Pasko sa Panahon sa Tingpamulak
Usa niana ka tuig, ang among pamilya nakadiskobre nga ang Pasko sa Pagkatawo ug ang Pasko sa Pagkabanhaw labing masabtan nga magkauban.
Mga paghulagway pinaagi ni Simona Love
Ang labing nindot nga Pasko sa among pamilya wala mahitabo sa Adlaw sa Pasko. Nahitabo kini sa Pasko sa Pagkabanhaw.
Wala na kaayo mahunahunai ang Pasko tungod sa kabalaka alang sa among anak nga si Tanner, kinsa nanlimbasog sa ospital tungod sa usa ka makamatay nga sakit. Gihatagan siya og medikal nga pangkatulog [medically-induced coma] sulod sa 10 ka semana. Siya natulog ra gyod sa tibuok Pasko.
Mahimayaon kaayo, si Tanner hinayhinay nga naulian sa iyang kusog ug nakauli sa panimalay sa tingpamulak. Samtang nagkaduol ang Pasko sa Pagkabanhaw, naghisgot kami mahitungod sa Pasko nga wala makaapil si Tanner. Ang iyang mga igsoong babaye ug igsoong lalaki nakahukom nga angayan siya mobawi. Naghunahuna kami kon unsa ka makalingaw ang paghimo sa Pasko sa Pagkabanhaw nga usa ka doble nga kapistahan [holiday].
Aron makaandam alang sa among pagsaulog sa panahon sa tingpamulak nga Pasko, gikuha namo ang usa ka kahon sa mga suga sa Pasko, naghimo og gamay nga Christmas tree, ug mipalit ug namutos og gagmay nga mga regalo sa Pasko alang sa usag usa.
Sa gabii sa wala pa ang Pasko sa Pagkabanhaw, nga among “Bisperas sa Pasko,” kami nagsul-ob og daan nga mga bathrobe ug hinimo-himo nga igsusul-ob [costume] alang sa usa ka pamilya nga pasundayag sa Pagkatawo ni Jesus. Among gibasa gikan sa mga kasulatan ang mahitungod sa anghel nga nagpakita ngadto ni Maria ug Jose, ang ilang biyahe ngadto sa Betlehem, ug ang ilang pagpangita og kapuy-an apan wala makakita og lawak sa balay nga abotanan.
Among gibasa usab ang mahitungod sa mga magbalantay nga nag-atiman sa ilang mga panon sa kagabhion, ang anghel sa Ginoo nga nagpakita kanila, ug usa ka koro sa langitnong panon nga nag-awit, “Himaya ngadto sa Dios sa kalangitan, ug sa yuta panagdait sa mga tawo nga iyang gikahimut-an” (Lucas 2:14). Sa among pasundayag, ang mga magbalantay sa karnero mibisita sa kuwadra diin ang among mga anak nagsul-ob og sapot isip mga mananap sa uma (niana nga tuig, ang among kuwadra sa Pagkatawo ni Jesus naglakip usab og giraffe!).
Apan ang among pamilya nga pasundayag sa Pasko wala matapos didto. Tungod kay Pasko sa Pagkabanhaw, nagpadayon kami sa pagbasa mahitungod sa masuso nga Jesus mitubo sa kaalam, mibisita ug mitudlo sa mga eskolar sa templo, mihimo og mga milagro, nangalagad sa Iyang katawhan, ug nakigkita sa Iyang Apostoles sa taas nga lawak sa Jerusalem, diin Iyang gipaila ang sakramento.
Matinahoron namong gibasa ang asoy ni Jesus nga misulod sa Tanaman sa Getsemani aron sa pagsugod sa Iyang gamhanang buhat sa pag-ula—sa pag-antos, pagpaagas sa dugo, ug pagpakamatay alang kanato. Dayon among gibasa kon sa unsa nga paagi Siya nabanhaw sa ikatulo ka adlaw. Iyang gibuntog ang kamatayon—Iyang kaugalingong kamatayon ug ang atoa. Gipahinumdoman kami nga tungod Kaniya, posible ang tanan.
Sa buntag sa Pasko sa Pagkabanhaw, mibangon kami og sayo kaayo. Nalipay kami sa silaw sa hayag, mabulokon nga mga suga sa Pasko batok sa kangitngit sa wala pa ang kaadlawon. Kami mahinamon nga miabli sa among mga regalo ug mikaon sa among naandang pamahaw sa Pasko nga pan nga labnoton gamit ang kamot [pull-apart bread]. Samtang ang nagsubang nga adlaw nagpadan-ag sa kalibotan sa gawas, kami nangita og mga itlog sa Pasko sa Pagkabanhaw ug nagsaulog sa kaanindot sa Pagkabanhaw. Sa simbahan, miambit kami sa sakramento, nga nagdala sa katinuod sa Pag-ula sa Manluluwas ngadto sa dinhi ug sa karon.
Alang sa matag usa kanamo, kana nga “Paskong-Pasko sa Pagkabanhaw” nakapahimo kanamo nga mas klaro nga makita nga ang Pasko sa Pagkatawo ug Pasko sa Pagkabanhaw labing masabtan nga magkauban. Ang Pasko sa Pagkatawo tungod kay puno sa saad, ug ang Pasko sa Pagkabanhaw tungod kay nagpalanog kini sa mga saad nga natuman.
Malipayon namong gihinumdoman kini nga kasinatian tungod kay makauban na lang namo si Tanner sa usa pa ka Pasko sa dili pa matapos ang iyang mortal nga misyon. Karon, kami motan-aw sa unahan uban ang pagsalig nga ang among panagbulag ni Tanner sa makadiyot lamang tungod kay kita nagmaya sa Pasko nga “usa ka bata natawo” (Isaias 9:6), ug atong hinumdoman sa Pasko sa Pagkabanhaw—ug hinumdoman kanunay—nga “Siya nabanhaw” (tan-awa sa Mateo 28:6).