« តើបងប្អូននឹងរៀបចំខ្លួនសម្រាប់សន្និសីទទូទៅដោយរបៀបណា » ដើម្បីកម្លាំងនៃយុវជន ខែ កញ្ញា ឆ្នាំ ២០២៣ ។
ការរៀបចំខ្លួនសម្រាប់ សន្និសីទទូទៅ
តើបងប្អូននឹងរៀបខ្លួនសម្រាប់ សន្និសីទទូទៅ ដោយរបៀបណា
យុវវ័យទាំងនេះបានរៀនច្រើនពីសន្និសីទទូទៅ ។ តើបងប្អូនអាចរៀបចំខ្លួនដើម្បីមានបទពិសោធន៍ដ៏មានអត្ថន័យនេះយ៉ាងដូចម្ដេច ?
ខ្ញុំចង់ធ្វើតាមព្យាការី
ខ្ញុំបានរៀបចំខ្លួនឯងសម្រាប់សន្និសីទទូទៅនៅ ខែ តុលា ឆ្នាំ ២០២២ ដោយការអានអំពីដង្វាយធួនរបស់ព្រះយេស៊ូវគ្រីស្ទនៅក្នុងព្រះគម្ពីរមរមន និងនៅក្នុងព្រះគម្ពីរសញ្ញាចាស់ ។
នៅក្នុងអំឡុងពេលសន្និសីទប្រធាន រ័សុល អិម ណិលសុន បានមានប្រសាសន៍មកកាន់យើង និងបានធ្វើទីបន្ទាល់អំពីសារៈសំខាន់នៃព្រះវិហារបរិសុទ្ធ ។១ នៅក្នុងព្រះវិហារបរិសុទ្ធ ពរជ័យដ៏អស់កល្បជានិច្ចត្រូវបានសន្យា ហើយបងប្អូនទទួលបានអារម្មណ៍នៃវិញ្ញាណដ៏ស្រស់ស្អាតនៅពេលបងប្អូនទៅទីនោះ ។
មិនទាន់មានព្រះវិហារបរិសុទ្ធនៅក្នុងប្រទេស នីការ៉ាហ្គា នៅឡើយទេ ប៉ុន្តែមានព្រះវិហារបរិសុទ្ធមួយត្រូវបានប្រកាសហើយ ។ ខ្ញុំសង្ឃឹមថាខ្ញុំអាចស្តាប់ពាក្យសម្តីរបស់ប្រធាន ណែលសុន ហើយទៅព្រះវិហារបរិសុទ្ធនៅពេលដែលសាងសង់ហើយ ។
នៅពេលខ្ញុំមើលសន្និសីទ ខ្ញុំមានអារម្មណ៍ថាព្រះវិញ្ញាណបានថ្លែងទីបន្ទាល់ថាខ្ញុំស្ថិតនៅកន្លែងដែលត្រឹមត្រូវហើយ ។ ខ្ញុំមានអារម្មណ៍ថាចិត្តរបស់ខ្ញុំពោរពេញទៅដោយសេចក្ដីស្រឡាញ់របស់ព្រះ ។
កាឡូស អិម នីការ៉ាហ្គា
ការព្យាបាលគឺមានសម្រាប់មនុស្សទាំងអស់
មុនសន្និសីទទូទៅនៅ ខែ តុលា ឆ្នាំ ២០២២ ខ្ញុំបានសញ្ជឹងគិតពីរឿងដែលបានកើតឡើងនៅក្នុងជីវិតរបស់ខ្ញុំកាលពីពេលថ្មីៗនេះ ។ មានរឿងជាច្រើនបានធ្វើឲ្យខ្ញុំមានកង្វល់ក្នុងចិត្តមុនពេលសន្និសិទ ហើយខ្ញុំចង់មានអារម្មណ៍ធូរស្រាល សេចក្តីសុខសាន្ត និងភាពរឹងមាំ ។
ក្នុងអំឡុងពេលសន្និសីទ អែលឌើរ ឃ្វីនថិន អិល ឃុក នៃពួកសាវកទាំងដប់ពីរនាក់បានមានប្រសាសន៍ថា « ដោយសារតែដង្វាយធួនរបស់ព្រះអង្គសង្គ្រោះ នោះការព្យាបាលគឺមានសម្រាប់មនុស្សទាំងអស់ » ។២
ពាក្យទាំងនោះបានផ្ដល់ឲ្យខ្ញុំនូវសេចក្ដីសុខសាន្ត និងសេចក្ដីសង្ឃឹម ។ នៅពេលខ្ញុំធ្វើខុស និងជ្រើសរើសខុស ខ្ញុំអាចទទួលបានការអភ័យទោស និងមានអារម្មណ៍សុខសាន្តតាមរយៈដង្វាយធួនរបស់ព្រះយេស៊ូវគ្រីស្ទ ។ ហើយទោះជាខ្ញុំមានអារម្មណ៍ឈឺចាប់អ្វីក៏ដោយ ក៏ខ្ញុំអាចជាសះស្បើយបានដែរ ។ យើងទាំងអស់គ្នាអាចមានអារម្មណ៍នៃសេចក្ដីសុខសាន្ត និងការព្យាបាលដូចគ្នានៅពេលយើងប្រែចិត្តពីអំពើបាបរបស់យើង ហើយខិតខំដើម្បីឲ្យកាន់តែប្រសើរឡើងជារៀងរាល់ថ្ងៃ ។
ខេ ឌី ប្រទេស ហ្វីលីពីន
ការរៀបចំសម្រាប់សន្និសីទរបស់បងប្អូន
ចំណាយពេលតែមួយនាទីដើម្បីត្រៀមខ្លួនសម្រាប់សន្និសីទ ហើយបងប្អូននឹងមានបទពិសោធន៍ដ៏ល្អប្រសើរមួយ ។ ដូច្នេះតើបងប្អូនអាចរៀបចំបានដោយរបៀបណា ? ចាប់ផ្តើមដោយការសរសេរសំណួររបស់បងប្អូន ! សូមពិចារណាសំណួររបស់បងប្អូនខណៈពេលដែលបងប្អូនមើលសន្និសីទ ហើយបងប្អូននឹងមានការភ្ញាក់ផ្អើលថាជារឿយៗ អ្នកថ្លែងសុន្ទរកថាហាក់ដូចជាកំពុងនិយាយមកកាន់បងប្អូនដោយផ្ទាល់អ៊ីចឹង ។