Hatag
Ang gagmayng buhat sa kaluoy adunay dakong epekto.
Ania ang gamay nga math equation alang kaninyo: Unsa man ang 270 x 2? Kon motubag ka og 540, sakto ka. Apan kon motubag ka og 5,000 ikaw mas sakto pa gayod—apan dili tingali alang sa inyong sunod nga matematika nga pasulit.
Kining medyo dili katuohan nga matematika nagpasabot kon unsay mahitabo human nga ang mga estranyo sa tibuok kalibotan midesisyon sa pagpakita og gamay nga kaluoy. Salamat sa mga Giving Machine sa Dan-agi ang Kalibotan nga kampanya, 90 ka kababayen-an gikan sa usa ka gamay nga baryo ang nakadawat og 270 ka pisó. Sa duha lang ka tuig (anaa kanang 270 x 2 nga matematika!) kini nga kababayen-an mihimo niining mga pisó ngadto sa 5,000 ka manok—ug nagpadayon pa sa pagdaghan. Gani, kini nga samang kababayen-an karon nagsuplay na og mga pisó pinaagi sa sama nga programa sa Giving Machine.
Mao kana ang tinuod mahitungod sa kaluoy. Kasagaran kita walay ideya kon unsa kadako ang kaayohan nga mahimo sa atong yano nga mga aksyon. Morag sama kini sa pag-itsa og gamayng bato ngadto sa lim-aw ug dayon mobiya, wala makabantay sa mga gagmay nga balod nga nagkadako diha sa tubig.
Karon nga panahon sa pasko, bisan giunsa pa ninyo pagpakita og kaluoy sa uban, palihog hibaloi kini: ang inyong mga paningkamot makahimo og kalainan.
Tingali sobra pa sa unsay inyong gihunahuna.
Ania ang pipila ka istorya gikan sa tibuok kalibotan aron matabangan kamo nga madasig sa pagpakatap og inyong kaugalingon nga gamayng kaluoy niining panahon sa Pasko.
Bag-ong mga Talento, Bag-ong mga Higala
Ni Ashton L., 17, State of Mexico, Mexico
Human mihangyo ang Kapangulohan sa Area sa among stake sa paghimo og kalihokan sa pagserbisyo, ako nagkaideya nga moadto sa usa ka lokal nga ospital ug modonar og hinimo sa kamot nga mga habol ug mga kalo alang sa mga mama ug sa ilang mga masuso.
Usa ka sister ang mitudlo nako sa paghimo og mga habol, mao nga gitudloan dayon nako ang uban. Lain nga sister sa akong ward ang nakat-on sa paggansilyo ug dayon gitudloan ko ug ang uban pa. Kami adunay kalihokan diin ang kabatan-onan mitabang sa paghimo og mga habol ug mga kalo. Bisan ang mga hamtong sa among stake, mga lalaki ug mga babaye, mahinamon nga “Dan-ag[an] ang Kalibotan” ug motabang usab.
Sa kataposan, ang among stake nakadonar og 200 ka kalo alang sa mga masuso ug 480 ka habol! Pagkahuman namo, usa ka grupo gikan sa akong ward ang miadto aron sa pagdonar sa mga aytem ngadto sa mga inahan nga naa sa ospital.
Sila malipayon kaayo, ug naghunahuna ko nga ilang gibati ang gugma ni Kristo.
Naghunahuna ko mahitungod sa serbisyo ug sa unsa nga paagi kini nakatabang kanako isip usa ka disipulo ni Kristo, ug isip anak nga lalaki sa Dios. Usa ka butang nga akong naamgohan mao nga ang pagserbisyo nakatabang kanako nga mas mapaduol sa Dios, ilabi na atol sa lisod nga mga higayon sa akong kinabuhi. Ang pagserbisyo mao ang labing maayo nga paagi aron mas mapaduol sa Dios.
Ang Dios naghatag kanato og mga talento ug mga gasa. Kon ganahan kamo nga makat-on og lain pa nga mga butang aron makapanalangin sa uban, Siya motabang ninyo nga mapalambo kana nga kahanas. Aron mahimong panalangin alang sa ubang tawo, Siya nagkinahanglan kanato nga mosugot ug andam. Bisan kon gibati ninyo nga dili kamo espesyal, o kamo walay bisan unsang butang nga ikahatag sa uban, kamo adunay ikahatag. Kinahanglan lang ninyo nga modangop sa Dios ug mohangyo Kaniya sa pag-abli sa inyong mga mata. Siya motabang kaninyo nga makakita kon unsaon ninyo nga tinud-anay nga mahimong panalangin alang sa uban.
Mga Giving Machine ug Maayo nga mga Balita
Texas, USA
Ang pamilyang Howard mipakigbahin sa gasa sa musika samtang sila nanaygon alang sa mga tawo nga mibisita sa mga Giving Machine ug sa mga tawo nga nanglabay. Pito sa siyam nga managsoon sa pamilyang Howard ug ang ilang mga ginikanan ang mikanta samtang ang ilang 19-anyos nga igsoong babaye, si Emily, usa ka inila nga piyanista, ang mitukar kanila.
