Ang Pagkatawo ni Jesus
Pagkat-on mahitungod niining pamilyar nga talan-awon sa Pasko ug sa unsang paagi kini makatabang kanato sa pagtutok ngadto sa Manluluwas.
Mga paghulagway pinaagi ni Carolyn Vibbert
Betlehem
Betlehem nagpasabot nga “balay sa pan” sa Hebreohanon. Kini usahay gitawag nga siyudad ni David, kang kinsang kaliwatan ang Mesiyas gipanagna nga magagikan (tan-awa sa Jeremias 23:5; Juan 7:42). Gidihogan ni Samuel si David nga hari didto sa Betlehem (tan-awa sa 1 Samuel 16:1–13). Gipanagna nga ang Mesiyas matawo didto (tan-awa sa Miqueas 5:2).
Balay abotanan
Ang Griyego nga pulong alang sa balay abotanan mahimong magpasabot sa bisan unsang temporaryo nga kapuy-an, lakip ang usa ka kwarto alang sa bisita. Si Maria “[g]ipahiluna [ang Batang Kristo] sa usa ka pasongan; kay wala na may luna alang kanila sa balay abotanan” (Lucas 2:7). (Ang Hubad ni Joseph Smith nag-ingon “mga balay nga abotanan.”) Ang “walay luna” mahimong magpasabot nga sila gibalibaran o nga walay dapit nga ilang gipuy-an nga adunay luna sa pagpanganak. Bisan unsa pa man, miadto sila sa usa ka dapit diin adunay pasongan.
Pasongan
Ang pasongan usa ka gipasaka nga kahon o lawoganan nga butanganan sa pagkaon sa mga hayop. Sa karaang Judea, kini kasagarang hinimo sa bato. Ang mga balay abotanan adunay hawanan nga anaay mga pasongan, ug daghang panimalay usab adunay mga pasongan diha sa dagko nga nag-unang lawak aron ang mga hayop mahipos didto sa tibuok gabii.
Mga Bakbak
Ang mga inahan nagbakos sa mga bag-ong nahimugso (giputos kini sa habol o panapton) sulod sa liboan ka tuig. Kini nagpakalma ug naghupay kanila human sa kakurat sa pagbiya sa sabakan. Ang panapton nga gigamit ni Maria lagmit adunay espesyal nga talagsaong marka sa pamilya.
Si Maria ug Jose
Maayo sila ug matarong nga mga tawo, ug silang duha mga kaliwat ni David. Ang matag usa gibisitahan sa usa ka anghel agig pagpangandam sa pagkatawo sa Manluluwas (tan-awa sa Mateo 1:18–25; Lucas 1:26–38). Mibiyahe sila og 100–140 km (60–90 milya) ngadto sa Betlehem. Si Maria mabdos atol sa biyahe.
Mga Magbalantay sa Karnero
Ang mga magbalantay nag-atiman sa ilang mga panon duol sa Betlehem. Sigon sa pipila ka eskolar, ang karnero lamang nga alang sa sakripisyo sa templo ang gitugotan nga buhion duol sa siyudad. Busa kini nga mga magbalantay lagmit nag-atiman sa mga karnero nga magrepresentar sa sakripisyo ni Jesukristo alang kanato (tan-awa sa Moises 5:6–7). Ilang gibiyaan ang ilang mga panon aron makita ang Mesiyas, kansang maulaong sakripisyo mowagtang sa sakripisyo sa mga mananap.
Ang Batang Kristo
Si Jesukristo mao ang sentro nga tawo sa talan-awon sa Pagkatawo ni Jesus [Nativity] —ug sa atong kinabuhi.