« វិធី ៤ យ៉ាងដើម្បីពង្រឹងគ្រួសាររបស់អ្នក » ដើម្បីកម្លាំងនៃយុវជន ខែ តុលា ឆ្នាំ ២០២៣ ។
វិធី៤ យ៉ាងដើម្បី ពង្រឹង គ្រួសាររបស់អ្នក
អ្នកអាចពង្រឹងក្រុមគ្រួសាររបស់អ្នកឲ្យរឹងមាំបំផុតតាមដែលអាចធ្វើបាន ដោយការរស់នៅតាមដំណឹងល្អរបស់ព្រះយេស៊ូវគ្រីស្ទ ។
មិនថាគ្រួសាររបស់អ្នករឹងមាំប៉ុនណានោះទេ វាតែងតែត្រូវការកម្លាំងបន្ថែមទៀតជានិច្ច ។ សព្វថ្ងៃនេះ ការវាយប្រហារទៅលើគ្រួសារហាក់ដូចជាកំពុងបន្តកើនឡើង ។ រឿងនេះគឺដោយសារតែសាតាំងដឹងថា ក្រុមគ្រួសារមានសារៈសំខាន់ចំពោះផែនការរបស់ព្រះវរបិតាសួគ៌ ។ ប្រសិនបើមានអ្វីមួយដែលមារសត្រូវអាចធ្វើដើម្បីបង្អាក់ដល់ជីវិតគ្រួសារបាន នោះវាប្រាកដជាព្យាយាមធ្វើ ។
ទោះបីជាគ្មានគ្រួសារណាល្អឥតខ្ចោះក៏ដោយ ក៏គ្រួសាររបស់អ្នកមានអ្វីមួយដែលធ្វើឲ្យរឿងនេះអាចកើតឡើងបាន ហើយគ្មានគ្រួសារណាផ្សេងទៀតមានឡើយ ៖ គឺរូបអ្នក ! ហើយអ្នកមានដំណឹងល្អរបស់ព្រះយេស៊ូវគ្រីស្ទនៅខាងអ្នក ។ ពួកព្យាការី និងពួកសាវកបានបង្រៀនថា « សុភមង្គលនៅក្នុងជីវិតគ្រួសារអាចកើតមានឡើងបាននៅពេលធ្វើតាមការបង្រៀនរបស់ព្រះអម្ចាស់ព្រះយេស៊ូវគ្រីស្ទ » ។១
ទាំងនេះជាវិធីមួយចំនួនដែលដំណឹងល្អរបស់ព្រះអម្ចាស់អាចពង្រឹង និងនាំឲ្យមានសុភមង្គលដល់គ្រួសារអ្នកបាន ៖
-
ក្រុមគ្រួសារអាចផ្សារភ្ជាប់សម្រាប់ភាពអស់កល្បជានិច្ច ។
-
ក្រុមគ្រួសារអាចរីករាយនឹងការចំណាយពេលជាមួយគ្នា ផ្តល់ការបម្រើដល់គ្នាទៅវិញទៅមក និងទទួលអារម្មណ៍នៃការមានចំណែកនៅក្នុងគ្រួសារ និងនៃអត្តសញ្ញាណដ៏ទេវភាព ។
-
ក្រុមគ្រួសារអាចពឹងផ្អែកទៅលើព្រះចេស្ដារបស់ព្រះយេស៊ូវគ្រីស្ទ ដើម្បីដោះស្រាយនូវការយល់ខុស ជម្លោះ និងឧបសគ្គនានាបាន តាមរយៈការប្រែចិត្ត ការអភ័យទោស និងសេចក្ដីជំនឿ ។
ទាំងនេះជាវិធី៤យ៉ាងដែល អ្នក អាចពង្រឹងគ្រួសាររបស់ប្អូនបានតាមរយៈការរស់នៅតាមដំណឹងល្អ ៖
រចនារូបភាពដោយ ឡៃ ធី ស្ស៊ែង
១ លើកទឹកចិត្តឲ្យអធិស្ឋាន
ក្រុមគ្រួសារកាន់តែរឹងមាំជាងមុននៅពេលពួកគេអធិស្ឋានជាមួយគ្នា ។ ការអធិស្ឋានអាចប្រទានពរដល់ក្រុមគ្រួសាររបស់ប្អូននូវភាពសុខសាន្ដ សេចក្តីស្រឡាញ់ និងភាពសុខដុមរមនា ។ ប្រសិនបើការអធិស្ឋានមិនមែនជាទម្លាប់នៅក្នុងគ្រួសាររបស់អ្នកទេ សូមអធិស្ឋានដើម្បីដឹងពីរបៀបដែលអ្នកអាចជួយគ្រួសាររបស់អ្នកឲ្យអធិស្ឋានជាមួយគ្នា ។ សូមត្រៀមខ្លួនដើម្បីធ្វើតាមចម្លើយដែលអ្នកទទួលបាន ។
២ ទៅព្រះវិហារជាមួយគ្នា
នៅព្រះវិហារយើងរៀនអំពីដំណឹងល្អរបស់ព្រះយេស៊ូវគ្រីស្ទ ។ យើងក៏ទទួលទានសាក្រាម៉ង់ ហើយចុះសេចក្ដីសញ្ញាជាមួយព្រះថា យើងព្រមលើកដាក់មកលើខ្លួនយើងនូវព្រះនាមនៃព្រះយេស៊ូវគ្រីស្ទ ហើយចងចាំទ្រង់ជានិច្ច ( សូមមើល ម៉ូសាយ ១៨:៨-១០; គោលលទ្ធិ និង សេចក្តីសញ្ញា ២០:៧៧,៧៩ ) ។
