« នៅពេលមនុស្សជាទីស្រឡាញ់មានបញ្ហាសុខភាពផ្លូវចិត្ត » ដើម្បីកម្លាំងនៃយុវជន ខែ កញ្ញា ឆ្នាំ ២០២៣ ។
ជំនួយ ជីវិត
នៅពេលមនុស្សជាទីស្រឡាញ់មានបញ្ហាសុខភាពផ្លូវចិត្ត
ទាំងនេះជាយោបល់ចំនួនប្រាំដែលត្រូវចាំនៅពេលដែលប្អូនចង់ជួយមនុស្សណាម្នាក់ដែលកំពុងមានបញ្ហាធ្លាក់ទឹកចិត្ត ថប់បារម្ភ ឬបញ្ហាផ្លូវចិត្តផ្សេងៗទៀត ។
រចនារូបភាពដោយ ថូប៊ី ញ៉ូវសាំ
វាអាចពិបាកពេលមើលឃើញមិត្តភក្តិ ឬសមាជិកគ្រួសារមានជំងឺធ្លាក់ទឹកចិត្ដ ការថប់បារម្ភ ឬបញ្ហាសុខភាពផ្លូវចិត្តផ្សេងៗទៀត ។ ប្អូនប្រហែលជាចង់ធ្វើអ្វីមួយដើម្បីជួយ ប៉ុន្តែមិនដឹងធ្វើអ្វី ។
ទាំងនេះជាយោបល់មួយចំនួនដែលត្រូវចាំទុកក្នុងចិត្តនៅពេលដែលប្អូនពិចារណាពីរបៀបដើម្បីជួយនរណាម្នាក់ដែលកំពុងមានបញ្ហាសុខភាពផ្លូវចិត្តរបស់ពួកគេ ៖
១.សូមឈោងទៅជួយ ។
ប្រសិនបើប្អូនកំពុងឆ្ងល់ថាតើវាល្អបំផុតដើម្បីឈោងទៅជួយ ឬនៅឲ្យឆ្ងាយ ចម្លើយគឺ ៖ ពិតណាស់ ឈោងទៅជួយ ។ ទំនាក់ទំនងជិតស្និទ្ធពិតជាជួយមនុស្សដែលកំពុងមានបញ្ហាសុខភាពផ្លូវចិត្តបាន ។ សូមមានទំនាក់ទំនងជាមួយពួកគេ ។ សូមចូលរួមជាមួយពួកគេ ។ វាអាចជាអ្វីដែលសាមញ្ញនិងធម្មតា ប៉ុន្តែសូមឈោងទៅជួយ ។
២.ចូរកុំផ្តល់ដំបូន្មាន លើកលែងតែគេសុំប្អូន ។
ប្រសិនបើនរណាម្នាក់មិនបានសុំជំនួយពីប្អូន សូមកុំចាប់ផ្តើមផ្តល់ដំបូន្មានឲ្យពួកគេឡើយ ។ លុះត្រាតែគេសុំប្អូន សូមផ្តោតទៅលើតែរឿងមិត្តភាព ការយកចិត្តទុកដាក់ និងការព្រួយបារម្ភដោយចិត្តសោ្មះសរ ។
៣.សូមទន់ភ្លន់ វិជ្ជមាន និងមានចិត្តអាណិតអាសូរ ។
នៅពេលមនុស្សម្នាក់សុំជំនួយរបស់ប្អូន សូមធ្វើតាមគំរូរបស់ព្រះអង្គសង្គ្រោះ ។ សូមអធិស្ឋានទៅព្រះវរបិតាសួគ៍សម្រាប់ការបំផុសគំនិត ។ សូមនិយាយលើកទឹកចិត្ត ។ សូមនិយាយជាមួយពួកគេដោយទន់ភ្លន់ ។ សូមនិយាយរឿងដែលវិជ្ជមាន ។ សូមបង្ហាញការយល់ដឹង និងសេចក្តីអាណិតអាសូរ ។ សូមប្រាប់ពួកគេថាប្អូនគាំទ្រពួកគេ ហើយនៅទីនោះសម្រាប់ពួកគេផងដែរ ។ សូមលើកទឹកចិត្តពួកគេដោយទន់ភ្លន់ឲ្យស្វែងរកជំនួយវិជ្ជាជីវៈ ។
៤.អត់ធ្មត់ និងតស៊ូ ។
មនុស្សដែលកំពុងជួបការលំបាក ពេលខ្លះសំបកក្រៅហាក់ដូចជាមិនឆ្លើយតប ឬមានអំណរគុណនោះទេ ។ ប៉ុន្តែសូមមានចិត្តអត់ធ្មត់ ។ សូមនៅជាប់ជាមួយពួកគេ ។ ការនៅដាច់ដោយឡែកតែឯងគឺមិនល្អសម្រាប់ពួកគេនោះទេ ។ សូមកុំដកខ្លួនចេញទាំងស្រុង ប្រសិនបើពួកគេមិនឆ្លើយតបមកវីញតាមរបៀបដែលប្អូនចង់បាន ។
៥.សូមយកចិត្តទុកដាក់លើខ្លួនឯងផងដែរ ។
សូមប្រាកដថាប្អូនកំពុងស្វែងរកអំណរនៅក្នុងជីវិតរបស់ប្អូន ។ សូមបន្តការអធិស្ឋាន និងការសិក្សាព្រះគម្ពីរផ្ទាល់ខ្លួនរបស់ប្អូន ។ សូមទៅព្រះវិហារបរិសុទ្ធ ។ សូមធ្វើរឿងមួយចំនួនទៀតដែលប្អូនចូលចិត្ត ។ សូមកុំឲ្យភាពតានតឹង ឬការព្រួយបារម្ភពីស្ថានភាពមនុស្សជាទីស្រឡាញ់របស់ប្អូនគ្របដណ្ដប់លើជីវិតរបស់ប្អូនឡើយ ។ សូមឈោងទៅជួយអ្នកដទៃសម្រាប់ការគាំទ្រ ប្រសិនបើប្អូនត្រូវការវា ។