« ពួកស្ងួនភ្ងានៃព្រះ » ដើម្បីកម្លាំងនៃយុវជន ខែ កញ្ញា ឆ្នាំ ២០២៣ ។
ចូរមកតាមខ្ញុំ
ពួកស្ងួនភ្ងា នៃ ព្រះ
នៅក្នុងផែនការនៃសុភមង្គលរបស់ព្រះ យុវនារី និងយុវជនមានគោលបំណងដ៏ទេវភាពគ្រប់ៗគ្នា អ្នកទាំងអស់គ្នាគឺជាពួកស្ងួនភ្ងា និងត្រូវការជាចាំបាច់ ។
សូមស្រមៃមើលថា តើតន្ត្រីនឹងមានលក្ខណៈបែបណា ប្រសិនបើ ឧបករណ៍ភ្លេងទាំងអស់មានសំឡេងដូចគ្នានោះ ។ ចុះបើខ្ទង់ភ្លេងនៅលើព្យាណូលេងចេញណោតភ្លេងដូចគ្នា ឬប្រសិនបើសំឡេងទាំងអស់នៅក្នុងក្រុមចម្រៀងដូចគ្នាវិញ ? នេះនឹងធ្វើឲ្យតន្ត្រីគួរឲ្យធុញទ្រាន់ ខ្លាំងណាស់ !
ឧបករណ៍តន្រ្តីនានា និងសំឡេងក្រុមចម្រៀងមានសម្លេង និងសូរខុសៗគ្នាយ៉ាងរីករាយ ។ ខ្ទង់ទាំងអស់នៅលើព្យាណូផ្ដល់នូវបទភ្លេងជាច្រើន ហើយក្រុមចម្រៀងផ្ដល់នូវភាពពិរោះដ៏សម្បូរបែប ។ ត្រែបារំាង ត្រែធូបា វីយ៉ូឡុង និងស្គរនីមួយៗបន្ថែមសំឡេងពិរោះពិសេសទៅឲ្យក្រុមតន្ត្រី ។
កម្លាំង និងអំណោយទាន
ដូចជាមួយតន្ត្រីដែរ ព្រះវរបិតាសួគ៌មានសេចក្តីរីករាយចំពោះទេពកោសល្យ ចរិតលក្ខណៈ និងបទពិសោធន៍ផ្សេងៗរបស់បុត្រាបុត្រីរបស់ទ្រង់ ម្នាក់ៗគឺជាបុត្រា ឬបុត្រីជាទីស្រឡាញ់ ។ មិនថាអ្នកមានកាលៈទេសៈបែបណា ទោះនៅទីកន្លែងណាដែលអ្នករស់នៅទោះក្នុងចំណោមជាតិសាសន៍ទាំងឡាយណាក៏ដោយ ព្រះវរបិតាសួគ៌អបអរសាទរនូវសក្ដានុពលដ៏និរន្តរ៍របស់អ្នក ដែលអ្នកអាចក្លាយទៅជាតាមរយៈការគោរពប្រតិបត្តិ ព្រះគុណ និងសេចក្ដីស្រឡាញ់ ។
ដោយសេចក្ដីស្រឡាញ់ដ៏អស្ចារ្យ ទ្រង់អញ្ជើញក្មួយឲ្យស្វែងរកអត្តសញ្ញាណដ៏ទេវភាពរបស់ក្មួយ ហើយបំពេញនូវគោលបំណងដ៏ទេវភាពរបស់ក្មួយ ។ ទ្រង់លើកទឹកចិត្តក្មួយឲ្យអភិវឌ្ឍអំណោយទានខាងវិញ្ញាណរបស់ក្មួយ ចរិតលក្ខណៈជាព្រះ និងលទ្ធភាពដ៏ធំធេងនានា ។ ហើយទ្រង់ប្រទានឱកាសជារៀងរាល់ថ្ងៃដល់ក្មួយដើម្បីរៀនមើល និង បម្រើអ្នកដែលនៅជុំវិញខ្លួនរបស់ក្មួយ ដូចដែលព្រះយេស៊ូវគ្រីស្ទធ្វើដែរ ។
