« ខ្ញុំអាចនៅក្នុងខ្សែបន្ទាត់បាន » ដើម្បីកម្លាំងនៃយុវជន ខែ កញ្ញា ឆ្នាំ ២០២៣ ។
ខ្ញុំអាចនឹងធ្វើ គ្រប់ ទាំងអស់បាន ដោយសារ ព្រះគ្រីស្ទ
យុវវ័យចែកចាយពីរបៀបដែលព្រះគ្រីស្ទបានពង្រឹងដល់ពួកគេឲ្យធ្វើរឿងលំបាកៗទាំងឡាយ ( សូមមើល ភីលីព៤:១៣ ) ។
ខ្ញុំអាចនៅក្នុងខ្សែបន្ទាត់បាន
ចាប់តាំងពីខ្ញុំបានចាប់ផ្តើមរត់ប្រណាំងមក វាគឺជាសុបិនរបស់ខ្ញុំក្នុងការបំបែកកំណត់ត្រាសាលានៅក្នុងការរត់ប្រណាំងចម្ងាយមួយម៉ាយល៍ ។ បន្ទាប់មកពេលដល់ចុងរដូវកាលខ្ញុំបានរត់មួយម៉ាយក្នុងរយៈពេលប្រាំនាទីដោយបំបែកកំណត់ត្រាជិតបីវិនាទី ។
ប៉ុន្តែនៅថ្ងៃបន្ទាប់ យើងបានដឹងថាចំនួនម៉ាយល៍របស់ខ្ញុំមិនបានរាប់បញ្ចូលទេ ។ មន្រ្តីធ្វើការនៅទីនោះបានពន្យល់ថាខ្ញុំបានរត់ចូលបីជំហាននៅក្នុងខ្សែបន្ទាត់មួយទៀត ដែលធ្វើឲ្យខ្ញុំមិនមានលក្ខណៈសម្បត្តិគ្រប់គ្រាន់ក្នុងការប្រកួតនោះទេ ។ គ្រូបង្វឹករបស់ខ្ញុំបានតវ៉ាថា ខ្ញុំបានចេញទៅក្រៅខ្សែដោយសារខ្ញុំត្រូវបានរុញដោយអ្នករត់ប្រណាំងម្នាក់ទៀតប៉ុណ្ណោះ ។ មន្ត្រីនោះបាននិយាយថា« វាប្រហែលជាមិនមែនជាកំហុសរបស់នាងដែលនាងត្រូវបានគេរុញចេញនោះទេ ប៉ុន្តែវាគឺជាកំហុសរបស់នាងដែលនាងនៅជិតខ្សែបន្ទាត់ពេក » ។ ខ្ញុំបានដើរចេញដោយមានអារម្មណ៍ថាសមិទ្ធផលរបស់ខ្ញុំត្រូវបានគេដកហូតពីខ្ញុំទាំងដែលខ្ញុំគ្មានកំហុស ។
ថ្ងៃអាទិត្យក្រោយមកនៅក្នុងថ្នាក់យុវនារី យើងបានមើលវីដេអូមួយដែលប្រៀបធៀបការនៅក្នុងខ្សែបន្ទាត់ទៅនឹងការរក្សាបទបញ្ញាតិ ។១ នៅក្នុងមេរៀននោះខ្ញុំបានអង្គុយនៅទីនោះខឹងទៅនឹងការរំឭកដែលខ្ញុំបានបរាជ័យ ។
នៅថ្ងៃស្អែកឡើងនៅពេលដែលខ្ញុំរត់ជុំវិញគន្លងសម្រាប់រត់នោះ ខ្ញុំបានក្រឡេកមើលចុះ ហើយបានកត់សម្គាល់ឃើញថាខ្ញុំកំពុងរត់ចូលខ្សែបន្ទាត់ខាងក្នុង ។ ហើយយូរៗម្តងខ្ញុំបានរត់ចូលទៅខ្សែខាងក្នុងដូចដែលមន្ត្រីធ្វើការនោះបាននិយាយអ៊ីចឹង ។ ខ្ញុំឈប់រត់ភ្លាម ហើយបន្ទាបខ្លួន ។ ខ្ញុំបានមានភាពសុខស្រួលពេកនៅកន្លែងដែលធ្លាប់រត់ ដែលធ្វើឲ្យខ្ញុំមើលមិនឃើញគ្រោះថ្នាក់ទាល់តែសោះ ។
សំណាងល្អ ពីរបីសប្តាហ៍ក្រោយមកខ្ញុំបានទទួលឱកាសជាលើកទីពីរ ។ ខ្ញុំបានដកខ្លួនពីបន្ទាត់កណ្តាល ហើយបានបំបែកកំណត់ត្រាទត្តពលកម្មសាលាលើកនេះខណៈខ្ញុំនៅក្នុងដែនកំណត់ ។
បទពិសោធន៍នោះបានធ្វើឲ្យខ្ញុំគិតពីកម្រិតដែលខ្ញុំខិតទៅជិតនឹងខ្សែបន្ទាត់នៅពេលខ្ញុំកំពុងរត់ជាមួយនឹងបទបញ្ញត្តិមួយចំនួន ។ ប៉ុន្តែដោយសារព្រះយេស៊ូវគ្រីស្ទ និងដង្វាយធួនរបស់ទ្រង់ ខ្ញុំតែងតែទទួលបានឱកាសមួយទៀតនៅពេលខ្ញុំប្រែចិត្ត ។
នៅពេលនិយាយអំពីរឿងបទបញ្ញត្តិ យើងគួរតែជៀសវាងឲ្យឆ្ងាយពីខ្សែបន្ទាត់ ហើយធ្វើឲ្យបានល្អបំផុតដើម្បីបន្តនៅក្នុងព្រំដែននៃខ្សែបន្ទាត់ ។ ប៉ុន្តែខ្ញុំមានអំណរគុណដែលនៅពេលយើងធ្វើខុស នោះព្រះអង្គសង្គ្រោះអនុញ្ញាតឲ្យយើងប្រែចិត្ត ហើយព្យាយាមម្ដងទៀត ។
រ៉េហ្គិន ភី រដ្ឋ យូថាហ៍ ស.រ.អា.