Mga Pangutana ug Mga Tubag
“Unsaon nako pagkahibalo kon unsay akong gibasa diha sa Basahon ni Mormon tinuod?”
“Importante kaayo nga inyong iampo ang mahitungod sa inyong gibasa. Sa dihang nakadawat ko og tubag gikan sa Langitnong Amahan, adunay makapakalma nga kalinaw nga dili nako ikalimod. Samtang kamo magbasa, ang inyong pagpamatuod molambo ug ang inyong abilidad sa pagsabot motubo.”
Lilia W., 13, Utah, USA
“Sa matag higayon nga ako magbasa sa Basahon ni Mormon, akong sulayan sa paglikay ang matag makabalda nga makapugong nako sa pagbati sa Espiritu. Ang Espiritu magpamatuod sa kamatuoran sa tanang butang, ug samtang mogahin ka og panahon sa pagpaminaw sa Iyang tingog, ikaw makahibalo nga ang imong gibasa diha sa Basahon ni Mormon tinuod.”
James Z., 15, Utah, USA
“Ako makahibalo nga ang Basahon ni Mormon tinuod tungod kay ang mga butang nga gitagna diha sa Basahon ni Mormon natuman sa atong panahon. Usab, sama ni Nephi, ako nag-ampo ug nangutana sa Dios kon kini tinuod ba.”
Azuonwu P., 16, Nigeria
“Ako kasamtangang nagkat-on og ikaduha nga pinulongan sa eskwelahan, ug ako bag-o lang nga nagsugod sa pagbasa sa Basahon ni Mormon niana usab nga pinulongan. Kon akong buhaton, kini nagtabang kanako nga makapamalandong sa mga pulong sa karaang mga propeta tungod kay kinahanglan ko nga mohinay ug maghunahuna gayod mahitungod sa unsay akong gibasa aron masabtan kini. Dayon ang Espiritu mas sayon nga makakompirmar nga ang akong gibasa tinuod.”
Amelia C., 15, Arizona, USA
“Ganahan ko sa pasiuna sa Basahon ni Mormon diin giingon nga, ‘Kami nagdapit sa tanan nga mga tawo sa tanan nga dapit sa pagbasa sa Basahon ni Mormon, sa pagpamalandong diha sa ilang mga kasingkasing sa mensahe nga gilakip niini, ug unya sa pagpangutana sa Dios, ang Amahan sa Kahangtoran, sa ngalan ni Kristo kon ang basahon tinuod ba. Kadtong kinsa mopadayon niini nga dalan ug mangutana diha sa hugot nga pagtuo makabaton og usa ka pagpamatuod sa kamatuoran ug kabalaan niini pinaagi sa gahom sa Espiritu Santo (tan-awa sa Moroni 10:3–5).’”
Obediah, 19, Nigeria
“Ang Basahon ni Mormon usa ka basahon nga gisulat pinaagi sa kamot sa Dios ug sa Iyang mga sumusunod. Ang Espiritu Santo moanha kanimo ug mohatag kanimo og pagbati nga ang imong gibasa tinuod. Bantayi kana nga pagbati pagkahuman gayod nimo og basa o samtang gibasa nimo ang Basahon ni Mormon. Usab, makaampo ka mahitungod niini!”
Colton N., 13, Utah, USA
“Kon ikaw magbasa, ayaw lang kini buhata aron matsekan lang kini sa listahan. Seguroha nga gibuhat nimo kini alang sa imong espirituhanong kaayohan. Kini makatabang nimo nga mas makapaminaw sa Espiritu. Makaampo ka usab aron makahibalo kon kini tinuod ba. ”
Jacob W., 15, Utah, USA
“Si Elder David A. Bednar nagtudlo nga kinahanglan gamiton nato ang mga kamatuoran nga atong nakat-onan gikan sa mga kasulatan diha sa atong kinabuhi. Mahimo nato kining buhaton alang sa mga kamatuoran nga gitudlo diha sa Basahon ni Mormon mahitungod sa pag-ampo aron makabaton og pagpamatuod sa basahon. Kon ang mga resulta maayo, nan kini nagagikan sa Dios. Ang Espiritu sa Ginoo kanunay nga mouyon sa kamatuoran.”
Joseph N., 17, Kolwezi, Democratic Republic of the Congo
“Mahimo nakong masayran nga ang Basahon ni Mormon tinuod pinaagi sa akong pagbati kon ako magbasa niini. Kini nagtabang nako nga magsugod og pag-ampo. Nagbuhat usab ako og journal sa kasulatan aron irekord ang akong mga hunahuna ug mga pagbati aron makabalik ko sa unsay akong nabasa.”
Anna K., 11, North Dakota, USA
“Sa matag higayon nga mobasa ka sa Basahon ni Mormon, pag-ampo sa Dios sa pagtabang nimo nga makahibalo kon ang imong gibasa tinuod ba. Pag-ampo usab nga Siya motabang nimo sa pagsabot. Kon imo kining buhaton nga madasigon ug uban sa hugot nga pagtuo, ikaw makadawat og impresyon nga ang imong gibasa tinuod, pinaagi sa tabang sa Espiritu Santo.”
Onyinyechi O., edad, lokasyon