នៅក្នុងផែនការដ៏ទេវភាពរបស់ព្រះ យើងមកលើផែនដីនេះតាមរយៈម្តាយ និងឪពុក ។ ក្រុមគ្រួសារត្រូវការលោកទាំងពីរនាក់នោះ ។ ទាំងពីរនាក់ គឺជាដៃគូស្មើភាពគ្នា ឪពុកម្ដាយចិញ្ចឹមបីបាច់ និងផ្គត់ផ្គង់ដល់ក្រុមគ្រួសាររបស់ពួកគេ ។ នៅក្នុងផ្ទះរបស់យើង ឪពុក និងស្វាមី គឺត្រូវធ្វើជាអធិបតីដោយភាពសុភាពរាបសា ភាពស្លូតបូត និង សេចក្ដីស្រឡាញ់ដោយស្មោះ—គុណសម្បត្តិសុចរិតដែលបុរស និងស្ត្រី ត្រូវការនៅក្នុងទំនាក់ទំនងទាំងអស់របស់យើង ។ នៅក្នុងទំនាក់ទំនងណាមួយក៏ដោយ ឋានសួគ៌យំសោកនៅពេលណាដែលមានការរំលោភបំពាន មានការគៀបសង្កត់ ឬការបង្ខិតបង្ខំគ្រប់ប្រភេទដែលប្រព្រត្តិដោយបុរស ឬស្ត្រី ។ ការបញ្ចុះបញ្ចូល ការអត់ធន់ សប្បុរសធម៌ និងចំណេះដឹងដ៏បរិសុទ្ធគឺជាគុណសម្បត្តិរបស់ព្រះគ្រីស្ទដែលយើងម្នាក់ៗស្វែងរក ។
ពិតណាស់ គ្មាននរណាម្នាក់ល្អឥតខ្ចោះទេ—ក៏គ្មានគ្រួសារណាមួយល្អឥតខ្ចោះដែរ ។ មិនថាអ្នកមានកាលៈទេសៈបែបណានោះទេ សូមគោរពឪពុកម្ដាយ និងស្រឡាញ់គ្រួសាររបស់ក្មួយ—គ្រួសារដែលក្មួយមាន និងគ្រួសារដែលក្មួយនឹងមាននៅថ្ងៃណាមួយ ។ ព្រះអង្គសង្រ្គោះរបស់យើងអាចជួយក្មួយឲ្យយល់, អភ័យទោស, និងលើកទឹកចិត្តដល់អ្នកដែលនៅជុំវិញក្មួយ ។ ពេលក្មួយធ្វើឲ្យអស់ពីសមត្តភាព នោះព្រះអម្ចាស់នឹងជួយ និងដឹកនាំក្មួយ ។ សូមចងចាំពីជំហររបស់ក្មួយនៅចំពោះមុខព្រះអម្ចាស់ និងនៅក្នុងសាសនាចក្ររបស់ទ្រង់គឺត្រូវបានកំណត់ដោយចរិកលក្ខណៈ និងសេចក្ដីសុចរិតផ្ទាល់ខ្លួនរបស់ក្មួយក្នុងការរក្សាសេចក្ដីសញ្ញារបស់ក្មួយជាមួយនឹងព្រះ ។
បព្វជិតភាព និងផែនការរបស់ព្រះ
ព្រះជាព្រះវរបិតាសួគ៌ស្រឡាញ់យើងខ្លាំង ហើយស្គាល់យើងច្បាស់ជាងយើងស្រឡាញ់ ឬស្គាល់ខ្លួនឯងទៅទៀត ។ សិទ្ធិអំណាចបព្វជិតភាពរបស់ទ្រង់ត្រូវបានប្រទានឲ្យដើម្បីផ្ដល់ពរជ័យដល់បុត្រាបុត្រីទាំងអស់របស់ទ្រង់ ។ បងប្អូនប្រុសដែលមានភាពសក្តិសមកាន់បព្វជិតភាព ប៉ុន្តែពួកគេ មិនមែន ជាបព្វជិតភាពទេ ។ ប្រធាន រ័សុល អិម ណិលសុន បង្រៀនថាបព្វជិតភាព « គឺទាក់ទងនឹងបងប្អូនក្នុងនាមជា [ ស្ត្រី ] ក៏ដូចជាចំពោះបុរសណាមួយផងដែរ » ។ បព្វជិតភាពផ្តល់ឲ្យបុរស និងស្ត្រី « សិទ្ធិទទួលបាន … ទ្រព្យខាងវិញ្ញាណទាំងអស់ដែលព្រះអម្ចាស់មានគឺសម្រាប់បុត្រាបុត្រីរបស់ទ្រង់ » ។១
ការបម្រើរួមគ្នា
