Mga Tingog sa Kabatan-onan

Dili Siya Makalimot Kanato

Edson S., edad 16, Georgia, USA

Ganahan sa pagmartsa sa banda, pagdula og bisan unsang matang sa mga dula, ug paggahin og panahon uban sa iyang pamilya.

Lisod kaayo ang akong freshman nga tuig sa high school. Nag online school ko tungod sa COVID-19. Nianang tuiga, na-COVID ang akong papa ug namatay. Kinahanglan nakong atubangon ang maong kapildihan sa tibuok tuig. Eksaktong usa ka tuig ang milabay, ang akong lolo namatay. Sa tuig sa akong pagka-junior, ang akong lola namatay. Naa ko sa kwarto uban niya dihang namatay siya.

Kanunay kong gibati ang kahaw-ang tungod niining mga butanga nga nahitabo sa akong kinabuhi. Gibati nako nga tingali nakahimo ko og usa ka butang nga sayop o nagbayad sa akong mga sayop o usa ka butang. Nianang panahona, wala usab ako nagbuhat sa labing maayo nga mga butang. Wala nako tugoti ang kahayag ni Kristo nga modan-ag kanako.

Usa niana ka adlaw, samtang nagbasa sa mga pulong sa himno nga “Ako Nagpabilin nga Natingala” (Himno, nu. 114), ang linya nga “Gugmag kalooy dili ko kalimtan kana?” mitandog kanako. Sa akong pagbasa niana, gibati nako nga nahulipan ang akong kahaw-ang. Ang mga pulong nga “di ko kalimtan” nakapahunong nako ug naghunahuna. Sa tibuok nakong kinabuhi, sa tanang butang nga akong giantos ug nasinati, gusto nakong kalimtan. Gusto kong mangita og mas sayon​ nga paagi, maglingaw-lingaw, ug mobuhat og mga butang nga dili husto, samtang wala magsalig ni Jesukristo.

Bisan og anaa ko sa ngitngit nga dapit ug naningkamot nga mahisalaag, si Jesukristo wala motugot kanako nga makalimot sa Iyang kaluoy ug gugma. Sa dihang naguol ko, wala Siya makalimot kanako. Busa, kon dili ko Niya kalimtan, dili ko Siya angayng kalimtan.

Ako nagtuo nga bisan pa kon kamo anaa sa usa ka mangitngit nga dapit ug kamo naghunahuna nga ang Dios dili mohatag kaninyo og ikaduhang higayon, Siya mohatag. Siya nahigugma kaninyo ug moatiman kaninyo.