Serbisyo pinaagi sa Cell Phone
Mapasalamaton kaayo ko sa akong higala sa pagpadala niadto nga text, ug nalipay ko nga mituman sa pag-aghat nga magpadala og akong kaugalingon nga text.
Paghulagway pinaagi ni Michael Mullan
Usa ka tuig ang akong mama, akong igsoong babaye, ug ako miadto sa balay sa akong uyoan aron adto mag-Pasko ug Bag-ong Tuig. Sa adlaw sa wala pa kami mobiyahe, akong gi-delete ang tanan nako nga app sa social media tungod kay nakaapekto kaayo kini sa akong espirituwalidad. Nakahibalo ko nga ang pagpalayo sa social media alang sa kaayohan, apan gibati nako nga medyo nag-inusara ug nabiyaan. Sa pipila ka adlaw human ko mibiya sa panimalay, walay nangumusta nako, ug gibati nako nga wala gayod bisan og usa nga nagpakabana.
Sa Adlaw sa Bag-ong Tuig, gibati gihapon nako nga nag-inusara ug magul-anon. Apan nakadawat ko dayon og wala damha nga mensahe sa text gikan sa usa ka higala, nanghinaot kanako og malipayon nga Bag-ong Tuig. Dili kami ingon niana ka suod sa usag usa, apan ang iyang mensahe dako kaayo og kahulogan kanako—nagpasabot kini nga adunay usa ka tawo nga nagpakabana.
Dayon aduna akoy usa ka pag-aghat—nganong dili man magpadala og mga mensahe pinaagi sa text ngadto sa tanan nakong higala? Milihok dayon ko nga nanghinaot sa matag tawo og usa ka malipayon nga Bag-ong Tuig ug nagsulti nila unsa ko kamapasalamaton nila. Tingali ang uban nila nagkinahanglan usab og usa ka tawo nga mokontak nila. Sa kalit lang, mas sayon na alang nako nga makabantay sa musika nga gipatukar ug sa kalipay nga naa sa mga panagway sa akong mga ig-agaw. Gibati nako ang Espiritu, ug ang akong malipayon nga pagbati milungtad sa tibuok adlaw.
Mapasalamaton kaayo ko sa akong higala sa pagpadala niadto nga text, ug nalipay ko nga mituman sa pag-aghat nga magpadala og akong kaugalingon nga text. Niini nga kahimtang, nakatabang kini kanako nga mosuporta sa uban sa dihang akong gibati nga kinahanglan usab akong suportahan. Nakahibalo ko nga kini nga mga pulong ni Presidente M. Russell Ballard (1928–2023) tinuod: “Makakaplag kita og kalinaw, hingpit nga kalipay, ug kamaya sa atong kinabuhi kon nagserbisyo sa Ginoo ug sa atong mga silingan.”
Si Mosiah gikan sa Lagos, Nigeria. Sukad sa pagsulat niini nga istorya, siya nagsugod sa pagserbisyo sa Côte D’Ivoire Abidjan East Mission.