នៅក្នុងសាសនាចក្ររបស់ព្រះអម្ចាស់ យើងប្រឹក្សាគ្នានៅក្នុងក្រុមប្រឹក្សានៅពេលយើងបម្រើរួមគ្នា ។ នៅក្នុងក្រុមប្រឹក្សារបស់យើង ថ្នាក់ដឹកនាំស្វែងរកការយល់ដឹង និង គំនិតផ្សេងៗពីមនុស្សទាំងអស់ រួមទាំងយុវជន និងយុវនារីផងដែរ ។ នៅក្នុងករណីនីមួយៗ យើងឈានទៅដល់ការសម្រេចចិត្តកាន់តែល្អប្រសើរ និងទទួលបានជោគជ័យកាន់តែច្រើននៅក្នុងការបម្រើរបស់ព្រះអម្ចាស់នៅពេលយើងឲ្យតម្លៃដល់ការរួមចំណែករបស់គ្នាទៅវិញទៅមក ហើយធ្វើការជាមួយគ្នា ជាបងប្អូនប្រុសស្រីនៅក្នុងកិច្ចការរបស់ទ្រង់ ។
នៅក្នុងវួដ និងសាខារបស់យើង យុវនារី និងយុវជនដឹកនាំថ្នាក់រៀន និងកូរ៉ុម ។ នៅក្នុងក្រុមប្រឹក្សាយុវវ័យក្នុងវួដ ថ្នាក់ដឹកនាំយុវវ័យរបស់យើងរួមគ្នាជួយយុវវ័យម្នាក់ៗឲ្យតភ្ជាប់ជាមួយនឹងស្ថានសួគ៌ ថ្នាក់ដឹកនាំ សាសនាចក្ររបស់យើង និងយុវវ័យដទៃទៀត ។ ក្នុងនាមជាដៃគូរអ្នកផ្ដល់ការបម្រើដល់មនុស្សពេញវ័យ យុវជន និងយុវនារី របស់យើងបានជួយ និងប្រទានពរដល់មនុស្សជាច្រើន ។ នៅក្នុងការបម្រើរបស់យើង យើងទាំងអស់គ្នារួបរួមគ្នា ។
ពិតជាពរជ័យដ៏ល្អមួយដែលយុវជន និងយុវនារី ធ្វើជាសាក្សីឲ្យពិធីបរិសុទ្ធនៃដំណឹងល្អដែលបានស្តារឡើងវិញ ។ ក្មួយគឺជាសាក្សីឲ្យពិធីបុណ្យជ្រមុជទឹក ទាំងពិធីបុណ្យជ្រមុជទឹកឲ្យអ្នកនៅរស់ និងពិធីបុណ្យជ្រមុជទឹកឲ្យបុព្វការីជននៅក្នុងព្រះវិហារបរិសុទ្ធ ។ ក្មួយក៏បម្រើនៅកន្លែងផ្សេងៗទៀតនៅក្នុងព្រះដំណាក់របស់ព្រះអម្ចាស់ផងដែរ ។
ពរជ័យនៃសេចក្ដីសញ្ញាជាមួយនឹងព្រះ
បុគ្គលម្នាក់ៗ យុវនារី និងយុវជនម្នាក់ៗ ចុះសេចក្ដីសញ្ញាពិសិដ្ឋជាមួយនឹងព្រះ ។ នៅពេលយើងគោរពតាមដោយសោ្មះស្ម័គ្រ នោះសេចក្តីសញារបស់យើងជាមួយនឹងព្រះនឹងនាំមកនូវពរជ័យទាំងឡាយរបស់ទ្រង់—ច្រើនជាងអ្វីដែលយើងអាចស្រមៃដល់ទៅទៀត ។ សេចក្ដីសញ្ញារបស់យើងជាមួយនឹងព្រះអាចញែកការប៉ងប្រាថ្នា និងសកម្មភាពរបស់យើងចេញជាបរិសុទ្ធបាន ។ សេចក្ដីសញ្ញា និងសេចក្ដីស្រឡាញ់របស់យើងចំពោះព្រះគ្រីស្ទអាចជួយយើងឲ្យក្លាយទៅជាកូនរបស់ព្រះ—រាបសា អត់ឱន ពោរពេញទៅដោយសេចក្ដីស្រឡាញ់ ( សូមមើល ម៉ូសាយ ៣:១៩ ) ។ នៅក្នុងគ្រប់អ្វីៗដែលយើងធ្វើ យើងចាប់ផ្ដើមឡើងជាមួយនឹងព្រះយេស៊ូវគ្រីស្ទ ។ យើងជ្រើសរើសទ្រង់មុនគេក្នុងចំណោមការជម្រើសជាច្រើនរបស់យើង ហើយយើងដាក់ទ្រង់ដំបូងគេនៅក្នុងជម្រើសនីមួយៗដែលយើងធ្វើ ។