“Kini ang labing maayo nga kasinatian sukad!” miingon si Hannah, 17. “Ganahan ko nga mougmad og nindot nga kalinaw palibot sa Giving Machine ug magdala og kamaya sa tanan nga mobisita! Bisan kon ang kadalanan tingali bisi na, ug ang panahon sa Pasko magdala og daghang butang nga buhaton, ganahan ko nga mopakigbahin og Kristohanong gugma sa mubo nga panahon. Ang pagkakita sa tanang kamaya samtang nagserbisyo nagdala og kalinaw ug kamaya sa Pasko diha sa akong kasingkasing.”
Tennessee, USA
Si Sam S. ug Sofi J., duha ka estudyante sa high school, nagmugna og bag-o nga club sa eskwelahan alang sa katuyoan sa pagkolekta og kwarta alang sa mga Giving Machine. Ang ilang tumong sa sinugdanan mao ang makakolekta og igo nga makahimo sa “777 Challenge.” (Kon pindoton sa mga modonar ang 7 sa tulo ka higayon diha sa mga Giving Machine, sila mopalit og 1 sa tanan.) Sa daghang donasyon nga nakolekta gikan sa mga estudyante, si Sam ug Sofi nakahimo sa 777 Challenge og kaduha.
Si Sofi miingon nga kini nga kasinatian nagtudlo kaniya nga adunay daghang lainlaing paagi sa pagserbisyo, ug matag gamay nga donasyon makatabang sa pipila ka paagi.
“Akong gihimo ang fundraiser aron moabot ang impluwensiya sa mga Giving Machine ngadto sa akong komunidad ug high school,” miingon si Sam. “Gusto usab nako nga pamatud-an nga ang mga tin-edyer makahimo og kalainan ug makapahayag sa kalibotan.”
Western Australia, Australia
Usa ka gabii sa wala pa ang Pasko, si James H, miadto sa mga Giving Machine kauban sa iyang pamilya. Siya mipili nga modonar og primary school pack [putos sa nag-una nga panginahanglanon sa eskwelahan] tungod kay gusto niya nga motabang sa usa ka tawo nga makaangkon sa kinahanglanon nga mga butang sa eskwelahan. “Mapasalamaton ko sa panalangin nga makaangkon og edukasyon,” miingon si James. “Kini usa ka butang nga akong gipangandoy nga madawat sa matag bata sa kalibotan, kay kini moabli og mga pultahan sa mga oportunidad nga mopanalangin sa ilang mga kinabuhi ug sa mga kinabuhi sa uban.”
Quezon, Pilipinas
Si Princess Jewel V. ug ang iyang igsoong babaye nga si Princess Jazmine Miraede N. V. adunay “talagsaon nga kasinatian” sa mga Giving Machine sa Pilipinas.
“Ang dungan nga paglibot sa mga Giving Machine usa ka nindot kaayo nga higayon alang namong duha,” miingon si Princess Jewel. “Makapadasig ang pagpili og mga gasa alang niadtong mga nanginahanglan, gikan sa mga kinahanglanon kaayo ngadto sa mga suplay nga pang-edukasyon ug medikal. Ang pagpakigbahin niini nga kasinatian kauban sa akong igsoong babaye nakapalig-on sa among kasuod ug mitudlo kanamo sa gahom sa kaluoy ug kamanggihatagon, bisan sa among pangedaron. Usa ka kini ka makahuloganon nga pahinumdom sa epekto nga among mahimo pinaagi sa yano nga paghatag.”
Paghimo og Imong Kaugalingon nga Impluwensya
Sama sa gitudlo ni propeta Alma sa iyang anak nga si Helaman, “Pinaagi sa gagmay ug yano nga mga butang ang mga dagko nga butang ipahinabo” (Alma 37:6).
Mao nga hatag sa imong kaugalingon, imong panahon, imong mga talento, gugma, o serbisyo sa usa ka paagi o lain pa niining panahon sa Pasko. Ania ang pipila ka ideya:
-
Linya ug tuploka ang usa o duha ka buton sa Giving Machine.
-
Pahiyom ug mosulti og hi sa usa ka tawo nga mora og medyo nag-inusara.
-
Serbisyohi ang inyong mga higala, mga silingan, o bisan mga dili kaila.
-
Dapita ang inyong mga higala ug mga silingan sa mga kalihokan sa Pasko.
-
Dapita ang mga higala sa pagsimba uban ninyo sa Dominggo sa wala pa ang Pasko.
Nakahinumdom ba kamo sa analohiya sa lim-aw ug gagmay nga mga balod kaniadto? Lakaw ug pag-itsa og pipila ka gagmayng bato.
Ang kalibotan malipay nga inyo kining gibuhat.