagkalinga lang. Hinuon, kita magmugna og palibot nga makapaawhag sa pagbati ug pag-ila sa Espiritu.
Mosalig sa Espiritu
Sa higayon nga kita nagtinguha ug napanalanginan sa Espiritu diha sa atong kinabuhi, nahuman na ba kita? Siyempre wala pa. Ang tumong mao ang pagsalig sa Espiritu samtang kita naghimo sa buhat sa Manluluwas.
Ang pagsalig sa Espiritu nagpasabot gayod nga kita molihok inubanan sa hugot nga pagtuo, mosalig nga ang Dios mogiya ug modumala kanato ug nga ang Espiritu Santo mopalambo sa atong mga paningkamot.
Ang pagkat-on nga mosalig sa Espiritu Santo nagpasabot nga atong ibutang ang atong pagsalig ug hugot nga pagtuo kang Jesukristo. Kinahanglan kita nga mosalig sa Espiritu imbes kay sa atong kaugalingon nga mga talento ug mga abilidad. Ang Espiritu Santo mopalambo sa atong mga paningkamot labaw pa gayod sa unsay atong mabuhat sa atong kaugalingon.
Ang paglihok diha sa hugot nga pagtuo ug pagbutang sa atong pagsalig ug hugot nga pagtuo kang Jesukristo wala magpasabot nga dili makahimo og desisyon kon kita dili mobati og usa ka positibo nga pag-aghat.
Unsaon Nako Pagkahibalo Kon Kini Ba ang Espiritu o Ako Ba Kaha nga Kaugalingong mga Hunahuna?
Usa sa labing komon nga mga pangutana mao, “Unsaon nako pagkahibalo kon ang akong nahunahunaan akoa ba o kon kini gikan sa Espiritu Santo?” Kini usa ka mabuot nga pangutana. Apan tingali ang usa ka mas maayo nga pangutana nga ipangutana sa atong kaugalingon mao kini: “Angay ba akong molihok alang niining partikular nga hunahuna?”
Ang propeta nga si Mormon mihatag og pipila ka sukdanan sa pagtino kon kita kinahanglan bang molihok sa usa ka piho nga hunahuna: kini nagpasiugda nga motuo sa atong Langitnong Amahan ug ni Jesukristo; kini nagpasiugda nga mohigugma ug moalagad Kanila; ug kini nagpasiugda nga mobuhat og maayo. Kon ang hunahuna nakatuman niini nga mga sukdanan, nan importante ba kini kon direkta ba kini nga gihatag sa Espiritu Santo nianang eksakto nga higayon o kon ang hunahuna mitungha tungod sa tibuok kinabuhi nga mga kasinatian ug naunang mga desisyon? Sa pagkatinuod lang, dili.
Ang pagkat-on sa pagpangita ug pagsalig sa Espiritu usa ka kahanas sa kinabuhi, dili lamang usa ka temporaryo nga paagi aron makalatas sa usa ka misyon o sa usa ka krisis. Samtang magtinguha kita sa Espiritu Santo, Siya masaligan, ug minahal nga kauban.