ចូរមើលទៅព្រះអង្គសង្គ្រោះ
ក្មួយអាចមានអារម្មណ៍សប្បាយរីករាយ កក់ក្ដៅក្នុងចិត្តរបស់ក្មួយ នៅពេលក្មួយដាក់ព្រះយេស៊ូវគ្រីស្ទនៅចំចំណុចកណ្តាលនៃការរៀនសូត្រនៃដំណឹងល្អ ការបម្រើ សកម្មភាពនានា និងការអភិវឌ្ឍផ្ទាល់ខ្លួន និងពេលក្មួយជ្រើសរើសធ្វើល្អ ។ ការខិតខំរបស់ក្មួយដែលផ្តោតទៅលើព្រះគ្រីស្ទជាចម្បងអាចមានភាពសប្បាយរីករាយ និងមានរង្វាន់នៅពេលដែលក្មួយជួយអ្នកដទៃដោយមានសេចក្ដីអាណិតអាសូរ និងសេចក្ដីស្រឡាញ់ដ៏ពិតប្រាកដ ។
រឿងគួរឲ្យកត់សម្គាល់ជាច្រើនកើតឡើងនៅពេលយុវជន និងយុវនារីស្រឡាញ់ព្រះអម្ចាស់ ហើយធ្វើការបម្រើរួមគ្នាដោយសាមគ្គីភាព និង ភាពសុខដុមរមនា ។ នេះជាការពិតនៅក្នុងថ្នាក់សិក្ខាសាលា សកម្មភាពជាប្រចាំរបស់យុវវ័យ និងនៅ ដ.ក.យ. ។
ដោយមានសេចក្តីស្រឡាញ់ដ៏អស្សកល្ប ព្រះវរបិតាសួគ៌របស់យើងអញ្ជើញយុវនារី និងយុវជនគ្រប់រូបឲ្យ « មករកទ្រង់ ហើយទទួលទាននូវសេចក្ដីល្អសប្បុរសរបស់ទ្រង់ ហើយទ្រង់ពុំបដិសេធអ្នកណាម្នាក់ ដែលមករកទ្រង់ឡើយ » ( នីហ្វៃទី ២ ២៦:៣៣ ) ។
ព្រះវរបិតាសួគ៌ និងព្រះយេស៊ូវគ្រីស្ទស្រឡាញ់ខ្ញុំ ។ ទ្រង់ទាំងទ្វេនឹងជួយ ហើយប្រទានពរដល់ក្មួយឲ្យមានសុភមង្គលដ៏ពិតប្រាកដ ។ សូមជ្រើសរើសព្រះអង្គសង្គ្រោះរបស់យើងមុនគេបង្អស់ ។ សូមទុកចិត្តលើព្រះ ហើយរួបរួមគ្នាតែមួយនៅក្នុងព្រះយេស៊ូវគ្រីស្ទ ជាមួយនឹងអ្នកទាំងឡាយដែលនៅជុំវិញក្មួយ ។ ក្នុងនាមជាកូនជាទីស្រឡាញ់របស់ព្រះ ក្មួយអាចភ្ជាប់ និងចូលរួមចំណែកនៅក្នុងសហគមន៍របស់ពួកបរិសុទ្ធ ដែលជាសាសនាចក្រដែលបានស្ដារឡើងវិញរបស់ទ្រង់ គឺសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ក្មួយជានរណា ហើយនឹងក្មួយកំពុងតែក្លាយជានរណា គឺជាអ្វីដែលត្រូវការនៅក្នុងពិភពលោកសព្វថ្ងៃនេះ ។ អ្វីដែលជាភាពខុសគ្នាដែលក្មួយអាចធ្វើបានក្នុងគ្រួសាររបស់ក្មួយ នៅក្នុងសាសនាចក្រដែលបានស្ដារឡើងវិញរបស់ទ្រង់ និងក្នុងពិភពលោកនេះ ។
នៅក្នុងព្រះយេស៊ូវគ្រីស្ទ រឿងល្អទាំងអស់គឺអាចសម្រេចទៅបាន ។ នៅក្នុងព្រះយេស៊ូវគ្រីស្ទ រឿងពិតទាំងអស់នឹងកើតឡើង ទៅតាមពេលវេលា និងវិធីរបស់ព្រះ ។ ក្នុងនាមជាសាក្សីពិសេសម្នាក់របស់ទ្រង់ ខ្ញុំសូមថ្លែងទីបន្ទាល់ និងសន្យា ។