« ព្យាការីធ្វើតាមព្យាការី » ដើម្បីកម្លាំងនៃយុវជន ខែ កញ្ញា ឆ្នាំ ២០២៣ ។
ការរៀបចំខ្លួនសម្រាប់ សន្និសីទទូទៅ
ព្យាការី ធ្វើតាមព្យាការី
អ្នកណាម្នាក់ក៏អាចទទួលបានពរជ័យតាមរយៈការដើរតាមព្យាការី—សូម្បីតែពួកសាវក ។
យើងត្រូវបានសុំជាបន្តបន្ទាប់ឲ្យធ្វើតាមព្យាការី ។ ប៉ុន្តែអ្នកខ្លះប្រហែលជាឆ្ងល់ថាហេតុអ្វីសំឡេងរបស់ព្យាការីមានសារៈសំខាន់ខ្លាំងក្នុងការធ្វើតាម ។
នៅក្នុងសន្និសីទទូទៅ ខែ មេសាឆ្នាំ ២០១៧ ប្រធាន ថូម៉ាស អេស ម៉នសុន ដែលជាព្យាការីនៅពេលនោះ បានសុំឲ្យសមាជិកសាសនាចក្រ កុំគ្រាន់តែអានឡើយ តែសិក្សាព្រះគម្ពីរមរមនជារៀងរាល់ថ្ងៃ ។ ប្រធាន រ័សុល អិម ណិលសុន និងប្រធាន ហិនរី ប៊ី អាវរិង លោកទាំងពីរបានធ្វើតាមការប្រឹក្សារបស់ព្យាការី ហើយបាននិយាយអំពីអ្វីដែលបានកើតឡើង ។
សាវកដែលស្តាប់បង្គាប់
ប្រធាន ណិលសុន បានមានប្រសាសន៍ថា ៖ « ខ្ញុំបានខិតខំធ្វើតាមការទូន្មាន [ របស់ប្រធានម៉នសុន ] ។ ក្នុងចំណោមរឿងផ្សេងទៀត ខ្ញុំបានធ្វើបញ្ជីថាតើព្រះគម្ពីរមរមន គឺជាអ្វី អ្វីដែលវា អះអាង អ្វីដែលវា បដិសេធ អ្វីដែលវា បំពេញ អ្វីដែលវា បញ្ជាក់ និងអ្វីដែលវា បើកសម្ដែង ។ ដោយពិនិត្យមើលព្រះគម្ពីរមរមនតាមរបៀបនេះ វាបានក្លាយជាការអនុវត្តមួយដែលធ្វើឲ្យយល់ច្បាស់ ហើយបំផុសគំនិត ! ខ្ញុំសូមឲ្យបងប្អូនម្នាក់ៗធ្វើតាមរបៀបនេះ » ។១
ប្រធាន ណិលសុន បានបន្តពន្យល់ថាលោកបានសួរអ្នកដទៃទៀតនូវសំណួរស្រដៀងគ្នានេះ ហើយបានរកឃើញថា មានមនុស្សជាច្រើនទទួលពរជ័យតាមរយៈការធ្វើតាមការប្រឹក្សារបស់ប្រធាន ម៉នសុន ។ ព្រះអម្ចាស់ដឹកនាំយើង ទាំងអស់គ្នា តាមរយៈព្យាការី ព្រះគម្ពីរ និងវិវរណៈផ្ទាល់ខ្លួនរបស់យើង ។
សាវកដ៏ស្មោះត្រង់
ប្រធាន អាវរិង បានមានប្រសាសន៍ថា ៖ « ខ្ញុំបានអានព្រះគម្ពីរមរមនជារៀងរាល់ថ្ងៃអស់រយៈពេលជាង ៥០ ឆ្នាំហើយ ។ ដោយសារខ្ញុំបានធ្វើរឿងនេះ នោះខ្ញុំអាចមានហេតុផលគ្រប់គ្រាន់ថា ប្រសាសន៍របស់ប្រធាន ម៉នសុន គឺសម្រាប់អ្នកដទៃផ្សេងទៀត ។ ប៉ុន្តែដូចបងប្អូនជាច្រើនដែរ ខ្ញុំបានទទួលអារម្មណ៍នៃការលើកទឹកចិត្តពីព្យាការី និងការសន្យារបស់លោកចំពោះខ្ញុំឲ្យខិតខំកាន់តែខ្នះខ្នែងឡើង ។ » ។
ប្រធាន អាវរិង បានបន្តថា ៖ « ការស្តាប់តាមការទូន្មានរបស់ប្រធាន ម៉នសុន មានឥទ្ធិពលពីរដ៏អស្ចារ្យផ្សេងទៀតលើរូបខ្ញុំ ៖ ទីមួយ ព្រះវិញ្ញាណដែលលោកបានសន្យាបានបង្កើតនូវស្មារតីនៃភាពសុទិដ្ឋិនិយមអំពីអ្វីដែលកើតឡើងនាពេលខាងមុខ ទោះបីជាការរំជើបរំជួលក្នុងពិភពលោកនេះហាក់ដូចជាកើនឡើងក្តី ។ ហើយទីពីរ ព្រះអម្ចាស់បានប្រទានដល់ខ្ញុំ—និងបងប្អូន—នូវអារម្មណ៍នៃក្តីស្រឡាញ់របស់ទ្រង់កាន់តែខ្លាំងឡើងចំពោះអស់អ្នកដែលមានទុក្ខព្រួយ » ។២
មនុស្សគ្រប់គ្នា
មនុស្សគ្រប់គ្នាអាច និងគួរធ្វើតាមការប្រឹក្សារបស់ព្យាការីមកពីសន្និសីទទូទៅ ។ មិនថាបងប្អូននៅកន្លែងណាក្នុងការធ្វើដំណើរខាងវិញ្ញាណរបស់បងប្អូននោះទេ បងប្អូនអាចធ្វើឲ្យប្រសើរឡើងជានិច្ច មិនថាបងប្អូនជាសាវក អ្នកប្រែចិត្តជឿថ្មី ឬនៅក្នុងស្ថានភាពបែបណាក៏ដោយ ។ វាមិនបានកាត់បន្ថយតម្រូវការរបស់យើងដើម្បីមានវិវរណៈផ្ទាល់ខ្លួនទេ វាគឺជាវិធីមួយទៀតដែលព្រះអាចប្រទានពរដល់យើងបាន ។ ប្រសិនបើសូម្បីតែសាវកក៏អាចស្វែងរកពរជ័យបន្ថែមតាមវិធីនេះបានដែរ ដូច្នោះយើងទាំងអស់គ្នាក៏អាចធ្វើបានដែរ ។