Si Jesukristo Mao ang Inyong Kalig-on
Ginoo, Ubani Ako
Si Floyd nakat-on kon sa unsang paagi nga ang gasa sa pagpasaylo makaayo ug makalig-on kanato.
A Father’s Care [Pag-amuma sa usa ka Amahan], ni Kelsy ug Jesse Lightweave
Si Floyd, usa ka batan-ong lalaki nga nagpuyo sa Uganda, ganahan nga mag-break dance, mopalambo sa iyang mga talento, ug moserbisyo sa Dios. Sa edad nga 13, si Floyd nag-atubang og mga tentasyon kabahin sa Pulong sa Kaalam. Ang pag-inom og kape ug tsa normal lang sa iyang baryo, ug si Floyd usahay moapil sa iyang mga higala.
Human makig-istorya sa iyang mga ginikanan ug magbasa sa unsay gitudlo sa mga kasulatan mahitungod sa kahimsog, siya midesisyon sa pagsunod sa Pulong sa Kaalam. Sa tinguha nga mag-usab, si Floyd nag-ampo sa Langitnong Amahan alang sa kapasayloan. Ang pagbuntog sa dili maayo nga kinaiya nagkinahanglan og “oras ug paningkamot,” siya miingon.
Si Floyd nakakita og paglaom pinaagi sa mga pulong sa iyang paboritong himno, “Ubani Ako!” (Mga Himno, nu. 97). “Kini usa ka himno nga magpalig-on sa atong mga kalag,” siya miingon.
Sama ni Floyd, kita makakaplag og kalig-on diha ni Jesukristo. Kon si Kristo “mouban” kanato, Siya magpabilin uban kanato, mohupay kanato, ug mohatag kanato og paglaom! Usa ka paagi nga kita makadapit kang Kristo sa pag-uban kanato mao ang paghinulsol sa atong mga sala ug pagpangayo og pasaylo sa Dios.
Kita nakakat-on nga “ingon sa kanunay” nga kita maghinulsol ug mangayo og kapasayloan, uban sa tinuod nga katuyoan, kita pasayloon (Moroni 6:8). Kon kita madagma, mahimo kitang mobangon ug mosulay, mosulay, og usab! Walay hunongay!
Si Floyd nakasinati sa mga panalangin sa paghinulsol ug pagpasaylo sa iyang kinabuhi. Siya nakakaplag og kalig-on pinaagi ni Jesukristo. “Nakahibalo ko nga Siya anaa kanunay alang kanato sa atong mga hagit,” siya miingon.
Ang gasa sa pagpasaylo makaayo ug makalig-on kanato. Pulihan ni Jesukristo ang atong sala ug kasakit og kalinaw ug kamaya! Sa sunod higayon nga kamo mangayo sa Ginoo og kapasayloan, hinumdomi nga Siya hingpit nga nakasabot kaninyo, ug Siya kanunay nga anaa alang kaninyo.