Dali, Sunod Kanako
Ang Kataposang Mensahe ni Moroni alang Kaninyo
Nagtuo si Moroni nga nahuman na niya ang iyang talaan. Pagmalipayon nga misulat pa siya og gamay.
Lisod ang paghunahuna sa mga butang nga nagkaanam og kagrabe sa kataposan sa Basahon ni Mormon. Si Moroni, ang kataposang propeta nga Nephita, nakasaksi sa hingpit nga kalaglagan sa iyang katawhan—iyang tibuok pamilya, tanan niyang higala, tanang tawo.
Karon nagbalhin-balhin siya aron dili madakpan sa mga Lamanita.
Ang mga Lamanita misaad nga patyon si bisan kinsa nga dili molimod ni Jesukristo, mao nga si Moroni kinahanglan maglatagaw nga mag-inusara “alang sa kaluwasan sa [iyang] kaugalingon nga kinabuhi” (Moroni 1:3).
Pagkamakahahadlok! Giunsa man ni Moroni sa pagsulbad niini?
Siya maisogon nga mipahayag, “Ako, si Moroni, dili makalimod kang Kristo” (Moroni 1:3). Nakahibalo siya nga bisan unsa pa man ang mahitabo, ang iyang hugot nga pagtuo ni Jesukristo makapalahutay kaniya. Mao usab kamo. Mao kini ang kataposang mensahe ni Moroni nga iyang gibilin alang kaninyo.
Hinumdomi Unsa ang Labing Mahinungdanon
Nag-inusara ug nagtago-tago, si Moroni mihuman sa talaan sa iyang amahan, si Mormon, kinsa napatay sa gubat. Human gidugang ang Basahon ni Ether ug pipila ka kaugalingon niyang mga pulong, (tan-awa sa Mormon 8–9), si Moroni nagtuo nga nahuman na siya—hangtod nga siya mibati nga giaghat sa “[pag]sulat og dugang pa nga mga butang” nga iyang gilaoman nga “mahimo nga bililhon … sa uban nga umaabot nga adlaw,” (Moroni 1:4). Kana nga adlaw mao ang atong adlaw, nga nakita ni Moroni (tan-awa sa Mormon 8:35). Unsa ang gikonsiderar ni Moroni nga mahimo “nga bililhon” kanato?
Si Moroni mipakigbahin og mahinungdanon nga mga kamatuoran sa ebanghelyo (tan-awa sa Moroni 2–6) ug nagpamatuod kang Jesukristo. Bisan sa samok nga mga higayon, si Moroni nakahinumdom kon unsa ang labing mahinungdanon. Sama ni Moroni, kamo makakita og kalig-on pinaagi sa paghinumdom kon unsa ang labing mahinungdanon—ang inyong relasyon sa Langitnong Amahan, ni Jesukristo, ug sa inyong pamilya ug mga higala; magpuyo sa ebanghelyo; ug mopakigbahin sa unsay inyong nahibaloan nga tinuod.
Pagkakita og Paglaom diha sa Tiunay nga Gugma ni Kristo
Giapil usab ni Moroni ang mga pulong sa iyang amahan (tan-awa usab sa Moroni 7–9). Si Mormon nagtudlo nga ang hugot nga pagtuo ni Jesukristo mosangpot sa “paglaom pinaagi sa pag-ula ni Kristo ug sa gahom sa iyang pagkabanhaw” (Moroni 7:41). Ang hugot nga pagtuo ug paglaom mosangpot sa gugmang putli, nga mao ang “tiunay nga gugma ni Kristo” (Moroni 7:47).
Si Jesukristo nabuhi alang kanato, Siya nag-antos, nagpaagas sa dugo, ug namatay alang kanato, tungod kay Siya nahigugma kanato. Kita makaampo “sa tibuok kusog sa kasingkasing” nga mapuno sa Iyang gugma, nga mao ang gugmang putli (Moroni 7:48; tan-awa sa Ether 12:33–34). Pinaagi lamang sa Manluluwas nga “kita mahimo nga makabaton niini nga paglaom” (Moroni 7:48). Si Mormon ug si Moroni nakahibalo niini sa tibuok nilang kasingkasing. Ang walay pagkapakyas nga gugma sa Manluluwas maghatag kanato sa matag katarongan nga molaom.
Motan-aw sa Umaabot nga adunay Hugot nga Pagtuo
Sa dako nga risgo, gitiwas ni Moroni ang talaan ug gilubong duol sa tumoy sa usa ka bungtod. Gatosan ka tuig human niana, si Joseph Smith mihubad sa talaan ug gimantala kini ngadto sa kalibotan isip ang Basahon ni Mormon: Lain nga Tugon ni Jesukristo.
Sa iyang kataposan nga mensahe, si Moroni mipakigbahin kon unsaon nato pagkahibalo nga ang Basahon ni Mormon tinuod (tan-awa sa Moroni 10:4–5). Siya usab nagdapit kanato sa “[pag]duol ngadto kang Kristo” (Moroni 10:32). Kon kita modawat sa pagdapit ni Moroni, kita makatan-aw sa umaabot uban sa hugot nga pagtuo bisan kon gibuhat na nato ang atong labing maayo ug ang mga butang sa gihapon wala mahitabo sumala sa atong gilaoman.
Si Moroni mas nakahibalo niini kay sa kadaghanan. Ang iyang hugot nga pagtuo mitugot niya nga makaamgo niini nga saad gikan ni Jesukristo: “Kon kamo adunay hugot nga pagtuo kamo makahimo sa tanan nga mga butang nga maayo ngari kanako” (Moroni 10:23). Ang kataposan nga mensahe ni Moroni nagpamatuod nga kini nga saad alang kaninyo, usab.
Si Jesukristo mao ang inyong Manluluwas ug Manunubos—sa maayo nga mga higayon o samok nga mga higayon, karon mismo ug kanunay.
Jesus Stood in the Midst [Si Jesukristo Mibarog sa Tunga], ni Casey Childs