ការចូលរួមនៅព្រះវិហារជាគ្រួសារជួយនាំសមាជិកគ្រួសារទាំងអស់ឲ្យខិតកាន់តែជិតព្រះ ហើយជិតស្និទ្ធនឹងគ្នាទៅវិញទៅមកផងដែរ ។ វាត្រូវការការប្តេជ្ញាចិត្តដើម្បីទៅព្រះវិហារជារៀងរាល់សប្តាហ៍ ប៉ុន្តែព្រះនឹងប្រទានពរដល់ការខិតខំរបស់អ្នក ។ ប្រសិនបើគ្រួសាររបស់អ្នកជ្រើសរើសមិនទៅព្រះវិហារជាមួយអ្នកទេ សូមដឹងថាការចូលរួមរបស់អ្នកនឹងពង្រឹងអ្នក ហើយជួយអ្នកស្វែងរកវិធីផ្សេងទៀតដើម្បីពង្រឹងគ្រួសាររបស់អ្នក ។
៣ សេចក្ដីស្រឡាញ់ និងការបម្រើ
ព្រះអង្គសង្គ្រោះបានបង្រៀន « ស្រឡាញ់ដល់គ្នាទៅវិញទៅមក ដូចជាខ្ញុំបានស្រឡាញ់អ្នករាល់គ្នាដែរ »(យ៉ូហាន ១៥:១២) ។ សូមប្រាប់គ្រួសារអ្នកថា អ្នកស្រឡាញ់ពួកគេប៉ុនណា—ទោះបីអ្នកប្រាកដថាពួកគេបានដឹងហើយក៏ដោយ ។ ការបង្ហាញសេចក្ដីស្រឡាញ់របស់អ្នកចំពោះគ្រួសាររបស់អ្នកតាមរយៈពាក្យសម្ដី និងសកម្មភាព នឹងយាងអញ្ជើញព្រះវិញ្ញាណឲ្យចូលទៅក្នុងផ្ទះរបស់អ្នក ។
ការបម្រើសមាជិកគ្រួសារគឺជាវិធីដ៏សំខាន់មួយដើម្បីបង្ហាញសេចក្ដីស្រឡាញ់របស់អ្នក ។ ហើយការបម្រើអ្នកដទៃជាមួយគ្នាក៏ធ្វើឲ្យគ្រួសាររបស់អ្នកជិតស្និទ្ធនឹងគ្នា ហើយឲ្យខិតកាន់តែជិតព្រះវរបិតាសួគ៌ផងដែរ ។ អ្នកមិនចាំបាច់រៀបចំគម្រោងនៃការបម្រើដ៏ធំមួយនោះទេ ។ ការបម្រើអាចជារឿងសាមញ្ញ ដូចជាការរៀបចំអាហារដែលអ្នកចូលចិត្តសម្រាប់អ្នកជិតខាងជាដើម ។ ការបម្រើជាគ្រួសារនាំមកនូវសេចក្ដីអំណរ ពីព្រោះដូចដែលយើងបានអាននៅក្នុងបទគម្ពីរ « កាលណាអ្នករាល់គ្នានៅក្នុងការបម្រើដល់មនុស្សទូទៅ នោះអ្នករាល់គ្នាគ្រាន់តែនៅក្នុងការបម្រើដល់ព្រះរបស់អ្នកតែប៉ុណ្ណោះ »(ម៉ូសាយ ២:១៧) ។
៤ រស់នៅតាមដំណឹងល្អ
ក្រុមគ្រួសារជាច្រើនមានសមាជិកដែលមិនមែនជាសមាជិកសាសនាចក្រ ឬដែលបានជ្រើសរើសឈប់ទៅព្រះវិហារ ។ ដោយគ្មានការគាំទ្រពីគ្រួសារ វាអាចពិបាកក្នុងការចូលរួមនៅព្រះវិហារ ។ ប្រសិនបើគ្រួសាររបស់ប្អូនស្ថិតក្នុងស្ថានភាពស្រដៀងគ្នានេះ សូមចងចាំថាប្អូននៅតែអាចជាឥទ្ធិពលដ៏វិជ្ជមានមួយដដែល តាមរយៈការរស់នៅតាមដំណឹងល្អ ។
សូមឲ្យគ្រួសាររបស់អ្នកឃើញអ្នករស់នៅតាមអ្វីដែលអ្នកជឿ ។ អ្នកមិនដឹងថាពេលណាពួកគេកំពុងមើលអ្វីដែលអ្នកនិយាយ និងធ្វើនោះទេ ។ ការណ៍នេះនឹងនាំមកនូវពន្លឺនៃដំណឹងល្អទៅដល់គ្រួសាររបស់អ្នក ។ មិនថាស្ថានភាពគ្រួសាររបស់អ្នកយ៉ាងណាទេ ការខិតខំយ៉ាងខ្ជាប់ខ្ជួនរបស់អ្នកដើម្បីរស់នៅតាមដំណឹងល្អ អាចបើកទ្វារឲ្យព្រះវិញ្ញាណដឹកនាំ ជះឥទ្ធិពល និងលើកស្ទួយដល់គ្រួសាររបស់អ្នកបាន ហើយជួយពួកគេឲ្យខិតកាន់តែជិតព្រះអង្គសង្គ្រោះ គឺព្រះយេស៊ូវគ្រីស្ទផងដែរ ។